Jerita Mawar Biak “Ragai Ngerang Pematak Bala Mansang”

Jerita Mawar Biak “Ragai Ngerang Pematak Bala Mansang”

Nyadi pun jerita Mawar II tauka Mawar Biak tu bakatu. Nyadi Mawar Biak tu anak Gendup seduai Ujor (f), uchu Mawar Tuai ti bebini ngambi Rabai. Apin indai iya Ujor jadi enggau Gendup, iya belaki menyadi Gendup ti benama Chella. Leboh iya begulai diri melaki bini enggau Chella, iya lalu ngandong ka Rinya (f). Leboh iya baru ngandong ka Rinya, enda mukai-mukai Chella parai sakit. Leboh Chella udah parai, nya baru menyadi iya Gendup diasoh jadi enggau Ujor nganti niang Chella ka laki Ujor. Gendup pan deka laban nitih ka ator sida apai indai iya. Nyadi pengawa tu tadi dikumbai kitai Iban “Nyerambong Kandong”. Udah beranak ka Rinya, nya baru Gendup seduai Ujor beranak ka Mawar Biak, Melling, Eddie enggau Rantie. Sida empat ke dudi tu endang anak Gendup seduai Ujor bendar.

Nyadi Rabai (f) anak Rambok seduai Beda datai ari Bangat. Nyau kelama sida udah nguan menoa Bangat sida pindah lalu pulai ka Saka, lalu diau di Ulu Entanak ba Tembawai ti dikumbai “Bebandong”. Kebuah alai tembawai nya di kumbai Tembawai Bebandong, laban rumah panjai sida ti diau dia menya dua bebandong, tauka bebandong dua. Bisi ga orang ngumbai tembawai nya “Tembawai Tandok”, laban leboh sida ke diau dia menya Mawar Biak bulih tandok ke ngasoh iya tau serang. Kenu ko jako tuai, bulih sedaun idas tandok enggau pengaruh puchong retak saribu diberi amtu mgagai Mawar Biak. Semua pengaruh tu diberi sabengkah ari bansa Antu Gerasi ti dikumbai Bunsu Bugo. Nambah ka semua pengaruh nya tadi Mawar Biak endang bisi betua’ ka Ular Sawa ti nulong iya dalam samoa pengawa ngayau mulau. Be-pun ari semua tu tadi, nya ti ngasoh Mawar Biak tau serang, tau pandang, tau mulau, tau ngayau.

Ari rumah nya Mawar Biak bedudok nyerang munsoh. Lalu ari iring iya ke tau serang, iya lalu niri ka Gawai Sandong Betong, ba rumah nya. Kurang lebih sataun udah lempus Gawai, dia Mawar Biak lalu mai bala anembiak iya pindah ngili Sungai Entanak, serta lalu berumah ba Tembawai Kara. Ditu sida diau enda bangat lama ka semina dua taun aja. Udah nya iya mai anembiak iya pindah baru lalu pulai ka Beran. Serta udah tembu rumah sida dia lalu pendiau sida pan udah ga entap, nya baru Mawar Biak mai bala manok sabong iya ngayau bansa Daya Remun di Bukit Lebor, Ulu Gedong, pati Batang Sadong. Leboh serang tu, bansa Daya Remun lalu alah ditachah ka sida. Dengah maioh bendar ulih sida, lalu pia mega prapasan baka tajau, guong serta macham utai bukai ulih bala anembiak iya. Utai ti nyelai ulih sida leboh serang tu iya nya ketebong temaga bansa Daya Remun. Nyadi ketebung temaga tu pulai ngagai Mawar Biak empu. Tang enda mukai-mukai, leboh sida ke berumah di Beran, Layar, rumah Mawar Biak angus lalu semua reta tengkira ke ulih iya abis retung dibai rumah angus empa api.

Dudi agi ari nya, sabedau rumah angus, bisi kaban sida Daya Remun betemu enggau bala sida Mawar Biak nanya ka penunga Ketebong Temaga nya ngagai sida. Nyadi Ketebung Temaga nya, nitih ka padah sida Daya Remun nya, tau ka ubat penyelap rumah.

Serta udah angus rumah nya, sida lalu bedampa kena ngibun taun. Nyau maia udah badu ngetau, nya baru Mawar Biak mai bala anembiak iya pindah ka Ulu Pasa semak antara enggau Batang Paku. Sida ke pindah endang ensurok kampong puang laban menoa tu endang apin bisi orang nguan. Leboh sida datai dia, sida enda lalu berumah terus, semina bedampa dulu tiga taun. Lepas tiga taun udah nya sida pindah baru ari nya lalu berumah ba tanah ke dikumbai Wong Pelangka, tang sida enda lama diau ditu. Mawar Biak mai anembiak iya pindah baru ari nya ngagai Ulu Sungai Serudit, dalam pati Sungai Paku. Di Ulu Sungai Serudit, sida ngaga rumah besai laban menua nya ditemu sida nadai penyiga laban ke semak pendiau enggau bala kaban indai iya ari Paku (baka sida Busu apai Uyut “Bedilang Besi” tuai orang Paku Ulu maia nya menya). Kira dua taun sida udah diau dia, Mawar Biak lalu niri ka Gawai Sandong tauka Gawai Burong baru. Datai ka kamaia hari tu tembawai nya dikumbai “Tembawai Diri”.

Nyadi ba maia daun gawai tu, leboh maia pengabang pansut ka tanju, dia sida ngasoh matak Eddie, adi Mawar Biak, dudok ba pun sabang. Tang Eddie enggai lalu ringat ngagai orang ti ngasoh iya dudok ba pun sabang nya. Laban ti kelalu ringat, iya lalu matak generang siti serta lalu dientun iya. Generang nya lalu kena tajau lama sigi ke dikena nyimpan tuak gawai Mawar Biak. Nyadi tajau tuak tu endang tajau pesaka lama sida Mawar Biak. Tajau nya lalu pechah dua. Meda tajau iya pechah, Mawar Biak ringat bendar, serta angkat lalu ngiring Eddie ba moa pengabang maioh ba daun gawai lalu madah ngagai bala pengabang maioh, Eddie nya terus nyadi ulun iya, datai ka rega tajau nya dibayar iya. Berengkah ari nya Eddie tu tadi lalu nyadi ulun Mawar Biak. Gawai leboh tu pengawa gawai balat bendar tebelenga laban pengawa Mawar Biak ti ngiring Eddie jadi ka ulun iya.

Nyau kelama sida udah diau di Ulu Sungai Serudit, nya baru Mawar Biak mai bala anembiak iya pindah ari nya lalu berumah di Tanjong Melanyut, tebing Sungai Paku. Nyadi menyadi iya Eddie seduai Ranti enda nitih ka Mawar Biak agi. Seduai iya lalu pindah ka Rimbas, tang Eddie agi dikumbai ulun laban tajau Mawar Biak lalu apin dibayar iya rega. Di Rimbas, Eddie lalu nyadi manang. Datai ka saharitu maioh bendar uchu-ambu peturun Eddie nyadi manang baka iya.

Nyadi Melling, menyadi Mawar Biak, nikal baru ka Layar, lalu jadi enggau indu siko benama Icha lalu beranak ka Gelingie (f), Ulok, Naja (f), Liping (f) enggau Anchang. Melling bebini tiga kali. Udah jadi enggau Icha, iya lalu bebini baru jadi enggau indu siko ti benama Ikal lalu beranak ka anak indu siko ti benama Lintu. Ketiga kali iya bebini, iya jadi enggau Rabia lalu beranak ka Sabai, Idai, Asu enggau Sandu (f). Uchu ambu peturun Melling maioh bendar lalu bisi ditemu diau ngachir sabelah menoa Sarawak tu baka di Layar, Paku enggau Rimbas. Sakeda sida bisi ditemu pindah ka Malang dalam menoa pegai Miri.

Nyadi Mawar Biak jadi enggau indu siko ti benama Lena lalu beranak ka Gallau seduai Sulan (f). Gallau bebini ngambi indu ti benama Chandu ke datai ari Seremat di Batang Ai. Nyadi Chandu tu anak Salengka, siko tuai Iban ke tau Serang dalam Batang Ai maia nya menya. Gallau seduai Chandu lalu beranak ka Imban, Ladang (f) enggau Jugan.

Nya alai baka nya meh pemechah pendiau sida Mawar Biak diri menyadi. Mawar Biak empu lalu mai bala iya pindah ari Tanjong Melanyut ngili Sungai Paku lalu diau ba endor ke dikumbai Pengaan. Tiga taun sida udah diau dia, Mawar Biak lalu mai bala anembiak iya pindah pulai baru ngagai menoa lama sida iya di Sungai Entanak. Dua tiga taun udah diau dia, sida lalu pindah baru lalu berumah di Beran, Tusor Layar.

Kira dua taun sida udah diau di Beran, nya baru Mawar Biak matak kayau ari pinta kaban iya ari Bangat. Nyadi Mawar Biak tu endang enda ati matak kayau agi udah bekau ke pechah pendiau enggau bala menyadi iya ke endang teleba nyadi ka manok sabong iya enti iya nurun ngayau. Tang laban ka sekali tu, bala kaban iya ari Bangat minta ulu ka iya ngayau laban sida deka betuai ka iya laban iya endang tuai ke tau serang. Ari nya tadi, Mawar Biak madah ka diri setuju ngulu ka sida ngayau bansa Skan dalam menoa pegai Mukah serta enggau nyerang menoa Melanau Segalang.

Sida lalu baum nyendia ka diri deka ngayau. Lepas nya bala manok sabong Mawar Biak serta enggau anembiak bukai lalu berebgkah begiga ka kayu ti manah digaga ka perau pengayau. Udah tembu betebang ka kayu, nya baru sida berengkah beban. Nambah ka nya sida endang selalu ngintai mimpi tau ka burong ti manah kenyau ari sida ke begiga ka kayu enggau sekumbang sida ke beban perau. Kebuah pia laban pengawa ngayau mulau tu endang bepangai ba burong enggau mimpi ti manah. Enti mimpi enggau burong enda manag, suah agi sida enda nyadi nurun ngayau mulau. Reti burong ba bala pengayau tu pesan Petara, lalu sida enda tau ngelaban jako Petara.

Serta udah tembu beban sida lalu madah ngagai Mawar Biak. Mawar Biak lalu ngasoh bala pengayau enggau bala manok sabong iya nyikap diri serta lalu nimpoh sida nurun ba belah dua bulan baru nya ila. Leboh ke nyikap diri sida iya nyendia ka perengka kayau baka senjata nyabur, illang, sangkoh, terabai, sumpit, laja serta enggau bekal ka dikena sida. Nyau datai ba geran semaia sida ke patut nurun, sida mupok undor ngili Batang Layar lalu beranti di Nanga Kalaka.

Leboh semua bala pengayau bela udah sampal datai, sida lalu mudik Batang Kalaka lalu tama Sungai Seblak. Enda jauh ari Ulu Nanga Seblak dia semua bala lalu ngetu serta bemalam dia. Ari nya Mawar Biak lalu ngasoh bala tiga iko nyengkaum menantu iya ke benama Ambas ngabas penyauh nengeri Sesang ari nya. Udah nya sida tiga lalu angkat bejalai begadai-gadai ngabas nengeri Sesang.

Datai sida di Sesang ke enda bangat jauh ari sida ke nganti, sida tiga lalu beserara enggau pangan diri. Api bangat lama sida udah beserara enggau pangan diri, dia deh Ambas lalu betemu enggau Gundit Menteri Assan mansang minching sangkoh serta betudong kain limar. Dia Ambas tak enda chechamang lalu mantap Gundit Menteri Assan ke lalu terus mati dia. Pala lalu di pumpong serta lalu ditaban ka iya pulai.

Ambas endang enda madah ka diri udah bedengah serta udah bulih pala sigi ngagai seduai ke enggau iya. Sida tiga lalu beguai-guai pulai ngagai tugong bala. Datai dia Ambas lalu nyua ka pala ngagai mentua iya. Meda diri udah bulih pala, dia Mawar Biak lalu enda ngasoh sida majak ka pejalai agi lalu madah ka diri enda manah mimpi. Tang iya lalu bedau madah ngagai bala iya udah bulih pala sigi. Iya mega nemu kayau sida udah regu laban munsoh tentu udah ngadang.

Udah nya bala sida lalu bebai nikal pulai ka menua baru. Leboh sida benong mudik Batang Layar, nya baru Mawar Biak madah ka diri udah bulih dengah sigi, ti ulih menantu iya Ambas. Bala maioh ringat bendar ngagai Mawar Biak, ringat ka penyai akal iya enggau anembiak iya.

Nyau ka dua taun lepas nya, Mawar Biak lalu mai orang ngayau baru ngalah ka Melanau Segalang enggau Skan dalam kandang menoa Mukah. Ninga rita tu, nyau berebut bala deka enggau ngayau. Manok sabong iya ti betu berani sigi nadai ingat ka pemarai, laban julok ati sida endang ngambu diri bedengah. Nyau maia timpoh ti deka nurun datai, suda lalu undur ngili Batang Layar, mansa Nanga Kalaka lalu terus nuju Mukah. Dalam kayau tu, Skam abis alah laban sida. Sida bulih bendar prapasan serta enggau pala. Semua sida pulai gerai lalu nadai bulih penusah ba menua munsuh.

Nyadi siti, udah sida ngalah ka Skan, dia deh Mawar Biak empu bisi mimpi. Ari mimpi iya tu, dia iya nemu diri deka mati laban tua iya di rumah din udah kena bunuh orang. Nya alai Mawar Biak lalu madah ka mimpi diri ngagai orang maioh lalu pia mega ngagai bala manok sabong iya ti sama enggau iya ngayau.

Ko iya “Aku parai, enda datai di menua kitai empu. Nya alai bangkai aku anang ninggal, tang bai kita pulai serta lalu dikubur ka di menua kitai empu.”

“Kati alai nuan tak munyi nya deh bapa?” ko bala maioh.

“Eh, laban utai aku din udah dibunoh orang,” ko iya nyaut sida.

Ninga jako Tuai sida iya munyi nya, sida lalu bekayuh beruntu serta beguai-guai ninggal ka menua Skan mai iya pulai ngagai menua sida di Batang Layar. Leboh sida agi di rantu jalai, Mawar Biak mati. Bangkai iya lalu dibai sida pulai nyentuk ka sida datai di rumah. Bangkai iya lalu dikubur ka sida di pendam Saka.

Nyadi Mawar Biak tu, laban iya berani lalu tau serang, nya alai iya bensumbar “Ragai Ngerang”.

Nyadi kebuah iya mati bakatu:
Tinggal sida ke ngayau bansa Melanau Segalang di Skan dalam menua Mukah, kira leboh sida bamok serta betachah pagi nya, bisi indu siko ti benama Injau ke tinggal di menua, bisi meri babi sida iya makai pagi nya. Leboh iya nelentang ka dulang dikena babi makai, dia iya tekenyit bendar meda ular sawa siko baruh dulang nya. Laban ti tekenyit bendar, dia iya enda bapai enda beindai, lalu ngambi kayu ti lalu dipalu iya ngagai ular sawa nya. Ular sawa nya pan lalu mati dia. Nyadi ular sawa tu endang nyadi ka tua’ Mawar Biak. Injau ti malu ular sawa nya enda nemu nya tua’ Mawar Biak. Laban tua’ iya udah mati, Mawar Biak empu pan sama mati, laban endang udah disumpah Petara ti nulong Mawar Biak.

Nya naka lansa jerita siko tuai Iban ti benama Mawar Biak ke bensumbar “Ragai Ngerang Pematak Bala Mansang”.