Jerita Kebing Mata Juling Renggat Kedua

Jerita Kebing Mata Juling Renggat Kedua.

Laban tudah ia juling diak tudah Kebing dasuh bala sebayan ngeluan perau alu sida sebayan ngasuh Impun ngemudi perau alu sida sebayan ka nyerang bala panglima munsuh ti ngaga langkau ba Nanga Saribas.Maianya endang malam amai ari alu sida meda kem langkau bala munsuh sigi terang amai laban unggun pedilang ditungkun naka pemau mau nya ba Nanga Saribas.Bekayuh belubah tudah Impun diak Impun meda bala sebayan tak tuchum tuchum aja ngimbai nisi perau ia.Maioh bala sebayan peda Impun,tak mudik ari ulu sida lemai tadi enyau majak nambah maioh semengat antu sebayan.Amai gelesi ati tudah Impun meda antu sebayan baka kemayang aja nerebai diri.Diak Impun ninga orang richah aja belah tebing diak ia meda bala panglima udah nyikap diri nganti penatai tudah Impun ti kediri bekayuh.Diak meh bala munsuh tachuh madah bisi bansa dayak ngayau ko sida ia laban tudah Impun sigi nungkun api ba luan perau laban kena ia nerang diri laban ke takut ditundi antu sebayan.Nyadi tudah Kebing enda memunyi aja ba luan alu sida sebayan madah sida ia senurut jako Kebing aja.Enti serang ko Kebing alu serang meh dah nya mega.Datai sida ka damping kem langkau munsuh diak Kebing alu angkat ari luan perau alu ngangkat jari.Diak bala munsuh alu ketawa lelekai alu ngemelik ke saduai ia baka paong empa jani.Meda bakanya diak Kebing lama ngangkat ke jari alu seretai Kebing enchelak ke mata ia juling diak Kebing alu bejako baka serut baka ribut diak ia alu nyebut besai.Seretai Kebing ngambis leka jako nya diak naka pemaioh nya semengat bala antu sebayan nujo bala munsuh bala ribut baka ujan,mansa api unggun ambis meh padam mansa langkau ambis betekeladan,maia nya tudah Impun nyangkai ke perau ke tebing diak Impun meda amai bala semengat sebayan ngambis ke munsuh baka asap,pantap bala munsuh tubuh semengat tang nya angin alu enda berasai pala munsuh tekepak aja labuh.Ni ia ke ulih lari ambis dibunuh bala semengat ke bukai ti benung nganti ba paya alai.Ni ia tama dalam tanah paya meh kaduak alu parai lemas meh kaduak munsuh.Maia nya nyampau amai munsuh keno ke jerita orang tuai nusi.Maioh munsuh maianya.Ia ke bisi ilmu tadi alu nguji meh penemu sida ba penatai semengat sebayan ke maioh nya.Bisi ga bala semengat sebayan nya alu lesi alu lesap tauka alah ia tang laban ke semengat sebayan nya naka pemaioh enyau tekepai aja belah langit dipeda ari panchar bulan kembong,pemaioh semengat sebayan ti udah dimangun tudah Kebing naka penyampau nya.Ba kenang orang tuai menya,Kebing ķtu bisi mata sebayan nya kabuah ia juling alu ia ulih ngangau ke orang sebayan enti ia ulih ngaga ritual baka dipadah apai tuai nya.Nyadi ritual tu agi bedau mengkang disimpan bala tuai tuai iban ba endur enda tau dipadah ba dini mina bala kami aja ulih nemu ba dini nya.Utai tu enda dimangun ngapa laban utai tu ulih nyarut ke menua enti dimangun baru.Alu enggai mangun ia laban nadai ditemu agi bakani nawar ngemulai semengat sebayan nya pulai agai sebayan laban sampi pulai semengat udah enda ingat ditulis niang Mary Tingom suba.

Maianya bulan terang amai sereta kembong diak tudah Impun meda amai bala munsuh maioh parai belah nanga Saribas maianya.Tang penyelai pemarai orang nya,nadai dipeda agi tubub sida ia alu ambis dangkut bala semengat sebayan pulai ke sebayan laban nya dipeda sida utai kelauk sida ia ba menua tengah menua sebayan din.Pelaba aku mina bala lemambang tuai kelia nemu agi reti utai tu angka sida ia kala ditusi dilansa jerita Mangun Semengat Orang Sebayan.Ritual tu udah punas laban nadai agi orang ka nguna penemu tu agi laban ngenangi umur diri pandak tauka enda gayu sereta ngenangi nadai purih pantih.Orang ngembuan penemu tu ia ka punas nadai purih.Ambi ke chunto tudah Impun ti berajar ba Kebing pengudah sida ia bekayau ba Nanga Saribas maianya.Pama ga sida munsuh bisa penemu sida ia tang nadai siku ulih ngalah ke penemu tudah Kebing maianya.Kebing tu meh ba renggat ke lima purih ti tau mangun semengat alu tudah Impun ba ke enma alu ia ketujuh pengambis kitai iban tau mangun semengat ba mensia benama Nyanggun.Pulai agai jerita Kebing tadi,enyau dinihari diak kem langkau bala munsuh enyau puang nadai tubuh munsuh dipeda diak bala semengat sebayan naka pengaga kenyang makai tubuh mensia.Diak sida manjung madah diri menang alu mupuk meh bala sebayan pulai nitih dini alai sida terpanggai ba tengah menua sebayan.Diak malik Tuai Sebayan alu tuchum agai Kebing alu ia bejako madah ke Kebing bisi menujuh kali mensia bumai betaun diak ia ka ngambi Kebing nganti ia ba tengah menua sebayan laban ia ka nuju sebayan pemetang pengudah nya ila ko ia madah ke Kebing.Seretai tembu bejako alu lesap meh bala semengat sebayan ari dipeda mata.Tudah Impun enda memunyi alu sida sabuat alu pulai ke Saribas alu mindah ari menua Saribas nuju Batang Skrang.Pengudahnya diak sida sabuat alu mupuk meh mindah kin kia tang tudah Impun semampai enggau Kebing ngejung maia atai tujuh taun dahnya Kebing dibai petara pulai nitih ke pesau Tuai Sebayan Tengah Menua Sebayan suba diak Impun meh ngempu penemu tudah Kebing.Impun pindah agai menua Batang Lemanak alu diau kediri ba din maianya.Lebuh James Brooke menjajah menua Sarawak tudah Impun udah tuai amai maianya mina tudah Nyanggun aja ke bedau nampung penemu ia tang tudah Nyanggun enggai agi segulai enggau mensia pengudah ia dikerakal bansa diri enyau ngemai ia bekayau ke bansa diri ngejung Nyanggun lesap nadai temu berita nyentuk kediato.Tang bisi orang nemu tudah Nyanggun udah dibai petara pulai mega maia taun 1920an.Ia parai ba Nanga Balleh,Kapit.Kubur tudah Nyanggun tu aku enda ingat ba dini bala ia engkah suba.Bala ia kala mindah kabukai pengudah Nyanggun tu dibai petara pulai.Pengambis jeman mangun semengat ba penemu lama bansa kitai iban.Maioh bala ke ngelala tudah Nyanggun tu enda nemu tudah Nyanggun tu nemu mangun semengat.Kala niang aki aku nanya bala purih ia suba.Sida madah enda nemu aki kami nya bakanya ko sida ia.Ambis jerita kitai ke malam tu madi.