Balang ke Besumbar Balai

Balang ke Besumbar Balai

Jerita tu ngenang pasal siku orang kelia ke benama Balang. Nama juluk iya tu Balai Nyabung. Selangkuh tubuh iya tegap, besai tinggi sereta kering. Iya berani sereta tau engkeramat lalu tau ngemedung. Iya ti ngemedung nya nyempilup nengah bukit ti dikumbai Bukit Panggau Dulang di ulu Sungai Bangkit dalam menua Katibas.

Kenu ku cherita bisi siku agi orang bujang ti sigat sereta kering maya nya ke benama Bulik. Iya tu lama belelang ngiga indu ke bisi benama Pok ke bini iya. Nyau kepuas ti belelang nyerangkap sekayu menua Batang Kanyau, nya baru iya tetemuka indu dara ke benama Pok.

Pok tu indu ti pemadu bajik dikelandik baruh hari. Iya mega udu pemurak; keba sema jaku kelangkung orang, tak ngenying senayau baruh dagu lebuh iya nelan pinang. Kuyu enggi iya nyau jejepu baka telu manuk dikupak. Idung manchung, anak mata iya deka bebiru ke lalu diumba enggau lentik bulu mata. Mulut iya baka cheriak kerupak bunga. Nya alai laban gamal ti ngemajik nya iya nya nyau baka tapang bisi rembia, baka lubuk ke diuan baya. Iya diinang sereta dikemataka Sempiang Padi ke suah mega dikumbai Kemping Padi. Nyadi Semping Padi tu menyadi Keling Gerasi Nading, Bujang Berani Kempang.

Lebuh Bulik jadi enggau Pok, sida tu agi mengkang nguan endur ti dikumbai Emperan Kawat di Batang Kanyau. Nya alai kira bisi sepiak bulan, Bulik seduai Pok udah jadi melaki-bini dia bisi utai nyelai nyadi. Bisi sekali malam siti lebuh Bulik agi mengkang duduk di pantar, dia iya bisi tepedaka daun pintu sida tekebak. Baka ti bisi kenaya orang tama tang nadai mega nyengala dipeda batang tubuh. Pekara ti bansa nya bisi nyadi dalam kandang tujuh malam beturut-turut. Nya alai ati Bulik lalu bisi sangka ke oraang bisi ngayap bini iya. Iya lalu nguji nengkilunka orang nya. Suah endar iya beturut malam ngipa, ngintai orang nya tang lalu enda ga kala besatup.

Nyau kepuas, nya baru Bulik pan lalu bisi mimpi. Dalam mimpi iya, Bulik asai ke bisi betemu enggau orang bujang siku. Orang nya besai tinggi sereta sigat lalu berupai kering. Lelaki nya pan lalu bejaku, “Puas aku udah meda nuan deka ngipa, ngintaika penatai aku, tang diipa nuan pan enda mih nuan tepedaka aku; laban aku tu Sempiang Padi. Pok nya bini tua lalu anak ti dikandungka iya nya ila mega endang anak tua sama. Anak tua nya ila lelaki lalu digagaka nuan nama Balang bejuluk Balai Nyabung. Anak ti kedua ila deka indu, nya pan anak tua mega lalu tau diberi nama Charang. Seduai menyadi nya ila, anang diserara,” pia ku padah enggau jaku ajar Sempiang Padi ngagai Bulik. Udah nya iya pan lesap, Bulik pan lalu tedani.

Nya alai nyau datai maya chukup bulan, Pok pan beranak. Iya amat ngadaka anak lelaki. Meda anak nya amat lelaki ari nya Bulik lalu arapka mimpi iya nya. Anak iya nya pan lalu diberi nama Balang ke bejuluk Balai Nyabung nundaka ajar Sempiang Padi dalam mimpi Bulik. Baka nya mega anak iya ti kedua amat indu, nya alai lalu digagaka nama Charang.

Lebuh Balang nyau udah besai, dia iya suah dibai apai indai iya pindah endur pendiau. Kepuas ti suah pindah, nya baru sida Balang sebilik enggau sida serumah ke bukai lalu ngentapka pendiau ba Nanga Ririk lalu ke penudi bendar nya ba Nanga Ngemah pati Batang Rajang.

Nyadi Balang tu mayuh ngereja pengawa ajih tang utai ti agi mengkang nyata tau dipeda kemaya hari tu iya nya bisi embawang sepun ti dikumbai Kerangan Pulai Hari. Buah embawang nya enti iya labuh ke ai melepung tang enti labuh di tebing lalu udah nya bebaring ke ai dia iya deka tenggelam. Nambahka nya, Balang mega bisi nanam sepun buluh.

Balang dikumbai tau engkeramat laban bisi sekali indai iya ngasuh iya minta buah pinang ngagai rumah orang ti ari seberai rumah panjai sida. Maya nya rumah orang nya benung begawai. Nya alai lebuh Balang datai ba pendai, dia iya nadai perau dikena ngelayang ke seberai laban udah dikena orang mansang ngabang. Betul bendar maya nya mega, menyadi iya Charang ngeringak masu tikai pandan. Balang pan lalu ngerampas tikai pandan nya. Tikai nya lalu dikena iya merau ngelayang ke seberai. Sekeda ari pengabang ti bisi tepedaka ulah Balang nya lalu nusi ngagai pengabang bukai.

Lebuh Balang ngemedungka Panggau Libau, dia iya bisi diberi apai iya sebilah ilang enggau terabai siti. Terabai iya nya tau mansang panjai sejengkal, tau mega mansang besai setempap lalu tau mega betambah tebal setunjuk enti disebutka leka jaku ngayau tauka nyerang. Kelimpah ari nya, Balang mega bisi ngembuan pengaruh ti ngasuh iya kebal enda masuk besi enggau peluru.

Nyadi sekali Balang deka nirika gawai Besai dikena iya begawaika pengaruh iya nya. Nya alai iya lalu ngempuruka sida serumah. Iya madahka diri ti deka nirika gawai besai. Dikena nirika gawai nya, dia iya madahka diri deka munuh babi belang tujuh iku enggau manuk labang tujuh iku.Dikena makai selamat madahka sida ari Panggau Libau ngabang
Picture
Ninga nya dia bisi siku orang ke benama Unggat laban ke endang bebulu ati ke Balang lalu beguai-guai ke Sibu madah ngagai Tuan Residen. “Balang deka nirika gawai besai ti alai iya deka munuh babi putih reti nya Tuan Rajah Charles Brooke enggau manuk putih iya nya Tuan Residen di Rejang ianya J.B Cruickshank, laban nya ke diasuh orang ari Panggau,” pia ku Unggat. Ari petenah tu, dia deh orang putih kelia ngumbai babi belang tu bansa orang putih ( Mr. Anthony Richard(1988) An Iban-English Dictionary)

Ninga berita nya, dia Tuan Residen lalu ngasuh orang kubu madahka berita nya ngagai Tuan Charles Brooke. Sereta nerima berita nya, Rajah Charles Brooke pan lalu begaut mudik Batang Rajang napatka rumah panjai sida Balang di Nanga Ngemah. Lebuh datai din, bala raja madahka diri ngambi Balang baum ke Kuching. Ninga nya raja ti ngambi baum, Balang pan nadai betangguh mega lalu nurun ke kapal. Bala Balang enggau sida sebilik pan nadai mega nyempulang iya.

Lebuh datai di kapal, baru Balang nemu diri diakal orang. Laban sereta iya ngindikka kaki iya ba kapal iya lalu diberekas orang. Iya lalu diikatka ba tiang kapal. Iya lalu dipantap tang iya enda masuk. Udah nya iya direjang orang ngena sangkuh pan enda ga masuk. Meda iya enda masuk besi, dia raja lalu ngasuh orang nimbak iya. Ditimbak enggai mega senapang meletup. Nyadi sekumbang orang ti merinsaka Balang baka nya, dia siku burung ketupung siku ular tedung enggau siku ular kendawang semampai bisi ngimbai Balang. Kenu ku jerita tusui sida ke tuai tujuh kali mati, tujuh kali idup enda meh balang ulih bunuh sida laban ular tedung, ular kendawang serta burung ketupung sesuran ngidup ke Balang belama.
Picture
Ensepi diri udu bendar diperinsaka orang asai nya lalu meda raja menga enda beampun-ampun nya baru Balang ngeluaka pengaruh ti dikulum iya lalu ngasuh orang muka rajut enggau ilang ti ditangkin iya. Balang mega ngasuh sida nampal bubun aji iya enggau tanah kuning laban nya aja baru ulih ngasuh iya mati, laban sigi udah sumpah sida ari Panggau Libau. Udah nya baru iya Abang Talip nampal lubang aji Balang ngena tanah kuning. Lesi meh Balang ngelanggah hari, parai meh tudah tuai ngelanggah lemai, danjan ngilah bulan, mabun ngelanggah taun 1868.

Sebedau iya ngapuska seput, dia iya minta duku ilang iya dianjungka menua ngambika bini anak, bala apai indai enggau kaban belayan iya nemu iya udah nadai agi idup.

Endur rumah panjai sida Balang lebuh iya ke ditangkap Rajah tu suba iya nya antara Nanga Ngemah enggau Ensengai ari Ulu pasar Kanowit di Batang Rajang ke diatu. Diatu tembawai Balang tu udah nyadi pulau pendam. Ba tembawai Balang tauka Pulau Pendam tu orang ke bidik lansik ke mansa endurnya kala meda Batu Bedilang niang Balang.

Ba kitai Iban, Balang tu kena bunuh Rajah endang ketegal ari jaku petenah ti digaga Unggat ke pedis ati ketegal Bini iya ke madah diri bisi mimpi diasuh antu butang enggau Balang. Bisi mega jerita tusui sida ke tuai, madah lebuh ke diambi sedadu Charles Brooke ngena Kapal Zahora, Balang bisi diuji sida, diasuh sedadu Rajah tama lubang sumpit. Ketegal iya ke ulih tama lubang sumpit nya meh Charles Brooke bisi endar ati deka munuh Balang laban kenu ku penemu iya Balang nya ukai mensia tang meh antu lalu sigi enda patut diasuh idup lama enggaika ngalah iya nyadi Raja Iban.

Gambar Balang ke besumbar Balai Nyabong enggau menyadi iya ke benama Ranggau ti digaga ari engkeraju ke begambar ngena pekayan ngepan Iban bisi ba Tugu Pengingat Rajah Charles Brooke di Pengkalan Batu (Waterfront) Kuching datai ke sehari tu.