ENSERA "ADI PAU"

ENSERA "ADI PAU"

MANSAI DANAU LALAI

Nyadi Indai Pau endang tuai indu orang di Gelong Batu Nakong lalu semoa pengawa ke benama agi ti dikerja indu sida serumah nya baka makan neladan, ngembun narum, ngikat ngebat endang bedudok ari iya magang. Maku nubu, mansai nubai pan iya nya mega ngulu ka indu sida serumah nya.

Lemai siti dia Indai Pau lalu ngempuru ka samoa indu sida serumah nya. Iya ngasoh bala anembiak bejalai begerah lalu tama nyelinting setiap pintu. Nya alai bejalai ga meh sida ke biak tu tadi ga udah diasoh iya begerah. “Oi ibu ! Oi ini ! Indai Pau mai kita begempuru ngagai bilik iya lemai tu,” ko sida. Leboh bala indu sida sarumah nya sama bela udah datai magang, dia Kumang seduai Lulong lalu nudok ka diri ngimbai Indai Pau. Kumang ari kanan, lalu Lulong ari kiba iya. Nya alai Lulong lalu bejako. “Baka nya ko tu ibu Indai Pau. Kitai serumah tu tak bela udah datai magang peda aku. Nya alai gamal sida tak nyau tetengok deka ninga ka berita lalu mending ka kebuah kitai begempuru lemai tu,” pia ko Lulong.

Apin Indai Pau sempat nyaut dia dulu Kumang bejako. “Ia ga amat munyi ko Wai Lulong nya tadi ibu, baka kitai ditu amat lama ga udah berandau, lalu ke udah tu tadi agi jako bukai. Tang kebuah kitai begempuru tu lalu apin disebut. Nya alai nya ngetu dulu kitai maioh tu randau bukai, awak ka ibu Indai Pau nusoi berita iya,” ko Kumang. Indai Pau lalu bejako. “Ukai nama agi mih endu, baka kita ke nanya ka berita. Ia ga endang ke baka kitai. Nya alai baka tu ko kebuah alai aku ngempuru ka kitai lemai tu. Aku meda kitai ;

Lama udah enda ngerugoh danau taroh, Lama udah enda mansai danau lalai, Lama udah enda nyagam danau simpan. Nya alai aku bisi ati deka mai kita ngereja pengawa nya. Enti iya sama setuju ba ati bala maioh,” pia ko Indai Pau. Udah nya Lulong lalu bejako baru nimbal enggi iya. “Nya munyi pemanah berita ibu Indai Pau tu. Nya alai iya udah nusoi berita nya, lalu manggai ka ujong jako iya ba kitai maioh ke ditu. Saut ulih kita,” pia ko Lulong.

Semoa saut sida maioh tak lalu setuju magang enggau runding Indai Pau. Udah nya Kumang lalu bejako baru. “Nya alai , nya gaya munyi saut kitai serumah tu ibu. Tak lurus bendar munyi jako sida maioh tu dinga aku, ibu Indai Pau. Patut bendar meh semoa saut sida ba runding aku. Kebuah aku ngumbai iya patut laban kitai serumah ke ngelamatu enti bisi pengawa mansai nubai, maku nubu endang ibu tu ga alai bepegai, alai bepanggai nyadi ketuai. Enti pengawa ngasu beburu nya endang aka kitai Pau nya mega nyadi ka jarum ke pun pengawa kitai. Nya alai tu nyadi meh aum kitai,” ko Kumang. Dia Indai Pau lalu bejako ga,”Au meh wai, enti udah munyi nya, nyadi meh jako kitai tu. Tang semoa kitai ke berapi, anang laun angkat pagila. Lalu ingat, anang enda mai bekal perarau utai udah mansau,” pia ko Indai Lipai. Tembu semoa jako nya orang lalu mulai ka diri ngagai bilik diri empu, lalu tindok.

Agi dini hari pagi siti, dinga udah betegerup orang ke indu angkat berapi. Agi petang hari, samoa orang udah siap makai pagi magang. Nyau tawas hari, dia Indai Pau lalu ngasoh sida ke biak begerah niti rumah mai semoa sida sama beradu lalu besikap enggau bekal. Kira nyau tumboh matapanas dia Indai Pau lalu ngasoh orang begerah baru, lalu bebai sama nurun. Sampal bendar bala indu sida serumah nya nurun mansai. Bejalai bala sida sepagi-pagi nya, iya pan udah bisa panas baru sida iya datai ba kaki Danau Lalai. Dia bala sida ba kaki danau lalu ngenong ngemata ngemata ka ikan. Samoa sida endang udah andal ati meda pemaioh ikan dia. Tang siko pan nadai ga ngerara enggau jako, sida semina gaga dalam ati diri. Sida sama ngasi ka jako orang ke tuai, laban nya mali maioh jako ngerara ikan enggai ka menoa jelungan ; menoa tau kudi, lalu ikan nadai agi.

Diatu semoa sida nyau sedia deka ngengkah ka diri mansai. Nya alai Indai Pau ga dulu terejun ngulu ka bala, lalu ditangkan ka Kumang seduai Lulong. Udah nya baru bala maioh sama terejun kadalam danau. Nya alai laban danau nya bangat besai sereta panjai, iya lalu diputus ka sida ngena jala ba tengah-tengah. Lumpong ari ili dipansai sida dulu. Lumpong setak ari ulu agi digalau sida nganti udah badu merarau. Bala lalu sama bela naka ulih majak ka diri mansai. Sida sama bulih bendar ikan, nya alai sida sama ransing magang mansai lalu enda berasai peda hari tak nyau tengah hari.

Indai Pau pan lalu ngangau mai orang sama ngetu merarau. Bala pan lalu bakabirap ga mantai ka diri ari dalam ai lalu niki katebing. Sida lalu sama bakasegap sebelah babas semak nya dia ngiga rangkang kena menjadi ka api, bisi nya lalu ngambi buloh ruas kena belulun, bisi ngambi daun kena ngelempis ikan. Nyau bala anembiak Indai Pau laban sida sama regas ngereja utai, endang enda beteju ka pangan diri. Tak enda lama alai semoa utai lalu udah di sedia, sida pan lalu belaboh makai. Sida iya ukai semina kenyang makai asi, tang lalu kenyang ngulam ikan.

Nyau numbas pengelama udah badu mererau, dia Indai Pau lalu ngulu ka orang terejun mansai baru. Sida lalu berengkah mansai ba lumpong ari ulu ai ke diputus ka sida ngena jala. Bala lalu sama mansai enggau naka ulih. Genap iko bala sida lalu bulih bendar ikan. Leboh maia tengan nurun mata panas dia bala lalu mupok mulai ka diri. Sida mulai ka diri enda tentu sereta, laban ngasai ka diri empu udah chelap sereta ikak. Nyau kelama , samoa orang bukai udah pulai magang semina tinggal Indai Pau, Kumang enggau Lulong da agi dudi. Tang leboh sida tiga nyau berati deka mulai ka diri, alai sida tekenyit ninga utai nyelai bendar munyi.

Utai ke bemunyi nya tak kela-kela munyi sabak anak mensia. Dia sida tiga tak sama tegenong mending ka tunga munyi sabak nya. Tang sabak nya enda tentu temu tunga kuing. “Enda meh nemu nama utai nya tak kela-kela,” ko sida tiga bejako enggau diri sama diri. Dia sida tiga bisi ati sinu laban nya tak munyi sabak anak mensia. Sabak nya tak majak semajak. Dia deh ati sida tak nyau sinu kesinu ninga munyi sabak nya. Sida tiga lalu berengkah ngiga tunga munyi. Tang iya tak lalu enda temu tunga. Titih ketebing dinga muak ka ai, titih kili dinga bemunyi muak ke ulu. Titih ke ulu dinga munyi baka ke seberai. Nyau puas ke ngiga dia sida tiga nyau berati deka mulai ka diri, tang ati sida sama enda ulih di bai pulai, laban kelalu sinu ninga munyi sabak nya seruran kela-kela tak minta ambi belam kenu ko munyi. “Enda meh nemu nama kabuah ati tak bangat ngenyinu tu,” pia ko sida tiga bejako enggau pangan diri. Leboh sida nyebut jako nya, ai mata sida sama bekerenjoi nurun moa enggau dagu.

Nyau kepuas sida tiga ka begiga ke anak mit nya dia, nya baru tedinga ka munyi nyawa nya tunga ngagai pun maba sakayu ba ulu danau nya. Sida tiga lalu mansang nitih ka munyi nya ngagai pun kayu maba nya. Leboh sida mansang kia, dia hari pan lalu bebuat ka kudi, ujan enggau ribut mua pemalat, sereta kilat enggau ngitar ngenjing babasegum kiba kanan. Rangkang enggau punggu ngenjing betegerup laboh kena pangka ka ribut.
Dia sida tiga makin majak ka diri mansang ngagai pun maba nya. Leboh sida datai ba semak pun maba nya tadi, sida tiga lalu sama bepegai ba jari pangan diri. Sida lalu bebai surut mimit laban tekenyit tepeda ka orang lelaki siko bediri ngimbai pun kayu nya. Gamal orang lelaki nya peda sida benong baru angkat bujang. Kulit iya burak kuning, tuboh iya chukop pemesai, sereta jelan peninggi ; Iya nyan sempitan sumpit tapang. Minching terabai buloh temiang. Nangkin berangin pedang panjang. Ngena ketapu bulu burong kenyalang. Jejabong iya bok galong ngelegetang.

Tak baru berunding deka nanya iya sida tiga dia alai lelaki nya tak lesap lalu nadai dipeda sida agi. Hari pan lalu tedoh ga ujan, kabut enggau ribut pan lalu sama ngetu ga tekala nya. Datai sida dia lalu tetemu ka anak mit siko gali ba selepak bandir pun maba. Umor anak mit nya kira ka baru tau tingkap. Gamal iya manah sereta chukop penganggam. Tak enda chechamang deh Indai Pau tu tadi, lalu ditanggong iya anak mit nya, lalu disandik iya pulai ka rumah. Sida tiga pan lalu beguai-guai mulai ka diri naban ka anak mit nya. Leboh sida tiga datai di rumah hari pan baru salah kelala. Leboh sida Indai Pau datai di rumah dia lalu begau bala sida ke biak. “Aram kitai meda pemaioh ikan ulih sida Indai Pau pulai mansai. Nama sida bangat ngelaun nya pulai,” pia ko jako bala anembiak. Sida lalu sama tama ngagai bilik Indai Pau. Datai sida din lalu serengking nanya iya. “Oi ini ! Ni ikan ulih nuan mansai ini,” ko sida. Dia tudah Indai Pau lalu apin bisi ari nyaut sida, laban iya apin tembu begari. Nya alai iya tak semina nyaut sida enggau jako bungah. “Nyin ikan ulih aku,” ko iya nunjok ka anak mit ke ulih iya nemu ba pun maba tadi.

Udah nya sida ke biak lalu pansut, lalu mulai ka diri. Datai sida ba bilik diri empu sida lalu sama bela nusoi diri ke udah meda anak mit ulih Indai Pau nemu ba pun maba. “Indai Pau bisi bulih anak mit pulai mansai tadi indai,” ko sida ke biak. “Esh !, mapap kita tu,” ko indai sida nyaut, “Mali orang nusoi utai ngapa. Mali ngelulu ka berita bula. Kitai ditunggu Indai Pau ila. Nama kami sama mansai enggau iya sehari tu nadai nemu iya bisi bulih anak mit,” ko indai sida. “Enda kami bula, indai. Tang kami bisi meda anak mit ulih iya mansai.Temu iya ba pun maba, ko iya,” ko sida ke biak.

Ninga sida ke biak tak sampal nusoi, nya baru orang ke tuai ngabas berita nya. Udah sida ngabas ngagai bilik Indai Pau nya baru sida nemu berita nya amat. Nya alai leboh udah badu makai lemai nya baru sida serumah sampal bejalai ngagai bilik Indai Pau, deka meda, lalu deka ninga ka reti pun berita iya ka bulih anak mit. Nya alai awak ka berita nya bebatang sereta terang dinga orang maioh iya ngasoh Kumang nusoi berita sida tiga Lulong ke nemu anak mit ba pun maba. Leboh Kumang nusoi berita nya orang maioh nadai bemunyi laban sida alit ati ninga penyelai macham utai ke nyadi leboh sida nemu anak mit nya tadi.

Selemai-lemai nya orang lalu besilih-silih bepangku ka anak mit nya. Sida sama bela rindu meda pemanah gamal iya. Dia anak mit nya sekumbang orang ke begempuru tak enda nyabak tak gaga meda orang maioh. Iya lalu enda digaga ka Indai Pau nama, semina tak dikangau ka orang nama Adi Pau aja. Leboh orang maioh udah pulai dia deh Indai Pau lalu kiroh ngemas diri deka tindok. Leboh nya Adi Pau tu tadi lalu berengkah nyabak. Nyabak meh iya dia enda meanchi-anchi pemalat malat. Dikemadu ka Pau seduai indai iya enda ga ulih dikemadu. Nyau nguang orang ari bilik sapiak enggau nguji ngemadu ka iya lalu bedau ga enda badu. Nyau sampal sida serumah nya dia begau ka iya, lalu enda ga iya nemu badu nyabak. Bisi sekeda ari sida nguji ngunsut iya enggau ubat nyangka iya bisi pemedis, lalu sekeda nguji muchau nyangka iya bisi kena semun pedis perut bekau berambun sebelah tanah. Tang iya baka ke enda dibela, seruran majak nyabak belama. Nyau keleju-leju dia Pau seduai indai iya pan lalu sama-sama nyabak. Seduai nyabak nyau enda nemu chara agi kena ngemadu ka adi iya nya.

Nyau kelama deh, nya baru Kumang seduai Lulong nguji mai Adi Pau nya berua. Nya baru iya badu agi nyabak. Leboh sida tiga ke berua dia tuboh iya lalu dipangku Kumang, lalu kaki iya dipanggai ka ba pah Lulong. Nyau kepuas jari iya tekachau-kachau bayam tenggak ba dada Kumang, nya baru iya lalu tindok. Nya endang kebaka iya, nama iya kelalu udah balat ringat, nama enda Kumang ngaum iya, dia iya lalu enggai badu nyabak.

NGAGA BUBU

Leboh Adi Pau nyau mansang besai dia gaya iya enda baka pemansang orang bukai. Makin iya besai makin jai agi ga gamal. Makin iya ditupi Pau seduai indai enggau lauk, makin gamal iya mansang kurus sekurus.
Leboh iya deka besulu enggau sida ke sama bela dia orang enggai tentu begulai enggau iya. Suah mega sida ketawa ka gamal iya. Leboh umor iya baru angkat bujang dia gamal iya tak nyau chukop penyai ; Ikil nyau baka sengkil buah maram, Kuris nyau baka beris leka ujan. Kurap nyau bau selap burit kerungan,.Insak nyau baka tepak baka tempuyak buah rian. Untut nyau baka bout mesai peputan. Moa iya tak nyau tebelenga baka jugam, Liur nyau melulor baka depur leka hujan,. Ngeli nyau baka rangki mesai lengan, Bok nyau baka ke dikusok alai bubu nepan.

Taja gamal iya ngenyai nya, tang semoa pengawa endang diketau ka iya magang. Samoa penemu nadai diketimpang iya lalu diketau ka iya magang. Nyadi sekali leboh bala sida serumah sampal begaga ka bubu magang. Nyadi leboh maia lemai hari nyau ka genap belah ruai bisi orang ngelalin bubu. Nyadi tudah Adi Pau suah tak lentok-lentok ngantok dudok nengkila ka orang ngaga bubu. Nyau kepuas meda iya baka nya dia Pau lalu ngaga bubu siti ka iya nyangka iya tetengok meda enggi orang bukai.

“Esh, nama utai digaga ka bubu orang ke beli baka nya. Nadai mih iya nemu nan ka bubu nya ila,” pia ko jako orang maioh dia meda Pau kenanas ngiroh diri ngaga bubu ka adi iya. Tang leboh bubu nya udah tembu, dia deh Adi Pau tu tadi enggai bempu bubu nya. “Esh, enggai aku bempu bubu nya. Enda manah, enggai bulih ikan,” ko iya. Enda bemunyi ga tudah Pau ninga adi iya jako nya, lalu ditan Pau empu bubu nya. Nya alai udah nya leboh bubu sida serumah sama udah tembu magang, dia orang maioh sama berebut nampun ka enggi diri empu. Sida bela berebut ngiga ai ti manah tau alai nampun ka bubu diri empu. Leboh sida sama ngabas bubu diri lalu bisi nya bulih ikan, lalu bisi nya lalu nadai kala bulih siko, enda tentu sebaka.

Udah nya baru Adi Pau mupok nurun ngambi resam, ngambi randau kena iya ngaga bubu. “Eh, nadai gamal baka iya nya nemu ngaga bubu,” pia ko jako orang maioh. Udah iya bulih randau enggau resam, nya baru iya ngambi gari kerungan sida iya empu ba langkau manok sida di ujong tanju. Kerungan nya lalu digaga ka iya nyadi ijap. Udah tembu gaga, bubu nya lalu ditan iya. Bubu kerungan iya nya tadi ditan iya enda betampun, semina dipesul ka iya ngapa ba selepak batang ari ili pendai sida.

Leboh hari agi besebun urap hari pagi siti dia orang maioh lalu sama nurun ngabas bubu diri empu. Nyau maia orang pulai nya baru tudah Adi Pau mupok nurun ngabas anak bubu iya, bubu gari kerungan. Benong orang bukai agi ba pendai dia sida betanya ka ulih pangan diri. Sida sama madah ka diri nadai bulih ikan pagi nya. Nyadi tudah Adi Pau tu tadi benong ngangkat ka bubu iya ba selepak batang. Peda tak penoh laban ikan. Nama agi deh tak lalu ngenong magang samoa orang meda pemaioh ikan ulih bubu Adi Pau. Nya alai lalu baka nya berari ari genap pagi. Bubu sida bukai nadai utai ulih, lalu enggi iya penoh laban ikan.

Udah nya baru Aya Bujang Tuai bejako enggau semoa sida ke biak. “Nya meh baka, nya alai kitai enda tau selalu ka ketawa ka orang, laban kitai enda nemu ukor nasip orang siko-siko. Kitai enda tau enda berunding ka gaya pendiau iya. Taja gamal iya jai tang pendiau iya baroh sereta bebasa. Uji kitai ninga ka pengelandik iya bejako ngena jalai jako ke baroh sereta bebasa. Kitai meda pemanah gaya pejalai iya, gaya penudok iya sereta enggau pemansut jako iya endang ngena jalai baroh sereta lurus. Nya alai kita kebiak anang enda ingat. Pendiau ka baroh baka enggi Adi Pau nya tau diambi ka chuan ka teladan. Mina orang sebaka enggau pendiau iya tu niang Keling kalia, tang iya nadai agi, lama udah ninggal ka kitai,” pia ko Aya Bujang Tuai.

NGAGA PANGKA

Nyadi orang ari menoa Panggau Libau endang selalu belaban bebuti enggau sida di Gelong Batu Nakong. Nya alai bemacham-macham main dikena sida belaban bebuti enggau pangan diri. Suah sida belaban bepangka, nyabong, bibat, batak lampong ngelaban pangan. Nyadi hari siti dia deh orang Panggau Libau bisi datai lalu mai orang Gelong Batu Nakong belaban bepangka. Udah nya nama agi dih, nadai ngetu lemai orang belaban bepangka belama. Sida bepangka nyau ka genap lemai, tang deh tak enda mukai-mukai sida ari Gelong Batu Nakong enda kala muat jamah orang ari menoa Panggau Libau. Adi Pau endang apin kala udah enggau orang nguji bepangka.

Nya alai lemai siti, dia sida sarumah lalu baum. Orang ke ngumbai mai begempuru lemai nya Adi Pau. Sida ke biak pan lalu bejalai ga begerah niti rumah madah ka Adi Pau mai begempuru. “Nama utai dikaum bai Adi Pau tu. Nadai nya nemu numboh ka aum utai ke beli bakanya,” pia ko jako orang maioh. “Esh, anang kita mansut ka jako munyi nya,” pia ko Aya Bujang Tuai. “Orang ga ngumbai begempuru, ni kitai tau enda angkat,” “Nya meh,” ko sida ke bukai. “Kin ka pan kitai itah meda ka penyai anak gamal iya.” Leboh sida ke biak datai ba ruai Pau din, sida lalu baka lekik ketawa ari tisi bala meda penyai anak gamal tudah Adi Pau ka nyandih ba tiang tengah nunga orang ke tuai-tuai dudok ari atas. Dia Adi Pau lalu berandau enggau orang maioh. Lama sida udah dudok berandau alai orang ke biak madah ka diri enda nakal dudok lama agi, udah lelak bekau bepangka lemai nya tadi. Dia sida ngasoh orang ke mai begempuru nusoi jako leka aum.

“Nyadi tu Pau sida kebiak udah bejako, nya alai ngetu dulu kitai randau bukai. Berita aum kitai tu tusoi dulu. Nama kebuah seduai mai kitai serumah tu begempuru ?” ko sida ketuai. Dia Pau lalu nyaut. “Ukai nama agi. Ia ga amat munyi ko kita. Nama kitai ngumbai orang begempuru tentu ga bisi kebuah. Tang aku tu nadai penemu, laban adi nya ke pun ngumbai mai begempuru. Nya alai tusoi rita nuan dia adi,” ko Pau. Adi Pau lalu bejako. “Au, ukai nama agi baka kita nanya ka utai ti deka dikerandau ka kitai lemai tu. Nya alai tu, baka kitai ke berumah aku tu. Ia ga udah ngentak, kati ko enda ngebat. Baka ke bumai aku tu, udah mantap kati ko enda manggul. Nya alai bakanya ga tu, aku ga udah ngumbai kitai baum, kati ko enda bejako ga deh. Baka nya ko kebuah tu, awak ka iya terus sekali di dinga kitai maioh.

Nyadi dalam dua tiga lemai tu kita udah belaban bungah enggau orang ari menoa Panggau Libau lalu gaya dipeda aku kita tak alah bendar laban orang. Nya alai ati aku tak berasai enda lantang. Ukai ga aku pedis ati meda orang nyin menang tang laban nya endang ka baka kitai bisi alah bisi menang. Dalam pia kitai belaban tentu ga kitai ngiga diri menang. Kitai ke belaban bemain baka tu selalu ukai baru. Nya alai jako aku tu disurut ka pun mimit. Aku deka ninga ari kitai maioh ditu. Kati kala kitai ngalah nya baka ke sakalitu ?” ko iya.

Udah nya sida serumah lalu nyaut madah ka sida dia endang selalu alah. Sida madah ka diri endang enda kala menang dalam semoa macham main laban orang ari Panggau. Udah nya Adi Pau lalu bejako baru. “Nya alai dalam main sekalitu, nya baka pengalah kita bepangka laban orang Panggau. Nama runding kitai maioh deh ?” ko iya. Bala maioh sampal ga udah nyaut, tang lalu nadai tak nyemetak ka saut madah ka ator tau dikereja ngasoh menang. Udah nya semoa pengabis jako sida lalu dipanggai ka sida ngagai Adi Pau. Sida lalu ngasoh iya nyadi tuai ngulu ka sida bemain ngelaban orang bukai.

Adi Pau pan lalu nyaut ga. “Enti runding kita udah munyi nya tau ga kitai nguji. Tang sehari pagila kitai ngadu ka pangka manah agi,” pia ko iya. Abis samoa jako nya, orang maioh lalu mulai ka diri ngagai ruai diri empu.
Pagi siti dia orang maioh lalu sama sampal ngadu ka pangka diri nitih ka jako Adi Pau. Nyadi Pau lalu ngaga pangka ka adi iya. Leboh pangka nya udah tembu lalu disurong ka iya ngagai adi iya. Tang adi iya tak enggai empu pangka ke digaga Pau. Iya madah ka pangka nya amat manah gamal lalu kayu pan manah ga tapang, tang enda tan dikena iya bepangka.

Udah nya Adi Pau lalu nurun ketanah deka ningkoh kayu ke pangka. Iya ke nurun nya tadi minching duku chandong. “Esh,” ko Pau, “Mapap pengawa ari orang bukai baroh hari tu. Diberi pangka enggai empu. Nya nurun minching gari duku chandong. Dini nya tulih ka kayu tau ka pangka. Kena nibak sempiar sengkilu baru duku mesai nya umbas. Kitai kenanas bebai ka beliong, ka kapak kena ningkoh bandir tapang deh tau enda bulih,” ko Pau. Udah nya bala anembiak ke bemain ba tengah laman ngerara Adi Pau ngeringak nambak pugu pisang ba baroh tebelayar sida Pau. Dia iya gerut-gerut ngali pugu pisang ka pangka. Pulai iya air tanah lalu dudok ba pugu tanju sida. Iya lalu ngeraut pugu pisang nya ka pangka. “Esh,” pia ko bala orang maioh serumah nya, “nadai orang kala ngaga pugu pisang ka pangka.”

Nyau tembu pangka nya, dia orang lalu bejako enggau iya. “Lapa pangka nuan nya lalu enda kala diuji ka dih, meda ka penyinok” ko sida. “Eh, nama kiroh enggai enda nguji. Barang naka gamal penyinok iya ila,” ko sida iya. Nyau tengah hari siti nya baru orang ari Panggau bisi datai baru mai sida belaban bepangka. Sida sarumah lalu sampal enggau indu enggau anembiak ngila ka orang belaban bepangka. Datai sida di kaki tangga, nya baru Adi Pau nguji ngasing ka pangka iya. Peda nadai utai ngenyinok nya deh. “Nama kayu ka pangka nuan nya Wat ?” ko Sempurai. “Eh, pugu pisang jang,” ko iya. “Esh ! Pugu pisang ! Sapa apai orang kala bepangka ka pugu pisang ! Tak bepuloh pan pangka bansa nya enda meh aku siko takut ngelaban,” ko Sempurai nyakap Adi Pau.

Udah nya tak apin berengkah sida, alai enggi Adi Pau lalu putus tali. “Dulu kita berengkah” ko iya, “aku tu ngadu ka tali enggi aku dulu,” ko iya. Orang lalu berengkah bepangka. Udah nya tak nadai utai ngalah nya ga orang Gelong laban orang Panggau. Nya meh sida Gelong endang enda kala mangka sakali. Pangka orang Gelong nadai tau ngintu menalan jamah orang Panggau. Nya ga munyi penginggar nyawa Sempurai dia enda nemu agi. Naka penginggar nyawa ditebah iya, laban iya gaga meda pangka orang Gelong tak teperanchit-teperanchit dipangka iya. Iya ga ransing bendar meda sida ke indu-indu enggau sida ka dara bangat maioh nengkila ka sida lemai nya. Dia meh iya seruran nyeling-nyeling ngagai sida ka dara. “Uji gaga jampat ka tali pangka nuan nya Wat” ko Sempurai ngangau ka Adi Pau. “nguai ka aku mangka pugu pisang nya lagi. Rindu meda rampang pugu pisang nuan nya merenchit kelangit kin,” ko iya. “Au, tembu meh tu,” ko Adi Pau.

Nya baru iya berengkah enggau orang bepangka. Bala sida serumah lalu ngasing ba tengah menalan. Nama agi deh ngenjing baka setap tali pangka orang ke ngasing dia. Nyadi enggi Adi Pau semina dilengka ka iya gamal, dinga tak lalu rengong-rengong begasing ba tengah menalan. Benong pangka orang Gelong nyinok, dia orang Panggau berengkah mangka. Mangka Pandak Segatak dulu, dinga semetap kena. Udah nya lalu mangka ga Apai Migu, dinga ngenjing tibu kena. Udah nya lalu mangka magang ga orang bukai. Sida ke mangka bisi kena bisi ga nya salah. “Eh, nya pangka pugu pisang nya anang mangka kita bukai. Lak ka aku ngembal ka nya lagi. Rindu meda rampang iya ngelayang kelangit kin,” pia ko Sempurai. Udah nya dinga lalu nengkelak Sempurai angkat lalu mangka pangka pugu pisang Adi Pau. Dinga tak nadai utai malat nya munyi ngenjing semetup lalu tepelasit. “Udah pangka nuan Wat !” ko Sempurai. “Apin jang !” pia ko Adi Pau, “Enggi nuan baru udah,” ko iya.

Peda deh enggi Adi Pau tu tadi anang ke pechah, tang ngasoh iya rengong-rengong munyi nyawa indu ridun. “Alau tandu nya,” pia ko Sempurai merak sida bukai ke dudi mangka ari iya. “Nama kita lalu enda tetandu ka enggi iya nya,” ko Sempurai. Nyau pupus bala sida mangka bedau ga enggi Adi Pau rengong-rengong. Leboh sida ngambi pangka diri empu nya baru sida nemu enggi Sempurai pechah lalu tepelasit nya tadi. “Akai-rai ! Naka penyayau pangka kirai aku tu pechah deh,” pia ko Sempurai. Peda pangka pugu pisang Adi Pau nya tadi tak suman, lenggam pan enda mih enggi iya. Bala orang maioh ke ngemata ka sida dia lalu betelai enggau pangan diri. “Anak sapa Adi Pau tu ?” ko sida. “Enda nemu meh,” ko sekeda nyaut.

“Kitai anang guai ngasing dulu nganti aku udah pulai ngambi pangka ka rumah kin,” ko Sempurai. Iya lalu belanda ka rumah sida iya empu di Panggau Libau. Belanda deras meh iya dia baka kipas angin kenchang. Belanda lasit meh iya baka sumpit buloh tapang. Sekumbang iya ke belanda ka rumah dia iya bejako dalam ati diri. “Malu bendar aku tu ka. Nadai aku ngadang panga kirai nya mudah pechah baka nya,” ko leka puchau ransi iya serantau jalai mansang ngambi pangka baru ka rumah. Tak enda berasai udah nya alai Sempurai lalu datai di Gelong baru. “Pama penegar lelaki tu. Tak enda bulih sakejap mata asai iya ke Panggau udah ga datai ditu baru,” ko jako sida ka indu bekerut diri sama diri. Datai Sempurai dia, peda mai pangka sigi besai agi ari ke dulu tadi. Bala sida Sempurai lalu berengkah ngasing. “Nya, enggi aku nya selinting Wat,” ko iya ngangau ka Adi Pau.

Bala sida ari Gelong lalu berengkah ga mangka samangka dia. Udah nya nadai tentu di menalan agi pangka orang ari Panggau jamah sida. Nyau kelama semina enggi Sempurai seduai Laja agi bedau ngintu menalan. Nya baru Adi Pau mangka. Iya lalu nyelinting enggi Sempurai. Dinga tak semetup enggi Sempurai kena pangka iya lalu nyengki enggi Laja. Enggi Sempurai lalu tepelanting, semina enggi Laja agi tinggal di menalan. Udah nya sida lalu semetah ka taga enggi Adi Pau ngelaban enggi Laja. Enggi Adi Pau makin lama makin nyinok. Peda enggi Laja makin lama makin lubah agi ga bepusin, lalu gali rebah. Nyau diambi peda deh simpak enggi Sempurai. “Oh, ukai utai dilaban Adi Pau nya bepangka. Abis pangka kirai aku simpak laban enggi iya,” pia ko Sempurai. Pangka Sempurai ukai semina simpak tang nyau berabi deka belah laban enggi Adi Pau.

Ninga Sempurai seruran itok ka pangka diri simpak dia Laja lalu bejako. “Nya alai kitai, ko jako tuai. Anang manjong dipala wong. Nya nuan tadi ngumbai sapuloh pan pangka bansa nya ulih ga pangka nuan enggau jari kiba. Tu nya baka enggi nuan tak abis pechah, tak abis simpak,” ko Laja nganu Sempurai. “Iya ga amat deh buat. Amat nadai kala ninga orang bepangka ka pugu pisang. Kati jako munyi enggi aku nya tadi salah nya buat,” ko Sempurai. Iya nyau kesal ati, enda kala bepangka asai ke ngelaban Adi Pau.

Hari pan lemai ga alai orang Panggau lalu mulai ka diri. Nya alai udah lepas nya sida lalu selalu menang orang ari Gelong dalam samoa macham main ukai semina bepangka ngelaban orang Panggau. Sida serumah nya lalu balat bendar bebasa sereta ngasi ka jako Adi Pau. Maioh bendar pelajar ke manah ulih sida neladan nunda gaya pendiau enggau ati iya. Iya jarang bendar meri sida ajar ngena jako, tang iya meri teladan ke menyana ngagai anembiak sida sarumah dia. Gamal iya amat enda sigat baka orang maioh, tang ati iya nelap sereta lurus enggau samoa orang.

MANSANG NGAYAP

Leboh maia Adi Pau nyau udah bujang raya, dia iya deka bendar besulu enggau sida ka sama bujang. Sekali bala bujang orang ari Panggau maioh bendar datai ngayap ngagai rumah orang Gelong. Leboh sida di rantau jalai sida lalu bejako enggau diri sama diri. “Lagi kitai mai Adi Pau ngayap,” ko sida. “Esh,” ko Sempurai, “sapa orang deka ka gamal ngenyai engi ia nya. Mina ga iya ngemalu diri. Mina ngambi kitai diketawa ka orang ke dara ngapa begulai ngayap enggau orang ngenyai nya gamal.” “Anang munyi nya,” pia ko Laja. “Dini nya ulih disabaka ka gamal kitai maioh tu. Gamal iya ke jai enda ngerampit kitai.”

Leboh orang udah sampal tindok dia bala sida Sempurai lalu niki ka rumah. Sida lalu tama kibong Adi Pau, lalu negu iya. “Ngayap Wat ! Aram !” pia ko Sempurai. “Bisi kala angkat nuan ngelamatu Wat ?” ko iya. “Bisi ga sekali dua, tang sapa orang rindu ka aku,” ko saut iya. “Keba mupok kitai malam tu,” ko Sempurai, “Dini orang tau tak enggai semoa ka kitai. Barang ke deka-deka, barang ke enggai-enggai ga ka kitai.” “Barang iya meh runding ke mina nganjong kita,” ko Adi Pau. “Esh, aku nadai tusah dianjong orang,” ko Sempurai. “Semoa indu dara kita sarumah tu ditu nadai enda ditemu aku magang,” ko iya. “Eh, nadai nya tentu nganjong, tentu enda. Sama tak mina rindu besulu baka nya mih kitai,” ko Laja. “Ia ngagai sapa nuan deka ngayap dih, Wat ?” ko Sempurai ga nundi Adi Pau. “Aku ga nemu bagi ke di gagai kita. Iya ke enda di gagai kita nya ga gagai aku,” pia ko Adi Pau.

Udah nya sida lalu sama mupok bela napat ka endor diri empu. Sida sama udah bisi palan magang. Semoa dara sida serumah nya dia tiga puloh tiga ke berambau mansang, tujoh puloh satu ngaum indai orang. Sida nya bisi orang napat ka magang, mina tudah Kumang agi puang nadai orang. Nya alai tudah Adi Pau mupok ngagai iya. Dia Sempurai llalu lekik-lekik ketawa ngila ka Adi Pau mansang tama ngayap ngagai Kumang. “Eh, ngumba ka gamal. Ngamat ka diri, gamal ke ngenyai nya berani ngagai orang ke ngemanah nya. Kitai ke tentu menyana tu enda berani mansang ngagai Kumang,” pia ko Sempurai.

Udah nya lalu mupok meh tudah Adi Pau ringki-ringki mai tebu mansang bejalai lalu tama bilik sida Kumang. Datai iya ba tempuan bilik dia iya lalu muka karong diri, lalu ditungku ka iya ngagai kibong Indai Lipai ulun tuai sida Kumang. Karong iya nya tadi lalu nyadi mensia siko, lalu ngayap ngagai Indai Lipai. Tuboh iya empu ke bendar nya tadi lalu niki ke sadau lalu tama kibong Kumang. Leboh iya datai dalam kibong dia iya lalu dudok ba buntut kaki kibong. Iya lalu negu tunjok indu kaki Kumang. Laban tegu iya nya tadi lalu ngenani ka diri ga tudah Kumang, lalu angkat dudok. Dia iya berunding dalam ati diri.

“Sapa orang tu ngmerani nya tama kitu. Nadai kala orang bukai berani datai ba kibong aku. Mina niang Keling menya ka berani, pia orang bukai nadai,” ko runding ati Kumang din. Kumang tak lama enda bemunyi, laban iya enda ngelala sapa orang nya. Deka iya tak lalu terus nanya ka nama enda ga kempang meda penatai orang nya tak bebasa bendar. Nyau kelama baru iya bejako. “Aku tu unggal tak lain munyi tanya enggau nuan. Tak changka ga munyi aku tu, ka enda pia, ga enda ngelala pangan,” “Badu enda meh deh, endang ke baka kitai,” pia ko Adi Pau nimbal iya. “Nya meh unggal, aku tu tak beli munyi, ni deh enda beli, ga enda kala bepeda bepansa enggau pangan lalu enda ga nemu dini menoa lalu nemu ari ni penatai nuan,” ko Kumang. “Ukai nama agi meh unggal,” ko Adi Pau. “Ia ga endang kebaka kitai bejako enggau pangan. Senentang utai ke enda temu kati ko enda nanya ga deh. Nya alai baka nuan ke nanya ka penatai aku. Madah ga aku unggal. Aku tu tadi endang tak nurun ari menoa ari rumah tangga diri empu,” ko iya. “Kati gaya penyauh menoa nuan deh unggal ?” ko Kumang ga nanya iya.

“Menoa aku enda jauh ari tu unggal. Enti nengah jalai semak, Tak sekanyak bulan mingkai. Enti nengah jalai jauh, Tak sengesoh laja kirai,” ko Adi Pau. “Enti udah munyi tu enda ulih enda ditanya ngena jako bendar iya tu,” ko Kumang berunding dalam ati diri. Udah nya iya lalu nanya Ai Pau baru. “Uji padah ka aku enggau manah, Endor rumah nuan deh, Unggal Beruang Mangah, Landik betegah ditingkah rapi tebiang. Dini alai kupan nuan deh Remaung Dan, Landik teruan ngibun menasan, Ngipa puan jelu kijang ? Dini alai pandong nuan deh Bujang Rengayung, Ketungkah nuan bejuong nurun beguang ?”

Adi Pau lalu nyaut iya : “Datai ari menoa kami., Di Kerapa Sungai Raya, Tumboh pun buloh bala, Bebunga ngulor Kelingkang., Datai ari lengkap, Aku tu tadi unggal, Tumboh pun buloh amaT, Buku serekat ruas setempap, Bebuah mua pengelebat, Pengantong singap belang berang, Datai ari menoa kami di Kampong Pulau, Tumboh pun tapang begiau, Pun besebun kena tambun leka kangau, Biau selanjau manok menang.
Datai ari menoa kami, Di Tinting Panas Kuning, Tumboh pun aur gangging, Tau belagu landik kesuling, Rinding linsing jila isang, Tang diatu aku nyau, Udah di iru sida Puyu, Indu orang di Gerugu Batu Benang, Aku nyau ke gulai sida Ngelai,, Orang di Meligai Pungga Pungkang,” pia ko Adi Pau.

“Sapa nama nuan deh unggal,” pia ko Kumang. “Enti nuan nanya madah ga aku unggal. Tang aku tak maioh nama. Anak Batang Temiang Kemali, tau idup tau mati beulah-ulah tau nyadi ulun pengurang. Bujang Tatau diau aku tu unggal tau lenyau landik pegari selalu lelang suah pegi ka batang Mandai Mati nyadi tuai rungu sebayan midang. Aku tu ga Adi Dudi Kemping Padi, Lunchik kaki simbang terabang. Bujang Rindang Nengeri, Aku tu unggal, maioh tunang seribu bini.tampun puji buah kenang,” pia ko Adi Pau. “Enda aku kala ninga nama orang nyelai nya,” pia ko Kumang. “Enti nuan enda kala ninga orang nama nya unggal, Aku tu meh ke dikumbai orang, Anak Sendia Sida Sentuka Begila Gundi, Sepit Api Bejari Ranggang-ranggang,” ko iya. “Nuan anang beduan aku unggal, enti orang ke disebut nuan nya, nemu meh aku,” pia ko Kumang.

Nyau kapuas seduai ke berandau semalam-malam nya hari pan tawas. Adi Pau lalu mulai ka diri nurun ari sadau mansa kibong Indai Lipai ba tempuan bilik sida Kumang. Dinga iya kuroh Indai Lipai bedau derut-derut. Ambi iya karong, lalu pasok ka iya baru. Gamal iya lalu berubah pulai jai baka selama. Pansut iya ari bilik datai ba tengah ruai iya lalu bepansa enggau bala sida Sempurai ke sama baru pansut pulai ngayap.
“Dini alai ulap nya samalam tu ?” Ngamat ka diri ngelaun nya pansut ari bilik sida Kumang,” ko Sempurai. Bala sida Sempurai lalu nyau mulai ka diri ngagai rumah sida iya empu di Panggau Libau Gegiau Takang Isang.

Nya alai diatu lengka ka kitai enda lama kira sasempa mansau pinang ensera Adi Pau ke ngayap tu tadi. Kitai deka nyebut pengawa Indai Pau ke ngulu ka bala indu sida sarumah nya selumpu ngasing. Lemai siti ngasing, lemai siti ngasing ga bala sida iya. Dia bala sida Sempurai tu tadi, nama lemai nurun, nama lemai nurun ga ngayap ngagai rumah orang Gelong Batu Benang. Sida ke ngayap nya lalu enda tentu nyadi laban bala indu orang serumah beserumpu ngasing. Sida ke ngasing nya suah nyau lalu apus malam, lalu enda tindok nyentok ka tawas.

Nyau kepuas main nya, keleju deh lalu ringat Sempurai tu tadi. Nya alai angkat iya ari ke nganti orang ke indu tindok lalu mansang ngagai sida ke ngasing. Jengkau iya gasing sida Indai Pau lalu ditikau ka iya ngagai ujong tanju. “Nama main nuan Sempurai ngasar nya enggau utai kami,” pia ko Indai Pau. “Nama main kita selalu ngasing ? Lemai siti ngasing, lemai siti ngasing ga kita. Kami enda masok ngayap laban kita enda tindok. Ukai nya tau dikena kita belayar ketasik kin utai ke digasing kita nya,” pia ko Sempurai nganu bala sida Indai Pau.

NURUN BELAYAR

Lemai siti udah bekau nya, dia deh Indai Pau lalu ngetu mai orang ngasing. Iya lalu ngempuru ka indu sida serumah nya. Leboh orang udah sampal datai, dia iya lalu bejako. “Malu bendar kitai laban jako sida Sempurai. Nya alai enti sema kita sama deka ko runding aku, manah kitai nguji belayar ka tasik kin. Kebuah kitai belayar laban ka ngiga tajau, ngiga reta, ngiga pesaka, kena kitai nyaut jako Sempurai,” pia ko Indai Pau.

Samoa bala indu sida serumah nya lalu bela setuju magang runding ninga penemu ka dipansut ka Indai Pau tu tadi. Sida iya lalu nginjau perau Apai Tutong. Sida lalu nyikap diri deka belayar. Leboh semoa utai udah kemas magang, dia sida lalu madah ka diri deka belayar ngagai sida sarumah. Orang ke lelaki sama bela enda ngasoh sida laban pengawa nya ukai utai patut dikereja orang ka indu kediri. Tang bala sida Indai Pau enda ninga ka jako sida lelaki ke nagang sida belayar. Sida madah ka diri deka nguji laban jako sida Sempurai bangat kelalu udah rangkai. “Nadai reti kita belayar. Nama chara kita bulih utai. Ukai nya baka ke mansai ikan ba danau. Mansai baru pengawa kita. Belayar pengawa kami ke lelaki,” ko sida serumah dia nagang Indai Pau. “Barang utai ulih kami ila meh,” ko sida. “Enti bangat nadai utai ulih ukai enda tau pulai puang deh,” ko sida.

Nya alai pagi siti sida lalu undor. Nama siang hari belayar, malam hari diau ga sida. Nyau keleju-leju baru sida iya datai ba menoa Raja Laut. Dia sida lalu bebeli ka tajau, baku, bebendai, setawak enggau macham perengka pirak. Belayar ga sida ari nengeri Raja Laut, nyau kelama-lama baru sida datai ba nengeri ke pemadu besai. Nengeri nya enggi Raja Ribai orang ke diau di tasik besai ledong lelinang. Leboh sida datai semak, dia ati sida berasai tekenyit meda pemanah rampa nengeri nya, rumah tak nyau memanah, jalai tak nyau bebesai. Orang ngenjing seliboh bejalai kin kitu ba jalai raya. Sida lalu tepeda ka rumah sebuah manah sereta besai agi ari rumah bukai. Rumah nya datas munggu semak tebing ai. Nya ga pemanah geretak ba tebing enggau jalai raya nuju ngagai rumah sebuah nya. Nya ga pemanah umba menira enggau pemaioh bansa bungai tumboh nisau jalai raya.

Nyadi bala sida Indai Pau tu tadi lalu belayar nuju pengkalan nya. Leboh sida benong deka ngerapat geretak, peda sida lalu nurun orang ari rumah sebuah nya. Sida ke nurun nya bala soldadu tiga puloh satu iko nyan lunju. Peda nurun ga bala jaga tiga puloh tiga nyan sentika. Sida nya lalu dientudi ka bala sap empat puloh empat nangkin malat. Leboh sida datai ba geretak dia bala soldadu tiga puloh satu lalu nuju ka lunju. Bala jaga tiga puloh tiga lalu ngerebah ka sentika. Udah nya peda bala sap lalu nyintak malat. Meda utai baka nya dia dih sida Indai Pau tu tadi chukop bendar pengabis ati. Tang sida enggai ngayan ka gamal diri kelalu takut. Naka ulih ga sida nat ka gamal, lalu ngaga moa diri suman.

Sida lalu ngering bulu diri ngaga diri baka ke berani. Sida sama sereta bejalai lalu pansut ka luan. “Sapa orang empu nengeri tu ditu,” ko sida betelai sama diri. “Eh, nadai utai ditanya, tu mih nengeri Raja Ribai ko orang,” pia ko Kumang nelai sida bukai. “Mua mih kitai tu deh rembus ba nengeri ngemesai tu. Nadai meh nemu ko chara bejalai ditu” ko sida. “Esh, anang inggar,” pia ko Kumang. Udah nya iya tak lalu ngesai ka diri merejok, lalu laboh ba tengah-tengah bala soldadu Raja Ribai ke bediri ba atas geretak nya. Dia soldadu siko tak enda chechamang lalu ngentum ka lunju iya ngagai dada Kumang. Seninjik bendar lunju nya ngelipak ari dada Kumang, tang enda mukai-mukai ga lalu kena sida ke sama soldadu siko ke bediri napak iya. Peda tak kejar-kejar iya rebah lalu parai.

Udah nya baru bala soldadu tu tadi lalu sama sereta ngentum ka lunju sida nuju dada Kumang magang. Tang deh enda mukai-mukai ga lunju sida nya ngelipak ari Kumang lalu kena sida sama sida soldadu bukai. Nama deh, tak lalu sereta meh bala soldadu tu rebah magang. Bisi meh sida nya lalu parai, bisi ga sekeda semina naka bakal.

Nya alai meda utai bakanya dia Raja Ribai empu dientudi ka anak bujang iya lalu pansut ari rumah. Seduai menyanak lalu sama nurun ke geretak. Leboh seduai datai dia, Raja Ribai lalu nanya Kumang. “Sapa kita tu ?” pia ko iya. “Kami tu bala indu bansa Iban datai ari Gelong Batu Benang. Kami tu pegi belayar sebelah menoa, lalu kami sangkai ditu deka nemuai ngagai Raja Ribai,” ko Kumang. Dia Raja Ribai lalu bejako baru. “Kita enda tau sangkai ditu ngapa, laban kita nadai minta dulu. Nengeri kami tu mali ditiki orang bukai nama enda minta dulu. Malik nuan peda pemaioh bala soldadu aku rusak ka tegal kita sangkai ditu enda enggau pinta, enda enggau padah dulu,” pia ko Ribai. “Enda mih kami nemu jako nya. Orang ga nadai kala udah becherita ka pengkalan kita enda tau alai sangkai,” ko Kumang nyaut. “Pasal soldadu nuan ke parai nya ukai tegal kami sangkai ditu, tang sida nya belaya diri sama diri.” “Nuan anang bejako maioh,” pia ko Raja Ribai.”Enti enda ka tegal kita sangkai ditu bala soldadu aku nya enda sereta parai ngemaioh nya. Nya alai laban penyalah tu besai nuan enda tau enda kena kurong dalam sangkar besi nganti maia hari aku nyemelih nuan,” pia ko Rtbai. “Enti nuan ngurong aku dalam sangkar besi, soldadu nuan nya enda tau pulai gerai baru. Enti nuan enda ngurong aku sida nya tau pulai suman baka selama,” ko Kumang. “Anang nuan nguji ngemerani ka diri ngelaban aku ba menoa, ba pengkalan aku,” pia ko Raja Ribai. “Enda aku berani ngelaban nuan, tang aku nusoi utai ke bendar,” pia ko Kumang.

Raja Ribai lalu mansang pedis agi ati ninga Kumang lalu enggai badu bejako nyaut iya. “Nya alai enti nuan enda badu bejako nyaut aku, lalu enda ngidup ka bala soldadu aku tu ke udah parai, nuan aku bunoh ditu,” pia ko Raja Ribai Iya lalu nyintak pedang deka mantap Kumang. Tang seninjik bendar deh anak bujang iya lalu nagang. “Anang nuan ngasar nya enggau temuai indu ke baru datai ba menoa kitai ditu deh apai,” pia ko anak bujang Raja Ribai ngerara iya. Udah nya baru Raja Ribai tu tadi lalu ngetu. Iya lalu nyelit ka pedang iya baru ngagai sarang. Udah nya baru Kumang minta ai chiru engkah dalam mangkok besai siti. Raja Ribai lalu ngangau ngasoh bala ulun iya nganjong ai. Datai ulun iya ari rumah nganjong ai, dia Kumang lalu ngirah ubat pemurah abi diberi Apai Abang. Iya lalu ngirah tinchin pengajih iya empu. Udah nya iya lalu ngunsai ka ai nya atas bangkai soldadu ke parai tadi. Sida nya lalu pulai suman baka selama, amat baka ke muai empeleman.

Udah nya lalu alit mih ati Raja Ribai meda utai nyelai baka nya. Tiga kali iya ngesoh ka seput. Udah nya sida lalu beserara, bala sida Kumang lalu pulai ka perau, bala Raja Ribai lalu pulai ka rumah. Pulai nya Raja Ribai lalu kiroh ngasoh orang ngemas rumah iya, laban iya deka mai bala Indai Pau makai besai. Raja Ribai pan lalu mangil semoa pemesai dalam menoa nya mai sida sama begempuru makai lemai nya. Leboh maia hari nyau tumboh lambor, peda lalu nurun Raja Ribai di sempulang pemesai iya tiga iko ngambi bala Indai Pau sama niki makai lemai ka rumah.

Sida pan lalu beradu. Kira maia hari nyau ka sabong petang nya baru bala sida lalu niki ka Istana Raja Ribai. Sida lalu diambat bala Raja Ribai enggau naka basa. Sida sama dudok begulai makai, dia Raja Ribai lalu bejako nusoi kebuah diri mai begempuru makai lemai nya ketegal ngulu penatai bala Indai Pau. Iya lalu besabi ka diri kelalu udah salah ketegal kesal ati leboh sida ka baru sangkai tadi meda bala soldadu iya tak sereta bebadi. Iya lalu nerang ngagai orang maioh, taja sida Indai Pau tu indu magang tang sida iya bisi pemerani sereta enggau pengeras ati, nya alai sida tekereja ka pengawa sebaka enggau enggi orang lelaki. Iya lalu ngulor ka jako ngasoh bala pengabang maioh dia enda sanggu berandau lalu betanya ka berita ari bala sida Indai Pau.

Lepas Raja Ribai nya tadi bejako, lalu bejako ga Kumang nyaut iya. Iya nusoi pengangkat diri, lalu nusoi sida ke belayar sebelah-belah menoa deka meda ka gaya pengawa orang di menoa bukai. Nyau tengah malam hari nya baru sida iya tembu badu makai. Udah nya bala Indai Pau lalu mulai ka diri. Nyau pagi siti dia anak bujang Raja Ribai lalu bejako enggau apai iya ngasoh iya bejako enggau Kumang, laban iya bisi ati deka jadi enggau iya. Nya alai saut sida Kumang madah ka diri ukai enda rindu ninga jako Raja Ribai minta iya ka menantu, tang sida enda ulih lama diau di menoa nya.

Ninga saut Kumang munyi nya, lalu tusah deh ati anak bujang Raja Ribai tu tadi. Nya alai iya lalu berunding ka akal dikena iya agi ka nan ka sida nya. Iya lalu ngasoh ulun iya siko belalai nganjong Mangkok Mas lalu nyimpan nya dalam perau sida Indai Pau ba senentang palan Kumang. Iya ke ngereja pengawa nya endang ngintai ka maia bala sida Indai Pau udah nyau bejalai ka nengeri. Nyadi lemai nya Kumang lalu dibai Raja Ribai seduai anak iya bejako kediri ba Istana. Dia seduai iya agi ka nampong jako ke udah, lalu ngumbok iya jadi enggau anak iya. Kumang lalu enda ulih umbok seduai ngena jako, iya madah ka diri enda berani nyanggup jako nya, Bendar ga Raja Ribai seduai anak iya ngumbok; seduai madah ka pengaya, madah ka penyamai diri diau. Tang Kumang lalu enda teberi ka jako madah ka diri deka jadi enggau anak iya.

Tumu pagi siti dia sida Kumang lalu ngemas diri deka mupok belayar mulai ka diri ka Gelong. Benong sida bekemas, peda lalu datai bala soldadu Raja Ribai nurun ari Istana. Sida madah ka diri datai diasoh Raja Ribai meresa perau, laban Mangkok Mas iya siti lenyau. Utai nya disangka sida dichuri bala sida Indai Pau. Nya alai sida lalu berengkah nyengkuran meresa perau Indai Pau. Mangkok Mas Raja Ribai ke lenyau ko jako nya tadi amat bisi ditemu ba senentang palan Kumang dalam perau. Nya alai Kumang lalu ditangkap sida lalu disimpan dalam sangkar besi. Perau dikerepau sida ngagai tiang batu. Bala soldadu lalu jaga dia siang malam. Bala Indai Pau ka tinggal dalam perau lalu nyabak magang ngenang Kumang kena tangkap. Kumang ke dalam sangkar besi pan nyabak ga, tusah ati ka diri empu, lalu tusah ga irau ka bala sida ke tinggal dalam perau. Agi ga iya tusah berunding ka sida indai iya di rumah enda nemu penusah iya.

MANSANG NGAYAU RIBAI

Nya alai diatu lengka ka kitai enda lama jerita Kumang tu tadi, kitai lalu limpang nusoi indai iya ke tinggal di rumah. Tumu pagi siti tajau sida Indai Kumang ba luan bilik sida tak rebah kadiri nadai kebuah-buah. Tajau nya endang Tajau Pengajih. Meda tajau nya rebah Indai Kumang lalu nyerarat nyabak. Indah-indah enda munyi ke bisi orang baru udah apus munyi leka kangau sabak iya. Tekenyit magang semoa-moa orang sekayu rumah nya ninga iya nyabak. Sida lalu begau ngadang orang bisi bebadi ngenyit.

Leboh orang maioh udah tama kebilik, lalu bejako enggau Indai Kumang, dia sida nanya ka kebuah iya nyabak. Iya lalu ngetu, lalu bejako enggau orang maioh. “Kati ka aku enda nyabak, aku ga ingat ka jako Endu Kumang kejang iya nurun belayar suba.” “Kati ko jako iya suba alai nuan tak nyabak dih ibu ?” ko sida. “Badu enda meh. Iya ga bakatu ko munyi jako di tinggal ka iya suba. Peda indai, peda manah ka tajau pengajih kitai nya. Nama tajau nya belah mati aku di menoa orang din. Nama iya mina rebah bisi penusah besai aku din, pia ko jako iya. Nyadi tajau pengajih kami nya tadi tak rebah nadai kebuah-buah. Nya alai tentu bisi penusah meh Endu Kumang tu ba menoa orang din,” ko Indai Kumang.

Sida serumah lalu megau orang ari ulu, ari ili, kelebih agi ga sida di menoa Panggau Libau. Sida lalu mangkong gong lunyong, laban nya endang selalu diterantang ka sida kena megau orang. Leboh semoa orang ari ulu, ari ili udah sampal datai begau ninga terantang nya tadi, sida ke datai endang mai senyata, mai sangkoh, terabai enggau duku laban ngadang bisi munsoh ngalah ka rumah orang Gelong. Datai sida dia nemu nadai ga munsoh ngalah ka rumah orang Gelong. Nya alai orang lalu nanya ka kebuah sida nerantang ka setawak begau. Udah nya Tutong lalu ngasoh Adi Pau nusoi berita. Adi Pau lalu bejako nusoi berita penurun sida indai iya ke belayar, alah datai ba maia tajau pengajih Indai Kumang rebah nadai kebuah-buah.

Sempurai lalu nimbal jako Adi Pau. “Enti munyi nya rita kita ditu, aku tu nadai runding bukai tang mai nitih ka sida nya belayar. Kitai nurun nitih ka sida siap enggau perengka lalu ngayau. Lama aku tu udah enda kala beamok enggau munsoh,” pia ko iya. “Enda pia,” ko Laja. “Enggai nyadi kitai tak nurun nitih ka sida enti enda nemu tunga sida. Nya alai tunga enggau endor sida diau diatu go diperunding ka dulu.” Udah nya baru sida lalu nanya Geluma Ini Manang. Iya lalu bepandang ngena Batu Karas, nilik sida Kumang. “Oh, udah jauh bendar pejalai sida tu. Nyin sida udah datai ba menoa Raja Ribai di tasik besai din. Kumang udah disimpan Raja Ribai dalam sangkar besi,” ko iya. “Oh, enti munyi nya, nadai runding bukai tak ngayau kitai maioh tu. Ko aku lusa kitai nurun. Perau pengayau kami kena kitai,” pia ko Sempurai.

Orang maioh lalu serakup madah ka diri deka magang nitih ka runding Sempurai. Dia iya lalu idup isi ninga peransang orang maioh. Iya lalu maut tiang tengah ruai sida Tutong, nya meh rumah orang Gelong nyau guyat-guyat laban iya. Orang maioh pan bela beguai pulai, lalu ngemas diri deka nurun mansang ngayau. Chukop kedua hari bala sida lalu angkat belayar. Adi Pau nyadi ketuai sida ngayau. Sida belayar berari-ari, siang belayar, malam belayar ga sida nuju menoa Raja Ribai. Leboh sida nyau datai semak ke semak, tang apin pegari ga menoa Raja Ribai, dia sida lalu berunding ka ator enggau akal dikena nyerang Kuta Istana Raja Ribai, lalu ngulih ka Kumang dalam sangkar besi ba buntut kuta din.

Dalam pemutus aum sida lalu ngator perau besai sida belaboh dalam sungai jauh air nengeri. Udah nya Adi Pau, Laja enggau Sempurai lalu nyadi pengabas. Leboh maia dini hari dalam dia sida tiga ngerembus ka diri ba nengeri. Sida lalu merati ka jalai tau betiki lalu ngalah ka Kuta Istana Raja Ribai. Sida tiga nya endang sama udah teleba lalu nemu rampa nengeri nya, nya alai sida enda kabat tauka tesat, tang lalu terus sangkai ba telok ari ili geretak istana. Ari nya sida tiga lalu ngerayap niki munggu istana. Leboh maia nya seninjik bendar semoa mensia udah tindok magang. Indah bala soldadu ke empu idar jaga pan tindok dudok ba pala tangga pintu kuta. Sida tiga terus tama lalu meresa endor Kumang, sida nilik iya dalam sangkar besi meda iya benong tindok. Udah nya sida lalu mupok mulai ka diri enggau naka penyampat. Hari pan baru tebererak tawas sida tiga pan datai ga ba bala maioh ke nganti ba perau besai dalam seraka sungai jauh ari nengeri.

Malam nya sida mansut ka diri lalu mupok bedayong gadai-gadai ngagai telok ari ili istana. Sepuloh iko sida tinggal ngibun perau besai, lalu semoa sida bukai betiki magang. Sida lalu belalai ba lindong madang bunga ke ngelingi istana. Ari nya sida ngemata ka gaya, lalu nganti bala soldadu ke jaga tindok magang. Leboh nya sida meda ngepan enggau senyata soldadu ke jaga nya besi magang, tupi besi, tanchut besi, baju besi, terabai besi. Sida nyan sangkoh lalu nangkin pedang siti siko. Sekumbang nya Sempurai seruran kejok-kejok berari isi deka mantap soldadu ke jaga. Tang Adi Pau seruran nekan ka bau Sempurai apin ngasoh iya mantap. Nyau dinihari dalam dia soldadu ke jaga pintu kuta pan ngantok lalu tindok. Adi Pau pan angkat gadai-gadai nyubok soldadu siko ke jaga tali rantai perau sida Indai Pau. Tak dikenuyong ka iya dia lalu dibiau iya enggau nyabur ari belakang kena ba pugu lalu putus, pala lalu mengketik. Ambi iya kunchi ari tuboh jaga nya lalu buka iya kerepau tali perau Indai Pau. Bala sida Indai Pau benong tindok, nadai nemu utai. Angkat ari nya Adi Pau, Laja enggau Sempurai lalu nyubok soldadu ke nyaga pintu kuta. Dikenuyong ka Laja, sekali iya mantap lalu enda menyawa agi. Udah nya sida tiga lalu ngelih ari belakang kuta, lalu tama kedalam istana ngulih ka Kumang. Sida lalu naban ka iya rari nuju Kapal Raja Ribai ke belaboh ba nanga sungai ari ili munggu istana.

Datai sida din nemu bisi orang jaga tiga iko endang ngintu kapal nya. Sereta sida nya meda bala Adi Pau sida lalu rari terejun ka sungai. Sida lalu megau orang bukai di istana. Benong orang kachoh kiroh begau di istana dia bala Adi Pau lalu mansut ka kapal nya ari sungai lalu mai iya ngerapat geretak ngimbai perau Indai Pau. Perau Indai Pau ari puak ai, kapal Raja Ribai ari dalam bendar, perau pengayau sida Sempurai dibai kia lalu ngerapat nisau enggi Indai Pau. Samoa bedil enggau meriam dalam kapal Raja Ribai nya tadi endang sedia magang nganti ka nyelup. Bala sida Adi Pau ngenjing betakinding udah sedia deka bamok. Nya ga munyi tengkelak Sempurai saruran nyau baka setak berari-ari.

Kapala soldadu lalu ngerak Raja Ribai madah ka ia semoa utai ke nyadi malam nya. Raja Ribai lalu meri iya ator ngasoh semoa bala soldadu dalam kuta nya nurun magang lalu ngalah ka munsoh. Bala soldadu lalu nurun magang. Benong sida ngenjing betekisoh nurun, lalu belanda nengah jalai pengkalan kebaroh dia Sempurai lalu nyelup bedil enggau meriam. Nya meh bala soldadu tak lingkap-lingkap jamah leka meriam. Maioh bendar bala soldadu Raja Ribai parai di rantau jalai. Nya alai nadai maioh agi sida tedatai ka diri enggau bamok dalam kapal.

Bala Adi Pau endang udah sedia nganti bala Raja Ribai niki ngagai kapal. Dia sida lalu bepantap munyi ka nesap tubu payan. Sida lalu betumbok munyi tutok ujan selatan. Adi Pau nampak agi kering ari sida bukai, lalu iya ga enda masok laban kebal. Nya alai dengah enggi iya ga maioh agi ari enggi orang bukai. Meda bala soldadu diri nyau ka abis parai, nya baru Raja Ribai seduai anak iya nurun ngagai geretak. Iya lalu ngangau ; “Sapa kita tu ke bangat berani nya munoh anembiak aku nadai kebuah-buah. Uji aku tu laban enti kita bangat berani,” pia ko iya. Mansang Sempurai lalu deka mantap Raja Ribai, iya lalu disakal Adi Pau. “Anang nuan,” ko iya. “Enda nuan tan laban iya.” “Alau mih enti nuan deka. Mansang mih nuan kitu,” pia ko Raja Ribai nganu Sempurai. “Anang kitai agi beamok,” pia ko Adi Pau. “Nama meh kita udah munoh bala anembiak aku ngemaioh tu ?” pia ko Raja Ribai.

“Badu enda munoh meh kami. Nuan ga ngurong Kumang. Nya alai kami tu datai ngulih ka iya,” ko Adi Pau nyaut. “Kita enda tau ngerampas iya ari jari aku. Iya bisi penyalah,” ko Raja Ribai. “Nadai iya penyalah, tang iya semina diperinsa ka nuan ngapa,” ko Adi Pau. Enda liat agi ati anak Raja Ribai ke bediri semak dia ninga seduai betalat ka jako, dia iya lalu ngedar ka enteran sangkoh lalu nikam ka sangkoh numbok Adi Pau. Sambut Adi Pau ngena jari kiba. Iya lalu engkechit ari perau ngagai geretak, lalu nyurong ka sangkoh nya ngagai anak Raja Ribai. “Nah,” ko iya “Sangkoh nuan.” Jengkau anak Raja Ribai sangkoh nya lalu dientak ka iya baru ngagai dada Adi Pau, disilat iya ulih, lalu patah enteran sangkoh nya. Meda baka nya lalu engkejok Sempurai lalu mantap anak Raja Ribai, tang enda masok. “Anang !” ko Adi Pau ngerara Sempurai. “Awak ka aku siko pan ngelaban sida, enti sida deka umbas meh.” Sempurai lalu pulai ka dalam perau baru.

Raja Ribai seduai anak lalu berengkah bepantap ngelaban Adi Pau. Sida tiga sama enda masok. Nyau keleju sida tiga ke bepantap dia Raja Ribai seduai anak iya lalu sama- sama ikak. Seduai lalu ngaku diri alah. “Alah meh kami duai laban nuan,” ko iya nganu Adi Pau. “Tang aku minta kasih ngagai nuan lalu ninggal ka Kumang ditu, laban aku deka bemenantu ka iya.” “Aku enda nemu nyaut jako nuan nya, laban kami tu ukai nurun ngator iya belaki. Kami tu datai sigi deka ngambi iya pulai. Ninga rita iya dikurong nuan dalam sangkar besi. Enti nuan ngemansang ka jako deka bemenantu ka iya, nuan tau betemu enggau sida apai indai enggau menyadi iya empu,” pia ko Adi Pau. “Enti munyi nya alah meh aku tu laban nuan,” ko Raja Ribai. “Nya alai kena aku madah ka penyalah diri, aku meri kita kapal nya kena kita pulai, lalu kembuan kita. Samoa perengka dia diberi aku ngagai kita magang. Mangkok Mas tu bai kita pulai, lalu beri ngagai Kumang. Tu kena aku besabi ka penyalah diri udah ngurong Kumang dalam sangkar besi ngelamatu.” ko iya

PULAI NGAYAU

Udah nya sida lalu mupok belayar mulai ka diri. Kapal Raja Ribai lalu dibai sida pulai. Lantang bendar ati sida pulai, lalu semoa orang ke kena pansa sida ngenong magang meda pemanah gamal kapal Raja Ribai. Leboh sida datai semak menoa sida di Gelong, orang lalu tekenyit ninga munyi redup injin kapal Raja Ribai ke dibai bala Adi Pau pulai ngayau. Sida sampal betilik ka kapal nya, leboh iya nyau semak sida lalu tepeda ka orang nyau baka kachau dalam nyin, lalu meriam enggau bedil baka chukak ba ujong luan. Orang di rumah lalu berati deka rari. “Kada enda kapal Raja Ribai datai deka nyerang kitai. Nyangka bala Adi Pau tu udah abis jamah sida. Manah kitai rari.” Pia ko sida.

Orang lalu baka debar rari. Sida ke rari nya sampal bendar, iya ke kait irit, sida ke buta ma. Semina tinggal tudah Geluma Ini Manang aja agi ngintu rumah. Leboh kapal nya sangkai, nya baru iya nilik ari tanju, meda tak Adi Pau pansut ari kapal. Udah nya baru Geluma Ini Manang tu tadi nurun ari rumah lalu bejako enggau sida Adi Pau. Nya baru orang nemu berita ke menuku. Orang lalu riuh nurun ka pengkalan, lalu bebantai ka samoa perengka ke ulih sida pulai belayar. Utai ke ulih sida nya maioh macham, sida tajau, bebendai, setawak, baku, engkerumong enggau gong. Lemai nya maioh orang datai ari ulu, ari ili ngulu pemulai sida ke udah mindah. Sereta udah badu makai, orang lalu begulu ba ruai Tutong deka nanya ka berita. Udah tembu nusoi semoa berita sida ke ngalah ka Raja Ribai, Tutong lalu mai orang baum besai.

“Pasal berita kami ke ngayau nya udah ditemu kita, lalu tu siti agi jako,” ko Tutong. “Bala sida ibu Indai Pau ke pegi tu kemari bulih bendar reta, lalu nambah ka nya kami lalu diberi Raja Ribai kapal. Kapal nya baru ba kitai menoa tu. Ngelama tu kitai nadai kala udah ngembuan pesaka bansa nya. Kapal nya ukai enggi siko enggau dua, tang iya enggi kitai sekayu menoa sekayu ai tu. Nya alai aku tu betanya ngagai kitai maioh ke ditu, nanya ka chara kitai ngintu, kitai mela utai ngemesai nya.” Ko Tutong.

Udah nya orang lalu belator ka bagi tuboh nyadi kepala megai kapal nya. Lama bendar sida belator laban uboh kelalu bangat enda chukop bisi penau megai utai ngemesai nya. Deka sida ngengkah ka jako ngasoh Adi Pau, iya amat baka ke bisi penemu, tang kelalu nadai gamal. Deka sida ngasoh Sempurai, iya amat rajn sereta sikar ngereja pengawa, tang kelalu lengkar, dalam pia iya lengkar enti iya deka mending ka penemu orang bukai pama ga agi, tang iya suah agi ngereja pengawa ngati ka diri enda betanya dulu ari orang maioh. Siti ga agi penimpang Sempurai, laban iya enda nemu jalai mansut ka jako. Nama iya mansut ka jako lalu salah. Nya alai mar bendar ga sida ngengkah ka jako ngatur iya megai pengawa ngemesai nya. Deka sida ngasoh Tutong, iya amat tuai endang megai orang di Gelong Batu Nakong, tang ga timpang mimit nadai penemu kena bejalai ka pengawa megai kapal ngemesai nya. Nyau kelama-lama, puas sida berunding, nya baru orang maioh mutar ka jako nanya Aya Bujang Tuai.

Nya alai saut Aya Bujang Tuai, “Amat munyi ko kita maioh nya amat mar kitai belator ka tuboh megai pengawa ngemesai tu. Enti kitai salah pilih tau endar pulai ka pengerusak. Nya alai awak ka jako putus sekali. Nuan, Sempurai meh megai kapal nya ka kitai,” ko Aya Bujang Tuai. Sempurai lalu nyaut madah ka diri deka, laban nya endang pengawa diniat ati iya. Jako sida lalu putus dia. Nya alai Sempurai lalu nyadi tuai megai pengawa bejalai ka kapal sida ke diberi Raja Ribai.

Aya Mamau lalu nibar ka jako seleka. “kami ketuai tu baka kepayang ngada ka dilah, bejako nemu tang nereja pengawa enda nemu. Aku, Sempurai, lantang bendar ati meda kitai udah bulih kapal besai diberi Raja Ribai. Nya alai lantang ga ati aku meda nuan udah dipadu ka kitai maioh tu megai pengawa bejalai ka iya. Kita ke biak amat landik, amat nemu, tang dalam pia kita landik enggau nemu, kita enda tau enda betuai. Reti betuai ko aku, kita enda tau enda betanya, enda tau enda bepinta ka penemu ari pangan. Baka perau beguna ka gandong, baka rumah beguna ka sukong.”

Udah tembu jako nya baru Tutong mutar ka jako siti agi nyebut diri mai sida serumah nya begawai. Orang maioh lalu serakup nyaut madah ka diri rindu ninga penemu orang ketuai. Nyadi gawai tiga serak deka dikereja sida. Kesatu gawai ketanju kena nyambut semoa pala ke ulih ngayau, kedua lalu beserak enggau gawai nama ka tajau, ketiga gawai miring mela kapal. Pengelama timpoh gawai alai nyadi dua minggu, laban sida serumah deka ngaga tuak. Dalam kandang dua minggu nya, dia sida Indai Pau bejait ka jako deka bejadi ka Kumang seduai Adi Pau. Nyau ka empat serak gawai sida melah pinang. Nya alai leboh Kumang ditanya sida, dia iya madah ka diri deka. Leboh iya bejako madah ka diri deka, lalu tebuka dih karong Adi Pau tu tadi. Iya lalu bebali pulai nyadi Keling.

Tekenyit Sempurai meda nya tak Keling, dia iya lalu enda berasai angkat lalu merap iya. “Enda meh aku belaba ka nya nuan enggau kami begulai ngelamatu deh buat. Patut aku tak semampai asai begulai enggau nuan,” ko Sempurai. Nya alai laban gawai nya besai sereta maioh serak, samoa orang ke semakai enggau sida kena ambi magang. Iya pan chukop timpoh kedua minggu, gawai pan lalu nyadi. Leboh ari agi tawas orang maioh miring lalu munoh babi di pengkalan. Nya nama pengawa mela kapal. Dalam nya orang mengap. Dua bengkah orang diasoh mengap. Sebengkah nya mengap ka gawai tajau, lalu sebengkah nya mengap ka gawai burong . Dini hari nya orang lalu bejako melah pinang Kumang seduai Adi Pau. Tang diatu iya udah pulai nyadi Keling baru.

Nyau tawas hari pagi nya, orang lalu berengkah berayah ke tanju. Sekumbang ke berayah nya, dia Sempurai seruran kais-kais berari manjong. “Sempurai aku tu ! Bujang Berani ! Tu baru ia ila leboh aku megai ulu !” ko iya. Nyadi sida Aya Mamau, Aya Bujang Tuai, sida Apai Migu, Apai Jangkam Bulan ke dudok mankang pun sabang seruran ngeriut berari kening meda ulah sereta jako Sempurai. Iya bejako selalu enda enggau pelaba. Sida ketuai lalu berandau enda inggar enggau diri sama diri : “Mar meh kitai ngengkah ka jako arap ka sida ke biak ngereja pengawa. Keling nya endang patut dikarap ka kitai megai pengawa, tang iya kelalu enggai entap diau di menoa.” Udah tembu berayah nya tadi, gawai pan abis, pengabang maioh lalu mulai ka diri. Dalam pia jako orang ketuai ngumbai diri mar arap ka Keling tang endang sigi iya ga ngulu ka sida di menoa nya ngereja pengawa. Nama iya bisi di menoa pengawa sida enda kala enda mujur. Nya alai sida di menoa nya diau lantang senang dalam pengawa lalu kitai pun baka sida iya lantang senang gayu guru panjai umor.