Apai Sali Nginti

Apai Sali Nginti

Hari siti Apai Sali nyau berasai puang laban nadai pengawa agi dikereja laban padi sida ke dikumbai iya mansau nya endang bedau tau diketau tang semina murai aja. Deka nurun nangkal nyelutung, ngasu beburu baka orang mayuh pan iya nyau enda tentu ransing agi asai ati udah bekau semua utai ke dikereja iya sebedau tu tak puntan memagang. Lama tudah Apai Sali duduk dunga dunga nunga Sali seduai indai iya Enchelegit ngemata ke iya nya nganyam sintung kena nyendia kediri ti deka ngetau padi ila.

Apai Sali pan lalu madah ngagai Enchelegit, “Apo Indai Duat, naka iya enda nyamai asai ati aku sehari tu tak bemua ke akan aku Apai Seumang Umang udah bekau iya ke ditanjah aku ngena ai angat suba. Nama enda berita sida menyanak diatu kini ?”

“Nama main nuan tak munyi nya dih Apai Duat, bisi enda manah kenyap nuan ngagai iya malam tadi ?” pia ku saut Indai Sali.

“Enda Indai Duat, tak nyau setaun enggai tu kitai sebilik udah enda nemuai ngagai sida menyanak. Nya alai aku tu lagi deka nemuai ngagai sida. Enda patut iya bengat ringat ngagai aku ketegal betu nya dih laban iya ke beduan aku suba.” pia ku Apai Sali ga nimbal Enchelegit.

“Barang ku nuan ga Apai Duat, tang bejimatka enggaika nuan tak dikeduan iya baru lagi. Sinu bendar aku meda nuan dikeduan iya belama ngelama tu,” pia ku Enchelegit nangkan iya ke ngumbai diri deka nemuai nya tadi.

Nama agi dih nyau sejengkal kenu ku gamal mua tudah Apai Sali ninga bini iya Enchelegit nya enda nagang iya nemuai ngagai akan iya Apai Seumang Umang. Lalu beguai guai iya ngambi ma ke endang selalu dibai iya turun, tangkin iya duku ilang butuh kunding ke semampai mai nasib nama iya nurun begiga sereta lalu san iya sumpit tapang ke digelar iya “Belalang Ngelayang Mali Lebu, Laja Terebang Nemu Jelu”. Lalu baka nya ga nyau kepik kepik ga temilah payan tangkin iya ba punggung alai iya nyimpan laja ke endang dikirai iya beremdam ba ipuh dirakit enggau rachun ular belalang enggau ular tedung ambi ke bisa agi kena munuh jelu.

Bejalai kenu ku Apai Sali tu naka iya deka pengelantang ati nebing tisi serarai umai sida ninting ke bukit nuju rumah orang Panggau Libau Lendat Dibiau Takang Isang. Bejalai lubah kenka gaya Apai Sali tu enda nyalah baka singkang lemambang maya berayah. Lebuh ke mansa batang melintang ba jalai lalu disimbang iya beluntang dua, lebuh ke tesipak ke tunggul tuga lalu dibantun iya tuga nya lalu ditikau ke iya sampai ke nyau enda di peda. Ensung iya sepemanjai jalai nya nyau naka iya pengerami enda nyalah nyalah baka munyi burung ke makai buah kara, naka ga meredu munyi ensung apai Sali.

Nyau kelama ke baka nya tak enda berasai dih iya pan nyau datai ga ba kaki tangga rumah Apai Seumang Umang, iya nya rumah iya empu ke dibai seduai iya Apai Seumang Umang besilih suba. Apai Sali lalu enda kakang ngangau ke akan iya nya.

“Ooi Akan Apai Seumang Umang, nyadi rumah nuan sehari tu ?” pia ku kangau Apai Sali ari tanah.

Ninga nya bisi temuai tudah Apai Seumang Umang ke benung gali pan lalu ensugau laban ke baru gali ketegal lelak baru pulai ngabas panjuk pagi nya tadi. Nama agi dih nyau tepipir kenu ku gaya singkang kaki tudah Apai Seumang Umang beguai-guai ngagai lubang penyenguk deka nilik temuai ke datai sambil ngelaluka orang nya niki.

“Lalu Akan lalu, niki mih, nadai penti nadai pemali rumah kami ditiki nuan ke sehari tu,” pia ku tudah Apai Seumang Umang laban ke gaga bendar ati meda Apai Sali nemu ngundang iya taja pan seduai iya semampai ke belaya ketegal ti ngelakar tauka ngemedis pangan diri belama.

Nama agi dih Apai Sali lalu beguai guai niki, seduai pan lalu beberap enggau pangan diri laban ke lama bendar udah enda betemu. Apai Sali pan mimit nadai mih nyangka Apai Seumang Umang nya agi deka alai iya nemuai. Sekumbang ke berandau nya seduai iya mayuh macham utai dikenang nitihka pendiau sida iya rambau nya kelia. Nyau enda berasai peda hari pan nyau mantar tengah hari, Apai Sali pan lalu madah kediri deka pulai laban ingatka semaya diri ke madah ngagai Enchelgit, iya nya nemuai enda lama aja ngagai Apai Seumang Umang.

“Deka mupuk aku tu Akan, laban ke endang madah kediri nemuai enda lama ngagai kita menyanak tu tadi,” pia ku Apai Sali.

“Lapa nya tak ngerampas dih Akan, nadai nya utai dipeguaika nuan dih,” pia ku Apai seumang Umang nan ke iya laban ke agi belala berandau.

“Kati ku enda baka nya dih Akan, aku tadi ga endang besemaya enda lama. Enggaika Indai Duat tak irau ngapa ga nganti di rumah,” pia ku saut Apai Sali.

“Lagi mih Akan, nganti udah merarau enda aku nan ke nuan agi. Aku bisi bulih pelanduk lebuh ke nginti tadi,” pia ku Apai Seumang Umang bungah enggau Apai Sali.

“Amat nya Akan kitai belauk pelanduk lagi?” pia ku tanya Apai Sali.

“Dini nya deka bula dih Akan, merarau mih enggau kami dulu,” pia ku Apai Seumang Umang bendar nan ke iya mai merarau tengah hari nya.

“Au mih enti tak ngenyamai nya lauk, deka ga aku enggau kita merarau dulu enggaika tak puni ngapa pulai ba serantu jalai lagi,” pia ku Apai Sali ga nyanggup deka enggau sida Apai Seumang Umang merarau.

Nama agi dih Indai Seumang Umang ke berapi nya naka iya penyampat. Nyau dengut dengut munyi kesuh suling nya kena iya menyadi ke api ambika jampat agi mau ba dapur. Nama nya disurung nama nya ditarit iya kayu api nya ba dapur ambi ke jampat agi nyadi sereta ngemansau ke semua utai. Sekumbang ke nganti Indai Seumang Umang nya berapi Apai Sali seduai Apai Seumang Umang pan lalu nampung randau seduai iya baru baka selama.

“Tak ngerichau ke randau tua aku tu Akan, tak nyelai munyi cherita nuan dinga aku tadi maya ke ngumbuk mai aku merarau enggau kita tengah hari tu,” pia ku Apai Sali.

“Nama utai ke deka nuan nya dih Akan,” pia ku Apai Seumang Umang.

“Tadi nuan tak bisi nyebut diri nginti bulih pelanduk. Kati amat nya Akan,” pia ku Apai Sali laban ke irau ati enda kala ninga utai munyi nya.

“Kati deka nya bula dih Akan,” pia ku Apai Seumang Umang ngelanjurka Apai Sali. Tang ke bendar pelanduk nya ulih iya manjuk ukai ulih nginti. Nyadi iya ke nyebut pelanduk nya ulih nginti laban batang pejalai iya pagi nya endang ngabas ginti taut ke ditan iya ba kaki umai sida ke taun nya. Nyadi benung ke mulai kediri dia iya lalu ngabas panjuk ke endang lama udah di tan ke iya sabar ba tisi umai sida mega. Benasit bendar ga pagi nya panjuk iya nya bulih pelanduk ke lalu dibai iya pulai ke lauk sida.

Apai Sali lalu ituk nanya Apai Seumang Umang baru ga laban deka nemu baka ni chara iya tau nginti pelanduk sedangka utai baka tu sigi nadai kala dikereja sida serambau nya kelia.

“Baka ni chara nuan nginti pelanduk nya dih Akan,” pia ku iya nanya Apai Seumang Umang.
“Nadai nya tak tentu beleman dih Akan, nitih ke ajar sida niang apai kelia,” ku Apai Seumang Umang nyaut iya.

“Padah ke mih Akan laban aku tu tak naka iya deka makai belauk pelanduk,” ku Apai Sali.

“Eh nadai utai bukai nya Akan, mata ginti ke dikena kitai nya ukai mata ginti ke dikena kitai ke ngelama tu laban tu jelu diau ba darat enda sebaka enggau ikan ke diau dalam ai, mesti ngena mata ginti digaga ari bangkang tang ruit iya gaga besai ke,” pia ku Apai Seumang Umang ngajar sereta ngemelika Apai Sali.

“Nama utai ke umpan iya nya dih Akan, ka nyadi ngena buah buan aja kini,” pia ku Apai Sali.

“Enggai iya nyadi baka nya Akan, ukai nya tak disimpan kitai dalam sangkar iya ngemudah nya ulih. Mesti ka beumpan ngena telu manuk panduk mansau, asi pulut lulun, buah pisang tanduk udah mansau, rangki, penganan iri enggau kelupis,” pia ku Apai Seumang Umang.

“Ba dini dih alai nuan nan ke ginti nya alai tak mudah bulih pelanduk dih Akan,” ku Apai Sali ga laban ngumbai cherita Apai Seumang Umang tu bendar.

“Nya ba tingkah ungkap ba ujung antara umai kitai ba Nanga Batang Panggau,” ku Apai Seumang Umang nya majak ngemulaka Apai Sali.

“Enti baka tu deka mih aku nguji nginti munyi ku nuan nya Akan, pagi ila tumu aku nurun ngicha ke mayuh ulih, “ ku Apai Sali.

“Nya mih nama nuan bisi meda tingkah ke bisi ditanchang aku ngena kain kesumba dia mih alai iya Akan, aku enda ulih ngulu ke nuan baka ke nginti burung tiung suba,” ku Apai Seumang Umang madah ke endur sereta iya pan nangi kediri enggaika Apai Sali nemu iya ngemula sereta bulih pemedis baru.

Sida sebuat pan lalu merarau udah semua utai di panduk Indai Seumang Umang nya mansau. Apai Sali bulih bendar makai nyau dua pinggai asi empa iya lalu pelanduk ke di bantai ke lauk nya tak setengah endang empa iya siku. Nyau munyi kechap babi iya makai empa pemasuk iya belauk ke pelanduk. Gamal iya pan nyau kasak-kasak baka orang ke nyera nangi kediri enda ampit lauk agi. Iya mih nyau tembu makai Apai Sali pan lalu madah kediri ka pulai laban ka nyendia ke umpan ke deka dikena iya nginti pelanduk pagila.

Datai mih Apai Sali ba rumah, iya lalu nebang pun pisang tanduk sida ba ujung tanju laban ke baka ke nemu lalu bisi mansau ga buah pisang tandok nya tadi. Telu manuk ba kurungan di baruh rumah sida nyau abis dikerau iya alai ngiga telu manuk. Iya lalu ngasuh Indai Sali ngaga penganan iri enggau kelupis. Iya pan lalu beguai ga ngelulun asi pulut.

Nyau meda ulah Apai Sali tu tak nyelai dia Indai Sali lalu nanya.

“Kapa nuan utai ngemayuh tu dih Apai Duat, bisi deka nemuai sida Apai Seumang Umang,” ku Enchelegit nya tadi.

“Nadai nya utai ditanya ke nuan Indai Duat, nadai temuai tang deka di bai aku nginti pagila,” pia ku Apai Sali nyaut Enchelegit.

Indai Sali pan enda bemunyi tang ngereja utai munyi deka diasuh Apai Sali nya mega. Apai Sali lalu beguai ngambuh ngaga mata ginti ari bangkang laban enggaika enda bulih enti enda nitih ke ajar Apai Seumang Umang. Rangki ke endang selalu di kena iya pan lalu di taruh iya manah enggai ke nadai ke umpan iya nginti pelanduk.

Tinduk malam nya Apai Sali nadai tentu meruan laban ati iya kelalu gagit ka nurun nginti pelanduk, nyau kasak kasak iya laban ke nganti hari tawas. Iya mih udah dinga munyi kukuk manuk iya lalu beguai guai ngemas rengka ke ka di bai iya nginti sehari nya. Udah hari nyau teberingkas tawas Apai Sali pan lalu nurun laban nangi kediri nadai utai ulih. Ma iya numbas iya ga pemerat laban umpan iya ke mayuh macham.

Tudah Apai Seumang Umang pan baka nya ga laban ke ka beambi ulih ba pemeli Apai Sali. Iya pan nadai tentu meruan tinduk laban nganti hari tawas. Lebuh hari udah siang Apai Seumang Umang lalu beguai guai mai ma sereta nuju ungkap ba tingkah ke endang udah di kelai iya dulu ari nya. Ba serantau jalai deka mansang ngagai ungkap nya dia Apai Seumang Umang lalu ngumpul semua buah buan ke bisi dipansa iya. Datai iya ba ungkap ba baruh tingkah nya lalu ngachir ke buah buan nya tadi ambika dikumbai Apai Sali bekau empa pelanduk. Iya pan lalu belalai ba ungkap nya nganti Apai Sali ke datai nikauka mata ginti ke bisi umpan munyi ku iya nya tadi.

Datai ba ungkap ke udah ditanda Apai Seumang Umang nya dia Apai Sali pan lalu ngaitka buah pisang tanduk ba mata ginti bangkang nya lalu enda chamang chamang, lalu di tikauka iya ngagai ungkap laban udah meda bekau buah buan nya tak baru bendar nyau beachir achir ba alai nya. Sereta mih buah pisang nya dinga iya meredup terengkah ba baruh tingkah nya, dia sepi iya ginti iya nya tak ngentun. Tang lalu entun iya ga ginti tang umpan iya nya lalu abis sereta ruit ginti nya pan lalu lurus.

Lalu dibingkuk ke tudah Apai Sali baru ga ruit ginti nya sereta dikait ke iya umpan asi pulut lulun. Peda iya baka nya ga gaya utai ke nyadi. Lalu uji ke iya baru ga ngena umpan kelupis, tang tak semina naka entun aja ke bisi di asai ke iya. Dia nyau enda berasai tudah Apai Sali pedis ati laban lalu nadai utai ulih sepagi pagi nya. Iya pan lalu nguji baru ga ngena umpan telu manuk mansau. Tang lalu agi lebu ga iya ke nginti sepagi nya sereta chukup lelak laban nadai utai ulih munyi ku ati. Ke pengabis iya Apai Sali lalu semadi bendar ngerurutka rangki ke di kena iya tang iya nyau nadai runding agi laban kelalu ngarap ke tusi pangan iya Apai Seumang Umang. Iya lalu melit rangki nya ba mata ginti lalu di tikauka iya baka ke udah mega ngagai ungkap .

Tang semua umpan Apai Sali pan nyau abis. Iya lalu mulai kediri laban berasai lelak sereta rugi nadai bulih pelanduk munyi ku tusi Apai Seumang Umang. Datai iya di rumah Enchelegit lalu beguai nyerungkai ma iya tang tekenyit laban meda nadai utai ulih. Apai Sali pan lalu nusi penungga iya ke nginti sepagi nya tadi. Ninga tusi iya munyi nya dia Indai Sali lalu ketawa rakah rakah geli ati meda laki iya enda nemu diri dikelakar Apai Seumang Umang.

Udah mih nemu diri dikelakar Apai Seumang Umang dia Apai Sali lalu berunding ka malas Apai Seumang Umang baru baka cherita seduai ke nginti burung tiung menya. Iya pan lalu bejalai baru nemuai ngagai Apai Seumang Umang. Datai ba rumah Apai Seumang Umang dia Apai Sali lalu nusi cherita bula madah kediri bisi bulih pelanduk lebuh nginti pagi nya. Apai Seumang Umang semina tuchum aja ninga cherita iya laban gaga kediri udah ngelakar Apai Sali.

Apai Sali pan lalu madah kediri bisi nemu ungkap ke manah alai tau endur nginti pelanduk iya nya ba Nanga Sungai Gelong Batu Nakong. Ninga cherita Apai Sali nya nyau deka sebaka dia Apai Seumang Umang lalu ngadang sereta deka beduan iya baru mega. Apai Seumang Umang pan madah kediri deka nguji nginti ba ungkap ke deka Apai Sali nya tadi tumu pagi ila.

“Nama utai ke umpan enti nginti dia dih Akan, ni nemu nyangka tak bidik bisi nasit bulih mudah ila,” pia ku Apai Seumang Umang nimbal.

“Penganan jala, lempis ikan, atau manuk enggau pending babi,” pia ku Apai Sali nguji deka malas Apai Seumang Umang ke udah beduan iya.

Ninga munyi nya Apai Seumang Umang lalu madah kediri deka pulai laban deka nyendiaka umpan ke deka dikena iya nginti tumu pagila. Arap bendar Apai Sali laban Apai Seumang Umang udah ulih dikemula ke iya enggau cherita nya. Apai Sali naka iya pengaga pulai lalu ketawa rakah rakah niti jalai Apai Seumang Umang pan lalu beguai ga begigaka utai ke umpan. Nyadi umpan ke digiga Apai Seumang Umang iya nya sarang kesa, sarang semada, telu matu enggau tai manuk lintung ke udah rangkai ba selap kurungan ba baruh rumah sida. Lalu mata ginti ke deka dikena Apai Seumang Umang nya endang tak mata ginti lelabi ngulih ke ruit iya besai agi sereta kering.

Pagi hari siti Apai Sali tumu bendar dani laban deka ngipa Apai Seumang Umang ba baruh ungkap laban ngarap kediri bulih umpan ke kena Apai Seumang Umang nginti. Apai Seumang Umang pan baka nya semina ke dudi mimit ari Apai Sali. Datai dia Apai Seumang Umang lalu ngait ke tai manuk lintung ke udah rangkai ba selap kurungan lalu tikau ke iya ngagai baruh ungkap nya. Sereta mih mata ginti nya udah terengkah dinga iya meredup, peda tak lalu beguai ngentun sereta kitau kitau tali ginti nya kual kual. Lalu entun Apai Seumang Umang dinga iya bisi mengkakai utai adap ke tunga ginti nya.

Kati ku enda mengkakai ga mata ginti nya ngait tapa jari tudah Apai Sali ke beguai guai nyambut umpan ke di kumbai iya utai meruan. Tang nasib ga laban iya jampat ngingkaska mata ginti nya enti enda pia balat tapa jari iya charik entun Apai Seumang Umang. Nama nyau beketup ngeli Apai Sali udah ke mengkakai sekali nya tadi. Apai Seumang Umang semina tuchum aja betati ke utai ke nyadi.

Udah nya tikau ke Apai seumang Umang baru ga mata ginti iya ke beumpan ke telu matu. Iya mih sereta ginti iya nya terengkah dinga iya tak ngapooo munyi utai sereta lalu bedemuh. Kati ku enda baka nya ga telu matu nya sereta ditikau lalu disambut Apai Sali tang salah lalu kena pala iya. Dini enda bedemuh natka seput ensium bau telu matu nya ke abis malut tubuh iya.

Udah nya ditikauka Apai Seumang Umang baru ga ginti tang umpan iya ke sekali tu iya nya sarang kesa. Sereta ginti iya nya terengkah dinga iya lalu baka setap munyi tempik utai ba baruh ungkap nya. Kati ku enda ga tudah Apai Sali betempikka tubuh iya ke nyau abis balut kesa. Gamal Apai Sali pan nyau baka ringin laban ke balat dikeduan Apai Seumang Umang sepagi pagi nya.

Udah nya Apai Seumang Umang lalu nikauka ginti iya ke beumpan ke sarang semada nya baru. Iya mih lebuh ginti iya nyau udah terengkah ba ungkap nya dinga iya tak nyau rauh rauh lalu entun ginti nya pan balat bendar ari ke udah. Nama agi lalu kejut ke Apai Seumang Umang ginti iya nya tadi lalu entun iya enggau penapat inat. Dinga iya ingar agi ga rauh nyawa orang nya sereta majak semak ke semak ngagai iya ke ngentun ginti nya. Iya mih nyau di peda tak enda mukai mukai nemu nya tak tudah Apai Sali ke kena kait ginti Apai Seumang Umang.

Apai Sali pan lalu rauh ruah.

“Umbas Akan umbas nuan ngentun ginti nya , aku tu akan nuan Apai Sali.,” pia ku iya.

“Nama main nuan ba ungkap nya dih Akan, dini enda pelanduk ke deka diginti aku rari kachau nuan,” pia ku Apai Seumang Umang ngaga diri ringat sambil ketawa geli ati.

“Ukai Akan aku mih tu, badu agi nuan ngentun ginti nya, kasih ke aku. Peda nuan jari aku nyau abis telih. Tubuh aku nyau mirah digigit kesa enggau semada lalu nyau bau but laban telu matu,” pia ku Apai Sali enggau sabak sabak.

Nama agi dih meda baka nya lalu ketas Apai Seumang Umang ga tali ginti iya nya, peda tak lalu tebelunging ga tudah Apai Sali labuh ari tingkah ngagai ungkap baru. Nya ga gaya tudah Apai Sali nitih ka sempama “Udah ga labuh lalu ditinggang lesung", ga tudah tuai. Apai Seumang Umang pan lalu mulai kediri ninggalka tudah Apai Sali dia. Apai Sali nyau naka iya pemerinsa ga mulai kediri laban uti Apai Seumang Umang.

Jari Apai Sali nyau abis telih laban ginti Apai Seumang Umang laban Apai Seumang Umang ngena ginti lelabi lalu enggi Apai Sali nya ginti bangkang dini enda nyamai di pelurus ke Apai Seumang Umang. Umpan pan pia mega enggi iya utai diempa ke nyamai tang enggi Apai seumang Umang tak semua utai ke ngasuh Apai Sali tau pedis magang.