SALUMPONG KARONG BESI

● SALUMPONG KARONG BESI 

“Nama jejulok nuan unggal munoh sambok? Nama gela nuan unggal mantap sawa?” pia ko iya.

“Barang dulu nanya, nya meh dulu madah ka jejulok diri,” pia ko saut Mabong Panggau.

Nyau kepuas ke besaut ke jejulok pangan dia Mabong Tuai lalu madah ke jejulok Mabong Panggau selalu ninggang enggi iya belama. Iya lalu angkat baru mai siko nya bamok.Belaban baru meh seduai iya dia, sebulan nandan di langit, setaun nampug di bukit. Nyau kelama baru lemah di pah tampong patong. Iya lalu rebah ka kiba, tang agi disangga janga ulu ilang. Rebah ga iya ka kanan, tang agi disangga enteran sumpit tapang. Iya lalu madah ka diri mati.

“Parai meh aku tu unggal. Alah aku laban nuan. Nyadi pala aku enti kita beguna ka iya tau dibai kita pulai, unggal, tang uchu aku ila agi benama Mabong. Iya mega kering baka aku. Iya nya ila nyadi ka ganti aku di langit tu,” pia ko Mabong Tuai.

Mabong Panggau enda bemunyi ngila ka Mabong Tuai deka ngapus ka seput diri. Udah nya iya nampong jako diri baru.

“Parai meh aku tu unggal. Tang apin aku ngapus ka seput diri, dulu aku dek ananya ka nama enggau menoa nuan. Dini alai ai alai nuan mandia teruban gela? Dini tanah alainuan berumah terubah ada? Lalu anak sapa nuan tu unggal?” pia ko iya.

“Nadai ditanya ka nuan meh unggal,
Aku tu meh dikumbai orang
Mabong Remaung Panggau,
Anak Antu Ribut Nyepu
Mangka Katuchong Panggau Libau.
Nya menyadi aku, Salumpong, unggal,
Salumpong Karong Gemala
Bujagn Gelinggang Ayong Menoa,
Salumpong Karong Besi
Bujang Gelinggang Ayong Nengeri.
Siko nya apai aku, unggal,
Keling Gerasi Nading,
Bujang Berani Kempang.
Orang Panggau meh kami tu unggal,”
Pia ko Mabong Panggau.

“Patut meh aku alah laban nuan unggal. Nuan ga orang Panggau. Aku ga nemu ti kita Panggau sigi enda kala alah jamah laban orang,” pia ko Mabong Tuai. Iya lalu mejam ka mata diri, seput iya pan apus ga.

Udah siko nya parai, nya baru Mabong Panggau lalu bejalai meda ka semua bangkai mensia ke parai. Udah nya baru iya bejalai ngagai endor Salumpong ke gali. Iya lalu ngangkat ka siko nya. Salumpong pulai gerai lalu kering baka selama tu. Nya baru seduai iya ngidup ka semua orang bukai ke udah parai.

“Es,” pia ko Pandak Sagatak. “Nama kebuah ngiroh diri ngidup ka bala munsoh. Kapa sida enda kunjoh dia.”

“Es,” pia ko Bungai Nuing.

“Nuan enggai enda bejako. Lapa, enti orang enda ngambi enda tau pulai ari tasin nyin.”“Aku ga agi idup. Sida nya udah parai. Nadai guna kitai ngiroh diri enggau munsoh,” pia ko Pandak Sagatak.

Nyadi semua bala munsoh enggau orang serumah dia udah pulai gerai baru diidup ka seduai nya tadi. Dia Tedong Lampong Besuloh Tulang, Mantok Mengkanjong Enda Alah Tipang lalu mai bala sida Mabong Panggau niki ngagai rumah iya. Dia sida lalu begawai. Tujoh hari tujoh malam orang rami makai ngirup, ngajat enggau macham main bukai.
Udah bekau nya bala orang pen mulai ke diri ngagai menua diri empu magang. Bala sida Keling apin pulai, laban agi ditan ka mentua Salumpong Karong Besi diau dia.

Kira sebulan sida Keling udah diau dia, nya baru sida madah ka diri deka pulai. Iya madah ka diri lalu deka mai Salumpong pulai. Tang Tedong Lampong metua Salumpong enda ngasoh seduai nya enggau sida Keling pulai ka Panggau. Dia deh Salumpong empu madah ka diri enda tau lama diau di langit din. Ninga nya baru Tedong Lampong badu agi nan ka iya. Dua hari udah nya, nya baru sida lalub ekemas deka mupok pulai ka Panggau.

Datai sida di pendai, dia orang ke indu lalu begau nurun ari rumah ngambat penatai sida pulai ngayau. Kumang lalu tegepang meda pemajik bini Salumpong. Iya lalu beguai pulai ka rumah baru ngambi labu kendi. Datai iya dia lalu ngasoh Bungai Angi nyiuh ka ai ari kendi.

“Siuh ka ai nya ulih nuan, Endu. Enti nuan enda tisi ka labu kendi nya penoh bru, nuan enda tau ka menantu aku,” pia ko Kumang.

Bungai Angi lalu nyiuh ka ai nya. Di isi iya baru lalu penuh agi ari ke dulu tadi. Udah nya baru Kumang mai iya niki ka rumah. Datai di rumah, Kumang lalu nyembui padi tujoh lanji.

“Tutok tu Endu, enti nuan enda tetutok ka padi tu dalam sahari, nuan enda tau begulai sajalai enggau kami di Panggau ditu,” pia ko Kumang.

Bungai Angi lalu nutok padi. Enda sampai sajam alai tembu tutok iya. Udah nya Kumang lalu nyua ka iya taya sigi enggau bemban sabatang ngasoh iya ngaga pua enggau tikai.

“Gaga, Endu, pua tujoh lambar, tikai tujoh lambar ari tu,” pia ko Kumang. “Enti nuan enda tegaga ka tu, nuan apin tau kai menanti kami Panggau.”

Bungai Angi lalu ngaga utai nya. Apin tentu dudok Kumang udah bekau nya, alai semua utai nya tembu digaga iya.

“Nya nay ibu, udah tembu pua tujoh lambar enggau tikai tujoh lambar,” pia ko Bungai Angi.
Alit bendar ati Kumang meda penyampat indu nya gawa. Udah nya baru iya nanya bini Samlumpong.

“Naka ke udah enggau ke udah tu, nadai indu kami Panggau nyampat nuan tu gawa. Dini alai menoa nuan deh, Endu?” pia ko iya.

“Menua aku ibu din, di Terinsong Langit Ngeruyong Baka Pelembong Kapal Asap, di Telinsar Langit Luar baka Gembar Jong Sarat. Apai aku nya endang orang raja megai langit tujoh serak din. Aku betemu enggau Salumpong leboh kami nurun ngabas bubu iya suba ba semak rumah Ini Andan. Aku enda tau enggau bala menyadi akua tujoh iko pulai ka langit baru, laban sayap aku dilalai ka Salumpong. Udah nya kami lalu diator Ini Andan jadi diri melaki bini. Nama aku tu ibu, dikangau ka orang Belulin Tinchin Besegi, Jawai Satangkai Bungai Angi, Berega ka Menoa Siti Nengeri, lalu aku tu biak ka kami diri menyadi.

Nyadi samua utai ke dikena nuan nguji aku diadang aku udah abis magang diatu, ibu. Nya alai enti aku enda tau begulai enggau kita ditu, aku tu deka pulai ka langit nyin baru,” pia ko Bungai Angi.

“Ou, dini deh nuan tau pulai ngapa deh Endu. Nuan ga udah kai menantu kai anak kami. Tang aku ke nguji nuan tadi nya endang baka adat kami ditu. Aku pan diuji sida ibu meh suba, baru aku datai ditu,” pia ko Kumang.

Udah nya orang lalu nengkira diri begawai besai niri ka tiang ranyai tinggi gegiai murai ka tangkai jila isang, begawai burong niri ka tiang sandong bebungkong ka benong tajau bujang. Tembu pengerami nya orang pengabang maioh lalu pulai ngagai rumah diri. Nyadi Mabong Panggau tu tadi lalu mulai ka diri ngagai lubang tiang ke alai iya diau. Iya lalu mati baru.

● ANAK SALUMPONG

NYAU kelama Belulin Tinchin Besegi diau di Panggau jadi enggau Salumpong, nya baru iya betuboh bisi. Sembilan bulan semilan hari kandong iya udah, alai iya beranak. Anak iya lelaki, lalu dua iko besapit. Orang lalu ngaga nama seduai iya nya. Nyadi iya ka tuai agi dikangau ka orang Bujang Pinggan Begeran Gasing Merengong, Temilah Manah Tutop Tabong. Iya ke biak dikangau ka orang Pangka Ninak Gegayak Tengah Menalan, Sumpit Tepelasit Nuju Tempangan. Seduai menyadi nya sama sigat, kering sereta kebal baka apai seduai iya.

Nyau kelama Bujang Pinggan udah bujang iya pen lalu deka bebini. Nya alai iya ngayap ngagai menoa tasik, menoa sida Genga Menira Tasik Enturan Papan Titi Gilik-gilik. Nama indu ke digayap iya nya Retas Mangkok Mas Rega Seribu, Kemantang Bulan Aloh Dibau Tukuh Tekang Intan Lumor Satu Berandah ngagai piantu langit rapit. Indu nya lalu enggau iya pulai ngayap. Datai di Panggau lalu diuji Satangkai Bungai Angi ga pemandai indu nya.
Nadai siti utai ke dikena orang nguji enda ulih kereja iya. Nya alai iya lalu ka menantu Salumpong.

Dua taun udah nya, alai Pangka Ninak ga deka bebini. Iya bebini ngambi Endu Dara Bunsu Lendu-lendu Baka Menalu Bandir Tapang, Dara Manah Moa Baka Pelita Lampu Gudang. Nya menyadi Keling Ngading Kerangan, Laja Kuta Tebelian, orang di Langit Mit Mesai Kepit Bingkai Tanggi.

Sida sabilik sama begulai manah enggau pangan diri. Ti bumai bulih padi, ati ngereja pengawa bukai nadai enda nyadi. Sida lantang ngidup ka diri, laban tuboh maioh sama kering ngereja pengawa. Udah nya deh baru Belulin Tinchin Besegi bini Salumpong bisi mimpi. Iya mimpi betemu enggau Antu Empang Raga:

“Nuan enda tau enda pulai ka langit. Enti nuan enda pulai dalam setaun tu, nuan deka mati, nama nuan enda mati gila,” pia ko Antu Empang Raga nganu iya.

Dani iya tindok lalu nusoi mimpi diri ngagai Salumpong. Tusah ati meh Salumpong ninga mimpi bini iya, laban iya enggai beserara enggau iya. Malam siti udah nya bemimpi baru ga iya. Munyi nya ga jako antu, ngasoh iya enda tau enda pulai ka langit. Chukup tiga malam iya udah bemimpi, nya baru iya madah ka diri enda tau enda pulai ka langit. Hari siti iya lalu begari. Pasok ka iya kain empili sambil mandi berundang kasang. Udah nya baru iya masok rawai ringai-ringai manggai di kerigai rusok marang. Pasok ka iya jadam intan dua betangkan tiga betentang. Udah nya baru iya masok ka tumpa ngena baka ke manggum bara api satekang. Pasok ka iya ga tinchin mahu gempanang. Udah nya baru iya nesai bok panjai baka sentaba mulai nurun batang. Iya lalu besanggul bentor baka menaul angkat ngelayang.

Besanggul tangkai jawa nyelenga muak ka belakang. Tembu begari iya lalu nyapai cheremin pulai China, terupong ayam raja. Dia iya lalu nentang belakang tang nadai meda kuris buta, tentang iya ka dai nadai ga meda seremua dia.

“Oh, ti bakatu agi luchak meh aku tu baka temedak ninggang pun. Agi lechi baka mempili bali damun,” pia ko iya bejako kadiri berandau nengali.

Kemas iya becheremin, nya baru iya madah ka diri mupok ngagai sida sabilik. Iya lalu nyabak nunga Salumpong:

“Sayau meh nuan labu kendi temaga
Badu aku sauk ka di lubok dalam tigai.
Sayau meh nuan tudong tanggi menasa
Badu aku kelayang di dandang rapi umai.
Sayau meh nuan pedang bemata changka
Badu dikena aku ngeluntang bukang tengah jalai. Sayau meh nuan emperuji ati emperaja mata Badu begulai enggau aku tindok
Di lingkok papan lekai,” Pia ko leka Sabak iya.

Salumpong pan sama nyabak ga sinu ati ditinggal ka bini iya. Melengka iya ari Salumpong iya lalu merap anak iya dua iko nya. Sida sabilik sama bela nyabak magang ditinggal ka iya pulai. Iya lalu nyengkau sayap iya. Pansut iya ke tanju lalu nyau terebai pulai ka langit. Lama sida sabilik ngila ka iya terebai ka langit. Sebulan iya terebai nadai makai, nadai ngirup nya baru iya datai ba menoa sida iya empu. Gaga bendar apai indai meda iya datai. Tang iya empu lalu enda lantang ati, laban agi ingat ka laki enggau anak iya tinggal di Panggau.

Sida Salumpong pan bakanya ga lama bendar ngembuan ati enda lantang udah bekau tinggal bini iya pulai ka langit. Mai ati iya lantang mimit laban anak iya dua iko nya sama udah diator iya bebini ngintu ruang bilik, lalu iya endang bisi orang nampong orang nerujong. Mina ati iya tusah ngenang sida nya nadai indai enggau begulai. Sida sabilik sama nat ka ati enda lantang lalu mengkang ngereja pengawa baka selama tu.

- ABIS -