NUNUK RAGANG

●Jerita Tuai : "NUNUK RAGANG".

Dulu kelia kenu ku cherita bisi sepun kara ti besai sereta nyelai tumbuh semak sebuah danau ti dalam begenilung. Danau nya semak enggau tempat diatu ti dikumbai enggau nama Kampung Tampias ba pelilih menua Lubuk Sugut, Sandakan. Pun kara nya tadi, bechura mirah, ari batang iya nyentuk ke daun iya. Ba jaku orang-orang Dusun tauka Kadazan pun kara tu disebut sida 'Nunuk Ragang'. 'Nunuk' mai reti pun kara lalu 'ragang' nya reti iya mirah.

Kenu ku cherita maya nya kelia, tempat nya bedau kala diuan mensia. Endur ke bisi Nunuk Ragang nya dirangkap enggau pun kayu bukai lalu kampung lulung nya diuan jelu-jelu siga sereta ke mangah aja. Tang maya nya bisi siku manuk sabung ke besai bendar, kira-kira mesai siku kerebau diau dia. Manuk sabung nya tau ajih.

Bisi sekali manuk sabung nya ngair-ngair tanah ngiga pemakai. Enda mukai-mukai tak pansut mih siku bujang sigat ari dalam tanah ti dikair iya nya. Manuk sabung nya lalu majak ngair tanah. Enda lama udah nya lalu pansut mega siku indu ke bajik amat. Kedua-dua iku mensia nya lalu diambi sereta diibun manuk sabung nya.

Enda lama udah nya, dia kedua-dua mensia nya pan lalu disabung jadi melaki bini. Asil ari jadi melaki bini dia seduai lalu beranakka beberapa anak lelaki enggau indu. Peturun sida lalu mega beranak betelesak ngujungka sida nguan endur ke nadai orang nya. Nyau kelama tempat nya pan mayuh orang ngani endur nya. Peturun kedua mensia ti bisi ditemu ari dikair manuk nya disebut 'Orang-orang Nunuk Ragang' ti 'dikearapka’ aki ini sida orang-orang Dusun tauka Kadazan nyentuk ke sehari tu.

Lelaki ti keterubah pansut ari dalam tanah nya dipaduka manuk sabung nyadi penghulu ba tempat nya. Iya merintah enggau rentang sambil disaup manuk sabung nya. Manuk sabung nya diau ba puchuk kara mirah nya. Besereta enggau pun kara mirah nya mih manuk sabung nya nyaga mensia ke diau dia ngujungka tempat nya dikumbai Nunuk Ragang ngangkatka nama pun kara mirah ti nyelai nya.

Makin lama Nunak Ragang pan majak maju lalu sida ke diau dia mega majak mayuh. Enda jauh ari endur sida diau bisi beberapa batang anak sungai. Tu nyadika endur nya manah alai bekebun. Kenyau ari nya, pengidup sida ba Nunuk Ragang likun sereta baik.

Tang enda mukai-mukai, bisi sekali Nunak Ragang 'diserang' sereta dikachau 'Ragang Tie' (tai mirah). Ragang Tie tu enda ulih dipadahka gaya pendiau iya ti bendar. Iya dipeda baka ai ti tang lebuh ditimpai ari jauh iya dipeda baka mensia. Utai ti nyelai pasal Ragang Tie nya iya mai igi penyakit lalu ngerapit sida ke bisi kena tegu tauka sida ke negu iya. Penyakit nya seruran ngujungka orang dia parai. Nambahka nya mega, Ragang Tie tu ngerusakka asil utai tanam lalu munuh binatang ti ditupi sida iya nya iya ke bisi kena tegu iya.

Ketegal nya, mayuh mih sida ke diau dia sakit lalu parai; binatang tupi enggau utai tanam mega abis lus jamah penyakit nya. Hal tu ngujungka sidai Nunuk Ragang berasai sinu sereta nangika pengelikun diri. Mayuh entara sida ke pindah ke endur bukai ti dikiraka sida likun agi. Tu mega ngujungka sida bepechah lalu mayuh ngerembai ke pelilih menua enggau endur baka ke dipeda kemaya hari tu.

Lebuh datai musin bumai dia sida ba Nunuk Ragang pan bumai baka selama. Tang bisi sekali, lebuh sida benung gagau nugal padi bukit sida bisi tedinga munyi nyawa mensia ngangau ari dalam tanah. Sida Nunuk Ragang berasai alit ati sereta takut. Sida lalu madahka hal nya ngagai penghulu sida. Kena mutarka penanggul nya dia sida lalu baum. Dalam aum nya sida sama selubang penemu besetuju deka ngali tanah ti bisi penatai munyi nyawa nya. Lebuh udah dikali, tebuka mih sebuah lubang tanah ti besai. Ba dalam nya nyau penuh enggau bala mensia ti dipeda bela mangah memagang.

Orang-orang Nunuk Ragang nyau majak takut kelebih agi lebuh ninga nyawa mensia dalam tanah nya kuat sereta kasar amat. Udah nya tuai mensia dalam tanah pan bejaku enggau nyawa ti kuat amat munyi guntur, ku iya, "Terima kasih tuan-tuan ... laban udah ngelepaska kami lalu tempat tu manah amai laban kami udah lama tekandang ba baruh tanah. Nya alai kami deka diau ditu. Kita mesti pindah ari tu enti enda kami deka munuh kita semua!"

Ninga jaku mensia ari baruh tanah nya, dia sida Nunuk Ragang pan lalu ngeredandang rari nyelamatka diri empu. Pekara nya mih ngujungka orang Nunuk Ragang pindah ari tempat asal sida, lalu diau ba pelilih menua bukai di Sabah. Dua bengkah cherita nya tadi datai ari dua cherita ti enda sebaka ti madahka kebuah orang Nunuk Ragang pindah ari tempat asal sida.

Raban mensia ari dalam tanah nya tadi pan lalu diau ba endur ti udah ditinggalka orang Nunuk Ragang. Taja pia, mensia dalam tanah agi arapka manuk ajih nya sereta penghulu orang Nunuk Ragang mega agi bisi. Sida deka malas dendam ngagai sida sebarang maya, nya alai mensia dalam tanah terus ngembuan juluk ati deka munaska kedua-dua nya ti disangka sida nya munsuh sida iya. Orang Nunuk Ragang enggau penghulu sereta manuk sabung ajih nya seruran diasu sida mensia dalam tanah nya.

Tang taja pan beberapa lama mensia dalam tanah lalu agi enda mujur munaska penghulu enggau manung sabung ajih orang Nunuk Ragang. Nyau kepuas mensia dalam tanah nya pan diau mendam ba genturung pendiau ti kemaya hari tu dikumbai enggau nama orang Tampias. Sida tu diau ba genturung pendiau ba pelilih menua Labuk Sugut, Sandakan. Nitihka cheritan orang sida orang-orang Tampias nya nyentuk ke sehari tu enda ngembuan kaul ti manah enggau orang Dusun/Kadazan ti asal penatai sida iya ari orang Nunuk Ragang.

Mensia dalam tanah nya nitihka cherita endang mensia biasa tang udah disumpahka petara tanah ketegal mayuh ngenyaika utai ba bumi tu ngujungka sida dianjung diau ba lubang besa ba baruh tanah. Dia mih sida idup beranak betelesak beberapa lama datai ke sida dikeluarka orang Nunuk Ragang.

Asai ati ti muras sereta dengki mensia dalam tanah nya endang enda tembu kelebih agi ngagai penghulu enggau manuk sabung ajih orang Nunuk Ragang. Pekara tu ngasuh manuk sabung ajih nya nerbaika penghulu nya jauh ke siti endur ba bukit tinggi. Kemaya hari tu endur nya dikumbai Ranau. Enggau kuasa ajih nya manuk sabung nya lalu ngerataka tanah ti rebuh nya ngena kaki sereta nguiska endur nya ngujungka tempat nya landai endur diau. Ketegal endur nya ti rebuh dia iya lalu dikumbai 'Ranau' ngangkatka reti 'rebuh' dalam jaku Dusun/Kadazan.

Udah tanah dia dirataka, orang ti nitihka penghulu pindah nya pan terus berimba ba endur nya. Sida pan lalu berengkah bekebun sereta mupuk nupi binatang tupi baka manuk, itik enggau jani.

Taja pia mensia dalam tanah nya tadi agi enda lantang ati sereta nangika orang Nunuk Ragang datai deka malas sereta nyerang sida. Sida orang ari dalam tanah nya lalu nasat hal nya. Sida tetemuka orang Nunuk Ragang nya diau ba Ranau. Nya alai, sida pan mupuk ke Ranau laban deka nyerang orang Nunuk Ragang. Penatai sida ulih ditemu manuk sabung ajih nya. Iya lalu nerebaika penghulu Nunuk Ragang enggau bala iya ke tempat bukai sebedau sida sempat datai di Ranau. Tempat nya dikumbai Tambunan.

Ba tempat baru nya baka ke udah mega manuk sabung ajih nya tadi nyaup penghulu nya. Iya nguis-nguis sereta ngerataka tanah ngambika ulih alai sida orang Nunuk Ragang nya diau. Hal tu mega ditemu sida mensia dalam tanah. Sida nyau balat agi ringat ngagai sida Nunak Ragang, kelebih agi ngagai manuk sabung ajih nya. Sida terus nguji deka munuh iya.

Baka selama perangai manuk sabung ninting pagi iya deka engkukuk, baka nya mega manuk sabung ajih tu. Bunyi kukuk iya kuat amat sampai didinga datai ke Ranau enggau tempat-tempat bukai ke jauh ari tempat iya ke engkukuk nya. Nitihka cherita, bunyi kukuk manuk sabung tu mih ke ngujungka mensia ari dalam tanah nya nemu endur manuk enggau penghulu Nunuk Ragang. Ketegal nya raban mensia nya lalu bejalai mansang ke Tambunan. Baka ke sebedau tu mega manuk sabung ajih nemu penatai sida. Dia iya lalu terus nerbaika penghulu nya ke siti tempat bukai ke benama Apin-apin. Datai sida dia sida lalu berimba muka tempat endur diau ti baru.

Mensia dalam tanah nya tadi semina enggai meda penghulu Nunak Ragang enggau manuk sabung ajih nya aja, nya alai semina mimit aja raban sida ke enggau ngiga seduai iya. Sida ke bukai nya terus diau netap ba tempat-tempat ti udah dibuka manuk sabung begulai enggau sida orang Nunak Ragang.

Ketegal penghulu Nunuk Ragang ke enda lama diau ba Tambunan laban ke dipejal pindah ke Apin-apin, dia iya nuduh siku mandal ke benama 'Gombunan' nyadi tuai orang Nunak Ragang ti netap dia. Nya alai nama Tambunan diambi ari nama tuai sida ti dipadu nyadi penghulu. Agi mega tempat baru (Tambunan) nya bedau bisi nama.

Di Apin-apin, baka tempat-tempat bukai ti dibuka sebedau tu, penghulu Nunuk Ragang enggau manuk sabung ajih nya endang enda ulih diau lama ketegal mensia ari dalam tanah terus ngiga seduai iya. Baka selama mega, manuk sabung ajih nya tadi nerbaika penghulu Nunak Ragang ke siti tempat bukai ke jauh agi ba menua ulu lalu endur nya ke disebut Keningau. Baka selama mega manuk sabung nya lalu ngerataka endur nya alai sida diau. Ba tempat nya maya nya mayuh pun 'kayu manis'. Nya alai tempat nya lalu dinamaka 'Keningau' dalam jaku Dusun/ Kadazan ti bereti 'kayu manis'.

Enda lama udah nya di Keningau manuk sabung ajih nya pan lalu sakit ke ngujung iya parai laban iya tua. Bangkai iya lalu dikubur ba siti tempat dia. Enda lama udah nya, penghulu Nunak Ragang ga parai laban sakit tuai. Sepengudah pemarai kedua-dua nya dia mensia ari dalam tanah nya lalu badu ngiga seduai sereta enda agi bemunsuh enggau orang Nunuk Ragang.

Pemarai manuk sabung ajih enggau penghulu orang Nunuk Ragang bisi mai empas ketegal berasai ngasaika utai ke berega ba sida udah lenyau. Sida ngasaika sida berasai bisi utai ke besai amat udah lenyau ari pengidup sida. Manuk sabung ajih nya balat bendar bisi nyaup nulung orang Dusun/Kadazan kelebih agi lebuh berimbaka endur alai sida diau. Enti diperatika, mayuh tempat ti diuan orang Dusun/Kadazan nya ba endur ke bebukit tang baka ke udah dirataka. Orang Dusun/Kadazan arap amat ke cherita tu.

Pun kayu Nunuk Ragang ti ditinggalka orang Dusun/Kadazan semak enggau danau nya udah ditebangka mensia ari dalam tanah lalu kemaya hari tu sida ngarap nya aki ini orang Tampias di Sabah.