Cherita Raja Sabaginda Bujang

● Cherita Raja Sabaginda Bujang.

Nama aku Raja Sabaginda Bujang tang aku ukai peturun raja. Enda ga aku nemu kebuah apai enggau indai aku ngaga nama aku bepun ari Raja. Enti kitai meda bala tambi baka sida Raja Lingam enggau Raja Mani ukai mih peturun raja, raja mih nama sida. Nyadi aku tu deka nusi cherita senentang pendiau pengidup aku sebedau aku bebini.

Cherita pengidup aku bepun ari ini aku ke benama Rutih. Nyadi ini aku, Rutih tu diau enggau sida apai indai iya ba menua sida di Nanga Engkaramoh, ari ili Gellong Batu Nakong. Iya belaki jadi enggau siku orang ke benama Tunang Rebuam. Ku sida ini aku, Tunang Rebuam tu diau ba lubang batu, nadai berumah baka orang bukai. Nyau kelama ke udah begulai, dia dih ini aku nyau betubuh bisi, lalu beranakka anak indu. Iya namaka anak iya nya Sarai.

Leboh Sarai nyau dara dia iya deka turun ke temuda deka ngali bunga. Sebedau iya mupuk dia ini aku berat-rat ngelalau iya enda ngasuh iya ngambi bunga ke ba pun tapang, laban iya enda nemu penatai bunga nya.

Tang lebuh indai aku datai di temuda dia iya nemu panggal benih sida nadai agi, tak samina telesak bunga ke agi bisi dia. Ensepi diri enda bulih bunga ke deka dibai pulai, dia iya lalu mai bunga ke ba pun tapang, iya ti enda diasuh indai iya bai. Mayuh bendar macham bunga dia baka bunga limau enggau bunga setangan.

Udah indai aku mai bunga dia iya tak enda mukai-mukai ninga utai tak ngenjing beguru, nadai utai ngemalat nya. Deka iya ngumbai nya ribut nadai ga iya meda kayu beguyat; dikumbai iya tanah berenyang ukai ga nya. Rari mih tudah indai aku belanda-landa, dia dih bunga iya bisi teberayan. Datai iya di rumah nadai ga iya ninga utai ke beguru nya agi.

Antara tiga malam udah nya dia indai aku lalu bisi digayap orang. Orang ke ngayap iya nya nadai dikelala, meda pan nadai mih iya kala. Indai aku lalu nanya orang nya.

“Sapa nuan tu? Kukut nuan tu tak asai lungga, tunjuk nuan asai laja, betis nuan tu asai belia?”

“Aku mih tu, nemuai ngagai nuan laban nuan udah ngambi bunga kami, udah megai taju aku. Aku tu datai tu deka ngambi nuan ke bini,” ku orang nya.

“Sapa nama nuan tu dih?” ku indai aku.

“Aku tu mih ke benama Gadu,” ku orang nya nyaut indai.

“Ari ni penatai nuan tu dih?” ku indai.
“Jauh, datai ari Perenching Tisi Langit Kuning baka Siring Tangkung Burung, Selesa Ujan Nyala Baka Tangga Gempung Jabung,” ku saut Gadu.
Gadu lalu madahka diri deka jadi enggau indai aku, Sarai enti apai indai iya setuju. Indai aku lalu angkat ngerak sereta nanya ini aku enti sida iya setuju enggau jaku Gadu. Sida ini aku nadai mayuh jaku pasal seduai iya ke deka jadi amat ga seduai iya deka jadi manah enggau pangan diri.

Lalu jadi melaki bini mih indai aku enggau Gadu tu tadi.Nyau kelama ke begulai dia seduai lalu beranak, beranakka anak lelaki nadai utai ngenyigat nya gamal, baka apai iya empu kenu ku indai nyerita ngagai aku. Aku mih nya ke diadaka indai aku Sarai. Aku dini nemu utai maya nya sigi agi mit lebuh ke nyerita ngagai aku.

Dia apai aku lalu meri aku nama Raja Sabaginda Bujang . Lebuh aku nyau besai, dia aku nyau rangka, bepakaika macham-macham utai. Nyau deka abis bansa utai ke tau diempa aku magang dataika sekali aku tepakaika ansang keli enggau kelupa baung.

Lebuh aku nyau besai dia apai madahka diri deka pulai ngagai menua sida di tisi langit kuning, laban iya semina tau diau tujuh taun enggau bala kami di dunya tu. Sebedau iya pulai dia iya ninggalka kami benda ke benama Indai Ranai sigi, sirat luai selambar, badi andai sebilah, sumpit sepuchuk enggau selapuk marik siti, ke aku. Udah nya apai aku pan lalu mupuk pulai ngagai menua iya di Perenching Tisi Langit Kuning baka Siring Tangkung Burung, Selesa Ujan Nyala Baka Tangga Gempung Jabung.

Nyau kelama apai aku udah ngejang ke menua kami, aku pan nyau besai bendar. Hari siti dia aku madah ngagai indai aku, deka nemuai ngagai apai aku di Tisi Langit Kuning. Indai aku ngasuh, tang enda ngasuh aku lama, ngambi ke sebulan pia, laban nadai orang enggau iya betupi. Hari aku deka mupuk, dia aku lalu beradu. Pasukka aku simpai kima aku enggau sirat luai. Ambi aku badi andai lalu tangkinka aku, udah nya baru aku ngambi sumpit. Udah abis bekemas, baru aku mupuk ari menua kami di Nanga Engkaramoh.

Bejalai aku sehari-hari nya. Nyau lemai hari baru aku datai ba kaki Gunung Nyemugut. Aku pan lalu bemalam dia malam nya. Nyau pagi hari siti baru aku mupuk majakka pejalai diri niki Gunung Nyemugut nya. Kira tengah hari, dia aku bisi ninga orang ngagau.

“Oh ngetu,” ku orang nya didinga aku.

“Enda aku ngetu, laban beguai bendar,” ku aku.

“Nya pan ngetu enda lama”, ku orang nya.

“Sapa kita nya dih?”, ku aku ga nanya.

“Aku tu mih ke dikumbai orang Bunsu Ruai, Dara Bajik ke landik Kaban Temuai, Dara Bunsu Mandi Tumu Besepar Rangkai,” ku orang nya madahka nama diri ngagai aku. “Lalu ngetu,” mih ku orang nya nanka aku.

“Enggai aku ngetu.”

“Enti nuan enggai ngetu nuan puni ila, puni tusu madu aku baka lua burung kenyalang, puni kuyu aku baka telu manuk kepayang,” pia ku Bunsu Ruai.

“Enda”, ku aku, “Tusu nuan enda manah baka tampuk kepayang padung, kuyu nuan enda mih manah balut tai manuk lintung,” ku aku nyaut iya. Aku pan lalu nyau mupuk.

Bejalai aku sehari-hari nya, aku pan datai ba tuchung bukit sigi. Ba tuchung bukit nya aku meda mayuh bendar rumah. Tang taja pia aku mutus ati niki rumah orang ke sepintu selawang-lawang, siku seatap senukang. Lebuh aku datai ba kaki tangga dia aku lalu nyapa nanyaka penyadi rumah?

“Jadi rumah kita ini?”, ku aku ngangau.

“Jadi uchu, niki mih, tang nadai orang enggau nuan di ruai dia, lalu ke bilik kitu,” ku orang nya nyaut iya.
Datai aku di bilik aku lalu nudukka diri. Indai tuai orang nya lalu ngelaluka aku sereta lalu nanyaka penatai.

“Ari ni penatai nuan tu dih uchu?”

“Aku tu datai, ari menua kami di Nanga Engkaramoh ari ili Gellong.”

“Nama main nuan dih?”, ku orang nya ga nanya.

“Aku tu deka nemuai ngagai apai aku ke benama Gadu.”

“Oh Gadu nya anak menyadi aku,” ku ini orang nya nyaut aku.

“Oh sapa nuan tu dih?”, ku aku ga nanya.

Aku tu mih Ini Jelebok. Ti nuan anak Gadu, uchu aku mih nuan tu,” ku ini orang nya bejaku enggau aku. Ini Jelebok pan lalu ngangauka anak iya ke betenun di sadau ti benama Nain Ke Bekain Mali Rimpi, Besandul Andul Ke Besanggul Lepi Sekali. Endu Nain pan nurun ga ari sadau.

“Oh bisi datai nuan anak!”, ku iya bejaku enggau aku.

“Bisi mih ibu,” ku aku.

Nyadi aku lalu bemalam dia malam nya. Hari nyau jauh lemai tinduk mega kami. Pagi siti apin aku mupuk, dia aku lalu nanyaka nama menua nya ngagai Ini Jelebok. Ini madahka menua nya dikumbai orang Bukit Tandok Labong.

Kejang aku deka mupuk dia ini meri aku ubat sangga bunuh ke lalu diunsut ini ba tubuh aku ke bekal bejalai. Udah nya baru aku ngejangka menua sida ini. Bejalai mih tudah aku sehari-hari nya, nyau tengah hari engkarabak alai aku tak nyerungkung rebah tetanam tunsang. Rebah kanan saka enteran, rebah kiba sakal ulu tulang, rebah ke mua saka tanda paya lebang. Tak lalu luput dia.

Lebuh aku ke luput, dia dih Langau tak bira ba nyawa, ba pending, ba idung aku. Munyi ke bula aku nusi ke kita. Dia aku pan lalu tedani laban tai langau. Lebuh aku dani, dia aku meda orang tak ketawa ke aku. Nyadi ku orang, nama Langau nya Dara Nyerida Tau Tepat, Kumang Tukang Tau Keramat. Meda iya tak balat ngemaluka aku lalu deka disumpit aku mih Langau nya.

“0h anang nuan nyumpit aku,” ku indu nya bejaku. “Ila kami meri nuan ubat batu pending enggau ubat batu bidik ngambika nuan bidik baka kami.” Lalu diunsut orang nya batu pending enggau batu bidik ba jari aku. Benung ngunsutka batu ubat nya tadi, dia orang nya lalu bejaku.

“Tu baka nya ga aku, nama agi didinga panjung, agi nuan ninga jaku orang, baka kami ke nemu but,” ku orang nya.

Udah nya baru aku ngejangka menua nya lalu mupuk bejalai baru. Bejalai aku sehari-hari nya, alai aku tak rembus ba rumah orang di tuchung bukit nya. Aku lalu bejalai nuju kaki tangga orang nya. Datai dia aku lalu nyapa.

“Jadi rumah kita tu?”, ku aku ari tanah.

“Jadi mih uchu”, ku orang nya. “Lalu niki ke rumah kitu ka.” Ngenjing beselalut ga tudah indai tuai orang nya ngelaluka iya.

“Ari ni penatai nuan tu dih uchu, lalu ka kinika nuan tu dih?”, ku orang nya nanya.

“Aku tu datai ari Nanga Engkaramoh ari ili Gellong lalu ka nemuai ngagai apai aku Gadu ke diau di Perenching Tisi Langit Kuning baka Siring Tangkung Burung, Di Selesa Ujan Nyala Baka Tangga Gempung Jabong,” ku aku madahka diri ngagai indai tuai nya.

“Oh uchu kami mih nuan tu. Gadu nya anak menyadi aku. Nyadi aku tu mih ke dikumbai orang Antu Ribam,” ku indai tuai orang nya. Iya lalu ngangauka anak iya Dayang Ketupung Dayang Lingkau, Endu Berunu Pandau Ligau, ke betenun di sadau. Lalu nurun mih ga anak iya ari sadau lalu berandau enggau aku dia. Aku lalu bemalam ba ini dia malam nya. Nyau keleju ke udah berandau, dia ini madahka nama menua nya ngagai aku Nyadi menua tu dikumbai orang Bukit Alun Tenun.

Pagi siti lalu mupuk mih tudah aku nampung pejalai ke deka nemuai ngagai apai aku. Tang enda mukai mukai dih aku tak betemu enggau Antu Lembak Puki, apin tentu jauh ari rumah ini Antu Ribam. Dia antu Lembak Puki nya tak deka manching aku kemi. Takut bendar aku meda utai baka nya. Nama agi dih aku pan lalu nikal ga ngagai rumah ini Antu Ribam. Datai dia, aku madah ngagai ibu pasal Antu Lembak Puki ke deka manching aku. Ibu lalu meri aku batu pukak.

“Enti nuan bidik, ai kemi antu nya lagi tau jadi batu, tang enti nuan enda bidik tak basah ngapa mih nuan lagi laban kesing iya,” ku ibu madah ngagai aku.

Udah nya nyau mupuk aku mai batu puki nya tadi. Tang nasit bendar ga antu nya nadai agi ngachau.
Bejalai kenu tudah aku sehari-hari nya, nyau lemai hari aka pan datai ba kaki bukit. Agi jauh, dia aku meda mayuh bendar rumah orang, ngenjing baka daun bukau empa pemayuh, tang mih nadai betampung panjai. Dia aku lalu nuju rumah ti betampung tiga pintu. Datai ba kaki tangga aku lalu ngangau.

“Jadi rumah kita?”

“Jadi mih Igat,” ku orang nyaut iya. “Lalu, niki mih.”

Nyau lama ke berandau, dia apai tuai lalu nanyaka penatai iya.

“Ari ni penatai nuan dih Igat? Lalu deka kinika nuan tu dih?”, ku orang nya nanya aku.

“Aku tu datai ari Nanga Engkaramoh ari ili Gellong lalu deka nemuai ngagai apai aku Gadu,” ku aku nyaut orang nya.

“Oh petunggal aku Gadu nya. Kaban mih kitai tu. Nyadi aku tu Bunsu Kamba,” ku orang nya madahka diri ngagai aku.

Nyau empa pemanjai randau dia aku lalu nanyaka kebuah sida dia enda betampung panjai.

“Ukai utai,” ku orang nya. “Agi menya kami tu bisi ka dikayau orang. Nya alai kami enda betampung panjai. Enti sema kami ke sebuah rumah ditunu orang, sebuah ga agi tinggal, enti sebuah di tunu, sebuah ga agi” ku orang nya madah.

“Kati alai orang deka ngayau kita dih?” ku aku ga nanya.

“Kami menya bisi ngelalaika utai baka tajau, chapak, mangkuk, tekang mas bisi mesai tubuh kijang, ba pun kayu melebu. Kati nuan ngelala kayu melebu?”, ku orang nya nanya.

“Enda tentu ngelala,”, ku aku. “Ngelala-ngelala ke baka nya mih. Batang iya deka burak-burak lalu bandir iya deka mipis-mipis, daun iya begalung. Pia ku orang ke nusi ngagai aku,” ku aku nyaut.

Nyadi malam nya aku lalu bemalam dia. Malam nya orang lalu ngumbuk aku enggau sida iya ngiga kayu melebu pagi siti.

Nyau pagi siti tumu bala kami mupuk ngagai puak kampung ngiga kayu melebu. Mayuh mega kayu melebu ditemu kami, tang mih agi mit memagang. Nyau kelama baru kami tetemuka iya ke nyau dua pemerap pemesai batang. Datai dia kami lalu belabuh ngair-ngair pun kayu nya ngiga utai.

Dia kami tetemuka mayuh macham chapak ke manah baka chapak kerugi, chapak kemuja, pinggai beturus, pinggai tebal enggau mayuh utai bukai ke manah. Tang alah ngagai hari nyau lemai, tekang mas ke mesai tubuh kijang lalu nadai temu. Kami pan lalu pulai. Lemai nya udah badu makai dia aku madahka diri enda ulih enggau sida iya agi ngiga pagi siti laban lalu deka neruska pejalai. Semina chapak enggau pinggai aja ulih aku dia.

Pagi siti aku lalu mupuk. Apin aku ke mupuk, dia Bunsu Kamba ngasuh anak dara iya ke benama Endu Temuku Tampuk Lemba, Dayang Ketupang Bunga Taya nganjung aku. Bejalai kami duai ngejangka menua Bunsu Kamba lalu rembus ba pun kara. Dia aku lalu nyumpit. Burung ke ulih aku nya diberi aku ngagai anak Bunsu Kamba. Nyau kelama kami duai ke udah nyumpit dia anak Bunsu Kamba madahka diri naka nya nganjung aku. Kami duai lalu besarara dia. Manah ga anak Bunsu Kamba nya enda beduan aku mai aku tesat.

Bejalai aku ari pun kara nya, alai aku tak rembus ba danau siti. Deka aku nyemerai ke seberai, takut ga ati aku, laban ai nya dipeda baka dalam-dalam mimit. Dia aku lalu besampi munyi Menani Manang Chelong, mutap munyi kedadap teluk kampung.

“Ni petara ke ngemataka aku, ke ngaduka aku? Aku tu deka nemuai ngagai apai aku Gadu.”

Enda lama udah nya alai datai burung undan ke madahka diri deka nyangkaika aku ke seberai. Aku lalu nepan ba belakang burung undan nya. Nyau entachang burung undan nya mai aku terebai ke seberai nya ti ngasuh sepiak tubuh aku nya basah. Datai di seberai aku lalu bejembi. Lebuh deka bejembi, dia aku bisi ninga orang tak reding-reding. Jauh ga orang nya ari aku, tang laban aku ke bisi batu pending ke diberi Bunsu Langau ulih ga aku ninga. Dia aku ninga orang bejaku.

“Nama pengawa nuan dia wai?” ku orang nya didinga aku.

“Aku tu ngelalaika telu aku sepuluh igi tu enggaika di empa Ini Gumba, enggau Aki Gumba, enggai nyadi enda dilalaika,” ku orang nya nyaut. Udah nya mansang aku ngagai tunga orang ti bejaku nya. Datai aku dia aku meda nya Bunsu Beluku. Iya lalu nanya aku.

“Deka kini nuan?” ku Bunsu Beluku nanya.

“Aku tu deka nemuai ngagai apai aku, lalu aku tu minta anjung nuan.”

“Enggai aku,” ku Bunsu Beluku nyaut.

“Enti nuan enggai lagi mih aku madahka telu nuan sepuluh igi ke dilalaika nuan tadi ngagai Aki Gumba,” ku aku ngemeranika diri nyaut iya.

Nyadi tudah Bunsu Beluku tu tadi, laban sayauka telu diri diambi Aki Gumba, lalu besetuju nganjung aku. Aku lalu dianjung Bunsu Beluku alah nyau semak rumah Aki Gumba. Dia iya madahka diri naka nya nganjung aku, laban takutka diempa Gumba. Ninga redup tungkat Gumba bala Beluku lalu terejun ke ai.

Udah Bunsu Beluku mulaika diri. Aku pan begadai-gadai ga bejalai nuju rumah aki. Niki aku peda aku dugau-dugau aki ba ruai. Pala iya baka rintung, mata baka buah terung, ngeli iya baka lengki di kaki wung, nadai utai ngemesai nya, pala iya ga lalak. Sereta meda aku, aki lalu ngelaluka aku.

“Lalu uchu lalu,” ku iya. Iya lalu ngangauka bini iya.

“Untung tua lemai tu baka beliung ulih ngambuh, betuah tua lemai tu baka peredah ulih ningkuh. Bisi datai uchu tua lemai tu,” ku aki nya gaga ke aku ti bisi datai lemai nya. Lalu pansut ga bini iya ari bilik lalu merap aku gaga ke aku ti bisi datai lemai nya. Aki nya lalu madahka diri iya nya Antu Sepapa.
“Kini ka nuan tu dih uchu?” ku ini nya nanya aku.

“Aku tu deka nemuai ngagai apai aku Gadu,” ku aku nyaut.

“Enti Gadu nya anak petunggal kami,” ku ini nya nyaut.

Nyadi aku tu lalu dibai aki nya diau enggau seduai iya dulu. Diau dia mih tudah aku. Sekumbang ke diau dia, dia aku meda mayuh bendar salai, kasam tang mih balat bendar gamal. Nambahka nya mega, seduai dua iku tu tak nadai makai asi. Apin bangat lama aku udah diau dia, alai aki nya madahka seduai melaki bini deka tinduk.

Apin seduai iya tinduk, dia seduai iya madahka kasam enggau salai ke tau diempa aku sekumbang seduai iya tindok nya. Dalam ati aku berunding sigi lama seduai tu tinduk lagi enti munyi nya. Udah nya iya pan lalu meri aku alu siti kena ngerak seduai enti sema aku bisi dituntung penusah. Udah nya baru seduai iya lalu tinduk.

Kira bisi tiga malam mih seduai nya tinduk alai aku pan dituntung penusah. Enda mukai-mukai ga maya aku tinduk enda nemu nama kebuah tak mai kasam enda jauh ari aku ke tinduk. Ensium utai ke manah bendar bau, datai tikus belanda tak lalu ngigit tungkul idung aku.

Nama gi dih tak lalu rumpung idung aku. Nyau rauh-rauh aku laban idung ke nyau tetengut. Dia aku enda chechamang lalu ngambi alu lalu dientung aku ngagai dada aki nya ngerak seduai iya. Dani seduai iya lalu diadu-adu seduai iya tungkul idung aku. Nyau kelama jadi ga tungkul idung aku, tang mih lubang idung aku agi bedau siti aja, tak agi sedandang, nya ti ngasuh aku lalu idul jaku selama iya. Kira dua tiga hari udah nya alai aku madahka diri deka lalu neruska pejalai aku nemuai ngagai apai aku.

Pagi siti aku lalu mupuk ngejangka menua aki aku, Antu Sepapa nya ke alai idung aku sedandang. Bejalai aku sehari-hari nya kediri-diri. Nyadi menua nya tak entap baka padang tang mih kayu tak bebesai magang.

Nyau muak ke lemai hari alai aku rembus ba sungai siti ke alai aku betemu enggau indu siku ke benung mandi. Indu nya tak ngena selung semua, bulu pala iya baru beselat uban. Indu nya lalu mai aku sama mandi. Tang aku enggai laban chelap bulu. Lebuh indu nya ke mandi dia kami duai iya berandau.

Aku lalu madahka diri datai ari Nanga Engkaramoh ari ili Gellong, mansang nemuai ngagai apai aku Gadu. Tekenyit indu nya ninga aku nusi. Nemu nya tak anak laki iya empu. Indu nya lalu madahka diri bini Gadu. Udah iya tembu mandi, indu nya lalu mai aku niki ke rumah. Datai di rumah din gaga bendar apai aku Gadu meda aku nyau besai, ke lalu bisi datai nemuai ngagai iya.

Kiruh bendar apai enggau indai tiri aku ke aku ke nemuai kia, nyau baka ke endang anak iya empu. Pemakai pan manah ga enda baka ke ba rumah Antu Sepapa tang mih jaku aku tak lalu idul.

Kira empat hari aku udah diau enggau apai seduai indai tiri, aku pan lalu madahka diri deka pulai, laban nyau irauka indai ke tinggal kediri di Nanga Engkaramoh. Tang mih apai seduai indai tiri aku agi nanka ngambi dua hari agi. Lemai aku ke madahka diri deka pulai nya, dia dih enda mukai-mukai ga tak bemunyi ngingit. Ngingit tu Manang Mengayan ke gila deka ngerebuk mata orang enti orang tinduk. Leboh ngingit ke bemunyi, dia indai tiri aku lalu ngangau madahka kami agi dani.

“Agi dani kami tu, agi dani,” ku iya.

Nyadi aku bisi ninga jerita ngingit deka bendar ngerebuk mata orang ti tinduk. Tak berasai takut bendar ati aku. Nya ke lalu mun ke aku ti takut bendar ke ngingit.

Nyau kedua hari udah nya alai aku pan madahka diri enda tau enda pulai. Apin aku pulai dia apai ngasuh aku milih duku ti dikerindu aku, laban iya empu endang tukang kambuh. Tang mih aku semina deka mai keris sebilah aja, ke penguju ku aku, selapuk ujuk buk siti enggau baju kechepak selambar. Ari indai tiri aku semina minta siti senduk. Bisi iya deka meri ubat tang aku enggai empu ubat jedian. Nyadi senduk nya, ku indai tiri aku enti agi tujuh malam enda lapar enti udah nilat ujung senduk nya.

Udah aku bekemas enggau seduai iya beberika utai, nya baru apai enggau indai tiri nganjung aku ngagai pangkalan. Nyadi aku ke pulai tu nengah ai, merau ngena perau jung sebuah, kira panjai tiga enggau buka iya sedepa.

Udah nya lalu mupuk mih tudah aku tu berarat kili. Apin lama bendar udah nya, alai aku lalu betemu enggau burung undan.

“Oh nuan nya, bisi pulau batu sigi nyin, anang nuan mansa nya enggaika kudi. Pulau Kudi Mayau nya,” ku burung undan madah ngagai aku.

Tang aku tak enda ibuh ke pesan burung nya. Lalu bepeling-peling dia mih aku. Keleju ke baka nya alai perau aku tak tepangka ba batu nya. Tak lalu kudi mih hari dia. Nyau baka ke deka tungkup perau aku laban gelumbang. Nyau udah pama agi hari, alai aku tak rembus ba Nengeri Ribai Dayak. Ba pangkalan nya bisi bandung sebuah. Perau aku lalu disangkaika aku ba tumpang bandung nya, laban hari ke agi jai enda ulih disangkai ke tebing.

Semalam nya dia mih tudah aku ninga Laut ke empu bandung nya bejaku. Nyadi bala Laut nya kenu ku cherita datai ari menua Raja Suran, ari baruh Gunung Mesuat. Sida iya mansang deka “belujum” ka buah lebih seratus sepuluh leka ngelaban orang di nengeri Ribai Dayak.

Enti orang dia ulih nyangka penyampau buah nya, bandung sida Laut nya di empu orang nya. Tang enti sangka sida salah, sida laut bempu Kayu Sagu Alu, iya nya kayu pengajih siti ti bisi tumbuh ba menua sida dia. Tak nama utai deka dipinta kitai ulih magang laban kayu nya ngadaka semua utai nya. Angkat ninga dih aku jaku Laut ke madahka buah lebih sida iya seratus sepuluh leka nya.

Pagi siti aku lalu tumu niki ngagai jembatan ke enda jauh ari nya ke alai orang deka belujum. Aku ke mupuk ke tebing nya ngena selapuk ujuk buk enggau baju kechepak. Aku ga tinggi iya ga selapuk ringka, iya ga besai iya ga bebaju taya. Sigat bendar gamal aku sepi aku empu.

“Lalu mih tuan,” ku bala Laut ngelaluka aku. “Aram lalu belujum kitai tu,” ku orang bejaku enggau aku.

“Nama reti belujum?” ku aku ngaga diri enda nemu.

“Belujum mih, mun nuan nemu penyampau buah lebih dalam guni tu nuan empu bandung kamek, enti nuan enda nemu kamek empu kayu Sagu Alu,” ku siku ari sida madah.

Dia aku lalu bepusin-bepusin ngena keris ke diberi apai aku. Aku endang agi ingatka penyampau buah lebih nya.

“Seratus sepuluh leka!” ku aku.

“Alah mih kami tu enti pia,ney po ngan,” ku orang nya. “Nya alai bandung tu lalu diempu nuan mih.”

“Aku enggai empu bandung nya nadai dikena kita pulai,” ku iya. Aku semina ngambi barang temaga, reta baka setawak, engkerumung, enggau dumbak ke lalu dibantai sida ngagai perau aku. Udah nya aku lalu mupuk ga ngejangka menua Ribai Dayak, ke alai aku bulih reta enggau mudah.

Nyau kelama aku ke udah bedayung, dia aku lalu datai ba menua Batu Titi ke Bepampang Tujuh Nanga, Saka Ulak Jawa, Ai Beranti Tujuh Nanga. Aku lalu nyangkaika perau ba jematan lalu terus bejalai ke rumah orang. Datai ba rumah dia alai aku lalu betemu enggau Simpulang Gana. Aku sigi ngelala ga Simpulang Gana.

“Oh lama udah tua enda betemu,” ku Simpulang Gana ngelaluka aku.

“Au, lama endar mih tua udah enda betemu,”, ku aku ga nyaut. “Nama main nuan tu tak bisi di menua orang dih?” ku aku nanya Simpulang Gana.

“Baka tu,” ku Simpulang Gana. “Aku tu suba bebini ngambi Endu Serentum Tanah Tumbuh. Udah nya lebuh kami dua udah nyundang pinang kami dua lalu nemuai ngagai rumah aka aku empu, Dayang Putung Kempat. Nyadi lebuh iya mandi, dia iya tak mandi ari ili bini aku. Dirara aku enda ulih.

Udah bekau nya isi iya tak lalu muruk. Kami enda nemu ngubat iya agi, nya alai iya lalu diperaratka. Iya lalu diapung Ini Manang ke lalu nempa iya baru. Iya pen lalu pulai bajik baru. Udah nya iya lalu dibeli Pati Melayu Puteri Bunsu ke empu menua tu ngena Batu Pengajih ari Ini Manang. Nya alai aku ke bisi ditemu nuan ditu,” ku Simpulang Gana becherita ngagai aku.

“Nya alai sida tu,” ku Simpulang Gana nampung cherita iya, beperang ngelaban Raja Kumbang, tang lalu enda ulih alahka, laban sida ke enda teirupka ai selabu ke selalu dibinti bala Kumbang. Enti nuan tak bisi runding ni enda pama!”, ku Simpulang Gana madah ngagai Aku.

“Enti kita begunaka penemu enggau tulung aku, deka ga aku enggau,”, ku aku nyaut Simpulang Gana.

Malam nya aku lalu ngasuh sida ngumpul buah entawa mayuh bendar, lalu diasuh aku tabur sida ngagai kuta Raja Kumbang. Pagi siti bala Raja Kumbang lalu begau berebutka buah entawa nya tadi, ngumbai buah entawa nya mas. Laban sida ke balat bendar berebut nya ti ngujungka kuta sida lalu terumpang.

Udah kuta sida iya terumpang nyamai bendar bala aku, bala Simpulang Gana tama ke dalam. Nya ti ngujungka Raja Kumbang lalu alah, sereta lalu kena tangkap. Tang iya minta kasih ngagai sida Simpulang Gana minta enda munuh iya enggau kaban iya. Dikena nganti nyawa sida iya, Raja Kumbang laban iya ke tukang, semaya deka meri Simpulang Gana perau, laban iya ke bisi Gadin penyarin dandang umai, bisi Meliba nyala nanga sungai, bisi Mawing ngiling enda nginsap, bisi Mambu bebaju ke udu balat gerenyap nya orang kaban Raja Kumbang magang ke nemu ngereja semua macham utai.

Nyadi aku udah nya nyau beiparka Pati Melayu Puteri Bunsu, laban ke udah enggau iya ngalahka Raja Kumbang.

Angkat aku ari menua Pati Melayu nya, lalu mudik Batang Gellong. Simpulang Gana lalu masuk Nanga Sungai Limau Janting. Datai aku ba Nanga Engkaramoh, bala kami serumah nyau begau meda aku ke datai mai utai ngemayuh nya. Udah nya sida pan lalu mantaika utai ke diulih aku nya. Gaga bendar indai aku meda penatai aku mai perengka enggau reta..

ambih.......