Manang Meriam Manang Baya

Manang Meriam Manang Baya.

Menya pengudah menua kitai bebaik diak bisi siku indu tuai benama Meriam ba menua pelilih Balleh Kapit.Ia dikanggau Manang Meriam laban ia nemu berubat nemu belian sereta nemu nyambut anak urang ada ke dunya.Manang Meriam tu berasal ari Batang Engkarie kelia alu ada ba ka dunya ba Nanga Kapit maianya.Pengudah nya alu bai apai indai ia pindah agai menua Bintangor alu maia jeman betachah enggau Jipun sida mapai mambut ari Bintangor alu nuju menua sida Janggi ba Nanga Mujong kediato.Enyau ka dara diak Meriam belaki jadi enggau iban tungga Balleh empu maianya.Pengudah belaki diak ia bisi mimpi betemu enggau sida apai Abang ari Panggau Libau ti ngasuh ia nyadi manang laban maianya pengaruh manang niang aki ia nadai urang ngibun.Bisi meh ia madi kabukai tang enda nelap baka ia nya ngejung apai Abang ngambi ia nyadi pengganti nyadi pengibun pengaruh besai aki sida ia.Purih Manang Jinggong ari Batang Engkarie kelia.Jinggong ngada ke aki Meriam alu aki Meriam benama Gelayan asai pia nama aki ia suba.Bala anak Gelayan nadai siku nyadi manang laban rengkar nya kabuah apai Abang enggai ngambi sida nyadi manang agi kelia.Nyadi Meriam lebuh bemimpi diak ia dajar apai Abang belama ia bakani ia ngubat,nyuman,beurut,enggau kabukai.Genap setaun ia bemimpi bakanya diak ia maioh penemu ba bemanang ngejung ia nemu utai maioh macham.Menya menua Batang Rajang maioh baya alu penguan ngempu menua nya Bunsu Baya benama Bunsu Rintong ti puntul iko sereta ba belakang ia tumbuh pun kemunting.Raja Baya menua Batang Rajang ti suah besatup enggau Bunsu Baya ari Pelagus benama Bunsu Pulan ari tusi urang katuai ti nemu dunya mistik menua Batang Rajang kelia.Kelai saduai ia besatup betempuh kelia sigi bisi gelenggang besai ba nanga Balleh kelia alu suah dipeda ba Nanga Balleh kediato.Kala ditusi bala madi kitai ke urang lama ba Nanga Balleh kelia sebedau jeman menua bado charut.Ngenang jerita Manang Meriam tadi,nyadi rumah panjai sida ia ba Nanga Gaat kelia.

Nyadi sekali nyadi bisi sida serumah benama Ingai ti sakit raya kena tunang telanjing pengudah ngasu ia bulih gelang jari ba madang pako.Dambi ai alu dipasuk ke ia ba jari atai ba buku lengan.Alu dikena ia meh kumbai ia enggi bala sida pungka lelaki sida semenua ti baru kia kemari ngiga matah ke madang pako nya.Datai dirumah ia alu nanya sapa ngempu gelang simpai lengan nya pia ko ia nanya.Nadai ga urang lelaki madah enggi sida ia laban anyam simpai gelang lengan nya manah amai.Alu dempu ia alu kena ia belama.Ngejung ia enyau tuyo setuyo ngejung nyau gila.Meda bakanya diak alu sida sebilik undur kili ngambi manang,tang manang tadi nadai ga diak laban dambi urang berubat agai Mujong.Ka pen enda mupuk pulai kulu baru ga sida.Enyau raya amai penyakit tudah Ingai diak cechunguk tudah Meriam ngasul kediri madah ka nyuman ke Ingai enti sida ngasuh pia ko Meriam.Laban nadai runding bukai diak sida ia pen ngasuh Meriam nyuman ke Ingai.Udah perengka disedia baka dipadah Meriam diak Meriam alu berubat nyuman ke Ingai.Maianya malam ari alu sida enda memunyi meda Meriam ngemai ilang bedarah naka pemalat nya ari pemendai lebuh ia munuh buyo nya.Pengepun nya diak Manang Meriam alu dikelala bala maioh alu bepun meh ia nyadi manang kulu kili ngubat urang.Nyadi ari sitik lebuh ia ka nurun kumai maianya ia bisi uchu aja.Nyadi benung ia ka nurun kumai diak sida sarumah madah ke ia bisi lelaki bebesai tubuh ari menua Batang Rajang ngemai ia berubat agai menua sida.Bisi empat iko bakanya meh sida nya tadi alu bisi siko indu enggau sida ia.Meda bakanya tak nadai maioh leman diak Manang Meriam alu engkira perengka alu nuju sida sabuat nya tadi ti nganti ia ba ruai sida Tuai Rumah ba din mega.Atai diak alu berumban sida ia mupuk laban beguai ke ia sakit nya pia ko sida sabuat nya tadi.Nama agi deh alu nepan perau alu bekayuh meh sida ia.Diak Manang Meriam tekenyit kayuh sida nya tadi laju amai.Sida sarumah enyau ngapo meh meda utai bakanya laban meda pengering sida ngayuh ke perau.Kayuh sida sabuat alu atai ba Batang Rajang.Ari ulu Lubuk Guchi bisi batu besai bejugo ba diak sida sabuat alu ngaram ke perau.Sepik asai manang Meriam baka dibatak urang ba kaki ia maianya alu tenggelam alu ia ia pansut baru alu ia bepegai ba jari laki ia ke luan nya tadi matak ia niki nepan perau baru.Empai lama ia ka narit seput ba perau tadi diak ia tekenyit meda rampa menua urang naka pemanah nya ba diak.Tak nadai kala kia ko ati ia din nyebut kediri.Ti ngalit ke ati ia sida bedau nepan perau nya tadi.Ia meda panjai rumah panjai urang ba diak,ia alu ngapoo meda pemanah rampa menua nya tadi.Ia meda rampa menua penuh enggau bungai alu sitik kayu pen nadai ia meda.Mina batu bebukit maioh dipeda ia,Bisi ke peda ia kayu mina kayu agang aja ba sungai nya.Ia meda seberai menua nya baka tasik tang ukai ga tasik mina besai aja sungai menua nya.Ia alu meda maioh nembiak bemain ba madang bungai sereta manchal.Ia alu dibai niki rumah panjai alu nuju rumah panjai ba tengah,ia alit meda pemesai kayu tiang rumah ti berukir manah amai.Ia meda tinggi amai sadau ari geladak ruai.Manah amai menua tu deh pia ati Manang Meriam.Mina ia alit,menua nya nadai jelu tupi aja mina maioh dipeda ia mensia ti duduk enggau berandau ba ruai.Diak indu ke enggau sida tadi madah,anang duduk sengapa ruai sida sarumah enti ka ruai enti sida temuai datai enda dikelala pia ko indu nya nusi tadi.Alu lama ia ngenung nama basa menua tu sigi baka nya kini ko ia ba ati din.

Tama ia kebilik alu nuju kedapur datai ba senentang penindok pangking diak indu nya nyilak ke kain chelum ti nutup mua penama pangking diak indu nya ngasuh ia ngabas apai ia ka sakit ba bilik nya.Datai ia ba diak alu tama,laban ka pepetang dalam bilik nya diak indu nya nungkun api lampu ba dalam bilik nya tadi.Diak ia meda apai tuai siku ti besai amai tubuh alu pala ia mesai sintung dara ti benung kembai rekung alu bisi bekau telih belah tubuh.Nama agi deh diak ia nanya ba dini pemedis apai tuai nya diak apai tuai nya nunjuk rekung ia ti balat amai kembai.Alu dipegai Manang Meriam meh rekung ia diak apai tuai alu bedemuh baka madah nya pedis.Diak laban enda puas ati diak Manang Meriam alu ngasuh ia muka mulut ia.Alu buka apai nya mulut nya tadi alu tudah Manang Meriam bisi meda sangkoh sitik enggau mata ginti besai amai.Dijengkau Manang Meriam meh nya alu di ari ke ia ba rekung apai tuai ka besai tubuh nya.Udah nya alu dambi manang Meriam diak ia alu muka jampi ia ngasuh nya gerai ngena ubat ia meh.Alu apai tuai nya begik agi sereta nemu bejako.Naka pengaga apai tuai nya laban udah ulih angkat baka selama.Sida alu makai udahnya pengudah utai panduk bini apai tuai nya mansau.Sida alu makai belauk ka ikan semah,ikan labang enggau kabukai.Berau dempa sida ba diak naka bau amai renggut.Agi ulih disium bau asi nya ba jari enti udah dibasu jari maia makai.Padi tu dikumbai Padi Renggut mina ba menua Panggau Libau enggau menua ghaib aja bisi ngembuan padi tu.Dikanggau Padi Selang Wangi ti ba menua Gelong.Asal padi tu tinggal ba menua Panggau pengudah kitai iban kelia bebagi benih enggau sida Urang Panggau Libau sida ari Gelong,Bunsu Genali,Bunsu Remaong.Sida magi kitai mensia diberi aki Gemuring,kitai mensia dikirah sida ai padi renggut tu tadi ba dulang.Dambi sida ia padi bau renggut kitai kediato alu dikirah sida ia enggau ai padi renggut tadi ba padi kitai ti adai bau renggut.Ngejung padi nya bau renggut nitih ke ai nya kelia.Bepun ari meh berau kitai bisi bau renggut tang enda sebaka enggau ke asal amai ia ba urang Panggau Libau ba sida Petara Simpandai.Bunsu baya bebagi enggau bala ia mega.Genap iku utai ba dunya kelia ba dunya ghaib bisi ngembuan padi tu mega.Mina kitai mensia aja ke nadai laban sida ia enggai magi enggau kitai.Nya kabuah kitai bisi bepiring maia bumai ketegal ka meda padi murai manah alu bau renggut baka padi sida urang Panggau Libau din.

Pulai agai jerita tadi diak Manang Meriam alu ngenung meda penyamai asi nya,enda ibuh belauk pen kenyang meh ko ati ia.Enyau bemalam ia ba diak,diak ia meda utai sunyi amai ba menua nya alu apai tuai nya enda ngasuh ia pansut keruai maia malam ari laban ba menua maioh utai ngemedis maia malam ari ko apai tuai nya madah.Nyadi malam nya ia tinduk naka penyenak alu pagi ia dani diak ia bai urang makai dulu.Udah makai alu mupuk meh ia danjung sida nya pulai.Datai ari ulu lubuk pemendai nya tadi alu dikaram sida nya baru perau dahnya lebuh ia ka pansut ia ditarit ba kaki alu dahnya dileka urang nya baru alu ia tekenyit lebuh ia pansut peda ba jugo batu ari ulu Lubuk Guchi ba Batang Balleh.Ia enda memunyi aja alu lebuh maia sida nya bekayuh diak indu nya nusi agai ia.Apai ia nya meh benama Bunsu Ritong alu ia benama Dara Kenyulung Dara Begemong benama Dara Bunsu Nanyai.Alu genung tudah Manang Meriam laban ia ke perubat nya tak kah Raja Baya Menua Batang Balleh agi kelia.Diak indu nya nusi apai ia bemusuh enggau Bunsu Pulan ti bepenatai ari menua Pelagus.Maioh meh kenang Dara Nanyai enggau ia ngejung enda berasai datai ba pemendai rumah panjai sida ia tadi.Diak indu dara mekat ia enti ia ka kin ngabang baru seru aja nama ia ila ia ngemai manang Meriam agai menua sida kin ko ia.Ia jarang pansut ari menua sida ia din ko indu nya nusi.Ba kenang aki Chendang,manang Meriam kala berundang kala ngabang agai menua sida Bunsu Ritong agi bedau Manang Meriam tu idup kelia.Aki Chendang ari tusi niang apai ia kala meda Manang Meriam tu ngetu ka perau ia ba diak kelia alu atai siku baya mit bechura mansau.Alu Manang Meriam nyelam nitih ke ia,lebuh laki udah dibai petara,manang Meriam suah dambi urang ba dalam ai kin berubat agi menya.Keno ke jerita lebuh Manang Meriam dibai petara pulai bala baya baka bekabung ba menua Balleh nyentuk siku adai agi meda baya ba menua Batang Balleh maianya.Pengudah nya menua Batang Balleh nadai agi dipeda baya pengudah niang Manang Meriam lesi pergi naban ka ari.Jerita tu ari ditusi aki Chendang alu ditusi aku ba ditu,kenang tu kala ditusi bala aku mega ba menua Batang Balleh mega.Diak aku nanya penyentuk berita tu agai aki Chendang enggau aki Bandan ti nemu agi ba dunya mistik bansa kitai iban ba senentang utai nyelai ba baruh dunya tu.Enya aja jerita tusi aku maia kelemai tu.Maioh jerita ka ditulis aku ka diadu ka bala aya nya tang sitik aja dikenangi maioh urang ka berambi ulih ari jerita ditusi kami ba blogspot ditu.