KERA BUJANG ENGGAU BAYA BUJANG

● ENSERA NEMBIAK : KERA BUJANG ENGGAU BAYA BUJANG.

Mayuh macham bansa jelu ti diau di puak kampung jerung. Kampung ti penuh dedat enggau jelu baka remaung, kera, baya, pelanduk, landak, babi enggau jelu bukai. Jelu tu enda balat besulu enggau pangan diri. Enda kurang mega seruran besengki jaku, bejai pangan diri.

Lebuh malam hari, ayan Kera Bujang ti digela Kera Mali Lebu, Bejalai Apus Ulu Sungai bejelangkit di atas pun kayu indah baka tarzan ti merejuk ngagai siti-siti dan kayu. Dan kayu ti bangat rinda rakah nyau beteguyat baka ke dipuputka ribut kudi kena tarit jari Kera Bujang. Datai ba kayu siti, iya ngetu lalu nyandih ba selepak kayu ke bejanga dua ngetatka pengelelak diri. Iya semampai beratika bulan di langit mingkai ka benung manchar menua Lepung Bebelat. Menua alai Kera Bujang beridupka diri, bepakaika buah kampung kena ngidupka isi diri ngicha ke pemesai tubuh enda bangat tasal. Iya berasai gaga ati bayam pemanah gamal bulan.

Seraya ti ngenduh dia, iya lalu bejaku kediri berandau nengali ,”Ah dah, terang amat bulan malam tu. Naka mih pemajik indu dara di Bukit Lanjak Entimau din. Enti iku aku tu enda panjai, sigat ga aku,” pia ku sebana Kera Bujang. Ketegal ti kelalu tatuk, suah mih anak Kera Bujang ngulang jaku iya nya tadi. Ukai sekali dua tang nyau bepuluh-puluh kali.

”Ah dah, terang amat bulan malam tu. Naka mih pemajik indu dara di Bukit Lanjak Entimau din. Enti iku aku tu enda panjai, sigat ga aku,” pia ku sebana Kera Bujang baka tungguk ti nyabak ka bulan.

Maya nya, seninjik bendar bisi orang ninga iya bejaku kediri-diri. Selemai-lemai nya sampaika hari malam semampai beratika ulah Kera Bujang ti bemain dia. Iya ngendap ba tebing Sungai Sekara, ngalika diri laban ke udah lelak begiga pagi tadi. Kelalu lelak. Mata semina ulih dipejamka tang salah mimit laban iya semampai ninga kutap anak kera ari tadi enda ngetu-ngetu. Kepuas ke ninga sebana Kera Bujang, Baya Bujang pan lalu bejaku munyi tu;

“Eih, enda ngelabaka gamal diri empu,
Kening nyau bedungkung,
Ngeli nyau entasang,
Idung kempi nyau ketupang,
Perut besai tetanung baka basung,
Mata ngerung betudung lesung,
Burit nyau bepetar baka peku jelutung diempa derung,
Buk baka kempat tachu bechuanka jalung,
Iku nyau enserindak baka akar melabu kampung,”

Tembu ngutuk pendiau Kera Bujang, iya lalu menserul ke dalam lubuk dalam. Ngerendam diri sereta bemain dalam ai enggau baya bukai.
Nama dih, ninga mih tudah Kera Bujang jaku orang ti bejai iya. Endang enda disangka iya bisi orang ninga serebana tudah tuai.

“Ish…ish..ish!” pia ku sabak Kera Bujang munyi sabak anak mensia. Malu endang sigi amat malu. Nadai kala seumur pengidup bujang iya dienchakka orang jaku munyi nya. Nadai kala iya mungkal nanjal bejai siku nya.

“Nama kebuah iya tak begedi lalu bejai aku enda beapai beindai dih? Iya ukai nya sigat tang kulit nyau ngerutu,” pia ku pikir Kera Bujang.

Tak betul bendar maya nya bisi Pelanduk enggau Tekura mansa endur nya. Seduai tedingaka munyi orang nyabak sesikuk. Perening seduai ke atas puchuk kayu. Peda iya anak kera benung nyabak sambil merap dan kayu, empikap dia. Dia seduai iya pan lalu nyapa anak Kera Bujang,”Nama utai ke disabakka nuan dih Sambi?”

Kera Bujang tekenyit ninga orang bisi ngangauka iya ari baruh. Tilik iya ke baruh peda Pelanduk seduai Tekura ngeringak malik ke atas nengkadah iya ke benung empikap ba dan kayu.

“Nya mih Sambi, aku dikeleseka anak Baya Bujang tadi. Aku balat dipejai iya enggau nadai penyalah-nyalah enggau iya. Enda kala besengki jaku, betalat penemu. Tak dienchakka iya sengapa-ngapa, nadai kebuah-buah,” pia ku dawa Kera Bujang ngagai Pelanduk enggau Tekura.

“Eh, lapa iya tak ngenchakka sereta bejai nuan meiga-iga, nadai penyalah dih Sambi?” tanya Pelanduk.

“Aie…ie…ie, iya ga sut. Sut amat-amat. Naka pengesut-sut. Iya enggai ninga aku muji pemajik sida indu dara di Bukit Lanjak Entimau din,” ku padah anak Kera Bujang.

“Eh, lapa nuan enda malas baru? Timbal jaku iya nya nih. Pejai enggau iy. Kumbai bangat sigat meiga-iga gamal iya nya. Enda nemu kulit diri nyau bekerutu baka dinding batu,” pia ku saut Pelanduk. Pengeringat iya semampai ngerembai belama baka pengerembai bungai Seri Pagi. Runding iya semampai bepeling naning engkuda ke pengenyai apai Baya Bujang ti kala ngetup betis apai iya. Seninjik bendar apai iya besai akal lalu ulih ngelepaska diri ari diempa Baya Bujang.

“Nya mih Sambi. Ati din endang bisi pengingin malas. Tang enda nemu jaku dikena malas nimbal jaku pejai iya. Kati seduai bisi akal?” tanya Kera Bujang.

“Eh, nadai nya bangat mar dih Sambi. Uji sebut nuan jaku munyi tu asuh iya dikena malas jaku pejai iya ngagai nuan. Udah sedia, Sambi?” tanya Pelanduk.

“Au. Pajak ka dia mih Sambi. Ninga aku,” ku Kera Bujang.

“Bakatu munyi leka jaku tu Sambi,
Pala ga lunchung baka gaya geraji selung,
Mata bedungkung baka pala patung,
Perut gentung tetanung baka basung,
Kulit ga begerutu baka singkap batu anggung,
iku ga panjai baka dayung,
Kukut ga panjai nyau begelung,”

Nya mih sekeda ari jaku ajar Pelanduk ngagai anak Kera Bujang kena malas jaku pejai Baya Bujang. Ninga jaku ajar Pelanduk nya tadi, dia anak Kera Bujang gaga bendar ati. Gamal tudah tuai nyau berupai chiru. Iya enda sabar agi nganti anak Baya pansut melepungka diri ba tebing sungai semak alai iya selalu bejelangkit. Kepuas ka ngenung nganti riak ai nandaka penatai Baya Bujang, enda berasai iya ngelelapka mata.

Pap! Tekenyit Kera Bujang ninga munyi utai bedarup. Punggu labuh chemebur ninggang ai lalu lelepu anyut nitihka arus ai sungai. Tekala nya iya lalu muka mata, dani ari tinduk. Mata panas benung perenching manchar endur nya. Maya nya mata panas terit, anak Baya Bujang pan menserul ngayanka tubuh diri lalu napatka tebing sungai. Dia iya lalu niki ke tebing nyembui tubuh sereta ngulihka pengangat panchar mata panas. Tudah Kera Bujang bejelangkit semak agi ngagai endur Baya Bujang. Dalam untak, semampai ingatka leka jaku ti diajar Pelanduk malam demalam.

“Oh Sambi Baya, bujang pan nuan bujang agi ga aku
Ngenyigat ni pan nuan lebih sigat agi ga aku,
Dinga nuan ensumbar tu akan Baya,
Pala ga lunchung baka gaya geraji selung,
Mata bedungkung baka pala patung,
Perut gentung tetanung baka basung,

Kulit ga begerutu baka singkap batu anggung,
Iku ga panjai baka dayung,
Kukut ga panjai nyau begelung
Nuan nya sepuluh kali jai agi ari gamal aku,
Nuan nya baru enda patut besebutka pemajik bala indu dara di Bukit
Lanjak Entimau”

Kera Bujang meri jaku sereta ngenchakka Baya Bujang nitihka patah sebut ka diajar Pelanduk.

Baya Bujang ke ninga jaku enchak Kera Bujang nyida lalu ringat. Sapa makai chabi, iya mih ngasaika pemedas. Manding bendar leka jaku kelese ke dipansutka Kera Bujang endang senutuk bendar enggau pendiau tudah tuai. Jaku nya kelalu bisa diasaika Baya Bujang. Ngaru ati.

“Apu...! Nemu amat nuan bejai aku, malas baru. Sapa bakih ti ngajar nuan kera wai bejaku munyi nya. Enda patut nuan nemu nimbal aku bejaku munyi nya. Kita nya purih orang palui, tambab lap enda nemu utai. Uji padahka jampat. Awakka aku nelan iya idup-idup. Sepi asai iya,” pia ku jaku kutap Baya Bujang

“Kena timbak nuan Unggal. Sepi asai dik,” ku Kera Bujang dalam ati. Nama dih nyau ketawa engkakah, rising-rising gaga ati laban ulih malas jaku pejai dikena ngeleseka Baya Bujang.

“Endai, padah jampat nih. Sapa ke ngajar nuan bejaku bejai aku,” ku Baya Bujang agi ngumbuk anak Kera Bujang. Ka nemu-nemu ati iya, ukai Kera Bujang ke ngaga leka jaku nya. Tentu orang bukai.
Enda lama udah nya, dinga begendang baru Kera Bujang;

“Oh Sambi Baya, bujang pan nuan bujang agi ga aku
Ngenyigat ni pan nuan lebih sigat agi ga aku,
Dinga nuan ensumbar tu akan Baya,
Pala ga lunchung baka gaya geraji selung,
Mata bedungkung baka pala patung,
Perut gentung tetanung baka basung,
Kulit ga begerutu baka singkap batu anggung,
Iku ga panjai baka dayung,
Kukut ga panjai nyau begelung
Nuan nya sepuluh kali jai agi ari gamal aku,
Nuan nya baru enda patut besebutka pemajik bala indu dara di Bukit
Lanjak Entimau”

Baya Bujang majak ringat. Mua iya nyau mirah sereta redu-redu. Nitihka ati endang sigi dibunuh iya Kera Bujang tekala nya. Iya nadai daya laban enda ulih niki bejelangkit baka kera.
“Nama kebuah aku enda diadaka nyadi jelu kera oleh indai aku suba. Nyangka tak sigat agi ga kini gamal aku enti dibandingka enggau diatu. Endang udah diatur Petara. Iya ke ngaga nempa aku. Nadai ku enggau iya mih,” ku Baya Bujang nyau sebana. Iya nesal ati udah meri jaku jai ngagai Kera Bujang.

“Oh unggal kera, padah jampat nih. Sapa ke ngajar nuan bejaku bejai aku?” tanya Baya Bujang. Iya semampai ngumbuk Kera Bujang madahka orang ti nyadi tulang belakang ngajar Kera Bujang.

“Aya kami Pelanduk enggau Tekura ke ngajar aku bejaku nyebut utai munyi nya,” ku anak Kera Bujang.

“Enti pia, bisi maya seduai iya ila ikak ngirup ai, nadai endur mandi. Nya baru seduai iya ensepi. Aku sambar, tarit, luit kaki Pelanduk enggauTekura. Ipak iya. Awakka idung seduai bereni lemas enda ulih enseput, lempuang masuk ai lalu mati lemas enda beapai enda beindai. Parai nengali lemai, mati nengali hari. Nuan pia mih unggal, bisi maya nuan telunga-lunga bejelangkit ba dan kayu lemi merundai melenti tunga ke ai. Aku sumpit enggau ai ke ngasuh nuan tekenyit lalu labuh temebur temepak ke ai. Disambut aku enggau mulut lalu dikanit sampai perut teberunsai. Mati ga nuan enda beapai beindai. Peturun bala Pelanduk, Tekura enggau Kera endang sigi bemunsuh enggau peturun aku sampai ila-ila,” ku Baya Bujang.

“Chis! Nemu ga nuan nya ngeransi Sambi Baya. Nadai ku enggau iya mih unggal, enti mimpi kami jai ngayuka diri begulai enggau antu di menua Batang Mandai, awakka nyadi asi dikelauk nuan purih pantis suku juru kami tu. Aku nyumpah nuan laban nuan ke dulu mungkal,dulu nanjal. Jai hari bulan, bisi maya, bisi hari nuan nya tekanchin rang kena sekang mata ginti anak mensia. Bisi maya perut nuan nya, kena peruti, teberunsai ditikam gansai anak mensia. Nya baru kulit nuan ila disiat mensia nyadika gendang orang dikena sida lebuh berami gawai besai, makai selamat. Pui!,” ku Kera Bujang.

Udah bela ambis ngemansutka jaku sumpah ngagai pangan diri, dia dih seduai sama bela mulaika diri ngagai sarang diri empu. Anak Kera Bujang pan bejelangkit ngagai dan kayu siti-siti sambil begendangka leka jaku bejai Baya Bujang. Baya Bujang lalu enselur ke benung lalu nyelam ke dalam lubuk mampul pending diri ngichaka enda ninga leka jaku Kera Bujang ka bejai iya.

Nya mih ngepunka sampai ke seharitu, baya semampai nyemerai sebelah tebing ai nengkilaka bala kera ke benung bejelangkit sebelah dan kayu. Pia mega peturun kera, semampai ngerarika diri enggai semak baya lebuh tepedaka baya bisi ayan ba sungai.

Nyadi, kitai mensia enda tau sekali-kali nunda ulah kera enggau baya tu laban kitai bisi akal dikena berundingka pekara ti manah tauka enda tau dikereja. Anang dulu mungkal nanjal bejai sereta begedi ngagai orang. Bisi maya jaku pejai kitai ngagai orang dipulaika orang baru ngagai kitai sereta nadai mai penguntung ngagai siku-siku. Seagi kitai idup di dunya injau tu, naka ulih begulai manah enggau pangan diri.