BATU BABI

●ENSERA IBAN : "BATU BABI"

KIRA beratus taun ke udah, di menoa Kesit, Lemanak, dalam Bagi kedua, bisi tuai kitai Iban siko benama Juyu. Kelimpah ari ke tebilang nama nyadi tuai, Juyu tu landik dalam pengawa ngasu pengawa beburu.

Leboh maia lapang kereja umai, Juyu endang selalu begerah niti rumah, betesau sebelah langkau bebai ka orang ngasu. Laban menoa ke bedau resa maia nya menya, babas bedau keranggas, kampung agi jerong, jelu enggau burong agi maioh sereta enggau agi nyamai diulih ka. Nya alai tiap kali sida ngasu endang seruran bulih berari.

Nyadi sekali Juyu bisi tinggal di rumah, orang bukai udah abis nurun gawa magang, ka semina orang ke anembiak agi enggau iya di rumah. Enda tetat ka diri diau di rumah agi, kira maia mata panas tengah niki, iya nangkin duku, nyan sangkoh lalu nurun ngasu. Iya ke nurun nya nuju Bukit Melepi, betati ngiga babi ke selalu enda ulih sida leboh ke ngasu kia.

Datai ba Bukit Melepi nya peda bisi bekau babi, baru bendar, Juyu lalu ngansing ka ukoi iya. Apin lama udah nya dinga nyau nyerarat salak uloi iya. Ukoi nya enda ngetu nyalak, tang babi lalu enda nan. Nya alai Juyu selalu nitih ka salak ukoi iya nya.

Sahari-hari nya ukoi iya nyalak nitih ka babi. Babi nya melunggang ngagai Sungai Gugu, lalu ngili ka ai nya, muntang ngagai Sungai Laung, netak ngagai Ai Sidi, netak ngagai Ai Setengang lalu rembus ba sepiak Bukit Melepi nya baru. Hari maia nya pen nyau kira pukoi lima lemai. Agi ga babi nya ngili ka sungai ke ngelingi Bukit Melepi nya. Juyu ke nitih ka babi sehari-hari nya nyau ikak bendar. Iya endang nadai mai bekal leboh ke nurun mekang hari nya tadi.

Tang taja iya lelak bendar, Juyu endang seruran nitih ka babi nya berari. Ukoi iya tiga iko nya baka nya mega, endang seruran nyempulang bukit babi nya. Nya baru Juyu tepeda ka babi nya, Juyu ngeleka ka sangkoh iya lalu ngagai babi nya, semina mai duku aja.

Babi nya tadi rari ka Juyu, lalu masok Sungai Setengang. Laban babi nya ke bengat besai bendar, dia iya sendat lalu lekat ba Sungai nya. Datai Juyu dia, enda kakang, lalu mantap babi nya ba tengan belakang. Sereta udah dipantap iya, babi nya bebali nyadi batu, Juyu pen lalu luput.

Leboh ke luput, dia Juyu asai ke ninga babi nya madah ka nama diri ngagai iya. Nama babi nya “Pengiran Suma’. Babi nya mega lalu madah ka Bukit Melepi nya tau alai Juyu enggau bala uchu ambu iya ka dudi hari ila, betan ngelaban munsoh enti menoa bisi siga bisi rangka.
Ngeleda Juyu ke luput, dia iya meda Batu Babi nya tadi nyau bebali mit agi, ka mesai kisar dara. Tang abi pantap iya agi meruan ba senentan tengan belakang Batu nya.

Datai ka sehari tu, Sungai Setengang suah disebut Sungai Babi dipantap Juyu. Batu Babi nya mega endang bedau meruan datai ka kemaia haria tu. Malam nya, Juyu mimpi asai ke betemu baru enggau babi ke dipantap iya siang hari nya tadi. Dia babi nya madah ka menyadi iya ke benama ‘Pengiran Said’ agi bedau idup. Dalam mimpi nya mega iya asai ke bisi tepeda ka kenaya Jalang anak Kiau semak iya dia. Dani Juyu pagi siti, iya lalu beguai nusoi mimpi iya nya ngagai Jalang.

Jalang besikap, nangkin duku, nyan sangkoh, mai ukoi sepuloh iko, lalu nurun ngasu ngagai Bukit Melepi nya baru. Sereta datai din, ukoi lalu nyalak babi. Baka ke disalak ukoi Juyu mega, babi lalu enda nan. Sepagi-pagi nya Jalang nitih ka bala ukoi iya ke nyalak babi nya. Bekal ke dalam ma iya lalu enda diserungkai, anang ke bisi hari nyerungkai bekal, nyawa iya ke nyau rangkai deh nadai hari nengkurop.

Nyau ngalih hari baru babi nan, di ulu Sungai Laung, ke mati di Nanga Gugu. Babi nya nan di baroh batu sigi ke tinggi. Jalang lalu belanda ngagai atas batu nya tadi. Peda iya babi nya besai bendar, lalu taring nyelai mega: Taring babi nya segala baka bulu landak, sasetak burak sasetak chelum. Lalu ditumbok Jalang babi nya, tang salah, ngembar tuboh. Babi nya tadi rari, ukoi iya pen enda mega nitih ka. Jalang pen lalu mulai ka diri ka rumah.

Malam nya Jalang bemimpi betemu enggau babi nya tadi. Babi nya madah ka ukoi Jalang enda chukop bulu, nya alai Jalang enda tulih ka iya. Enti Jalang bisi tetupi ka ukoi siko burak lebus sampai ka kukut, siko chelum apus, lalu siko mirah bekungkong terus nya baru Jalang tulih ka babi nya. Udah nya Jalang tedani, lalu nemu nya mimpi iya.

Datai ka sehari atu babi nya lalu apin ulih. Babi nya tau besau tau mit. Leboh babi nya besai, peninggi rindas belakang iya kira sapengerejang sangkoh. Tang leboh iya mali diri mit, bekau kaki iya ka mesai bekau abi kaki kijang. Babi nya ama bisi aman adai mega ngagai Bukti Melepi nya. Tang dalam sataun enda tau enda sakali iya kia. Nya alai agi bedau meh babi nya, datai ka diatu.