JERITA ORANG KAYA PEMANCHA DANA BAYANG

●JERITA ORANG KAYA PEMANCHA DANA BAYANG APAI TIONG.

Lebuh sida Orang Kaya Bakti ke nama Beti Biak bensumbar Tajai Ngindang diau di Padeh ari ulu rumah sida di Nanga Lawing ke diatu di Purau-Purau, Beti tu bebini ngambi Endau beranak ke Senang, Isik, Nawi, Kitang, Sima, Mandah, Dana.

Lebuh maia Endau ngandung ngau ga sarat dia seduai melaki bini nemuai ke Tanu di Layar ari ili Nanga Padeh. Seduai ia nemuai ngagai sida Nyuin bensumbar Munti Gerai. Nyau maia jauh malam, orang nyau tinduk kediri magang, tang Endau enggai tentu tinduk. Ia agi dani kediri-diri. Dia ia ninga nyawa orang indu betimang anak, beadu adu, beadi adi. Lama ia ninga ke nya. Orang ke nimangnya seberai pengkalan orang Tanu ke bejulut arong Lubuk Tanu ari ulu pengkalan sida ke diatu. Udah nyawanya ngetu didinga ia, ia pan enda berasai ga lalu lela tak lalu tinduk.

Dia ia lalu bemimpi tepeda ke indu, lalu ngerak ia, “Dani, Endau!” Ia asai ke lalu tedani lalu bejaku enggau indunya. “Ninga nuan tadi Endau nyawa aku ke betimang ke anak?” “Ninga aku nyawa orang, tang jaku enda tentu didinga, mina ninga nyawa orang ti munyi ke nimang anak,” pia ku saut Endau. “Eh, akunya tadi Endau. Aku nimang anak ke ba kandung nuannya. Nya ga anak aku mati lulus, tang nyadi ia ti di kandung nuannya. Ila Endau enti nuan beranak lelaki anak nuannya, gaga ke nama Dana. Ia mai ngeli sigi ila, tumboh ari atas. Bunuh ke babi ila Endau enti nuan udah beranak. Enggai ke nuan enda ngelala aku, aku tu Kumang bini Keling indu orang ari Panggau Libau,” pia ku Kumang, ia pan ayas ga. Endau pan nemu diri bemimpi ga, ia pan lalu tedani ga. Enda ia nusui ngagai orang lebuhnya. Se-ari dua udahnya, seduai laki ia pan mulai kediri ga ke Padeh.

Nyau datai ba maia deka beranak, beranak meh ga Endau amat munyi ti ke mimpi ia ga utai ke nyadi. Anak ia lelaki lalu mai ngeli sigi tumboh ari atas. “Nyelai meh tu,” ku orang maioh, “Nadai kitai kala baka tu. Bunuh ke babi tu,” pia ke jaku sida serumah, lalu diintu orang bakanya meh ia.

Nyau ke lama sida ke udah dia, ia pan nyau ga besai. Nyau kira umur semilan taun, sida bumai di Tengalun endur kebun sida Nanang Sanggat ke diatu ari ulu rumah sida. Sida bemalam di umai lebuh maia nebas. Senang seduai Isik mai Dana enggau seduai ke umai, seduainya laban ke tuai, endang orang udah bebini beranak. Ia pan enggau seduai ga ke umai, sida tiga pan gawa meh di umai, nyau kelama sida tiga ka udah dia. Bisi pagi siti seduai ke tuainya tadi nurun ga gawa, Dana lalu apin dani.

“Lapa Dom tu lalu enda angkat?” pia ku Isik bejaku enggau Senang. “Nyangka nya lelak meh ia,” pia ku seduai menyadi ke tuai. “Awak ke tinduk, nadai ia kala bakanya. Mupuk meh tua,” pia ku seduai. Seduai ia pan mansang ga nebas.

Nyau ngetu ngansah seduai pulai ga ke langkau, meda Dana endang agi tinduk, tak diteju ke seduai meda ia lalu enda dani. “Nadai ia kala bakanya, nyangka nya bisi mimpi indah,” pia ku Senang seduai Isik. Seduai pan mupuk ga baru gawa.

Nyau maia ke ngetu tengah ari, pulai meh ga seduai ke langkau. Datai di langkau, meda ia endang udah dani. Seduai nanya ke nama kebuah ia bengat tinduk ngelama nya. Saut ia madah kediri bisi mimpi. Seduai pan ngetu ga nanya ia. Nyau kelama sida ti nebas umai sida tiga udah di tanya seduai baru ga ia.

Dia ia nusui mimpi ia, sepengelama ia tinduk nya tadi asai ke tiga malam ia diau di menua orang. Ia asai ti ke langit, datai din betemu enggau Dara Insin Temaga, lalu tinduk begulai enggau ia. Laban ia ke agi mit gaga bendar Dara Insin Temaga ke ia, gaga meda anak ia baru datai.

“Nya, uji nuan nesa panau ba dada aku,” pia ku ia nganu Dana. Ia pan lalu nesa panau Dara Insin Temaga ari kiba ke kanan. Tesa-tesa ia, ia pan nyemerai ke kanan. Lalu di tanya ia ga, “Berapa semua ia ditu,” ku Dara Insin Temaga. “Baru ke lapan,” ku saut Dana, “Alai nuan lalu nanya aku ga, aku nyau enda ingat agi.”

"Uji tesa baru,” pia ku indunya enggau ia. Baka nya tadi ga ia, nyemerai dada ia di tanya indu nya ga Dana, “Nuan ke bendar nanya aku, nya alai aku ka bendar ga enda ingat,” ku Dana. “Nya alai Dana, bisi Ribai datai ari tasik besai linggang gumbang ila. Anang ngelaban orang nya nuan Dana, nyentuk ke lapan turunan nuan ila. Anang ngelaban orangnya nuan, laban orangnya tau nyaup kita, tau mai pemansang ke kaban kita, tau ngasuh kita tampak rita tampak nama,” pia ku indunya nganu ia.

“Nya alai enti nuan ngayau nyerang menua, anang nyemberai ke tebing kanan nuan, laban nuan enda tetesa ke panau aku terus abis dada aku ke kanan. Nyadi semua enti ari kiba endurnya Dana, nyamai nuan ngelaban, nadai munsuh tetan ke nuan enti nuan nyerang sida,” pia ku jaku Indu Dara Insin Temaga enggau Dana.

Senang seduai Isik pan ngenung ga ninga mimpi ia, dipelalai ke sida tiga menyadi, laban Dana ke agi mit. Nya alai seduai ia enda ngasuh Dana nusui mimpi ia suh orang bukai lebuh ia agi mit kelia.

Dana pan nyau angkat bujang. Lebuh maia orang betangguk ngulih ke buntal ngagai Tanjong Kauk di menua ili, di Supa, maioh bala ari menua ulu sama sama bela betangguk. Endang ke baka maia bebuntal di menua Saribas lebuh ke betangguk di menua ili din. Enda mukai-mukai dia deh, datai bala munsuh ngayau ke Saribas lalu ngalah ke bala orang betangguk, belaban malam ari. Dia deh alah bala ke betangguk laban munsuh. Laban ke agi malam, dia deh Senang seduai Isik meda Dana tak nadai.

“Nadai dom tu!” ku seduai menyadi. Ulih munsuh ia tu ke penemu seduai menyadi ia. Meda bakanya seduai ia lalu ngansak ke bala munsuh ti agi. Bala munsuh endang agi maioh dia. Seduai belaban baru datai ke seduai ia nyau ulih bala munsuh. Nya meh pemati Senang seduai Isik anak Rekaya Bakti ke nama Beti Biak bensumbar Tajai Ngindang.

Angkat deh Dana tu tadi enda mati, munyi ku penemu seduai menyadi ia dua iku tadi laban Dana ti bakal ba urung perut ia. Ia lalu muai diri empu ke ai lalu bepegai ba burit perau ari kemudi. Laban ari ke malam petang, dia deh ia enda dipeda munsuh. Nyau tampak hari tebing pan nyau ga tampak, dia Dana lalu nyemerai ke tebing, ia lalu ngerayap niki ke tebing. Perambut ti lekat ba perut ia agi bedau mengkang ba ia. Ia pan semina tak datai ke diri di tebing alai ia pan lalu luput.

Dia bala munsuh nya tadi ninga utai munyi gugu guntur datai ari ulu, sida pan nadai agi ati. “Datai bala Saribas tu mantu bala sida,” pia ku ati bala munsuh tu tadi. Sida nadai ati, lalu nguing bekayuh rari. Ninga gu utai bangat balat didinga sida, angkat deh utai ti didinga sida nya.

Nyawa babi bandam, datai ia ba Dana. Peda ia tak indu utai ke nya tadi. “Oh, bakal nuan deh, Dana. Nadai nya ngapa deh. Tu aku Indai Abang datai ngubat nuan,” lalu dibabut ia perambut ari perut Dana lalu disembur Indai Abang enggau entemut. “Nya, gerai nuan, Dana,” pia ku ia.

“Menyadi nuan ulih munsuh, Dana,” pia ku jaku indu nya tadi, “Nuan pulai nebing ai tu meh jalai nuan, aku pulai ga.” Peda tak nadai agi indu nya tadi. Ia tedani ari ke luput, meda dia tak madang apung. Nya baru Dana nemu nya mimpi lebuh ke luput nya tadi. Ia pan berasai kering ga ia lalu mupuk mulai ke diri lalu bedarat ngulu ke ai Saribas. Nyau berapa ari udah nya baru datai di menua ia di Padeh din.

(Lalu Senang tu ku urang kelia bebali nyadi baya burak, dikumbai urang nyau ke saritu ‘BUJANG SENANG’, baya burak peti nyawa).

Lebuh sida diau di Buluh Lachau dia Dana bisi ati deka nguji ke diri memandu ayun ke tusun kanggan seluntang ba bujang jangung ke teluk kampung puang. Ia deka nguji mai bala ia ngunja menua jauh ke tasik linggang gumbang. Laban menua dalam Sarawak udah puas dikayau bala sida Unggang sida Mulok seduai Luta enggau sida Langi ari Semambu Bangkit orang ari Paku ili enggau bala sida Ijau Gema ari Skrang. Nya alai Dana enda ati nandu bekau kayau bala sida nya. Ia mai bala ia ngalah ka menua pegai perintah Belanda sepiak ke Sambas.

Bala sida pan begaga ke perau laban nasik menua jauh nengah gelumbang. Nya alai perau enda tau enda besai, takut ke alah laban umbak. Perau nya muat seratus lima puluh iku tubuh mesai perau Unggang ti kena ia ngipa munsuh di nanga Sarawak lebuh maia Unggang ke dulu agi ari maia sida Dana. Lalu perau ia digaga keh ia nama Ketam Batu. Langkau perau nya agi bedau ba pengkalan lama sida Buluh Antu, tang udah dalam tanah, nyangka nyau ga ke jai, tang agi bedau.

Udah tembu semua perau ia nya tadi, udah tembu ngetau bala sida pan undur ga ngayau. Undur ngili Padeh, pansut ke Batang Layar, lalu ngili Layar datai di nanga Saribas sida selalu nebing nyemerai Batang Lupar lalu nebing kiba nyemerai baru ga di Batang Sadong lalu nebing berari. Ti lebuh malam ngetu ga bekayuh, nyau siang mupuk ga bekayuh baru.

Nyau datai ga ba nanga Sarawak, ngintai ke ai keh teduh, baru nyemerai nanga Sarawak, lalu nengah luba nuju ke Santubong. Dia sida diau ga laban Dana madah ke diri deka niki ke tucung bukit Santubong. Ia niki kediri-diri bala maioh nganti di perau, belelak amat puas udah bekaioh nyenyauh nya ari menua sida ari Ulu Padeh. Tiga malam Dana di tucung bukit Santubong baru ia nurun ke diri pulai ngagai bala maioh ti nganti ia di perau di tebing ai din. Gaga bendar bala maioh meda ia bisi pulai, dikumbai sida enda pulai agi meda ia nyau tiga malam di tucung bukit din.

Bekaioh ari nya baru nyemerai Batang Lundu lalu nebing selalu, baru masuk Batang Kapuas, mudik ke ulu, datai di Sangkawang sida lalu ngetu bemalam. Nyau dini ari, bala lalu besedia nganti ke betiki, nyau ke tawas sida lalu betiki nyerang munsuh, belaban meh bala dia. Nyau kelama alah ga nengeri Sangkawang. Sida bulih bendar utai ulih ga nengeri di alah ka sida, bulih perepasan, bulih tangkap mega bala sida ia. Badu ke belaya, nengeri pan alah, bala sida pan beguai-guai ga mulai ka diri ka perau, bela sampal udah datai bala pan lalu bekaioh ga pulai. Bala sida bela gerai magang. Celap bendar kayau Dana pia ku orang maioh, siku pan nadai ga bala gugur bulu.

Pulai belantang lantang nadai utai diseguai ukai nangi ke munsuh bisi nitih ke deh, ukai nya bisi berperau ke injin baka ke maia ari tu deh maia nya kelia. Sida pan nyau ga datai di menua diri, nama enda pengaga orang ke di rumah. Orang pan nyau besambut ke antu pala, nyau begawai meh udah nya.

Enda ibuh maioh jerita pasal nya, kitai ga sama ninga jerita bukai lebuh orang ka baru pulai nyerang numbang ke menua munsuh. Nama enda pengerami orang di rumah sida Dana di Buluh Lachau. Nyau udah nya baru bala orang ti enggau ia ngayau nya mulai kediri empu ke rumah rumah diri empu, ukai baka ke serumah deh bala di begulai ngayau. Dana tu semina ke tuai, laban ia ke matak kayau.

Nyau lama ga udah nya bisi temuai datai ari Skrang, tuboh tiga iku datai nemuai ngagai sida Dana Bayang ke Buluh Lachau di Padeh. Sida tiga nya diulu ke tuai sida ke benama Lang Labang. Sida datai nemuai lalu bemalam ba sida Dana Bayang. Berandau meh ga dia semalam-malam, nyau dini ari baru Dana Bayang nanya ke pejalai penemuai sida tiga ia. Nyaut meh ga Lang Labang madah keh pejalai diri. “Nyadi bisi meh ga pejalai kami tiga tu Apai Tiong,” pia ku ia. “Pejalai tu berat bendar, laban ngelama tu kami ari sepiak nyin selalu belaya enggau bala kitai ari Undup. Bala kitai ari Batang Ai dibantu kami ari Skrang, tang kami selalu alah laban sida lebuh ke bemok. Kuta sida tegap bendar, tambah mega sida selalu dibantu bala sida Balau ari menua ili ari nyin. Maioh bendar bala Undup nya kami lalu enda ta alah ke sida. Nya alai penemuai kami tiga tu. Minta bantu nuan mai bala kitai ari Saribas tu nyah bala kami ari Skrang enggau Batang Ai nyin, ngambi ke tuboh kitai maioh agi, laban maioh bendar tubuh bala sida munsuh, agi ga kuta bengat tegap, ta enda ulih alai kitai tama.” “Oh, enti pia nama kebuah enda enggau kita deh Lang Labang,” pia ku saut Apai Tiong. “Nya alai baka tu ku semaia kitai, nama bulan tu penerama ila, bala kita sedia ke perau, beranti di Nanga Skrang. Bala aku tetap datai maia nya ila,” pia ku ia. “Enti munyi nya penemu nuan, besedia meh kami. Pulai tu kami tiga ila ngasuh bala kitai betesau ga ke bala ke din lalu ke Batang Ai keh.” Sida endang enda gali semalam malam nya. Nyau tawas ari, makai mega maia ke makai pagi.

Tembu makai nyau berandau ga agi. Nyau udah nya hari nyau niki, sida tiga ia pan madah ke diri deka mupuk ga mulai ke diri ke Skrang. Sida tiga temuai nya tadi nyau datai ga di menua diri, ukai nya ke jauh deh Skrang enggau Saribas, sama setanah semina nama sungai ke endur diau enda sama nama. Orang nya endang sama diri sekaban, baka ke enggau Undup enggau Balau sama sama diri sekaban. Tang laban orang kelia ke tau peneka ati munuh pangan diri, nama enda lantang ati, barang berani munuh bala diri empu. Nya alai nyadi bebalas nyau bebala besai ngelaban pangan diri.

Bala pan sama bela udah bersedia bela udah ngadang, nyau cukup datai ba timpuh bulan perenama. Bala sida ari Saribas pan nuntung ga di Batang Skrang. Ari nya baru undur ke Nanga Skrang. Dia bala beranti sida ari Batang Ai pan datai ga dia. Nama enda pemaioh bala deh. Sida lalu bemalam dia di Nanga Skrang. Sida ke tuai tuai berandau keh jalai ngelaban munsuh, belatur keh sapa ke ngambu dulu, ngari ke raban sebengkah-sebengkah. Bala ari Batang Ai bisi tujuh iku ngulu ke bala sida ngenulu ke bala ngiring bala sida. Ari Skrang tujuh ga tuai ke dulu diulu ka Lang Labang. Bala ari Saribas tujuh ga diulu ke Rekaya Akum bensumbar Bedindang. Lebuh deka berunding belatur ke tubuh ke mai bala dulu, dia bala tekenyit ninga panjung utai balat bendar, munyi ka runtuh langit ku jaku kitai. Enti langit tak runtuh empa penggingar panjung ke dinga bala pengayau ke ngemaioh nya betugung beranti di Nanga Skrang. Takut meh bala ninga panjung nya. Bisi ngumbai nya sabut, ngumbai nya antu. Tang enda nemu antu apa antu nama, nama bengat ngenggar nya nyawa manjung tengah malam besut nya. Begau meh bala maioh besedia nyangka nya bala munsuh, udah nemu sida bisi betatam di Nanga Skrang dia. Bala sida ke tuai dia betanya suh pangan diri ke nama reti burung bansa nya. Siku pan nadai ga nemu reti utai bakanya, “Nyelai bendar meh burung nya,” pia ku jaku. “Burung nagang kini nya,” ku ke tuai-tuai ti bergempuru dia.

Nyau ke lama baru Dana Bayang bejaku, “Nadai nya dikirau ke kitai deh. Ukainya sabut manjung munyi ti ku kita tang nya panjong Sengalang Burung. Ia madah ke kitai, alah meh munsuh laban bala kitai, ia madah ke diri enggau kitai ngalah ke Panglima Unjar, tuai sida Undup di Tanjong dia,” pia ku jaku Dana Bayang enggau bala maioh ke abis takut ninga panjung nya tadi. Bala pan tegeram ga badu agi begau takut, ninga panjung utai ke dinga nya tadi bengat balat bendar nyelai. Enda kala sida ninga nyawa orang manjung nginggar nya sekumbang sida ke belaya kediri ngelaban munsuh sida. Udah nya nyau ninduk ke diri ga bala.

Datai ke siang, barang ke berapi tumu agi ga angkat mansuh asi pulut, jena enda pemaioh bala ke diau dia, ga bala pengayau, betumpu tiga begulai dia. Enda kala bala ngemaioh nya. Sida ari Batang Ai, sida ari Skrang, sida bela gagit ke nurun ngayau, laban bala ari Saribas bisi enggau diulu ke Orang Kaya Pemancha Dana bensumbar Bayang. “Ke ngelama tu semina ninga rita ia kitai, tu ia empu enggau bala ia ke tunggul berani ari Saribas sama sama maioh dibai ia mantu kitai. Nadai kebuah kitai enda tak alah keh munsuh serak tu,” pia ku jaku tuai-tuai ari Batang Ai enggau sida ari Skrang.

Udah badu mela diri bala maioh pan lalu besikap, lalu nurun ke perau, lalu undur, ukai nya jauh di Nanga Undup ari Nanga Skrang. Datai di Nanga Undup, bala lalu mudik Undup, datai semak menua munsuh. Orang pan sangkai lalu bedarat ngagai rumah munsuh. Sida endang nadai kakang endang lalu terus niki ke menua munsuh terus nuju rumah. Datai dia lalu ngerapat kuta. Kuta munsuh tegap bendar, nadai jalai tama, kuta ga ngelingi rumah, ga tinggi diadu enda ulih perejuk munsuh.

Munsuh ke dalam kuta endang udah besedia magang. Meda munsuh datai endang enda belalai, terang-terang dipeda maioh. Sida pan lama ga berunding kati deka jalai tama, laban kuta endang udah ditan ke bala munsuh, pintu kuta endang udah ditambit lalu dijaga rapi. Endang udah betatam bala munsuh ke nan ke kuta. “Nadai cara bukai kitai tu,” ku Akum bensumbar Bedindang. “Perejuk kuta tu, baru kitai ulih tama. Ari dalam nyin lagi baru mebas tambit kuta nya, baru bala kitai ulih masuk tama kuta tu.” “Barang ia meh,” ku saut sida ari Batang Ai enggau ari Skrang. Tak manjung meh Bedindang. Panjung ia abis ia pan lalu mengkecit merejuk kuta. “Amat tegar meh Bedindang tu,” pia ku sida bukai. Sida Lang Labang pan lalu merejuk ga ngentudi ke Bedindang sereta enggau tuai ari Batang Ai. Sida tiga lalu muka kuta, nya baru bala maioh ulih tama. Bala munsuh tadi surut tekenyit meda sida tiga tadi ta labuh, teperejuk ke kuta. Nya alai sempat alai sida tiga mebas tambit kuta.

Udah bala tama, nya baru bala lalu bepantap. Bepantap se-pagi-pagi nadai ngetu nyentuk ke munsuh alah. Orang ke indu, anembiak ulih ngerari ke diri. Sekumbang orang ti belaban di dalam kuta, rumah pan alah ga laban sida. Panglima Unjar empu ulih ngerari ke diri enggau maioh bala anembiak dibai ia. Sida terus rari ke sepiak kin keh ngagai menua Selimbau di Sejiram. Datai ke sahari tu pan lalu meh diau di menua Sejiram di Kapuas. Nyau lama ga udah nya baru Panglima Unjar mulai kediri ke Undup ke baru. Udah serang ti diulu ke Rekaya Dana Bayang nya tadi sida ari Batang Ai enggau Skrang pan nadai ga belaya enggau kaban kitai ari Undup nyin agi datai ke saritu. Diau bebaik, saum empa saum kena, nya betampil, berenggap enggau sama diri, nyadi diri sebilik.

Alah bendar meh bala Panglima Unjar tu tadi, abis utai laban bala orang ke nyau niki rumah tak nyau peneka bala mai utai ke tau diguna. Endang baka menua udah alah, sapa ke enggai bulih perepasan, semadi enda ta ulih keh. Nyau ngetu ke bemuk bala pan nyau ke mulai ke diri.

● Tibak ari karang bup Iban Pegai Rajah Brooke tu : AJI SEDUAI NANANG

Aji seduai Nanang tu anak Orang Kaya Pemancha Dana (Bayang) di Padih. Rekaya Dana seduai Mengan bisi anak semilan iku; enam lelaki ke benama Nanang, Luyoh, Aji, Unting, Buda enggau Umpu lalu tiga iku indu ke benama Tiong, Landan enggau Badong (Kumang Bunsu). Ari enam iku anak lelaki iya, semina Aji (Saji) enggau Nanang aja tau kayau. Luyoh, Buda, Unting enggau Umpu nangka semina berani.

Sebedau iya tau kayau, niang Benedict Sandin bisi nuliska dua bengkah mimpi Nanang ke munyi tu. Dalam mimpi iya, Nanang asai ke bejalai niki Bukit Santubong. Datai iya di tuchung, dia iya bisi meda rumah orang sebuah ke panjai bendar. Iya lalu niki. Datai di tengah rumah, iya lalu didudukka indu siku. Empai lama udah duduk, indu nya mai Nanang niki ke sadau. Nanang lalu bejalai entudi iya. Datai di sadau, indu nya lalu ngasuh Nanang malik. “Peda nuan Nanang, semua rampa menua nyin alah magang kayau nuan ila. Nadai siku sida berani nantaika jari ngelaban nuan.” Indu nya lalu mai Nanang tama ngagai padung iya. Peda Nanang dalam padung bisi peninduk tiga iti. Ku indu nya nunjuk ngagai peninduk, “Iya ke ari kanan enggi nuan, tengah enggi aku lalu ari kiba nya enggi Ngumbang. Ngumbang alah kayau laban nuan. Nyadi aku tu Kumang,” ku indu nya madahka nama diri ngagai Nanang. Nanang pan lalu dani.

Enda bengat lama udah mimpi nya, alai Nanang bisi mimpi baru. Nyadi dalam mimpi iya, Nanang asai ke diau ba langkau kajang di tuchung bukit. Enda mukai-mukai tak datai ribut mangkaka langkau iya. Langkau nya lalu terebai nabanka Nanang sereta labuh ba pendai orang, bekerangan manah bendar. “O, lalu mih Nanang, enggau kami dua mandi,”ku indu siku. Nanang pan deka ga enggau seduai iya mandi. Indu nya lalu bejaku baru,“Nyadi nuan nyampi indai, lagi aku manjah iya.” Nanang pan duduk atas batu galang. Indu nya lalu manjah iya enggau ai selabu. Sereta iya dipanjah indu nya, indai indu nya lalu nyampi munyi tu, “Nunda sampi Manang Tibi ke belian nyilup hari entilang remang. Nunda sampi Manang Chelung ke belian nengkuyung, di paras lesung telentang. Nunda sampi Manang Matai ke belian mansai, di bidai pakan melintang. Nunda sampi Manang Lansu ke ngeluluka diri nubu di pun tiang.”

Nyadi ai selabu pan abis kena manjah iya, sampi indai indu nya pan abis ga. Indu nya lalu bejaku, “Nyadi menya lebuh aku manjah Laja, apin abis ai aku, endur iya chelap. Nyadi nuan tu Nanang sebaka enggau Keling, sama enda chelap laban ai selabu tanam. Bulu nuan Biring Sempidan. Enggaika nuan enda nemu, aku tu Kumang.”

Nanang seduai Aji suah bendar ngelaban Perintah di Saribas begulai enggau siku agi menyadi seduai ke benama Luyoh. Udah parai Dana Bayang, sida tiga menyadi tu enda ngasika ajar apai sida sereta angkat ngelaban Rajah di Nanga Padih baru. Alah dia, sida tiga nguta Nanga Spak, Layar. Alah di Spak, sida nan di Nanga Sungai Langit ke alai Aji parai negah bala Tuan Muda Charles Brooke dalam taun 1858. Lebuh bala Rajah betatam di kerangan Nanga Sungai Langit, dia sida Aji ke sama betatam ba emperan muak ke kiba mudik deka negah bala Rajah laban ke nyau enda tan ninga panjung enggau peransang munsuh tang burung sida bengat jai. Meda burung ngenyai nya, sida enda nyadi negah bala Rajah. Meda baka nya, bini Aji lalu bejaku, “Lapa bala pengabang nuan enda ditikika nuan dih Aji?. Enti nuan takut, kain aku tu pasukka nuan. Enggai nyadi nuan semina ngarapka apai enggau menyadi aku aja bebunuh ngelaban munsuh.”Ninga peransang bini iya tak lebih ari ke patut, dia Aji lalu beketup ngeli. Iya lalu muka rajut enggau baju kirai iya enggai ke nadai dikena bala anak iya bebalaska pemati iya dudi hari ila laban iya sigi ngira diri beamuk takar ke seput padam bai ati ti kelalu pedis dienchakka bini iya jaku munyi nya. Aji semina mai duku sebilah aja deka dikena iya mepat bala Rajah ti betatam ba kerangan. Meda Aji mansang, iya lalu ditimbak Laut Spaoh siku ke benama Beruang. Aji lalu rebah luput tang lalu dikepit ipar iya siku ke nitihka iya laban deka nabanka Aji rari. Meda baka nya, ipar iya nya tadi pan lalu ditimbak munsuh sereta kena lengan ti ngujungka Aji lalu tebelengka ari kepit iya. Aji ke luput nya tadi lalu dipasung munsuh sereta direndam sida. Taja tubuh murus, peluru enda masuk ba tubuh Aji laban iya kebal. Udah Aji parai, bangkai iya lalu dibatak munsuh, digalika ba tikai bekuang atas kerangan.

Hari siti baru orang mumpung pala Aji. Kenu ku jerita, pala Aji nya diambi siku Iban ari Skrang ti nanahka Rajah. Di Skrang din, ari pala Aji tu tadi, pansut siku orang bujang. Pagi hari, orang bujang tu duduk di tebing sungai, nganti orang nurun nyauk tauka nurun mandi. Lebuh orang nyauk tauka mandi, orang bujang tu lalu merejuk ke ai sereta bebali nyadi baya ti nachahka sida ke nyauk tauka mandi nya tadi. Pemuas iya, pala Aji tu lalu dipulaika Iban Skrang ngagai sida Aji sebilik di Saribas. Pala Aji tu dikuburka sida sebilik iya berimbai enggau kubur apai iya Orang Kaya Pemancha Dana (Bayang) di Buluh Antu, Padih. Udah bekau nya, baya Aji nadai agi ngachau Iban Skrang.Dalam bup Ten Years in Sarawak, Charles Brooke bisi ngenang Aji munyi tu, “His father, the Orang Kaya Bayang, who died only a few years ago, had maintained a suprising influence over both Dayak and Malay; the latter always following his counsel for the settlement of their more difficult and intricate cases. Aji’s name and acts had been in my ears and dreams for years past. Many a bloody deed had he perpetrated and always boasted that the white man’s powder and shot would take no effect on his body.”

***Ambis**