KABUAH BURONG POK BEMUNYI MALAM BULAN PERANAMA

● KABUAH BURONG POK BEMUNYI MALAM BULAN PERANAMA.

Diambi ari Bup CHERITA DULU KELIA. Ditulis oleh GEORGE JIMBAI. Dichelak BLB.

Nyadi ko cherita bansa Kayan kenyau ari jeman dulu kalia bisi lelaki siko benama Ukang. Ukang tu orang ke tinggi sereta sigat bendar gamal lalu bini iya nyau disema ka baka pemajik Kuman. Ukang rindu bendar ke bini iya, tang bini iya dipeda baka ke nadai pengerindu ka laki iya. Tang iya enda madah ka penusah diri ngagai bini iya, semina iya tak berati ka pendiau bini diri.

Enda lama udah nya iya nyau nemu bini iya bisi pengerindu ka lelaki siko, ke endang pangan Ukang empu. Enti leboh Ukang bemalam di langkau umai tauka mindah ka bukai, bini iya diau sereta tindok enggau ambai baru iya nya. Leboh Ukang pulai, orang lalu nusoi semua ulah ti dikereja bini iya, lalu pia mega bini iya nya deka sarak enggau iya lalu jadi enggau lelaki ti dikerindu ka iya.

Ukang endang enda iboh ka ulah enggau pengawa bini iya nya, laban iya nemu bini iya nadai orang nulong kelimpah ari iya empu. Iya diau jenoh diri sereta lalu enda ngerara bini iya, tang iya berunding ka jalai meri penusah ti pemadu besai ngagai bini iya ketegal iya ti ngereja penyalah nya. Iya ke berunding nya nyau datai ka dua-tiga hari nya baru iya tulih ka akal ti manah.

Gamal Ukang dipeda nelap sereta manah bendar enggau bini iya. Iya bejako enggau bini iya endang tak lantang sereta lalu madah ka bini iya nya indu ti patut bendar nyadi ka bini iya. Tudah bini iya enda nemu ati Ukang dalam nyin, laban jako ti dipansut ka Ukang nya endang jako ngapa, tang bini iya enda nemu nama kebuah laki iya mansut ka jako munyi nya. Nyau dalam runding bini iya din, laki iya enda nemu pesu fasal pengawa iya iya ti deka sarak sereta lalu jadi enggau lelaki bukai, taja mega berita iya endang di temu orang serumah-rumah nya.

Dua-tiga hari udah nya Ukang lalu bemalam ka langkau umai baru, lalu ninggal ka bini di rumah baru. Bini iya ngadang Ukang nya enda pulai ka rumah datai ka nyau beminggu-minggu nya alai iya lalu nurun baru diau enggau lelaki ti dikerindu ka iya tadi.

Tang Ukang nemu bini iya udah nyau ngagai rumah lelaki nya, nya alai iya lalu mulai ka diri hari siti sereta lalu terus ngagai rumah lelaki ti gila enggau bini iya. Benong seduai berandau ka pengawa ti ka dikereja seduai ka dudi hari Ukang lalu taman gagai seduai. Iya lalu merening bini iya sereta lalu bejako, “Nuan udah berunding deka ninggal sereta lalu sarak enggau aku, tang terubah iya aku enda tau enda ninggal ka nuan dulu. Aku ka ngambi semua perengka-tengkira ke dalam rumah tu.”

Lepas nya iya lalu nyeliah ka diri ari bini iya sereta lalu belaboh nyikap semua utai ke dalam rumah nya. Leboh barang nya udah tembu sikap iya, iya lalu ka mupok,bini iya pen lalu nyerarat ga nyabak, ko iya, “Anang nuan ninggal ka aku, enti nuan ninggal ka aku, aku tentu nyadi orang ti meskin sereta mina utai ngagai orang kulu-kili.” Ukang endang tak enda malik semina iya nimbal jako bini iya nya madah ka diri ninggal ka iya enggau sapai ati.

Iya lalu nurun belanda ngagai sungai sereta lalu nempalong ka semua barang nya tadi ngagai ai. Bini iya seruran agi rauh-rauh nyabak minta Ukang pulai, tang Ukang endang enggai mending ka jako iya. Ukang lalu niki ngagai puchok nibong, lalu enggau naka pengering iya, iya lalu merejok ngagai bulan. Bini iya lalu nitih ka iya, tang niki kayu, sereta iya datai ka puchok kayu nya iya lalu bebali nyadu burong ti dikumbai kitai “Pok”, lalu ko jako Kayan dikumbai “Manukwak”.

Tiap-tiap malam iya terebai ari puchok kayu siti ngagai puchok kayu siki ngangau ka Ukang, tang laban Ukang ke tekelalu jaoh nya alai iya enda ninga kangau bini jiya. Nyadi dalam bulan din, Ukang kenu ko cherita dudok nebah kesuling buloh iya.

Nyadi lelaki ke gila enggau bini Ukang nya tadi nyau mansang tusah ka tusah laban pengerindu ati iya udah mutus ka bini Ukang, tang indu nya enda jadi enggau iya. Nya alai iya kelalu tusah sereta merampau pendiau bakanya, enda lama alai iya mati.

Nya alai nyentok ka kemaia hari tu pen agi ga bansa Kayan arap ka Ukang nya agi tau dipeda bemain nebah kesuling iya leboh bulan peranama. Lalu leboh bulan peranama nyawa bini iya inggar bendar ngangau ka laki iya, tang iya selalu tusah laban laki iya enda ninga kangau iya.
Lalu diatu enti lelaki belaya enggau bini, bansa Kayan selalu nyema ka orang nya ngena jako munyi tu: “Anang baka Ukang seduai bini iya, enti ka bakanya manah tak ninggal ka pangan diri ari pun.”

Samoa bansa Kayan ke nemu cherita tu, arap ka cherita tu amat, laban penusah ke nyau ka sebaka enggau enggi Ukang seduai bini iya nya tadi bisi nyadi ba bansa sida dalam Batang Baram. Nyadi agi rambau Ukang seduai bini iya nya kalia, ko penemu bansa Kayan bulan semina tinggi ari puchok kayu. Tang iya mansang tinggi ka tinggi leboh Ukang udah merejok kia ka.