RAJAH LAUT

RAJAH LAUT

Sereta nuntong meh luan perau iya ba pengkalan Rajah Laut, perau iya di tarit iya kediri-diri ka atas kin, takut ka orang ngachau iya ba ai. Enda chechamang iya lalu niki ngagai Balau Datu deka minta iri diau dia semalam. Nyadi nama Rajah Laut nya disebut orang, Sultan Mohammad Salam muda Alam ke merintah pulau Peramata Maya. Nyadi Menteri Besai sida di pulaunya disebut orang Datu Patinggi Intai, ke di kumbai orang diau di gilik tasik besai sidi di jari tunjok megai tau nabur ka beras segantai gemisai jadi indai engkerawai midang. Nyadi Ulu Balang orang di menoa nya di sebut sida Datu Harun orang ke diau ba gelanggang gumbang besebun, orang ke tau nelan jarum ke bejerembun nansang ka rang.Keling lalu mansang ngadap ngagai Balai Datu Intai. Datai iya ba moa pintu, dia iya lalu betemu enggau orang jaga tiga puluh tiga nabi iya sama sereta. Iya lalu bejako enggau orang jaga dia.

“Hai! Orang jaga! Bulih tidak aku ngadap Datu?” ko Keling.

“Tunggu sini dulu orang Iban,” ko orang jaga bejako enggau iya.

“Enggai aku kena tunggu nuan. Aku tu orang Iban deka betemu enggau Datu,” ko iya nyaut.

Orang jaga lalu nyau tama ka dalam maah ngagai Datu, madah ka bisi orang Iban deka betemu enggau iya. Enda lama udah nya peda iya pansut baru ga orang jaga, lalu ngangau ka iya.

“Hai! Orang Iban, mari, bulih masok ngadap Datu,” ko orang jaga.

Datai Keling ba moa Datu iya lalu meremi ka diri nunda tabi bansa Laut.

“Saya orang bansa Iban, Keling nama aku. Aku baru pulai ari nengeri Antu Gerasi chari bini aku nama Kumang lama sudah ilang. Aku minta singgah sebentar dalam nengeri Datu,” ko iya ngelulu ka diri jako Laut.

“Bagus Keling bagus, saya suka sama kamu tinggal di nengeri ini tetapi besok hari kamu mesti chari lawan dulu baru bulih pulang nengeri kamu,” ko Datu.

Keling lalu diau ba nengeri Rajah Laut semalam nya. Ia iya bejalai meda ka gamal pengerami orang dalam nengeri nya.Nyadi ba nengeri Rajah Laut nya bisi orang siko ke pandai bemain sereta maioh bendar penemu ke tau ngasoh orang alit ati. Meda iya bangat gagah sereta sikar nya alai nama iya di kangau ka orang Rimau Garang Palau. Meda iya maioh penemu sereta landik berubat nya alai nama iya di kangau ka orang Beliau Pulau. Bansa penemu ke endang di kembuan iya, nya kebal, penemu kering enggau macham penemu bukai ke ngasoh orang alit nati. Beliau nya amat gagah, ti tuboh sapuloh anang mansang nyatup iya. Beliau nya endang manok sabong RajahLaut, endang selalu di sabong iya belaban enggau orng ti bisi datai nemuai ngagai Pulau Peramata Maya. Lalu iya mega endang manok pungka laki orang dia, nya alai semoa orang takut magang nangkup iya, maioh orang ke datai ari menoa bukai kia enda ulih pulai agi nama udah di sabong enggau Beliau Pulau nya.

Nyadi Rajah Laut nya empu endang orang tau engkeramat ka suah iya di peda orang terebai ngena tikai bekuang, selalu iya merau ngena pelaku tikai pandan, lalu iya di peda deras agi ari kilat sekali ngijap.Nya alai ati Rajah Laut andal bendar leboh iya meda Keling bisi datai, laban iya endang ngadang diri deka nyabong Keling bamok enggau Beliau Pulau.Malam nya Keling enda tentu tindok irau ati ngadang diri deka di sabong orang belaban pagi siti. Ti nitih ka dalam ensera semina sekenya aja iya bisi tindok, lalu dia iya bisi mimpi betemu enggau Ini Andan datai ari langit.

“Ngadang nuan Keling,” ko Ini Andan.

“Laut ditu maioh bendar penemu, pagila nuan deka di sabong Rajah nya belaban enggau Beliau Pulau. Tang nuan anang irau ati laban aku bisi enggau nuan,” ko iya.

Tumu pagi hari siti, Menteri Besai ke dikumbai Datu Intai, orang ke diau di gilik tasik besai sidi di jari tunjok megai tau nabor ka beras segantai gemisai jadi indai engkerawai midang, lalu ngempuru ka orang ngagai Balai Besai mai sama ngemata ka Keling belaban enggau Beliau Pulau.Orang jaga lalu mai Keling tama ngagai Balai Datu, dia iya meda orang endang udah sedia semua begempuru deka ngila ka Rajah Iban belaban enggau Beliau Pulau. Udah nya Datu Intai lalu bejako ko iya:

“Hamba rayat semoa, ini hari kita di sini ada satu perlawanan di antara orang Iban benama Keling dengan Rimau Garang Pulau, dia bulih lawan sampai mati! Sampai mati! Mati!” ko iya.

Keling enda engkebut mending ka jako Datu Intai nya ke nyabong Penikar Rimau Garang ngelaban iya. Peda iya penikar nya lalu muka langkah bunga main iya ba moa maioh. Udah tembu bunga pencha, bunga kuntau, tembu bekuntau, bunga chekak,udah nya baru iya muka bunga langkah mati. Gamal iya ga besai, iya ga tinggi, buah isi iya ga sentar.

“Lagi asai Beliau nya,” ko ati Keling dalam nyin, leboh iya ngila ka Beliau muka bunga kuntau.

Keling leboh nya agi chegit-chegit bediri ba tisau bala. Udah nya baru orang ngangau ka iya. Nyadi rantong nyabur apai iya endang mengkang di tangkin iya ba punggong.

“Hai! Orang Iban! Sekarang mari ka depan bulih lawan sama Penikar Pulau,” ko Datu ngangau ka iya.

Iya lalu mansang ngagai tengah-tengah bala lalu meremi nunda sembah tabi Laut.

“Minta ma’ap Datu,” ko iya, “betul tu belaban sampai mati.”

“Ya betul orang Iban,” ko Datu, “Lawan sampai mati!”

“Baik Datu, enti mati percuma,” ko Keling.

“Saya suka kita mati,” ko Datu.

Ninga jako Datu munyi nya lalu nyirut meh Keling tak munyi ka ngetup asam samadang, lalu manjong kenu Keling tak taung-taung munyi ke mumpong ka ujong tapang mensawang.Ninga jako Datu Inai nya tadi endang ngasoh belaban sampai mati, Keling lalu beati ingkar, endang jelar-jelar beati berani mantup ka ati tajam ka renjan nyilu tisi. Peda tak tebuka kenu sirat ari punggong iya lalu nyadi nabau ke begenarau tampong sawa. Angkat nabau lalu nangkap Beliau Pulau, lalu diperekoh ka iya Beliau datai ka mati. Udah mati beliau nya tadi orang isi nengeri nya lalu begau, dia ular nabau masong semoa orang senengeri di tanchang iya tuboh dua, tuboh tiga kenu, diperekoh ka ular nabau nya magang-magang, lalu mati nadai utai ngemaioh nya semoa orang ke bisi bediri semak dia. Meda utai nyelai nya, balat agi ga orang sanengeri nya begau deka munoh nabau. Meda orang begau mansang maioh bakanya lalu merurut ga baju kulit baya ari belakang Keling, lalu nyadi baya lalu masong orang tiga puloh iko endang sama nadai ngerijat. Meda utai mansang nyelai bakanya udu agi ga orang begau, lalu maioh agi ga orang datai begempuru kia deka munoh nabau enggau baya ke masong sereta nangkap Keling lalu nyadi remaung. Remaung nya angkat masong lalu nangkap orang senengeri nya. semoa ke kena tangkap iya endang enda mengkesap lalu lesap.

Dia meh ngepan Keling tiga iti nya tadi, baju iya siti nyadi baya, sirat iya nyadi nabau enggau gagong iya nyadi ngelaban semoa orang sanengeri nya, tang mensia bangat kelalu maioh lalu enda tentu ulih tangkap sida tiga semoa. Diatu Keling pen nyau ati deka nyintak nading unding iya ka beranaing makai tulang. Lalu deka nyintak nyabur chudor iya ke pengundor darah langkang.Dia Keling lalu ngelaban orang, biau iya ka kiba peda putus lima, biau iya ka kanan peda rawai delapan, biau iya ka moa peda putus tiga enda benyawa, biau iya katas peda putus sebelas enda mengkesap. Peda bangkai orang ke parai endang tak bereba baka reban petebang kayu pengerang. Nya meh semoa orang senengeri nadai tan di laban Keling, semoa ke enda ulih pantap iya ke bebaju besi ditikam ka iya ngagai lubok dalam enam. Semoa ke panjai dagu di kait-kiait ka iya ngagai puchok kayu emperawan. Meda orang ngemaioh nya mati di laban Keling, alai datai Rajah Salammuda, endang Rajah Laut megai pulau nya.

“Kati alai nuan tak begah-begah munoh nadai enggau paah?” pia ko jako Salammuda, bejako enggau Keling Rajah Iban.

“Aku ga ninga jako Datu Intai mai bebunoh sampai parai,” pia ko jako Keling Rajah Iban.’

“Aku enggai meda nuan munoh anembiak aku ngemaioh nya. Aku enggai ngelaban nuan bebunoh, tang ti baka tu bendar meh nuan munoh anembiak aku,” pia ko Salammuda bejako enggau Keling Rajah Iban.

“Au, bendar meh aku tu deka ngelaban nuan,” pia ko Keling.

Ninga nya Salammuda lalu nyengkau sentaka batang senapang, lalu di tuju ka iya deka nimbak Keling. Di raih ka iya senapang enda ga meletup, senapang iya meletup Keling ga enda masok peluru. Meda bakanya iya lalu nyengkau pedang di kena mantap Keling enda ga rajai, kapa ke iya rajai ngenjing ngelikis ngasoh mata pedang begiling baka ke udah di pantap ngagai batu. Lengka ka iya pedang jengkau iya ga sangkoh, tumbok ka iya ngagai Keling enda ga masok. Tumbok ka iya peda tak begulong meh Keing baka ke mesai leka buah pinang tuai lalu angkat bejalai. Di tumbok iya baru peda tak duduk guntam-guntam baka tuga tundan, lalu angkat ga bejalai. Di tuju iya baru ngena sangkoh lunju peda tak berasap lalu lesap nadai agi ayan, udah nya pansut peda tak berengkah ga bejalai. Di genggam Salammuda genteran sangkoh bujak lalu di entak ka iya ngagai Keling kenapat inat nuju dada rapi tusu, peda tak bediri degi-degi baka tiang besi, lalu mupok baru ga bejalai. Di tikam iya enggau sangkoh gansai peda tak bebali nyadi daun api, lalu bejako nyaris inggar endar munyi nyawa letup kelutong bedil temaga.

“Kati nuan Rajah Laut udah sedia, udah ngadang nuan?” ko Keling.

“Ngadang meh aku tu Keling, endang deka ngelaban nuan,” pia ko saut Salammuda.

“Enti nuan udah ngadang belaban meh tua,” pia ko Keling. Iya lalu nyengkau sangkoh lunju ke bediri degi-degi ngimbai iya empu.

“Sangkoh lunju enggi aku tu, ke bensumbar ditikam mali salah,” ko Keling.

Iya lalu nikam ka sangkoh lunju nya ka langit kin, peda tak naai agi ayan lalu ensilup ba remang.

“Ngadang nuan Rajah Laut,” ko Keling ga bejako baru.

“Ngadang meh aku tu,” ko Salammuda.

Dinga tak rengong-rengong sangkoh lunju laboh ari langit ngenjing mijar ngijap baka kijap kilat hari jai. Dinga tak semiup sekali sangkoh tajam nya laboh kediri lalu nutok nyelinting bubun aji Salammuda. Peda tak lalu kejar-kajar iya mati ba semak kaki Keling ke bediri. Udah nya Keling lalu meresa bangkai Rajah Laut, dia iya bisi nemu tanda seduai iya sama saum apai indai. Udah Keling nemu Rajah Laut nya menyadi iya, nya baru iya berengkah ngidup ka iya baru. Rajah Laut pan lalu pulau idup baru, pulai gerai baka selama. Samoa orang dalam nengeri nya chenggang magang meda Rajah Iban tau munoh tau ngidup ka seput Rajah laut nya baru.

“Enti bakatu endang pandai orang Iban,” ko jako orang Laut dalam nengeri nya.
Ngepan Keling tiga bengkah nya tadi, lalu mulai ka diri baru ngagai tuboh iya. Iya lalu angkat nepan ka perau ninggal ka menoa Rajah Laut.

●ANTU GAYU

Belayar Keling angkat ninggal ka Pulau Rajah Laut, datai di puak tasik, lalu kena pangka ka biau balai ribut besai angin neruju. Perau iya lalu tekebu, di taban ka ribut lalu tepawah jauh ka tasik kin. Perau lalu tesiuk tama ai, tekala nya lalu tungkup. Keling ngidup ka seput diri belatoh ngena papong dayong. Nyau ka lama iya udah matong-atong di puak tasik lalu di sagu ka leka gelumbang ngagai semak tebing ninding udu btingkah, nadai jalai niki, nadai alai bepegai. Iya lalu bepagut paut ba urat kayu ke tumboh ba tingkah batu, nya baru iya ulih mupok niki begadai-gadai manggai ka diri ngagai tanah landai. Datai iya dia lalu ngali ka diri udah lepi bekau kena pangka ka leka gelombang dalam ai tasik. Udah tuboh enggau seput iya berasai lantang agi nya baru iya mupok bejalai begaai nengah babas, meraka batang kayu, ensurok randau, neresap, ngiga batang jalai raya. Hari leboh nya nyau ka petang, maia salah kelala, iya lalu ngali ka diri tindok ba selepak bandir pun kayu sekayu ke besai bendar-bendar, ngenjing besadau gamal bandir nya, dia alai iya lalu ngendoh ka diri. Pagi hari siti bejalai baru ga iya ngejang ka pun kayu nya, apin lama iya uah bejalai lalu tepeda ka orang siko dulu ari iya. Iya berunding dalam ati diri, berunding ka sapa orang nya tau bisi ayan dalam kampung. Iya lalu ngangau ka orang nya.

“Ui! Sapa nuan nya antu sekali ka Iban?” ko Keling.

Orang nya tengetu ba tengah jalai, Keling lalu mansang ngagai iya.

“Aku tu pan sama baru pulai bejalai baka nuan,” ko orang nya nyaut iya.

Seduai lalu sama bejalai alah datai ba tebing sungai, dia orang nya mai Keling ngetu.

“Ngetu ditu tua,” ko iya, “ngetu belelak, lagi bejalai baru.”

“Barang iya meh,” ko Keling.

Ati iya lantang agi diatu laban bisi orang ka sulu enggau berandau di rantu jalai, tang bisi ngenyit ayan lalu nyulu iya dia. Di pelaba ati iya nyangka orang nyan amat pulai bejalai. Enda ga iya datai ati nanya ka menoa orang nya. Leboh seduai dudok ngetu dia, orang nya lalu bejako enggau Keling.

“Bibat tua Buat,” ko iya, “sebarang tua alah mati.” ko orang nya.

“Barang bai nuan meh Buat,” ko Keling.

Angkat orang nya tadi ari iya ka dudok lalu enda chechamang nangkap Keling, mangka ka iya ngagai batu, nadai ga Keling puri, kapa ka bisi ngasoh iya pedis, ngasoh iya bediri degi-degi baka ke endang enda tau rebah. Mansang Keling nangkap orang nya, lalu dipangka ka iya ngagai batu, peda tak enchair darah pansut ari abi ba pala orang nya. Angkat bru ga orang nya miau ka Keling kena batang kayu, peda tak engkanjong mantul. Mupok ga Keling bejalai gadai-gadai ngagai orang nya, lalu nangkap iya baru, di biau ka iya ngagai pun kayu, dinga ngenjing merengik luput. Ngeleda iya luput lalu bejako tiga leka enggau Keling.

“Aku tu Antu Gayu, alah meh aku laban nuan, nya alai aku mati, nuan idup, gayu meh nuan nguan menoa,” ko iya, iya lalu ngapus ka nyawa diri dia.

●NEBANG LIMAU SENAMAN

Enda LAMA Keling udah ninggal ka Antu Gayu, iya lalu terejun ba pendai sida empu di Panggau Libau. Datai iya dia, lalu mandi; seninjik sida ka biak bisi bemain ba tengah laman meda iya mandi, sida lalu beguai-guai belanda pulai ka rumah megau orang.

“Ui! Ui! Aya!” ko sida ngangau ka Sempurai. “Sapa orang ke mandi ba pendai kitai din tak baka Keling di peda kami?” ko sida.

“Chis, kita ka biak nya sebarang orang rara. Sapa orang ke dikumbai kita Keling? Enda antu nya kau ngaga diri baka gamal iya. Anang kita sebarang orang rara. Nadai Keling agi bisi di anti kitai pulai,” ko Sempurai.

“Enda aya, tak baka gamal Keling di peda kami,” ko bala anembiak nyaut iya.

“Kita ka biak nya anang bula-bula ngapa, madah ka Keling bisi datai, nama kita enggai di tunggu aku lagi,” ko Sempurai.

“Tak tentu Keling di peda kami aya, nadai endor belaba ka iya agi, tentu aku bejako enggau iya tadi,” ko anembiak ka tuai agi.

“Ni gamal orang nya ke dikumbai kita Keling?” ko Sempurai.

Di jengkau iya nyabur ba tiang lalu nurun ka ai. Datai iya di ai din peda amat bisi ga orang mandi, tang Sempurai lalu apin arap ka iya nya amat Keling munyi ke di padah ka anembiak.

“Ui!” ko Sempurai ngangau, “sapa kita nya? Nuan nya buat? Enti nuan nya orang bukai madah! Aku tu nadai maioh jako, bepantap tua. Rajah berani aku tu!” ko iya rauh-rauh ngangau ari pala tebing.

“Kati gamal aku di kelala nuan deh Buat?” ko Keling.

Iya lalu mansang niki jalai pendai. Sempurai merening iya ngenjing enda mengkesap, nyau semak baru iya ngelala nya amat Keling. Iya lalu merap Keling, sereta enggau sabak rauh-rauh dia.

“Nadai meh aku ngadang nuan tau pulai, tau datai, deh Buat! Nama berita nuan, Buat? Dini endor nuan diau ngelamatu?” ko Sempurai nyabak merap Keling.

“Nganti, datai di rumah lagi baru kitai berandau,” ko Keling nyaut iya.

Sempurai ngiring iya niki tangga, lalu rauh-rauh ngangau ka sida serumah.

“Hui! Kitai serumah, pansut magang, tu Buat Keling udah datai, udah pulai!” ko iya.

Lemai nya sida serumah lalu begempuru ngulu penatai Keling. Udah semoa orang datai dia magang. Sempurai lalu berengkah nanya ka berita ngagai Keling.

“Nya alai diatu Buat, kitai serumah tu udah sampal datai ditu ngulu penatai nuan je bangat lama udah ninggal ka kami. Aku tu minta nuan nusoi ngagai kami berita pemindah nuan ngelamatu. Jalai nuan nusoi berita tak raup sekali awak ka kami enda kiroh betandu ka jako agi,” ko iya.

Aya Bujang Tuai endang udah nyangah dudok nyandih ba pangau sida Keling mending ka berita iya ke pulai mindah. Tang meh Aya Bujang Tuai enda tau bejako ngapa ti nadai rangki diberi ka sabang jako iya.Keling lalu berengkah nusoi semoa menoa ke kena pansa, kena tengah iya sekumbang ke bejalai.

“Awak ka aku nusoi batang berita dulu, udah nya ila baru kitai ngerintai semoa sedak berita,” ko iya.

“Angkat aku ari tu suba, tak bejalai ngapa nadai utai di tuju, nadai tentu menoa di gagai. Nyau puas ke bejalai aku datai ba nanga sungai siti. Sungai nya dalam bendar, nya alai aku lalu minta anjong Empelawa Jagang ke mangkang nanga sungai ngagai tebing seberai nyin, datai di seberai nyin aku lalu rembus ba rumah Antu Gerasi Papa. Malam nya aku ninga iya bensera lalu dalam leka ensera dia iya bisi nyebut endor Kumang diau. Nya alai enti nitih ka leka ensera Antu Gerasi, Kumang diatu agi tepanggai ba puchok Limau Senaman ke tumboh enda berapa jauh ari ujong tanju kitai dia. Tang deh jalai ngulih ka iya enda mudah laban Limau nya enda tau enda di tebang, baru iya ulih ambi. Aku bisi bulih beliong Antu Gerasi kena nebang kayu nya,” ko Keling ngujong ka berita iya.

“Ni gamal beliong nya deh, Buat? Uji ayan ka dia, awak ka kami sama meda iya,” ko Sempurai.

Keling lalu ngayan ka beliong nya ngagai sida serumah.’

“Eee! Nadai beliong bansa nya tau kena nebang Limau Senaman beliong ke abis tegar, abis simpak bakanya,” ko Sempurai.

"Nya alai enti berita nuan amat munyi nya, enda tau enda ngamboh kitai sebuat sehari pagila. Nadai kami nemu arap ka beliong Antu Gerasi nya tau kena nebang pun limau.”

Udah tembu Keling nyerita ka endor Kumang diau, nya baru sida iya ngenjing nyinok mending ka iya nusoi berita bukai. Nitih ka dalam leka ensera endang enda tindok sida serumah semalam-malam nya mending ka iya nusoi gamal utai ke di peda, di pansa iya sekumbang iya ke belelang.

“Akai rai! Naka meh merentak jari nuan bepantap enggau munsoh ke ngemaioh nya Buat,” ko Sempurai. “Sayau meh aku enda enggau,” ko iya.

Iya lalu enggai jenoh agi dudok ninga berita nya.Tumu pagi hari siti Sempurai lalu begerah mai orang ngamboh beliong kena nebang Limau Senaman. Sida lalu berengkah ngamboh; dinga kesoh puput sida ngenjing berauh kesak-kesut munyi guru ribut angin selatan ke mangka ka gemuan gumbang besabong, dinga sepoh sida ngenjing meresih munyi pangka bena pasang nyurong. Udah tembu nyepoh sia lalu ngansah dinga gerut ansah sia munyi guru hari jai maia kabut besai ke mangka ka layar kapal lambong.

“Beliong aku tu lagi enda tau enda makai, nadai kala nyepoh ena ngarat ngelamatu,” ko Sempurai.

Udah nya baru orang beradu nebang Limau Senaman.

“Lak ka aku dulu mantap ka beliong aku tu ba pun limau nya,” ko Sempurai. “Enti beliong aku tu lagi ngelikis enggi kita bukai nya jauh agi enda masok makai pun limau nya. Tang kemaia kia udah kala ninga beliong sepoh aku kala ke tisau,” ko Sempurai.

Iya lalu berengkah mantap ka beliong ba pun limau. Sereta di pantap ka iya beliong, anang ke lekat ngasoh iya lalu tepelanting bulih tiga depa ngejang ka pun kayu nya. Diambi iya baru, pantap ka iya sekali agi, peda mata beliong nya lalu begiling; pantap ka iya baru peda simpak teman tunjok indu jari.

“Poi!” ko Sempurai. “Nadai kala udah nebang kayu asai tu. Ukai pun kayu tu! Poi! Pun besi tu!” ko puchau iya.

“Deka aku ngumbai beliong tu salah kamboh, salah sepoh, aku tu ga nyepoh ka kitai ngelamatu,” ko iya muchau dia. Iya lalu ngangau ka Keling.

“Ui! Ui! Buat Keling! Nadai penyadi kami tu. Nadai makai kayu nya samoa beliong kami ke ditu,” ko iya.

Nyadi Keling leboh nya apin nurun agi berandau enggau sida bukai di rumah.

“Eh, pupok kita dia dulu meh Buat,” ko Keling.

“Anang munyi nya Buat,” ko iya. “Nurun jampat ka nuan, enda rebah limau tu lagi.”

Udah nya baru Keling beradu lalu nyengkau beliong lajong Antu Gerasi, lalu dilekat ka iya ba peredah, nya baru iya nurun mansang nebang Limau Senaman. Peloh sida Sempurai leboh nya endang udah tau endor sida ikan nyaru ngaban, ngenjing guchor-guchor baka arong sungai, tang sida lalu nadai utai udah ulih, rajai pan enda ga bulit limau laban beliong sida.Datai Keling ba pun limau, lalu dipantap ka iya beliong, peda kulit tak merenchit ka langit nyelepak jerit bintang tiga. Pantap iya baru peda umbang tak ngelayang sebelah menoa.

“Akai rai Buat, naka meh penajam beliong nuan nya deh!” ko Sempurai. “Nyelai endar beliong nuan ko Buat, mata tegar, iya ga simpak tau ngenajam nya makai pun limau nya. Nyangka amat beliong antu meh enggi nuan nya Buat,” ko iya.

Di tebang sida Keling Limau Senaman nya, berengkah ari tarik panas alah datai ngagai kira maia tengah hari nampun baru rebah. Rebah meh limau nya kenu ko ensera ruyak tuga iya ngenjing kiak-kiak di dinga orang sebelah menoa, rentum puchok iya semegum ninggang tanah munyi letu bom bisa, tanah lalu berenyang sapiak dunya. Nya kabuah sekali menya dunya bisi belinggang balat bendar, laban Limau Senaman ke rebah di tebang sida Keling di Panggau Libau. Sereta puchok udah terengkah di tanah Sempurai lalu belanda beguai-guai niti batang lalu ngerumbak daun limau ngiga Kumang dia. Datai iya ba pun dan pintu peda nikal bru. Tapa kaki iya ngenjing burak di taban ka iya belanda rari, duku enggau beliong iya tinggal ba pun dan limau.

“Bah, nama main nuan deh Buat?” ko sida bukai nanya Sempurai.

“Ular Buat! Ular Buat!” ko iya rauh-rauh rari.

“Ular nama nya dia Buat?” ko sia nanya iya.

“Enda nemu, semina ninga utai tak rengong-rengong dia,” ko iya.

“Nuan tak baka ke ukai Bujang Berani,” ko sida bukai nganu Sempurai. “Nuan tak beguai rari ka kerus utai,” ko sida.

“Akai-rai Buat! Kita pan enda meh berani ninga utai munyi nya,” ko Sempurai.

udah nya baru Keling mupok begadai-gadai nyintak nyabur iya, lalu mansang lubah-lubah niti batang limau, datai iya ba pun da pintu lalu di simpong iya pala ular ke begembar dua. Amat munyi ko Sempurai ular nya tadi ngenjing rengong-rengong munyi remaung nan ka anak. Udah mati ular nya tadi, lalu mansang Keling ngerumbak daun ngiga Kumang. Peda iya amat bisi dia Kumang, udah beranak.

“Ni Endu, Buat bisi temu nuan dia?” ko Sempurai ngangau ari pun limau, enda berani agi semak bedau takut ka ular ke bepala dua nya tadi.

“Bisi Buat! Tu seduai iya ditu!” ko Keling.

“Oh! udah beranak Endu nya dia Buat! Akai rai naka meh nya deh! Penempa anak ulat nya dia Buat?” ko Sempurai.

“Bansa iya ke tau ngayau,” ko Keling.

“Kati ko tadi, Buat, enda tentu ninga iga pending aku?” ko Sempurai.

“Iya ka tau ngayau,” ko Keling.

“Oh, naka meh pemanah berita nya deh Buat,” ko Sempurai.

Sida lalu ngambi Kumang seduai anak iya ari puchok limau. Sempurai lalu rais-rais manjong merap anak mit pulai ka rumah. Samoa sida serumah ke lelaki lalu begempuru ba ruai Keling, sida keindu lalu ngulu Kumang seduai anak iya di bilik. Nama agi orang serumah-rumah nya ngenjing chapoh enggau indu enggau anembiak gaga ka seduai iya sama udah temu, gerai nyamai.

“Nya meh naka Ensera Limau Senaman di tusoi aku ngagai kita ke biak lemai tu, lemai bukai pagila lusa kitai bensera baru. Arap ka kita ke biak sama ngingat ka ensera nya alam ati diri,” ko Aya Samugan-Ugan ngujong ka ensera iya ngagai anembiak sida serumah lemai nya.