RADIN BATU ANCHAU, GAWAI GERASI PAPA

JERITA TUAI IBAN : RADIN BATU ANCHAU, GAWAI GERASI PAPA.

* Jerita tu kala di post admin suba, nyadi ditu admin post baru meri jerita ngagai sekeda ke rindu maca jerita tuai enggau penemu senentang Gawai Gerasi Papa.

Di Batang Paku, Saribas, bisi siti pendam ke dikumbai Pendam Batu Anchau. Jerita pendam tu baka tu. Duku kelia, di Nang Sekundung, Paku, Saribas, bisi siku tuai benama Rusak. Rusak tu uchu Jelian lalu Jelian tu siku ari tuai kitai iban ke dulu matak bala pindah ari Ketungau Kalimantan Barat, Indonesia ke diatu ngagai Wong Empangu dalam Batang Undup. Jelian tu kelia kering, besai sereta berani. Iya bebini jadi enggau Tiong, iya nya anak tuai bansa Kantu siku ke benama Beti.

Jelian tu keterubah iban mungkal Adat Chelap Dapur ari ajar Antu Dapur ngagai iya. Adat tu agi dikena sekeda bansa kitai iban ke diau di rumah panjai nyentuka saritu. Uchu Jelian ke benama Rusak tu bisi anak ke benama Radin. Udah parai pai iya Rusak, Radin matak nembiak iya pindah ngilah Nanga Sekundung ke ulu agi sereta berumah ba Batu Anchau, dalam Batang Paku. Hari siti, sida tekenyit bendar meda labit manyi lelayut inggap ba tulang perabung sida ari setak-setak benung sida ngeringak berumah. Meda burung tu nyelai, Radin nanya urang ke nemu reti burung. Bisi urang ngumbai nya manah bisi mega urang ngumbai burung nya jai.

Kenu ko bansa Memaloh siku ke benama Nyerubung ke ngampar ba menua sida Radin, burung nya Burung Najin. Burung Najin tu reti iya Burung Manah Jai. Burung tu manah enti bumai deka bulih ke padi lalu enti ngayau deka bulih munsuh tang burung tu jai laban ba rumah nya, mensia deka mayuh parai. Laban reti burung nya enda sebaka padah urang, ari nya Radin enggau sida serumah enda muai rumah nya tang lalu ditembuka sida.Udah rumah tembu, Radin madahks diri deka niri ka Gawai Kenyalang(Gawai Burung) ke pemadu besai dikumbai Gawai Gerasi Papa.

Dikena nirika gawai tu, sida Radin ngaga enkeramba Antu Gerasi Papa. Engkeramba Antu Gerasi Papa tu diukir sida sereta didirika di tanju lebuh gawai nyadi. Enti nitihka ajar Sengalang Burung ngagai uchu iya Sera Gunting, laban Gawai Gerasi Papa tu peringkat pemadu tinggi dalam ripih Gawai Burung, rumah ke alai begawai nya enda tau enda dibuai sebedau daun ke dikena makai maya begawai nya empai, bedau tauka apin layu.

Radin nirika gawai ke ngemesai tu pengudah seduai iya Bakak ke bensumbar Asu Rangka ngalahka ba Memaloh ba Wong Gerugu dalam Batang Paku. Iya ke bendar bala Memaloh ke diuluka Apai Kejuang tu deka ngalahka rumah sida Radin di Batu Anchau. Udah tembu gawai, engkeramba Antu Gerasi Papa lalu ditanam sida Radin ba tengah laman, mandung rumah sida. Rumah sida enda lalu dibuai nunda atur adat tuai. Malam nya, lebuh sida ke indu angkat berapi dini ari, dia sida ninga nyawa urang berenung ngili ai Paku, mansa ujung tanju sida. Sida ke indu ninga nyawa urang berebung nya tiga pagi berunggu, urung dini hari. Leka renung urang nya didinga sida munyi tu, "Jera asai sida Matup Raya diserang Bujang Kelili Ambun." Ninga utai munyi nya, sida ke indu ninting pagi nusi ke Radin utai didinga sida tang Radin agi enda kekebut. Enda lama udah nya, sida Radin serumah tuntung pemati balat bendar datai ke nyau nadai agi urang numbakka bangkai pangan.

Dalam kandang rabat nya, sida bisi ninga utai bemunyi nyelai bendar maya malam hari. Utai didinga sida bejalai berundang pasang niti ruai setak ke setak seraya ngangau "Lenggak lenggu!, Lenggak Lenggu!." Utai nya nya bemunyi genap malam niti ruai udah urang tinduk. Lemai siti Radin ngitang tali wa ba ruai urang ke mangkang pala tangga dikena iya ngipa utai ke bemunyi. Nyau kelama, Radin bisi ninga munyi utai niki tangga tengah laman. Peda Radin utai nya tak antu, bejalai sesipa nengah ruai. Radin lalu berua mantap antu nya ngena nyabur tiga kali. Antu nya lalu rebah mati sereta merentum ninggang geregar. Lebuh antu nya rebah, dinga Radin engkeramba Antu Gerasi Papa ke dientak ka sida mandung rumah di tengah laman pen merentum ga rebah ke tanah. Tumu pagi siti, sida meda engkeramba Antu Gerasi Papa ke rebah di tengah laman amat bisi abi tigi iti betul bendar ba abi antu ke dipantap Radin di rumah. Meda baka nya, baru sida ya nemu diri mati dibunuh Antu Gerasi Papa ke dipegawaika sida empu.Radin enggau sida serumah ke agi idup lalu muai rumah nya lalu nadai diwan bala mensia nyentuk sehari tu.