MIMPI UYUT ANAK KELANANG

MIMPI UYUT ANAK KELANANG

Nyadi Uyut tu siko ari bala ketuai bansa Iban ba Batang Paku, Saribas ke tau kayau lalu iya tu mega siko ari ketuai bansa Iban ke sama serebak enggau Rekaya Pemancha Dana Bayang dalam menoa Padeh. Leboh Rajah James Brooke ke datai di menoa Sarawak, Uyut tu endang udah tuai bendar umur lalu enda dapat agi matak bala iya nurun ngayau. Leboh Rajah James Brooke ti keterubah ngalah ka menoa Batang Paku dalam taun 1843, bala Rajah James Brooke endang belaban enggau bala anak Uyut ke benama Linggir ke bensumbar Mali Lebu. Nyadi gaya kenyap mimpi Uyut ke ngasoh iya tau kayau nya kelia ditusoi munyi baka tu.

Nyadi Uyut tak asai ke benong merau nurut ka pasang menoh ngulu ai Batang Paku. Nyadi leboh iya nyau datai ba menoa Wong Batu Anchau dia iya lalu bisi ninga orang richah amat tunga ngagai muak tebing kiba mudik. Leboh iya ke malik kia dia iya lalu tepeda ka orang siko ke baru udah tembu mandi bediri ba tebing sungai ke benong melit ka sirat ngasoh iya ngetu lalu niki kia.

Uyut lalu nanya ngagai orang nya nama main orang bengat ngingar nya richah diatas din. Orang nya lalu nyaut madah ka orang ti richah nya benong begawai bedua ka pengaroh di tanju, nyau ba ujong pengawa ke begawai burong. Ninga tak munyi nya, iya lalu lalu nadai maioh runding lalu beguai-guai nyangkai ka diri. Udah meh tembu nanchang ka tali perau iya lalu beguai-guai niki ka tebing ka mansang ngagai rumah orang nya.

Bedau bangat lama iya udah bejalai, alai iya lalu rembus datai ba rumah panjai orang ke naka iya pemanjai. Niki iya ngagai rumah panjai orang nya dia iya lalu nadai tentu meda mensia maioh dudok di ruai. Naka ka siko dua aja ke bisi dipansa iya ke sama bela bisi ngasoh iya nudok ka diri ba ruai sida nya tadi. Tang iya sigi madah ka diri enggai laban ka enggau orang begau ba tanju nya tadi.

Datai iya ba tanju ke alai orang maioh begau nya, dia lalu meda bisi apai tuai orang siko ke nyau burak buban bulu pala benong dudok nunga chapan siti ke nyau penoh laban tunggong pengaruh. Sereta apai tuai orang nya tadi tepeda ka Uyut dia iya lalu bejako, “Lalu Uyut, tu kitu nuan dudok semak ngimbai aku ditu,” ko apai tuai orang nya ngelalu ka iya.

Uyut lalu mansang nudok ka diri ngimbai apai tuai orang nya nungga chapan ke penoh laban pengaruh. Apai tuai orang nya lalu bejako baru enggau iya, “Naka meh nuan Uyut, semoa bansa pengaruh ke manah sigi udah abis dipilih orang bukai ke dulu agi ari nuan tadi, nya enti nuan ka, ngulih ka diri mega nuan dia,” pia ko iya nganu Uyut. Uyut lalu milih semoa pengaruh nya tadi, pegai iya siti leka ka ga, udah nya lalu pegai iya siti leka ka iya mega laban nyau enda nemu ni bagi ke ka diguna lalu bedau nemu nama tuju siti-siti ari pengaruh nya tadi. Nyau kelama Uyut udah bayam semoa pengaruh nya tadi dia iya lalu milih puchong siti ke udah bisi nyau rimpak moa. “Akai-indai manah bendar bansa pengaruh ke udah dipilih nuan nya tadi Uyut. Nya meh dikumbai orang pengaruh mali rampong ngasoh bala anak telesak nuan ila tau betampong sereta tau matak serang,” ko apai tuai orang nya madah ka iya. Sereta meh apai tuai orang nya udah abis badu bejako dia Uyut pen lalu tedani lalu pengaruh ke udah dipilih iya nya tadi pen lalu agi mega bedau mengkang dalam genggam jari iya nya tadi.

Nyadi mimpi Uyut tu ditusoi Tuai Rumah Libau anak Penghulu Garan dalam taun 1952..