LEMBANG BATU

MIMPI GARRAN BENSUMBAR “LEMBANG BATU”

Nyadi Garran ke beensumbar Lembang Batu tu tuai di Batang Paku, Saribas, ke nganti mentua iya Linggir “Mali Lebu”. Lalu Garran tu tau nyadi tuai kayau, lalu iya nyadi tuai Iban menoa Paku berengkah ari taun 1878 ngagai taun 1900. Nyadi sebedau Garran tu tampak berita tau nyadi tuai kayau dia iya bisi bemimpi leboh iya ke benong nampok ba Bukit Saban semak menoa orang Samu, Ulu Paku ke diatu. Lalu gaya cherita mimpi iya ke ditampong iya nya baka tu :

Nyadi dalam taun nya sida Garran enggau orang bumai bedandang enggau bala maioh ngelingi Bukit Saban. Leboh lemai hari siti udah meh tembu nunu tugong kebak maia nugal, dia dua iko orang enggau iya tindok nampok ba tuchong Bukit Saban. Siko ari sida tiga nya gali tindok muak ari baroh, lalu siko gali tindok ba tengah enda tentu berapa jaoh an iya ke di baroh nya tadi, lalu Garran empu ngambu tindok ba atas agi enda jaoh nyau ka manggai ba tuchong Bukit Saban nya tadi.

Iya meh leboh sida tiga pan baru udah lelap mata, nya alai tak datai utai nyelai bendar peda sida tak nyengenda guru-guru mesai tibang, tinggi agi ari puchok kayu sibau raras, sereta ngayan ke diri ngerisingka ngeli mansang ngagai sida tiga ke benong gali tindok nya. Seduai ke enggau iya gali tindok muak ari baroh nya tadi leboh udah meda utai nyelai baka nya mansang kia lalu naka iya penakut lalu mupok kebu-kebu nglari ka diri enda bapai enda bindai. Nyadi Garran pan naka ulih ga ngemerani ka diri, natka diri dia nganti utai ke mansang nya datai ngagai iya, sereta meh udah abis munyi auh seduai dua iko ka rari nya tadi, dia utai ke nyelai dipeda Garran nya pan tak lalu ayas nadai temu tunga peda mata.

Enda lama udah bekau utai ke di peda iya dulu nya ayas ari mata. Garran pan lalu tepeda ka siko ular datai mansang ngagai iya ke benong gali nya tadi. Ular nya dipeda iya tak naka iya pemesai, lalu dikra ka pemesai nyau ka bulih mesai giling idas tauka besai agi ari pah kitai mensia. Ular nya tadi pan lalu nuju Garran ke gali lalu nilat tuboh iya. Nama agi deh tak naka iya ka geli sereta gelesi asai tuboh tudah Garran laban dilat ular nya laban nadai kala nyepi utai baka nya lalu ditambah ke ati iya ti balat berasai takut. Udah ular nya tadi bedilat ka tuboh iya, dia ular lalu nguing nyeliah ka bukai lalu lenyau nglari ke diri nadai temu tungga. Udah meh ular nya tadi lari ninggal ka iya dia Garran pan lalu nindok ka diri baru. Leboh Garran ke tindok tu dia iya tak asai ka malik sereta lalu bisi meda rumah panjai orang tak ba atas iya ke gali. Lalu iya ke gali nya pan asai ka gali enda jauh ari baroh ujong tanju. Peda iya orang maioh bendar orang benong bediri betuggong ba tanju nya. Benong iya ke berati ka pengawa orang ba atas tanju nya dia Garran lalu ninga orang siko bejako, “Uji pungga enggau batang ke melintang jalai ba baroh tanju kitai nyin.” Udah nya peda iya lalu nurun lelaki siko  rejat-rejat niti rumah lalu enda chamang-chamang nurun ka tanah. Datai lelaki nya ba alai iya ke gali, endor ninga orang nya bejako madah ka diri bisi mai beliong tang mapap laban enda ingat mai peredah.

Udah pulai lelaki nya tadi dia peda iya lalu datai ga siko lelaki bukai mansang ngagai alai iya ke gali nya baru. Datai meh lelaki nya tadi ba iya, dia iya ninga lelaki nya bejako,“Ukai tu batang munyi ke disangka kita, tang nama tu tak Garran deh !. Aram niki enggau aku ka rumah nuan Garran,” ka orang nya. Iya pan lalu mupok enggau orang nya niki ke rumah. Datai Garran enggau lelaki nya ba ruai orang ti lumor tiga pintu ari pala tangga, endor iya lalu meda bisi indu dua iko ke benong rindang berua ba atas wa ba pantar. Sereta meh indu dua iko nya tepeda ka Garran dia seduai pan lalu berebut sama ka mai iya berua enggau seduai. Garran pan nama agi deh tak naka iya pengaga meda gamal indu nya ga bajik lalu baka ke lama udah ngelala iya tak enda kakang ati ka berua enggau iya. 

Naka pengerindu ati Garran  enggau seduai berua. Tembu sida tiga berua, alai indu dua iko nya lalu mai iya pansut ka tanju. Datai di tanju peda Garran tak nyau besebun langit baka maia orang benong musin nunu umai. “Nama main langit ditu tak ngemalat nya besebun?” ko Garran nanaya seduai iya. “Badu enda besebun meh langit peda nuan Garran, nya ga gaya pemalat sebun asap rumah munsoh ke udah alah lalu kena tunu orang ke tau kayau, tau serang,” ko indu nya madah ngagai iya. Dia indu siko nya pan lalu nunjok ka ngagai iya ni bagi ari asap siti-siti. “Nyin asap ka semak pedea nuan enggi Minggat Apai Runai ka benung melap nyadi. Nyin ka baru udah padam nya enggi aya nuan Linggir Mali Lebu, lalu nyin enggi Tarang ke muak ari ulu, lalu iya ka kanan nyin enggi Nanang,” ko indu. Garran pan lalu beguai ga nanya ka ni bagi asap rumah munsoh ke udah alah ditunu iya. “Nya ka enda bangat balat ba lebak ke semak nyin, nya enggi nuan Garran, laban nuan samina naka tak tau kayau aja,” ko indu nya madah.

Tembu bejako madah ke ni bagi nya tadi, dia indu nya tadi lalu madah ka nama diri Indai Ulop ke digela orang Indai Abang. “Enti nuan ngayau mulau ila Garran, nuan anang enda rnadah ngagai aku, kangau ka kami ditu,” ko indu. Indu nya madah ngagai iya. Lima kali Garran matak bala, dia semoa bala lelaki ke nyadi manok sabong iya sigi nadai bakal enda turis taji. Garran lalu tedani sreta hari pan nyau tekerebak tawas.

Nya alai udah nya, enti Garran mansang ngulu ka anembiak iya ngayau tau ka mansang ngabang, iya seruran ngangau ka Jndai Abang berari-ari, ka suah nyerupa nulong iya sekumbang iya ke agi idup. Lalu Garran kala tiga kali matak kayau. Cherita tu ditusoi niang Tuai Rumah Libau anak Penghulu Garran dalam taun 1952 ngagai niang Benedict Sandin.