BAYA BEGAU

Sekumbang Pelandok ke bekirah mandi ngerindang diri muai bekau darah ke udah di insap Lemetak nya iya endang nadai runding bukai, tak chukup ngerindu ke ati laban ngulih ke ai sungai nya ti chelap serta muai ikak iya ke udah belanda penapat inat ngambi ke Lemetak nya tingkil nginsap darah Pelandok nya tadi.

Nama agi deh bekau Pelandok nya tadi ke mandi nyau bebau lang anak sungai nya serta keroh mirah rarat ke ili. Ensium bau lang darah Pelandok nya , Baya pan lalu begau meda utai tak bengat nyelai nyadi. Baya pan lalu beguai guai mudik ke ulu laban ka nemu nama kebuah ai sungai nya tau ngemalat nya bebau lang serta keroh ngemirah nya. Iya meh nyau sepemeda ari ili Pelandok ke mandi dia Baya lalu tepeda ke Pelandok ke benong mandi. Tudah Pelandok pan lalu tekenyit meda Baya nya datai ngenyemak iya ke mandi.

“Nuan nya aki, ka bejalai kini ke nuan ?” pia ko Pelandok nanya Baya nya tadi.

Tudah Baya pan lalu tekenyit laban ke ngumbai Pelandok nya enda nemu iya bisi mansang kia. Baya pan lalu madah ke kebuah diri ke mudik ai sungai nya ngagai Pelandok.

“Aku meh tu, nyau berasai lapar perut aku tu udah ke ensium bau darah ke rarat ari ulu sungai tu tadi. Nya alai aku ke mudik ka nemu ari ni penatai bau darah nya lalu sapa bagi orang ke beempu bau darah nya. Deka makai iya, nyau engkerau asai perut aku tu lalu bedau bisi bulih utai ke tau diempa aku sehari tu.” pia ko Baya.
Sapa kini beempu bau darah tu kini?” pia ko Baya ga nanya Pelandok baru.

“Eh! enda ka nya darah kera ke kena timbak anak mensia ari ulu dia tadi, tang kera nya enda mati. Nya Kera nya bedau mengkang nat ke abi timbak ba atas puchok kayu dia,” pia ko Pelandok ngelimpang ka Baya.
“Ka nuan makai Kera nya aki?” pia ko Pelandok ga nimbal baru.

Leboh ke nyaut Baya nya ati tudah Pelandok endang tak naka iya penakut serta nangi laban nemu Baya tu sigi jai serta ka beempa ke jelu bukai. Pelandok lalu nguing kediri nyingkang begadai gadai mansang niki ka tebing sungai nya.

“Ka aku tu makai kera. Enda tentu milih asai nyawa aku tu laban ke lalu bedau makai,” pia ko Baya ga sambil ke mansang semak ke semak ngagai alai Pelandok nya tadi.

“Enti nuan ka makai Kera nya lagi ga aku madah ke iya ngasoh iya nurun ari puchok kayu nya mansang ngagai nuan ke sungai tu lagi. Tang nuan anang ngayan kediri, enggai ke Kera nya takut lalu lari lagi,” pia ko Pelandok ga ngelimpang ke tudah Baya.

Ninga munyi nya Baya lalu beguai nyelam kediri baru dalam ai nganti penatai Kera ke di kangau ke Pelandok. Pelandok pan lalu baka ke di tikau engkechit ke tebing lalu beguai guai belanda niki ke tebing enggau penaka ulih tulang iya.

Leboh Pelandok nyau datai ba punjong atas tebing sungai nya dia baru Pelandok rauh rauh ngangau ngasoh Baya nya pansut ari ai. Baya pan lalu begua pansut ngumbai Kera udah bisi serta lalu melepong ke tuboh iya ke nyau bejor bejor melintang ba sungai nya. Serta meh Baya nya pansut Pelandok lalu nikau ke papong kayu ngagai Baya nya tadi. Meda utai tak nyau semiup mansa pala iya dia Baya nya tadi lalu nadai runding maioh, tak lalu ka nangkap papong kayu ke di tikau ke Pelandok nya tadi. Tang benasib ga iya enda nyadi nagkap laban ke tepeda ke nya tak papong kayu ke di tikau ke Pelandok tang ukai Kera munyi ke di padah.

Pelandok lalu ketawa rakah rakah meda Baya mimit da nyau ka tepapa ke papong kayu ke di tikau ke iya nya tadi.

“Nadai kera ditu, enti nuan bengat enda tau enda papong kayu nya meh diempa nuan aki,” pia ko Pelandok beduan Baya.

Nama agi deh tak naka iya ka pengeringat Baya laban nyau nemu diri udah di kemeli ka Pelandok. Baya nya pan lalu udu ngeransi serta balat enda lantang ati ngagai Pelandok.

“Nuan Pelandok tak semina ngayah ke aku, ila asai nuan enti bisi nurun ka sungai endang aku empa aku giga lalu aku kunyah aku kekah ambi ke nyau nadai rampang agi,” pia ko Baya sambil ke lalu nyipat iko iya ba ai dalam sungai nnya.

.”Diatu pan aki enti nuan tak tetengok deka makai aku tau meh. Tang nuan nitih ke aku ngagai tingkah ba tebing tu. Aku tu lembau bendar nurun ngagai nuan kia laban nyau chelap tubuh udah bekau ke lama berendam ba ai tadi,” pia ko Pelandok majak ngelesay ke Baya.

Baya pan lalu nyurut kediri ka puak ai laban iya endang nemu diri enda tetiki ka tingkah tebing sungai nya ke alai Pelandok bediri ngemata ke Baya nya nenglam dalam ai sambil lalu ketawa gaga ke Baya enda ulih makai iya.. Baya lalu bejako kediri mutap ke Pelandok ke udah beduan iya ngumbai diri ka ngangau ke Kera ambi ke bisi ke empa iya.

“Beduan aku bendar ga Pelandok nya tadi, gaga amat iya ketawa meda aku ke enda ulih niki tingkah tebing sungai nya. Ila bisi maia iya enda ingat agi, enti iya ulih aku sigi endang tak lalu aku telan segala gala enggau tuboh iya nya,” pia ko baya bejako kediri berandau nengali lalu nyelam dalam ke agi dalam sungai nya.

Baya ke nengelam kediri nya tadi lalu berarat ngili ai sungai nya. Ati Baya nya endang tak lalu bedau nyamai laban ke udah serta irau ati bekau ke di keduan Pelandok. Baya lalu mupok ngili ai ngarap kediri tau bulih jelu bukai ke tau diempa iya laban ke udah kelalu lapar enda makai.