DIAU KA BULAN RERAK

● DIAU KA BULAN RERAK.

NYADI Sakali dulu kalia bisi kitai Iban siko benama Ngeli Chelum Ngah Rasau, Kaki Chungkir Pengirau Danau. Maia nya menya, kitai agi tampak jelu tampak antu. Ngeli Chelum Ngah Rasau, kaki Chungkir Pengirau Danau beranak ka Burong Malam. Burong Malam bebini ngambi Dayang Cherembang, beranak ka Belangkat datai ari Sedarat Randang Bangkang. Belangkat beranak ka Jenua bejulok Rimba Kampung Purang. Jenua beranak ka Beredai.

Kelama Beredai ke diau begulai enggau sida apai iya, leboh nyau besai, iya belaki ngambi Pagan ke datai ari Bulan Tuang-Tuang. Seduai iya begulai melaki bini baka orang maioh tu mega. Seduai agi beserak diau enggau sida apai indai Beredai.

Sida mega sama sebaka pengawa enggau orang bukai ke sama enggau sida begulai sebelah nya dia.Leboh nya menya kitai Iban endang nadai jalai bukai dikena ngidup ka diri, endang semina ngena jalai bumai betaun. Taun siti bumai, taun siti bumai mega. Nya alai enggi sida Pagan sabilik bumai mega endang nyadi ka batang pengawa dikena ngidup ka diri.

Sekumbang Pagan ke udah datai ba sida Apai Beredai, dia deh ator pendiau sida bisi nyelai mimit ari selama dibai Pagan. Leboh sida ke ngereja pengawa umai nya, enti leboh anak bulan bala sida sabilik dibai Pagan diau. Tang deh leboh sida sabilik bukai ke diau nya, Pagan turun ka umai. Apin nurun, iya endang selalu ninggal ka jako enda ngasoh orang nitih ka iya ke turun nya.

Datai maia bulan peranama baka nya ga, sehari bala sida sabilik enda diasoh Pagan turun ka umai. Tang iya empu nurun, lalu selalu ninggal ka jako enda ngasoh sida sabilik bukai nitih ka iya kin ka.

Nya alai nama tiap anak bulan enggau leboh bulan peranama, bala sida Pagan sabilik endang diau belama diasoh iya. Ka semina bisi lain mimit ator iya nya enti leboh sida diau ka anak bulan leboh maia nugal. Leboh diau ka anak bulan maia nugal sida diasoh Pagan diau dua hari. Tang maia bukai, baik ka diau ka anak bulan tauka peranama, sida semina diau sahari aja.

Keempat taun seduai udah begulai, bini Pagan pen udah beranak empat mega. Anak iya lelaki magang-magang. Iya ke tuai benama Chemegoh, ka lumor dua benama Landoh, lumor tiga Ensoh, lalu ke biak benama Rantai.

Leboh bala anak iya nyau udah besai dia sida bisi pengirau atia meda apai sida nya nurun ka umai leboh bala sida sabilik bukai ke diau ka bulan. Nya alai sida lalu bekenang ka pasal utai nya ba diri sama diri. Nyau udah mansau kenang, dia sida besetuju runding deka ngereja utai siti.

“Nama main apai, nama kitai diau nurun ga iya ka umai?” ko bala anak iya.

“Ka kitai meda ka pengawa iya di umai din, meda ka kebuah iya enda ngasoh kitai nitih ka iya,” pia ko bala sida empat menyadi.

Sida lalu nitih ka iya ka umai.Datai di umai sida meda langkau tak terang. Sida lalu ngas ka ukoi ke dibai sida. Di langkau dia sida meda utai nyelai bendar, meda apai sida tak tebererak. Kaki, lengan, enggau pala iya endang tak kediri magang-magang, nadai betampong enggau tuboh iya agi. Ukoi sida mega lalu nyalak meda utai baka nya gamal.

Nyangka tekenyit ninga nyawa ukoi ke nyalak, dia tuboh Pagan lalu betampong baru. Udah tuboh betampong, iya pen lalu nyadi mensia baru mega. Dia iya lalu bejko, nganu bala anak iya.

“Naka meh kita tu anak, aku enda ngasoh kita nitih ka aku, tu titih ka kita ga. Enti baka tu enda meh kitai tau begulai agi,” pia ko Pagan. Sida pen lalu mulai ka diri ka rumah.

Datai di rumah Pagan lalu bejako enggau bini iya.

“Aku enda tau begulai enggau kita di baroh tu agi, laban nuan udah ngasoh anak tua nitih ka aku rerak ka umai.

Nama maia anak bulan enggau peranama nyentok nya maia kami rerak. Lalu leboh nya aku tebererak. Leboh ke tebererak aku enda tau dipeda orang. Nyadi laban kita udah enda ngasi ka jako aku, nya alai aku pulai. Tang samoa kita ke peturun anak uchu aku ila, enti maia kami rerak, kita enda tau enda limpang diau ari kita ke gawa. Leboh anak bulan, enti maia nugal, kita diau dua hari. Hari ka terubah nya kita diau ka jengap, laban maia nya aku jengap-jengap. Hari ka dua nya baru kita diau ka kami mati. Lalu enti leboh maia bukai, baik ka anak bulan tauka peranama, kita diau sahari aja.

“Enti kita ke peturun anak uchu aku ila enda diau ka kami rerak, bilik kita deka tebererak, kita dekan adai tentu menyana pendiau agi,” ko Pagan.

Bini iya Beredai pen lalu nyaut.

“O, dini nuan tau pulai deh Pagan, sapa orang ke enggau aku ngidup ka diri enti nuan pulai. Nya baka pemaioh anak tua, sapa orang ke ngidup ka nya enti nuan pulai,” pia ko bini iya nyabak, nan ka Pagan ke deka pulai.

Pagan madah ka diri enda tau enda pulai. Japai iya sumpit sebatang, didiri ka di tanju, lalu ditiki iya. Sumpit nya abis ditiki, iya pen lalu terebai ari nya. Bini iya Beredai pen lalu terebai mega nitih ka iya.

Laban Pagan ke endang orang datai ari langit, nya alai bini iya enda tetitih ka iya. Nyau ikak kepuas ke nguji nitih ka Pagan, dia Beredai laboh ka baroh lalu inggap ba puchok rian. Laban orang kalia ke agi semak antu, kepuas Beredai ke selalu rangau-rangau nyaban ka Pagan, dia iya bebali nyadi buron tunggok.

Ari cherita tu meh pun kitai Iban nampong –menampong diau ka bulan, ka lebih agi elboh ke ngereja pengawa umai, laban agi kalia endang nadai pengawa bukai lebih agi aripengawa bumai dikereja.

Dtai ka sahari tumega kitai selalu ninga Burong Tunggok nyabak ka bulan enti maia bulan terang. Pagan nya tadi pulai ka bulan laban iya endang datai ari bulan.Siti pun tusut Iban mega nampong ari bala anak Pagan ke ditinggal ka iya pulai ka langit tadi, nampong ari Chemegoh, Landoh, Ensoh enggau Rantai. Terubah baru iya, sida empat nya diidup ka aki seduai ini sida ke tinggal di menoa tu. Udah besai, sida ngidup ka diri emga, lalu sama nyadi, sama tulih ka ruang bilik ka diri empu.

Nyadi cherita tu diabis ka naka tu, laban cherita sida empat menyadi ke tinggal nya enda ulih tusoi ditu, laban nya nyau nyadi siti pun tusut ke bisi nurun ka maioh bala kitai Iban datai ka kemaia hari tu. Terima kasih.