INI/INIK ANDAN

● INI/INIK ANDAN

Ngelala kita Ini Andan? Sapa Ini Andan?. Nama Ini Andan tu suah amai didinga enda ngira chara kitai berandau, ensera, pengingat tuai, besampi, bemiring enggau macham utai bukai. Nyadi sekali tu admin deka bekunsi penemu mimit senentang orang ke benama "Ini Andan" tu.

Nyadi, Ini Andan Bepala Bebunga Jirak, Kulit Rapih Betubuh Biak, Baka Dara Biak ke Disuak Digung Bujang. Ini Andan tu salah siku "Petara" kitai iban ari tujuh (7) Petara endang dikarapka dalam bansa iban. Petara bisi besangkut paut enggau kuasa sereta suah agi munyi ka ditusi tampung ensera enggau pengingat tuai, menua Ini Andan tu din ba langit mingkai. Nitihka penemu lama, Ini Andan tu diau ba rumah panjai baka kitai mensia, ngambika banding baka rumah panjai Tansang Kenyalang ti alai Petara Aki Lang Sengalang Burung diau, pia mega Panggau Libau enggau Gelung Batu Nakung ti diuan sida Bunsu Antu baka sida Keling enggau Kumang. Sida idup baka kitai mensia, bumai, betupi, mindah, bejalai, ngayau, ngayap. Semina sida iya lebih ari kitai ketegal sida ulih ngaga mayuh macham kereja ajih lalu tau mali diri nyadi utai tauka orang bukai.
Ini Andan ia nya antu manah ti nulung Iban bejedian enggau pemakai sereta duit ringgit. Ini Andan nya gela indu tuai kelia ke dipechayaka diau di langit. Nya alai dalam ensera Iban suah bendar besebutka Ini Andan, Ini Andan ke diau di bulan ke suah mega disebut Ini Inda Rabung Menua, Ini (ini’) Ini Rabung Hari.

Nangkanka Ini Andan nya Keling ti suah dikumbai Keling Gerasi Nading Bujang Berani Kempang, Jelingau ke Betugau Mayuh Rambang. Keling tu siku lelaki antu ari menua ti dikumbai Panggau Libau. Iya tu sigat gamal sereta berani tajam ati. Iya dikumbai raban bansa Iban nya Petara laban suah nyemia nulung Iban. Nyadi Ini Andan to sigi Petara ti besai kuasa laban ia ulih meri hari ujan enggau panas. Sereta malam ngau siang, ia mega ti nyaga menua Panggau Libau enggau Gelong sereta menua mensia baruh hari. Ia bisi jala tangga hari ti dikena Keling ngayau ngagai sida Jering enggau Apai Sabit Berkait. Nyadi Ini Andan sigi bajik enda nemu tuai tang ulih bebali tuai enti ia meda orang jai ati enggau ia.Ini Andan idup ba peringkat langit keenam keno ke jerita tuai. Ia ngembuan maioh macham pengaruh ti besai baka utai tau ajih.

Nyadi laki ini Andan tu tadi benama "Bujang Rirang" tauka Aki Ungkuk Sebungkuk. Nyadi ia tu laki Ini Andan tang udah beserara enggau Ini Andan laban ia butang enggau Indu Dara Lindung Bulan ngujung Aki Ungkuk nyau bungkuk laban diludah Ini Andan ngujung ke ia nitih Lindung Bulan ke Bulan kin. Datai din dibuai Indu Dara Lindung Bulan tudah tuai ia ngujung ia nyabak melukuk ngenang nasib diri jai lalu kita ulih meda ari jauh mua bulan baka siko mensia bepangal ke lengan lebuh bulan kembung. Nya bayang Aki Ungkuk Sebungkuk. Nyadi ia diau ba Bulan din laban enggai pulai agi ke langit tujuh beserak. Amai ia kenya ia semampai nimpai pemajik Ini Andan ari jauh sereta ngelindung Ini Andan ari panas belama.

Kepenudi randau admin ditu,
Ni nuan ini Andan bepantak burak kedua bali nama ini inda nyaga menua ini indi nyaga ari kebetampung perabung enggau Anchung selong bebelit Apai Sabit bekait ke diau di langit mit mesai kepit bingkai tangi. Uji asuh badu nelian meh ujan ka bangat berebenyan labuh betinggang awak ka penyakai rumah panjai kami badu di ampuh ka ai menuh sampai ke tempuan, nya ka ngasuh legiau munti arau enggau kami anyut leladung enda ulih di tancang. Uji asuh badu nerutu ujan bangat betepu labuh ngerunong, awak ka perau jungkang nyudu enggi kami badu lelisa karam di ruang, nadai alai sangkai di bah ka ai anyut memelan, sayau sangkai nya amang nadai alai beretan lecut di taman tiang penancang.

Terima Kasih.