Jerita Manggai Mati Idup Baru

Jerita Manggai Mati Idup Baru.

Bisi maia taun 1950an ba menua pelilih Batang Engkarie bisi rumah panjai ba Engkarie diak tadi benung nyenggai tudah Manggai ti udah parai laban kena penyakit keno.Nyadi pemarai Manggai tu nyelai amai,udah mandi ba sungai alu niki ke rumah panjai tadi alu kekesah minta sah enda sempat bejako ngajar anak bini diak ia alu luput tekalanya ba ruai alu jampat sida katuai meresa seput tudah tuai diak sida madah  Manggai tu mati meh tadi.Nama agi maioh meh orang nyabak ke Manggai tu tadi laban sinu ke pemanah budi basa ia,sereta bala kabukai bepadah kulu kili madah ke sepengabang sida semenua nya tadi madah ke Manggai nya udah lesi.Keno ko orang tuai nusi,basa Manggai tu amai besai sereta dikenangi bala maioh laban ia endang beberita manah ati sereta lempung tulang nulung bansa diri maia tusah.Nyadi maioh meh orang datai ngesah pengerabat bala Manggai tu tadi.Pemaioh kaban belayan sereta orang ke ngelala Manggai tu endang amai maioh amai,nyadi bala sida kelelaki kiruh begiga ke utai ke lauk begiga ke utai dempa bala ke ngesah rabat maianya.Nyadi kaduak ia ngeban santubong mega.Bisi meniga ngempat ari santubong digaga alu ditiki ke rumah panjai enggau piring.Lebuh malam ke nyengai nya tadi bisi siku nembiak mancal amai,ia ngemai repik kayu ke digaga santubong nya tadi.Diak laban ka nemu meh reti bakani gamal antu sebayan laban ia enda kala meda mina ditusi ensera aja.Ia laban ke baru tama pengarap baru(iban kedulu tama pengarap baru maia taun 1900) tadi alu enda pecaya utai bakanya.Diak ia nunu umbang santubong ti diban ba tanah tadi ba api.Seretai ia nya alu bisi abus nya tadi alu dipicit ia alu ia ngunsut abus nya ba senentang mata sapiak sapiak.Empai lama endar pengudah ia muka mata encelak diak tak terkenyit meda antu tak ngerimbai ia ba tanju.Peda ia mua antu besimpi pala sapiak,sereta sapiak ia meda antu indu mega.Ka nyeraoh tudah tuai enda ga ulih nyeraoh minta nyabak aja meh tudah tuai ba tanju meda pemaioh antu tadi belah tanju.Beguai ia tama agai ruai diak ia meda mensia duduk begulai enggau orang dikelala ia magang tang sida nya udah parai magang suba ko ati ia.Malik ia ke setak diak meda niang apai ia duduk jejangah bendar amai ngirup sereta makai tumpik enggau asi pulut sebayan.Malik ia ba senentang orang ke parai tadi diak ia meda semengat Manggai duduk nyandar ngimbai bangkai ia empu sereta nyabak mega.Alu enda jauh ari Manggai nya diak ia ka luput meda antu Apai Billai enggau Indai Billai.Raja Sebayan ti nemu bebalik mua mega diak meda Raja Sebayan nya enyau jerar jerar lidah,lidah ia melit pala ia.Enyau nyabak ia meda antu melut ke mata.Pengudah mata betentang mata enggau antu nya diak ia malik kabukai enya meh meda pemaioh antu sebayan ba ruai naka pemaioh.Ni ke bisi manah gamal ni ke jai gamal sereta semengat orang udah parai bisi setaun udah tadi agi bedau telego aja ngirup ai tuak sereta makai tumpik.Pengudah setaun mensia ke nyadi semengat tadi begulai enggau orang sebayan,diak semengat ia danjung orang agai Sempulang Gana sebedau ditiki ari bukit pengangkat semengat ke langit.Ba langit meh Batara tauka Ettala milih ni bagi sida ia ke tama dunya penerang engga dunya pemetang.Maioh agi kaduak mensia  muai ai tuak ke tanah makin maioh agi bala antu sebayan majak ngirup mega.Diak nembiak nya meda ulah orang sebayan majak kisuk begagai bebuti.Bisi enda lama pe gudahnya diak ditegah siku antu alu ngasuh ia luput.Sereta ia luput diak antu sebayan ngerumun tubuh ia alu duduk ba tubuh ia.Enda jauh ari nya bisi manang ngimbai nembiak nya duduk laban ke mata lansik diak manang mansang agai tubuh nembiak alu minta sida sarumah ngasuh daun sabang kena nepas nembiak nya laban sida sarumah meda nembiak nya baka ke parai enyau sengak sengak laban ditinggang antu sebayan.Capoh sekayu rumah panjai maianya tang benasit endar mega manang nya ulih ngadu ke nembiaknya ti ngujung nembiak nya berasai lantang seput ti ngujung ia pemado agi ngereja ulah bakanya.Ba sapa sapa enda kala pecaya agai bisi tauka nadai antu sebayan ba dunya tau mega nguji ulah nembiak nya tadi.Tang ba tisi kitak mesti bisi manang enda alah kitak mati ngapa laban takut mega.Enti ulih anang nguji au.

Pulai agai Manggai tadi,enyau malam ari 5 ia disenggai diak lebuh pagi ia dikubur mega.Sereta pengudah dikubur alu makai selamat mega sereta ulit enggau lumbung ia pen dipadah mega kemaia nyadi sereta malam beserara pen tembu.Laban munya agi sigi panjai ulit,ka sebulan ulit diadu laban kenya ngica sida sebilik enggau sida sarumah tadi begulai sejalai ngiga barang pemakai kena ngintu ulit mega,ukai baka kediato mega tau dintu seminggu alu ketas ulit laban belanja sepeneka meli ba pasar ukai baka sesuba agi ti tusah begiga ke duit.Bisi takah seminggu lebih bakanya diak sida sarumah tak alu begau meda siku mensia baka gamal Manggai ti cecuyuk bedarat ari penatai pendam tadi.Tesepar bala sida nembiak redak sida ke indu meda Manggai betungkat pulai nuju rumah panjai.Capuh meh sekayu rumah panjai meda Manggai nuduk kediri ba tunggul kayu ba mua rumah panjai tadi.Diak ia nanya nyadi ke enda rumah panjai ditiki ko ia enti nyadi ia niki enti enda ia ka bemalam ba langkau umai ia din ko ia bejako.Sereta bakanya diak sida kabukai nanya penemu sida katuai mega.Diak bisi siku manang enggau lemambang sereta tuai rumah nurun ke tanah alu ngasuh Manggai muka baju diak Manggai alu muka naju.Pengudah meresa tubuh Manggai diak sida ia terkenyit tak kah Manggai mehnya sereta pengepan nya pen pengepan maia Manggai mati ke seminggu ke sebedaunya.Meda bakanya alu digaga orang piring ading,Manggai digaga orang langkau ba tengah laman sebedau nganti peniki ia ka ditiki ngena piring.Pengudah cukup intu diak maioh orang tuai nanya bakani Manggai tau idup baru ko sida ia diak Manggai nusi ia dejuk bunsu bubut ari tanju ia din laban ia ngumbai bunsu bubu manah bulu sereta bau renggut ko ia.Reti ia bunsu bubut enda rindu semengat ngelesay pendiau ia ti kamah sereta bau but ba sebayan din.Keno ko jerita tuai sebedau mensia ditiki ke langit kin diak sida ia maioh menua dipansa tang menua Bunsu Bubut sigi dulu dipansa laban Bunsu Bubut tu ka meri semengat mensia ngena pengepan besayap ngica ulih terebai ke langit kin enti pengudah ba bukit tinggi ila.Pengudah ari menua Bunsu Bubut diak semengat mansa menua tasik besai alu betemu enggau Bunsu Ikan ti nginjau ke semengat ngena perau ti ngujung semengat merau nengah tasik besai pangka gelombang nengah wong betingkah arung mega.Pengudah nya semengat kitai mensia alu bedarat neresa tinting arung neresa kampung jerung jalai naka pemanah nadai nemu renjan nadai nemu arung ngujung datai ba titi penguji jembatan enda nemu renjan ti nuntung ke Bukit Tilong Bukit Begelung Bukit Rarung.Datai ba Bukit Rarung diak semengat nuju kayu pengelepau semengat ke langit diak semengat ngemasuk ke sayap ia sereta ia dipandi Inik Endu Buri ti ngibun kayu pengelepau semengat ke langit.Pengudah mandi ba sungai tuci ba Bukit Rarung diak tubuh semengat enyau perenching gegenjing alu semengat ditiki ke bala dara tuci sebayan ke pucuk kayu semengat ngujung sitik cahaya datai ari langit alu ia niki ke langit kin alu sayap ia kekebab nuju langit.Diak sida sarumah tegenung ninga utai ditusi Manggai tadi laban Manggai tu tadi agi ingat utai ba sebayan din.Ti ngujung lemambang ngandai Manggai tu labuh ari tanju alu ninggang tanah aja ba sebayan enti ninggang batu anchau angka Manggai enda ingat utai ditusi Bunsu Bubut ba dunya sebayan.Manggai madah bisi kaduak semengat tadi agi ba sebayan din empai niki laban kaduak ia takut nengah titi penguji jembatan enda nemu renjan ti ngasuh sida ngenang pengenyai diri ba dunya nyata mega.Manggai madah bisi apai tuai ari ulu sida suba ti ngembuan pengaruh munuh orang ti udah parai 5 taun ke udah agi enda ulih niti tangga penguji laban ba diak meh enti orang jai ati ka diperinsa titi penguji.Enti labuh ari nya sigi ba api din meh diau ko ia.Enti labuh ari titi penguji diak semengat nya bejalai naka pemedis neresa duri,pemetang,nengah jalai ti bebau but nyentuk rembus ba kaki Bukit Rarung.Datai semengat enya ba datas Bukit Rarung diak diintu manah mega ari sida Inik Dara Tuci tadi alu dibai niki ke langit din.Ba langit meh petara Batara milih ba dini semengat kitai diau jemah ila.Enti semengat labuh ke ai mega diak sida ia tau pulai ke idup baru tang nyadi anak mit ti diada ke ucu icit peturun semengat enya empu.Aku nampung jerita tu ari Manggai mega suba.Nyadi Manggai kala mati 3 kali sereta idup tiga kali mega tang ketiga kali ia idup diak ia bisi berumur 120 taun maia taun 1970.Ketiga ia idup mati diak ka lalek pendiau sereta ia enda tau nego anak mit mega laban ia suah nyenguk sebayan.Maia taun 1980 ia alu mati pengudah sida sebilik pindah ari Batang Engkarie mega agai Kuching.Jerita Mangai tu ukai jerita semina jerita tang endang amai nyadi suba.Menua amai sereta penama amai ia dilalai, ke nusi jerita tu laban ngenangi bala ia enda nyamai ati meda aku publish nama ia mega.