Jerita Chulo ka Bensumbar “Tarang”

Jerita Chulo ka Bensumbar “Tarang”

Nyadi Penghulu Chulo ke dikumbai “Begarak Tampak Berita, Tarang Mandang Menoa” nya anak lelaki Unggam seduai Ginyam. Ari sepiak indai iya, Chulo tu turun tuai Iban Paku Ili ti benama Saang.

Nyadi skali leboh maia umur Chulo ke agi bujang biak, leboh iya mansang ngayap, dia iya betemu enggau Antu Gerasi siko bediri ba tengah jalai ka ditengah iya ngayap. Ngeli antu nya bisi mesai buah maram dipeda iya. Chulo lalu nerkam antu gerasi nya lalu seduai pan lalu berekak dia. Nyau kelama seduai udah berekak, antu gerasi nya pan lalu nelesap ka diri. Udah nya Chulo pan lalu nerus ka pejalai iya.

Malam nya leboh Chulo tindok ba rumah ke endor iya ngayap, iya bemimpi asai ka betemu enggau lelaki siko ti sigat bendar gamal. Lelaki nya lalu bejako enggau Chulo.

“Amat berani meh nuan Chulo berekak ngelaban aku. Nadai siko udah mensia berani berekak enggau aku. Laban nuan udah ngalah ka aku tadi, nuan deka berani lalu bulih dengah enti nuan enggau orang ngayau. Enti nuan bumai, nuan deka bulih padi, lalu ari padi nya nuan deka bulih reta tengkira,” ko lelaki nya bejako enggau Chulo.

Lelaki nya mega nangkan Chulo enggau jako, ko iya, “Amat ga nuan nyadi manok sabong orang ti tebilang serta berani, nuan enda tau serang, semina nyadi ke tuai manok sabong orang serta tau ngulu ka kayau anak aja.”

Lelaki nya tadi madah ka diri diau ba tuchong Bukit Buloh ba entigis ai Paku lalu iya endang selalu ngemata ka nasib orang Paku. Udah abis jako lelaki nya tadi, Chulo pan lalu tedani. Nya baru iya nemu diri bemimpi.

Leboh iya agi bujang menya leboh ke agi diau di Nanga Anyut, Chulo endang udah nyadi manok sabong ti endang mutus berani dikarap ka Linggir “Mali Lebu” ngerandang jalai enti maia ngayau mulau. Nyadi kayau Linggir “Mali Lebu” ke alai Chulo pansut nama jelai rita iya nya ngalah ka Ilas di Nanga Rajang, ngalah ka Baketan di Sugai dalam menoa pegai Julau ke alai iya bulih 8 iko tangkap enggau leboh Linggir “Mali Lebu” ngalah ka Bugau di Ulu Ketungau. Leboh Linggir “Mali Lebu” ninggang kayau OKP Dana “Bayang” ngalah ka Undop, Chulo “Tarang” nya siko ari manok sabong ti dipilih iya ari Paku nambah ka Enchana “Letan Pulas Mas” seduai menyadi iya Minggat. Chulo mega bagas nitih ka kayau tuai ari ai bukai.

Tarubah iya pansut berita berani serta bedengah, leboh iya nitih ka kayau Orang Kaya Rabong ari Skrang nyerang Banting. Iya munoh munsoh 3 iko tang semina sempat ngambi pala sigi aja laban ti beguai naban ka tajau dua igi ti di pasok ke iya ngagai lengan lalu terjun ari tanju orang Banting. Pala sigi nya diberi iya ngagai OK Rabong tang tajau dua igi nya dibai iya pulai ka Paku. Laban pemerani iya leboh kayau nya, iya diberi ensumbar “Tarang Mandang Banting, Tarang Mandang Lingga”.

Leboh agi diau di Paku, Saribas, Chulo endang sigi udah bebini jadi enggau indu orang Anyut ti benama Siah di Udau. Enggau Siah tu iya beranak ka Tandok Apai Kerbau ti udah pindah ka Seblak lalu diau di Kedoh kena pagai menoa Kalaka.

Udah parai Siah Indai Tandok, Chulo bebini baru serta lalu nguai ka Dinggu anak Ramping ke bensumbar “Gumbang Mechah Nanga Maro” di Tawai dalam menoa Rimbas Ili. Di Tawai tu, laban iya endang udah nyadi orang Raja Berani, iya suah ngulu ka orang kayau anak.

Chulo “Tarang” Ngulu Ka Bala Kayau Anak:
Keterubah iya ngulu ka orang kayau anak leboh iya ngayau bansa Beliun ke diau di Ulu Sarikei. Dalam kayau tu iya begulai enggau Ramping ari Samu enggau Entemang ari Rimbas. Nyadi bansa Beliun ke dikayau sida tu endang udah dikayau sida Ugat ari Ulu Paku sabedau kayau Chulo tu. Leboh sida berengkah nyerang rumah bansa Beliun tu, dia Ramping balat bendar bakal ba pah kena pantap munsoh. Chulo lalu mai sida ngetu ngelaban munsoh laban beguai naban ka Ramping pulai. Dalam kayau tu sida semina ulih munoh dua iko munsoh aja.

Datai di Rimbas, sida lalu nusio rita sida ke ngayau enggau rita Ramping ke agi tinggal laban ke bakal. Orang Rimbas pan lalu nitih ka Chulo ngagai Bukit Tebujang ngambi Ramping. Datai sida ba gua dia, sida nemu Ramping agi idup, lalu telih iya pan nyau bulat. Ramping pan lalu dibai sida pulai.

Udah gerai Ramping, Tarang seduai Entemang lalu mai bala ngalah ke Bansa Beliun dalam menoa Serikei baru. Datai sida saberai rumah munsoh, Tarang seduai Entemang lalu nyemerai ka saberai laban deka ngikup rumah munsoh. Leboh seduai ke nyemerai sungai tu, Entemang pan lalu ditangkap baya. Meda utai bakanya, Chulo pan lalu beguai nikal ngagai tugong bala maioh madah ke penusah nya. Iya lalu mai bala sida ngiga bangkai Entemang tang sida bukai enda berani agi, laban endor Entemang mati bangat tak ba pangkalan munsoh.

Enda lama udah sida pulai ari kayau tu, orang Rimbas bisi datai ka Paku lalu nyangka Chulo munoh Entemang. Sida Rimbas madah ka rita pemati Entemang ke ditusoi Chulo nya enda betul, laban sida Rimbas bisi ninga rita angin ari Sarikei madah ka bangkai Entemang bisi ditemu. Lalu ko rita ti didinga sida Rimbas, bangkai Entemang tu baka ka bisi bekau tumbok orang enggau sangkoh lalu semina Chulo aja orang enggau Entemang maia tu sabedau Entemang ke parai. Chulo enggau bala orang Paku ke enggau kayau tu enda setuju ka tudoh sida ari Rimbas.

“Enti kita enda meda bangkai Entemang empu, kita enda tau arap ka rita angin aja,” ko Chulo madah ka sida ari Rimbas.Orang ari Rimbas pan lalu mulai ka diri. Enda puas ati ka jako Chulo nya tadi, enda lama udah bekau nya sida Rimbas lalu mesan ka Chulo mai iya kelam ai enti iya amat enda salah. “Enti Chulo berani kelam ai ngelaban sida Rimbas, nya tanda iya bisi munoh Entemang,” ko sida ke mai pesan nya tadi. Ngasai ka diri nadai penyalah, Chulo lalu nerima jako sida ari Rimbas. Iya lalu nimpoh sida Rimbas maia ke kelam ai laban ke meri awak begiga ka orang ngari ka sida nyelam.

Orang ari Rimbas pan lalu mulai ka diri. Enda puas ati ka jako Chulo nya tadi, enda lama udah bekau nya sida Rimbas lalu mesan ka Chulo mai iya kelam ai enti iya amat enda salah. “Enti Chulo berani kelam ai ngelaban sida Rimbas, nya tanda iya bisi munoh Entemang,” ko sida ke mai pesan nya tadi. Ngasai ka diri nadai penyalah, Chulo lalu nerima jako sida ari Rimbas. Iya lalu nimpoh sida Rimbas maia ke kelam ai laban ke meri awak begiga ka orang ngari ka sida nyelam.

Chulo “Tarang” milih Apai Enchalu nyadi ka pengari iya nyelam lalu sida Rimbas ngambi Usut ka pengari sida. Seduai tu sama berita betah nyelam.Sabedau sida berengkah nyelam, orang Rimbas mai Chulo “Tarang” bentaruh ka Tajau Menaga sigi. Tang Chulo “Tarang” minta entaruh nya ditiki ka ngagai lapan igi Tajau Menaga. Orang Rimbas enggai nyambut entaruh ngenyampau nya laban sida nyangka Chulo semina deka ngenakut ka sida aja awak ke sida enda nyadi kelam ai. Tang Chulo “Tarang” endang madah ka sida Rimbas iya endang enda salah, nya alai iya berani bentaruh ka lapan igi tajau menaga.

Nyadi pengawa kelam ai tu dipeda bala maioh nyengkaum orang ke datai Kerian nambah ka orang ke datai ari Rimbas, Bangkit enggau orang ai Paku nya empu. Sabedau Apai Enchalu seduai Usut berengkah nyelam, Tarang bejako ngagai mensia maioh ke bisi datai dia.

“Aku endang amat bisi ngundang Entemang enggau bala ari Rimbas ngayau bansa Beliun di Ulu Sarikei, lalu aku mega ngaku aku nyadi Tuai Kayau maia nya. Tang aku amat nadai munoh Entemang munyi ko kaban iya ari Rimbas. Nya alai laban aku enda salah atas pemarai manok sabong ti dikarap ka aku tu, aku tetap menang dalam pengawa kelam ai tu lagi,” ko Chulo bejako ngagai bala maioh ke datai dia.

Udah tembu Chulo “Tarang” bejako, siko ari manok sabong Linggir “Mali Lebu” ke benama Kendawang lalu nanya enti orang Rimbas deka matak dakwa sida ke ngumbai Chulo “Tarang” munoh Entemang.

“Enti kita Rimbas deka matak dakwa kita, kita agi ulih sabedau kita kelam ai. Enti kita alah, kita mega nyau entaruh kita,” ko Kendawang

Orang Rimbas madah ka sida enggai matak dakwa sida lalu mai Chulo “Tarang” bentaruh ka enam igi tajau menaga. Udah Chulo setuju enggau sida Rimbas, orang bukai pan berengkah bentaruh enggau diri sama diri ngena bendai, setawak tauke perengka tembaga bukai.Sabedau sida berengkah nyelam, orang ke dipadu ka nyampi ari spiak-spiak pan lalu nyampi minta Petara ngadu serta ngelurus ka laya sida tu lalu ngasoh sapa ke enda salah nya menang enggau lantang.

Udah nya Apai Enchalu seduai Usut pan lalu berengkah nyelam. Enda lama udah nyelam, Usut lalu lemas ke lalu diangkat ka sida Rimbas ari ai. Laban Apai Enchalu menang, tajau enam igi nya lalu pulai ngagai Chulo “Tarang” magang nitih ka semaia sida. Penyarut sida lalu abis ditu.

Chulo “Tarang” Pindah Ari Rimbas:
Udah bekau penyarut enggau bala petunggal iya OK Antau “Linggang Negeri” menyadi, Ramping “Gumbang Mechah Nanga Maro” seduai Chulo “Tarang” serta enggau semua sida sabilik lalu mindah ngulu Rimbas lalu diau di Nanga Ulai. Sida enda lama diau dia laban menoa enda besai endor bumai. Sida lalu mindah baru melunggang ngagai ai Krian lalu diau di Kumpai. Sida ke mindah tu dudi mimit ari bala Enchana “Letan Pulas Mas” ke pindah ari Paku ngagai Awik.

Udah parai mentua iya Ramping, Chulo “Tarang” lalu diasoh Raja Charles Vyner Brooke nyadi Penghulu ti keterubah iya megai Krian Ulu. Nyadi manok sabong iya maia nya anak iya empu, iya nya Ngadan seduai Unggit serta enggau dua iko menantu iya Kandau seduai Ngindang ari Paku.

Leboh Minggat Apai Runai seduai Chulo “Tarang” baru nyadi Penghulu megai Kerian Ili enggau Krian Ulu, semua Iban ke diau ari kaki wong Embuas lalu ngulu Krian endang bedau nundok ka Perintah Raja Brooke. Kena Perintah Raja Brooke ngalus ka menoa nya Raja Charles Brooke ngasoh semua Iban ke diau dia pindah ngulai sida Penghulu Chulo “Tarang” di Krian tauka sida Penghulu Minggat di Awik. Enti sida enggai pindah ari nya, Raja Charles deka mai bala nyerang sida ti enggai nundok ka Perintah iya. Ninga Raja Charles Brooke munyi nya, Iban ke diau ari Nanga Kabo enggau ke diau dalam Sungai Budu lalu ngelari ka diri ngagai Ulu Senulau lalu nan ba Bukit Batu. Sabedau sida lari, bala indu enggau anembiak ke Ulu Awik.

Dalam serang Raja Charles Brooke tu, bala Iban Layar, Paku, Rimbas enggau Krian Ili endang dibai Raja nyadi ka bala iya nambah ka sida ari Skrang enggau bala Balau ari Banting. Sabedau bala Raja datai, bala Iban ari Krian enggau Saribas endang udah belalai madah ngagai kaban sida ke nan ngelaban Perintah ngasoh sida ngelari ka diri. Semina bala ari Skrang ke babendar begiga ka munsoh, lalu sida endang seruran ditagang Iban Saribas enggau Krian ili awak ka nyaga bala kaban sida ke ngelaban Perintah ari spiak.

Bala Balau ke enggau bala Raja datai, lalu mudik ai Krian lalu ngalah ka rumah di Nanga Kabo. Leboh serang tu, anembiak redak rumah tu nadai dia laban ke udah enggau orang nyengai antu ba rumah orang Kerangan ari ili rumah tu. Endor rumah ke alah tu lalu nyadi pendam ke agi dikena datai ka diatu. Udah bekau serang tu orang ke diau ari nanga Kabo kulu lalu bapechah pendiau. Sakeda sida nitih ka Janting enggau Ranggau di Julau ngelaban Perintah, lalu sakeda nundok ka perintah.

Leboh maia tu mega, Libau “Rentap” diau di Stulak udah iya ke diau di Bukit Lanja udah ke alah di Sadok dalam taun 1861. Laban penyarut Iban Katibas enggau Iban Krian tu, Libau “Rentap” ke nyau udah tuai bendar, mai bala iya pindah ngagai bukit ba entigis ai antara Kabo, Awik, Julau, Sarikei enggau Binatang ke alai iya mati tuai lalu li lumbong ka ba Bukit Sibau. Libau “Rentap”, nyentok ka iya mati endang enggai nundok serta dipegai orang kulit burak enggau bansa bukai.

Udah parai Libau “Rentap”, Ranggau lalu nyadi tuai nganti iya lalu mai bala iya nguta diri ngelaban perintah ba Bukit Dugan dalam Ai Ensiring.

Meda Iban agi bisi enggai nundok ka Perintah, Raja Charles Brooke lalu ngasoh Minggat nitih ka munsoh ke lari ka Ulu Kanowit enggau Mujok. Raja mega ngasoh Minggat nyerang Iban Katibas be begempuru ngelaban Raja di Ulu Kamalih enggau Bukit Stulak di Ulu Kanowit. Ninga Minggat bisi nyendia ka diri deka datai nyerang sida diasoh Raja, bala Iban ke enggai nundok lalu bapechah. Sida ke agi deka ngelaban perintah lalu nitih ka Ranggau nan di Bukit Dugan lalu sida ke nyau puas merinsa ensepi pemedis ngelaban perintah lalu nyurut ka diri diau di Entabai.

Ari Batang ai Kanowit, Minggat mai bala iya niki bedarat ngagai Ulu Ensiring. Sida lalu berarat ngili ai Ensiring lalu ngalah ka rumah munsoh sepamanjai ai alah datai ba Nanga Ensiring. Dia sida beranti ka bala ke agi nyidi munsoh ke diau ngachir di menoa nya. Udah bala nyau datai magang, sida lalu ngitong pala enggau tangkap ke ulih sida. Leboh kayau tu, sida bulih 81 igi pala enggau 4 iko tangkap.

Enda lama udah ke alah di Ensiring, Janting seduai Ranggau lalu nguta diri baru ba Bukit Dugan. Ninga rita nya, Raja Charles Brooke lalu ngasoh Minggat ari Awik, Linggir “Mali Lebu” ari Paku enggau Entering Apai Nawai ari Julau mai bala ngalah ka Janting seduai Ranggau di Bukit Dugan. Chulo “Tarang” mega bisi mai bala iya ari Krian enggau kayau ka skali tu. Pia mega Chulo “Tarang” seduai Entering endang bela bisi kaban nulong sida Ranggau ngetan ka kuta diBukit Dugan. Nyadi bala ke bisi enggau ngayau skali tu iya nya bala manok sabong ari Paku, Rimbas, Krian, Awik, Sebetan enggau Sabelak. Linggir mai bala iya ari Paku enggau Rimbas nyuong sida Minggat seduai Chulo “Tarang” di Awik enggau Krian ke mai bala ari Sebetan enggau Sabelak. Sida lalu nyuong Entering enggau bala manok sabong iya di Julau.

Ari Ulu Julau, bala sida undur ngili ai Julau ngena perau lalu mudik masok ai Kanowit bemalam samalam di Nanga Mujok. Ditu sida ngadu ka aum besai ngadu ka jalai sida niki ngagai Bukit Dugan. Kayau skali tu enda mujor laban munsoh bela udah lari magang ninggal ka kuta sida leboh bala maioh nuntong ba kuta nya.

Sakeda bala manok sabong ke bisi enggau leboh ke ngayau tu iya nya Munan “Penghulu Dalam” ari awik, Luna “Panggau” ari Sabelak, Penghulu Garran “Lembang Batu”, Juing enggau Ajan “Sanggol Langit” ari Paku, Adu enggau Telajan ari Krian.

Udah kayau tu, Chulo “Tarang” rajin bendar bumai. Iya pemuli bendar padi lalu orang pan maioh meli padi ari iya. Padi iya dibeli orang enggau kebok, simpai ranki, pelaga, rawai, gerunong, geri, setawak, bendai enggau engkerumong. Laban pengaya iya, semua tiga iko anak indu iya dibagi ka iya sigi tajau segiu, sigi tajau menaga enggau sigi bedil siko-siko.

Udah tuai Saribas ke dulu agi baka OKP Dana “Bayang” parai dalam taun 1854, Ajie parai dalam taun 1858 enggau Linggir “Mali Lebu” dalam taun 1875, Nanang, Minggat enggau Chulo “Tarang” nyadi tuai Iban Saribas enggau Kalaka. Sida tu selalu dikangau ka Raja Brooke ngalus ka menua tunga ka Batang Rajang enggau Batang Ai.

Leboh Raja Charles Brooke mai bala ngalah ka Bukit Batu di Ulu Mujong dalam menoa pegai Baleh kena 9hb February, 1881, semina Chulo “Tarang” seduai Minggat enggau bala seduai iya aja dibai Raja ngulu ka bala. Sabedau sida nyerang, Raja Charles ngasoh Penghulu Chulo “Tarang” seduai Penghulu Minggat mansang ngagai kubu munsoh lalu ngumbok sida Janting ari Kanowit nyerah ka diri. Chulo “Tarang” enggau Penghulu Minggat lalu sama milih manok sabong seduai niki deka betemu enggau Janting. Tarang mai dua iko menantu iya ,Kandau seduai Ngindang “Kumpang Pali”, lalu Penghulu Minggat mai anak iya Munan serta manok sabong bukai baka Unggit seduai Luna “Panggau”.

Datai sida ba kaki Bukit Batu, sida lalu besatup enggau bala sida Janting ke ngeram ka ipa ba kaki bukit nya. Leboh ke begau ka tegah sida Janting, Kandau seduai Ngindang lalu bakal kena laban sangkoh munsoh. Semina Unggit tebunoh ka munsoh ke negah sida maia nya. Bala bukai bisi ga bakal mimit tang nadai siko bala ke enggau niki parai. Meda sida ditegah munsoh, bala Raja Charles Brooke lalu nimbak bala munsoh ke ngansak ka bala sida Chulo “Tarang” seduai Minggat.

Dalam pengujong taun 1870, Chulo “Tarang” nyadi keterubah tuai Iban dalam Krian megai pengarap Christain. Iya mega nyadi keterubah Iban di menoa Bagi Kedua maia nya berumah ngena batang belian ke besai nyadi ka tiang rumah. Tiang tu agi dikena turun iya sampai ka diatu. Nyadi Chulo “Tarang” parai sabedau rumah iya nya tembu dalam taun 1887. Minggat Apai Runai mati tuai dalam taun 1890 leboh ka belayar bedagang ka Sumatra.

Peturun Chulo “Tarang” agi maioh diau di Krian, lalu maioh mega udah pindah ngagai menoa baru di serata menoa Sarawak tu baka ka di Malang dalam menoa pegai Miri.

Jerita lama pasal siko tuai kitai Iban Krian tu dilengka ka aku ditu aja. Enti bisi penemu baru ba jerita lama tu ka dudi ari ila minta kita nambah ka jerita tu silik agi. Aku semina ngepun ka jerita lama kitai Iban ba internet awak tau dibaca bala ke rindu ka pasal penatai, pengidup, pendiau enggau adat asal kitai Iban.