Jerita Geruka Anak Banda Renggat 6

Jerita Geruka Anak Banda Renggat 6.

Jerita Pengayau Geruka Anak Banda.Pengudah meda maioh laskar ia alah diak bala panglima bala Sultan kabukai bebai undur kili laban ke alah maioh laskar ia parai dikayau bala iban Saribas enggau Iban Skrang maianya.Kenu ke tusi Seligie Anak Encharang ba bup ditulis Mary Tinggom maianya ai sungai Saribas bebau but mensia ke parai belah ai maianya.Pemaioh bangkai mensia baka apat kayu anyut ari ulu.Lebuh sida panglima askar Brunei ngundur diri maianya diak sida digagai tudah Mangah enggau Igoh laban enda puas ati enti teulih ke pala Panglima kabukai nya mega Saduai ia berunding enda patut diri alah endar ari tudah Ukam ke tacat sapiak enyau tulih pala panglima askar Brunei maianya suba.Meda Mangah enggau Igoh aja nitih diak sida Mering enggau Geruka sereta Sumping enggau Ukam sama nitih ari belakang saduai ia ke dulu.Mangah enggau Igoh alu tetemu ke bala askar Brunei nya ba Nanga Saribas baru alu betempuh baru ga sida ia.Laban ke bisi penemu ti cukup bisa peda sekali merawai ngempat ngelima pala munsuh terebai.Dansak bala sida Geruka mega nyadi balat sebalat agi bepantap kin kia.Ngujung dinga panjong kekalau tudah Mangah madah diri gaga tulih ke mumpung pala panglima nya tadi.Dipeda Igoh betempuh enggau panglima sakti bala Sultan Brunei.Dibaca panglima nya penemu nya tang Igoh alu engkecit tak nadai rusek tak nadai beampun ampun peda alu teketik pala panglima nya laban Igoh alu manjung kekalau Igoh madah diri bulih pala Panglima Sakti seretai nya alu manjung ga Sumping madah diri bulih pala panglima laskar Brunei.Pengudah kayau tu meh ngujung pengering laskar Brunei makin ari makin lemik,semina siku aja laskar Brunei pulai ke sangkar maianya.Pengudah kayau tu meh Sultan Brunei nganjung Sharif Masahor nuju Sungai Saribas tang Sharif Masahor tu enggai ngayau bansa iban maia nya ia ngemai bebaik maianya enggau iban maianya tang laban ke bala laskar ke nitih ia nya agi pedis ati agai bansa Iban ngujung bala pengikut ia dibunuh Sharif Masahor empu laban sida ia nangkap indu iban ke mandi alu dipasung sida ia.Tang pengudah ditemu Sharif Masahor ulah sida pengikut ia nya diak Sharif Masahor nyerah kuasa agai bala katuai iban ti ngukum sida ia.Maia nya Sharif Masahor aja ke idup laban ia aja enda enggau ba senentang utai ke udah nyadi.Pemulai Sharif Masahor ari   Saribas ngujung ia dasuh nyaga istana Sultan Brunei maianya.

Pulai agai sida enam sabuat tadi diak sida sabuat alu pulai kulu Skrang kin.Ba langkau Ukam meh sida nyalai pala nya tadi.Tang ba Ulu din meh sida tetemu sitik menua ti enda kala dipeda mensia nyengala mega.Menua nya baka sempadan dunia nyata enggau syurga dunia ti enda kala ditemu mensia.Sida enam iku alu ngentak ke langkau ba dunya nya nyentuk kediato agi bedau menua nya.Ba menua tu meh bisi sumpah,sumpah kedulu sumpah anak iban diadu mega.Ka keni agama ba dunya tu ia enda ulih tetembus ke sumpah anak iban laban sumpah anak iban tu beresi chulin baka ai beresi.Agi maioh dunya syurga ba menua kitai mina maioh kitai enda nemu.Baka Bruno Manser,ia udah ba dunya syurga.Ia enggai tuai tuai mega ba din,ia udah ka dambi pulai tang ia enggai laban ia rindu begulai the old legend orang Ulu ia nya Apang ti betapa ratusan tahun ba dunya syurga ba menua pelilih Ulu Baram kelia.Apang lari enggau bala ia ke Ulu Baram lebuh kayau besai besai kelia suba.Ia rembus ba dunya syurga ti enda kala dipeda mensia ba dunya tu.

Pulai agai kenang jerita Geruka,lebuh Skrang dikayau kelia.Penama Geruka suah disebut bala Kemayang Pengayau kelia laban ia siku pengayau ti lenyau pengudah bini ia mati ba kayau Rajah Brooke ba Nanga Skrang maia taun 1850.Maia nya sida ia ngetan ke menua Skrang ngujung maioh kitai iban maianya nanah ke Rajah Brooke ketegal asut siko panglima Sultan Brunei ti nyadi laskar Rajah Brooke maianya.Ba kayau ba Skrang maia penyampau bala Kemayang Pengayau bisi 500 iko tang bisi kaduak ia bakal maianya.Maianya tudah Geruka minta kasih agai siku panglima kitai Iban anang munuh bala indu enggau nembiak maia nya sida panglima nya nanah ke Rajah Brooke mega.Tang enda dipending ke bala laskar Iban ti nanah ke James Brooke maia ngujung maioh kitai iban ke indu enggau nembiak ba rumah panjai maianya parai dibunuh ketegal nitih ke penemu Rajah Brooke ngujung Geruka nyumpah.Maia nya laban laskar kitai iban enggai kiruh jako tesau Geruka alu sida munuh bini Geruka ngujung Geruka maia ti betempuh enggau sida ia nyabak deduie mangku tubuh bini nya ke mati seraya ia megai tubuh bini ia alu Geruka ngeraup darah bini ia alu ia ngangkat jari ke langit alu besumpah."Nya Batara,peda kitak iban munuh iban,aku tu Geruka anak Banda ti diayu sida Simpandai,sida Sempulang Gana,sida Raja Tiku,enggau Sengalang Burung alu dipadung sida Panggau Libau enggau Gelong sereta menua Titi Arong titi Pampong Titi Bedunjung,pengudah tu ila kitai iban aku sumpah nadai penyinu diri jemah ila,sida iban ka jai enggau bansa diri jemah ila,nya tulah kitak ila laban kitak jai enggau bansa diri ila,nyadi kampar nyadi ilal nyadi ke mit nyadi ke encit nyadi kerupit pengidup kitak ila,tu sumpah aku sumpah nuju bansa diri ti jai adat jai ngempat penemu bansa diri"pia ko Geruka.Pengudah nya Geruka nepu bini seladan tauka selabit ia alu ia dipeda nyabak deduie bejalai tang jari ia dipeda kiba kanan bedarah laban nya darah bini ia.Maia nya bala iban ke belaban sama diri ngenung ninga panjong ari langit madah jako Geruka nya ka dibai nyadi penanda Iban enda ulih segulai agi ila.Maia nya bisi didinga sabak ari langit tanda menua ka kudi nitih jako Geruka Anak Banda.Pelaba aku enti bedau idup niang niang aki inik kitai kelia suba ti enggau bekayau maianya angka sida nusi ba langit bisi didinga orang nyabak baka sabak orang pedis ati sereta sinu ke bansa bakanya.Madi James Brooke kala nulis "Ba atas langit bisi orang nyabak tang enda ditemu leka sabak laban sabak ia ngena jako iban".Geruka ngelenyau diri pengudah kayau ba Nanga Skrang suba alu ia nadai ditemu kini pemindah ia tang bisi ga orang madah ia agi mengkang nguan menua Ulu Skrang nyentuk kediato.Idup tauka mati ia nadai ditemu mega.Maia nya ka sebulan menua kudi maia nya laban sumpah Geruka ngasuh kitai iban ila pecah mepar pambar mina ari penyerakup bansa aja ngulih ke utai manah utai ke ngetan ke bansa alu iban ka luba pandai ari bansa bukai jemah ila.Kingat enti kitak amai iban kitak meseti ngingat sumpah GERUKA ANAK BANDA tu ila.Ukai Geruka jai tang bansa kitai maia nya laban ka ngulih pingat ka ngulih keresa ka ngulih ke nama ka ngulih pangkat.Ambis ensera Geruka.