Jerita Penyarut Batang Ai

Jerita Penyarut Batang Ai - Pun Penyarut Di Batang Ai

Nyadi kelia Iban Batang Ai enda kala bebunoh ngelaban bansa diri. Pun pengachau berengkah ari tegal Enche, indu orang Kumpang jadi enggau Dunggat, lelaki ari Lubang Baya, Ulu Ai.Apin Enche seduai Dunggat jadi, Dunggat dulu betunang enggau indu ulu ai nama Chala. Taja Dunggat seduai Enche udah begulai melaki bini serta bisi anak, Chala endang agi enda nyamai ati ngagai Dunggat meda ka enda jadi enggau iya, enda nitih ka semaia seduai ka dulu.Nyadi sakali indai Lemenya, indu sida ari Lubang Baya, bisi nemuai kili ngagai kaban iya di Kumpang. Ninga indai Lemenya deka nemuai kili ngagai rumah sida Dunggat, Chala lalu ngasoh iya mai dua iti ilom pinang ngagai Dunggat seduai Enche. Datai indai Lemenya di Kumpang, ilom pinang lalu disua ka iya ngagai Dunggat seduai Enche. Enggi Enche lalu diempa iya enda nanya ka penatai ilom nya. Nyadi enggi Dunggat dibuka iya dulu, ke alai iya meda bulu mayau begulai enggau bulu ukoi. Iya lalu nanya ka penatai ilom nya ngagai indai Lemenya. Ko indai Lemenya, ilom nya datai ari Chala.Ninga nya datai ari Chala, Enche lalu tusah ati laban iya ngumbai ilom nya rachun kena Chala munoh Dunggat seduai iya. Pagi siti indai Lemenya mulai ka diri kulu. Enche lalu bepesan ngasoh Chala enda tau enda datai kia betelesay ka ilom nya enggau iya enggau lengkas.Enda bangat lama udah nya Chala datai ari Ulu Ai. Ko Chala, ilom nya ukai rachun munoh, tang pemenche dikena nyarak ka seduai Dunggat.

“Nama kabuah de mia ka kami dua Dunggat? Enti de deka belaki Dunggat, de meh empu iya, enda iboh de ngaga pemenche”, ko Enche. “Tang ilom nya endang sigi rachun munoh, ukai pemenche munyi ko de”, ko Enche. “Enti aku parai laban aku udah makai nya, de enda tau enda mayar pati nyawa aku enggau tajau menaga tutup enggau bendai salabuan,” ko Enche.

“Au,” ko Chala, “tang aku sigi nadai ngerachun de, kelam ai pan deka meh aku enti aku bisi deka ngerachun de,” ko Chala. Chala pan lalu pulai kulu sahari nya.

Enda lama udah nya Enche kena sakit lalu parai. Ninga Enche udah parai, menyadi iya di Bui, Tugang seduai Lajang lalu mai kaban seduai ngerampas pati nyawa ari Chala ka Ulu Ai nitih ka semaia Enche seduai Chala leboh seduai betelesay suba.

Datai sida Lajang di Lubang Baya, sida lalu ngerampas tajau menaga sigi enggau bendai salabuan lalu dibai sida pulai ka Kumpang.

Terubah Orang Ulu Ai Ngayau KiliMeda pengawa Lajang seduai Tugang bangat enda bebasa ka sida di Lubang Baya dia Mandau, Sumping, Naga, Bararo enggau Temenggong Apai Rusah lalu ngerijat bebai nurun ngayau ngalah ka Kumpang. Kayau sida tu bulih pala dua igi.Enda lama udah bekau kayau nya, alai bisi anembiak sida Naga dua iko undor kili deka ngalu garam ka Nanga Skrang. Leboh seduai mansa Nanga Kumpang, seduai lalu dibunoh Tugang seduai Lajang dia. Udah bekau pengawa tu sida seruran bebalas bebunoh enggau pangan diri ngena kayau anak.Rambau pengawa sida ke bebunoh tu nyadi, tuai ke diau di antara menoa sida Lubang Baya enggau Kumpang nya Unggang “Gerasi” ke diau di Rantau Panjai.Nyadi orang Kumpang pan nyau majak ngayau sangayau ga ari ili. Sida Mandau sida Sumping pan majak ga ngayau ari ulu. Sida sama enda talah ka pangan.

Apai Ramba nyerang Ulu Ai

Udah nya baru Apai Ramba seduai Apai Jega, tuai serang orang Kumpang, matak bala besai mansang nyerang deka ngelangar menoa menoa Ulu Ai. Leboh sida datai di Rantau Panjai, dia sida betemu enggau Jeburie, bini Temenggong Medana “Simpi Pala” ke benong mandi dipendai. Nyadi Jeburie tu indu orang ari Kumpang, endang kaban sida Apai Ramba.

Meda bala apai Ramba merau datai ari ili, Jeburie lalu ngasoh sida ngetu. Sida enggai ngetu. Tang Jeburie ngumbok sida ngetu, nya alai sida lalu ngetu dia. Jeburie nanya ka kebuah sida bebala maioh.

“Kami tu deka ngayau Mandau, ngayau Sumping di Ulu Ai,” ko saut Apai Ramba. Ninga saut Apai Ramba munyi nya, Jeburie enda ngasoh, ko iya “nama kabuah kita deka kiroh jauh ngayau ka Lubang Baya, ka Nanga Tiga enggau ka Nanga Mujan.”

“Enggai enda kin ka kami,” ko saut Apai Ramba, “kami tu baka udok enggai enda nitih ka bekau lubang kaki babi.”

“Nama kabuah kita deka kiroh ngelaban wong, ngelaban riam kulu kin?” ko Jeburie.

“Dini endor munsoh ke semak ko de?” ko Apai Ramba.

“Oh, damping munsoh kami di menoa tu,” ko Jeburie. “Enda de nemu rumah Tegaran, rumah Jengkilan di Nanga Musing, nya meh rumah orang ke beburong raya, beburong rindang. Sida nya enti malam bekupan di batu anchau, enti pagi bejembi di puchok galau.” (Reti nya, enti malam sida nyalai antu pala olih ngayau di Kumpang, enti siang betaroh di sadau.) Kabuah Jeburie meri jako munyi nya laban iya nyangka sida nya ka diau di tengah menoa bisi besepakat enggau orang Mujan, orang Lubang Baya, orang Nanga Tiga enggau orang ari ulu Nanga Mujan, ngayau ngalah ka Kumpang.

Bala Apai Ramba Ngalah ka Musing

Ninga rita tusoi Jeburie, Apai Ramba seduai Apai Jega pedis amat ati. Dulu ari tu sida Kumpang endang enda sangka ka sida Tegaran enggau sida Jengkilan nyadi ka pintu bunoh.

“Enti munyi nya ko tusi de nya Jeburie, sida nya meh dulu dilaban kitai,” ko Apai Ramba.

Apin sida angkat ka Musing, Jeburie lalu bepesan enda ngasoh sida munoh bini Jengkilan. “Ka tanda iya nya bini Jengkilan,” ko Jeburie, “iya ngua ka anak ngena pua Lebor Api”.

Udah tembu bejako enggau Jeburie, Apai Ramba lalu mai bala iya mudik. Datai sida di Nanga Tebelian dia sida ngetu. Ko Apai Ramba, “Samua kita ke bedarat nya dudi, nyadi aku merau dulu. Enti kira bala aku udah nuntong ba pangkalan orang Musing, nya baru kita angkat ngerembing ngalah ka rumah.”

Udah meri jako nya ngagai bala maioh, prau Apai Ramba lalu angkat mudik kulu. Sangkai prau sida ba pangkalan orang Musing, sida betemu enggau indu siko benong mandi. Apai Ramba lalu mesan ka Tegaran seduai Jengkilan ba indu tu ngasoh seduai nurun betemu enggau iya ba pangkalan sida Musing.

Enda lama udah nya datai Tegaran nyandik kambut enggau Jengkilan nyandik kongap. Serta datai seduai dia, Apai Ramba lalu ngamuk. Seduai sama parai dia enda berandau. Udah parai Tegaran seduai Jengkilan, bala besai pan datai nuntong lalu ngalah ka rumah. Sida munoh tiga puloh iko tinggal bala lelaki ke udah nyau berikan ka danau Majang. Udah alah rumah nya baru bala ingat ka jako Jeburi ke enda ngasoh munoh bini Jengkilan. Tang sida nadai meda bangkai bini Jengkilan dia.

Nyadi bini Jengkilan tadi leboh rumah ke deka dialah ka sida Apai Ramba, iya benong nempa periok tanah beselap pua tekalong. Nya alai iya ulih ngerari ka diri ngelesit munsoh nyandik anak. Nyadi anak indu iya ka benama Simpo enda sempat rari, nya alai iya ditangkap Apai Ramba.

Bala Apai Ramba Pulai Ngetu ba Pangkalan Unggang “Gerasi”

Udah rumah orang Nanga Musing alah, Apai Ramba lalu mai bala iya pulai. Dirantau ai leboh sida mansa rumah Unggang “Gerasi” di Rantau Sandong, Apai Ramba mai bala iya ngetu laban deka madah ngagai Unggang “Gerasi” sida iya udah ngelangar rumah Tegaran seduai Jengkilan di Nanga Musing. Ninga rita sida, Unggang “Gerasi” tekenyit bendar ati ninga sida udah munoh orang baik. Iya lalu nurun ari rumah nangkin nyabor lalu mai bala Apai Ramba bepantap, tang bala Apai Ramba enggai. Apai Ramba lalu nusoi ngagai Unggang “Gerasi” kabuah iya ngalah ka rumah orang Nanga Musing ari tegal tusoi Jeburie, bini Temenggong Medana “Simpi Pala”, sida Nanga Musing nyau jadi ka pintu bunuh, mantu sida Lubang Baya munoh orang Kumpang.

Unggang “Gerasi” madah ka diri nadai kala mimpi ka sida Nanga Musing kala enggau orang Ulu Ai ngalah ka Kumpang. “Tang nya petenah Jeburie,” ko Unggang “Gerasi”. Iya madah ka pengawa Jeburie nya nyabong orang belaya.

Bala Apai Ramba ngetu ba pangkalan Temenggong Medana “Simpi Pala”.

Udah tembu berandau enggau Unggang “Gerasi”, Apai Ramba lalu mai anembiak iya undor kili. Datai sida ba pengkalan Temenggong Medana “Simpi Pala” di Rantau Panjai, sida dibai Apai Ramba ngetu dia.

Leboh iya betemu enggau Temenggong Medana “Simpi Pala”, dia iya lalu madah ka perau sida sarat laban pala orang Musing. “Enti de deka nanam leka semakau ba amau dan kara di Nanga Musing, mudik de kulu,” ko bungah Apai Ramba enggau Temenggong Medana “Simpi Pala”.

Ninga jako Apai Ramba, Temenggong Medana “Simpi Pala” udu bendar ringat. Iya ngeransi lalu ngerinsai ka tanju sepiak, lalu rarat magang pagar enggau lantai-lantai tanju ka bisi dia. Iya lalu mai sida Apai Ramba bamok, tang Apai Ramba enggai nya alai sida lalu undur pulai kili.

Bala Apai Ramba Ngetu di Bui

Datai sida di Nanga Bui, sida lalu ngetu ba rumah Untu, ba rumah Bulan enggau ba rumah Bantin.

“Dini alai kita ngayau?” ko Untu.

“Dia,” ko Apai Ramba, “di Nanga Musing.”

“Bulih kita?” ko Untu nanya baru.

“Bulih,” ko saut Apai Ramba, “pala 30, tangkap 30, tajau 30.”

Leboh Bantin tiga Untu enggau Bulan meda tangkap, sida tapeda ka Simpo anak Jengkilan. Sida lalu madah ka diri deka nebus Simpo ngagai Apai Ramba, laban iya tak anak petunggal sida.

“Tau, enti kita deka nebus iya enggau tajau menaga nyengenda tutup enggau setawak selabuan,” ko Apai Ramba.

Sida setuju serta lalu nebus Simpo. Simpo pan lalu tinggal Nanga Bui dia.

Orang Ulu Ai Nyerang Orang Kumpang

Enda lama udah orang Musing udah dialah ka Apai Ramba, alai Unggang “Gerasi” ngasoh sida Sumping, Naga, Ujan, Berara, Mandau, Gong enggau Sumok nyerang Kumpang bebalas ka orang Musing. Bala sida tu dibai Unggang “Gerasi” nyuong Temenggong Medana “Simpi Pala” di Rantau Panjai.

“Enti iya enggai,” ko Unggang “Gerasi”, “bunoh iya olih kitai, laban orang Musing punggor ari patenah bini iya Jeburie.”

Udah tembu aum, Unggang “Gerasi” lalu mai sida nurun ngayau nyengkaum bala Baketan. Datai sida di Nanga Pan ari ulu rumah Temenggong Medana “Simpi Pala”, sida ngetu lalu belangkau dia ke endor sida begiga ka ipoh enggau begaga ka laja. Ari nya mega sida Naga seduai Sumping beseruan ngagai Temenggong Medana “Simpi Pala” ka Rantau Panjai.

Datai di rumah Temenggong Medana “Simpi Pala”, seruan tu lalu madah ka diri diasoh Naga seduai Sumping mai Temenggong enggau sida nyerang orang Kumpang bebalas ka pemarai orang Musing.

“Oh, kati ka aku enggau kita ngayau, tak kaban mentua, kaban ipar aku magang di Selindong, di Bukong,” Ko saut Temenggong Medana “Simpi Pala”.

Ninga Temenggong enggai enggau, bala seruan lalu deka munoh iya. Meda sida nyau deka munoh iya, nya baru Temenggong Medana “Simpi Pala” madah ka diri deka enggau ngayau, enti bala deka dulu nulong iya nguta rumah iya, awak ka enda mudah dialah ka munsoh nyelawai. Bala maioh pan lalu nguta rumah Temenggong Medana “Simpi Pala” lalu tembu sahari laban Baketan bengat maioh tuboh.

Leboh sida agi betatam ba Rantau Panjai, bala Apai Ramba ari Nanga Kumpang pan bisi ninga bala ari Ulu Ai deka datai bebala maioh nyerang sida. Nya alai sida lalu sedia nganti enggau bala wan ai sida jaga ba Nanga Saremat.

Lemai nya bala sida Sumping enggau Naga lalu undor ari ulu. Malam nya kejang sida deka mansa Nanga Saremat, wan ai sida Apai Ramba meda api insap ari jauh bakaliau. Meda nya, bala wan ai lalu beguai pulai ngagai tugong bala madah ka diri bisi meda api munsoh bakaliau undor ari ulu. Tang sida Apai Ramba enda arap ka berita ka dibai bala wan ai, nya alai iya lalu ngasoh anembiak bukai enggau bala wai ai ngabas baru.

Leboh sida wan ai datai baru di Nanga Saremat, sida nadai agi meda api insap bala sida Sumping seduai Naga, semina kijap sempepat ka ingap ba sabelah kayu nebing ai nya bisi di peda sida. Tambah mega laban hari ujan maia nya. Tang sida enda nemu bala munsoh udah mansa lalu nyau undor kili. Bala sida wan ai ka enggau dudi nya tadi lalu bebula sida wan ai ka dulu mai berita nya tadi. “Empa pemuyan sida nya alai sida lari. Tau ganti enggau mata sida nya,” ko sida wan ai ka dudi nya tadi.

Nyau dini hari baru bala sida Sumping nuntong ngalah ka rumah Gelau enggau rumah Kemarau di Nanga Setuga. Rumah dua buah nya lalu alah, laban semua pungka lelaki sida udah enggau bala Apai Ramba ngipa munsoh di Nanga Saremat. Pala, tangkap enggau tajau maioh bendar ulih sida ari Ulu Ai. Rumah bukai ke sama bedamping dia ulih ditunu sida magang.

Nyadi agi urap ari, bala sida Apai Ramba ke ngentam di Nanga Saremat nyau nemu rumah sida udah retong lalu alah magang, laban sida meda langit ngenying kuning tunga ka kili.

Hari tawas bala sida Sumping ari Ulu Ai pan lalu merau mulai ka diri. Tang siko anembiak ka banama Kibong ngulu ka sakeda bala pulai bedarat. Meda iya ngenulu ka bala ari jauh, bala sida Apai Ramba lalu ngelala iya. Ari nya sida nemu anembiak Temenggong Medana “Simpi Pala” empu ari Rantau Panjai bisi enggau sida ari Ulu Ai ngalah ka sida. Sida enggai nguji munoh Kibong laban iya bangat ipar sida.

Nyadi Temenggong Medana “Simpi Pala”, laban takut ka orang munoh iya, ngenudi ka diri bejalai ari bala maioh. Iya irau bendar ka bala Apai Ramba jai ati enggau iya.

Meda bala munsoh mansa, Apai Ramba lalu mai anembiak iya nitih ka sida bedarat muntang ngulu ai Saremat awak ka negah sida. Ari Nanga Saremat sida nuju ka Nanga Piyat lalu ngeram ka ipa dia.

Betempoh di Nanga Piyat

Datai bala Sumping enggau bala Nuga di Nanga Piyat, sida lalu dikangau ka bala Apai Ramba agi mai bebuti, laban ati empai tembu bebuti dili tadi, ko Apai Ramba. Ninga nya sida Sumping enggau sida Naga lalu nyangkai ka diri dia, lalu berengkah belaban baru. Nyadi anembiak Sumping ka benama Taboh dulu mutus ka pala musoh lalu dibai iya ngagai tugong bala iya.

Enda lama udah nya anembiak Naga ke benama Sibat, leboh iya ka nitih ka munsoh, nemu semua anembiak Apai Ramba ka bakal dianjong sida ka ulu Piyat. Leboh tu Sibat lalu bedengah rawai empat, lalu enggi Enturan Besi bedengah sigi. Ninga bala Apai Ramba ke udah bakal dianjong ka ulu Piyat, bala Sumping seduai Naga lalu ngansak ka munsoh kin ka, lalu munoh samoa munsoh ka bakal nya tadi. Meda anembiak diri alah, Apai Ramba seduai Apai Jega lalu rari ngidup ka diri.

Apai Ramba Nyerang Ulu Ai

Agi ngidap ka bekau alah tu, Apai Ramba mai bala besai ngalah ka rumah Apai Likup di Entego, ari atas Nanga Mujan. Leboh tu, rumah Apai Likop ngenjing punas alah.

Sumping Seduai Naga Pindah ari Batang Ai

Meda menua nyau mansang kudi, bebunoh ka diri sabansa baka nya, alai Sumping mai Temenggong Medana “Simpi Pala” pindah ngagai menua baru ke nyamai agi diuan. Temenggong Medana “Simpi Pala” enggai enggau mindah laban iya enggai ninggal ka Petara iya ba Bukit Tunggal ari ili Nanga Kaong.

Ninga Temenggong Medana “Simpi Pala” enggai enggau mindah, dia Naga enggau menyadi iya Sumping, Maoh, Api enggau Murap lalu mai anembiak sida pindah ka Kanyau ari sepiak menoa Indonesia. Di Kanyau, sida diau enda lama ba endor ka dikumbai Emperan Kawat lalu mindah ari nya ngagai siti endor ka dikumbai Kerangan Labu. Ditu sida agi dititih ka sida Apai Ramba ari Kumpang enggau Kayau.

Meda sida lalu enda likun pendiau, Naga lalu mai pindah baru. Sakalitu sida melunggang ka Katibas dalam menoa pegai Sarawak lalu diau ba endor ka dikumbai Jekelan. Nyadi Sumping parai tuai di Genting Tilan Bukit Chundong antara Katibas enggau Jekelan. Leboh ka diau ditu, Naga ngasoh anak iya Unggat seduai Gerinang “Nitik” nyadi ka tuai.

Tusut Naga:
Asal tusut Naga tu ari Sera Bungkok ke nurun ka sida Tamoh (f), Ranchak & Judi (f).
Tamoh (f) x Jamal = Usiek x Simpo (f) = Ulas (f) x Pantau = Meringai x Randai (f) = Tamoh (f) x Ningkan = Serian (f) x Jantau = Demong x Dabah (f) = Naga, Sumping, Maoh, Api, Murap. Naga x Jentia (f) = Penghulu Unggat, Penghulu Gerinang “Nitik” x Lintau = Penghulu Gunggang “Matahari”, Penghulu Keling x Lenjai (f) = Rando (f) x Laang = Penghulu Gerinang x Teresa (f) = Penghulu Jimbun, Penghulu Kumbong, Wong, Bulan (f), Raymond, Raong, Bunsu, Timah (f)

Ari nya sida pindah baru ngagai endor ka dikumbai Emperan. Di Emperan sida di serang olih Bansa Kantu begulai enggau Dayak Embaloh. Munsoh tu datai ari Kanyau enggau Ulu Ketunggau pati Batang Kepuas. Ngelari ka diri ari penusah tu, sida pindah baru ngagai endor ka dikumbai Batu Gong lalu berumah di Tekalit.

Nyau kelama Sumping seduai Naga udah pindah, nya baru Temenggong Medana “Simpi Pala” mai bala iya pindah ka Seriang. Datai iya din, iya lalu bebunoh ngelaban bansa Tawang, bansa Salimbau enggau bansa Kantu. Nyadi laban munsoh tu alah magang laban iya, nya alai Danau Majang diempu Iban datai ka diatu. A tanda antara bagi danau diempu Iban, bisi ditanam ka perintah Belanda Tiang Tembang siti ka agi bediri dia datai ka kamaia ari tu.

Tusut Temenggong Koh:
Temenggong Medana “Simpi Pala” x Jeburie = Temenggong Demang “Buah Raya” = Temenggong Runggah x Empana = Temenggong Jemat, Ba’ x Bejau = Garong (f) x Jubang = Temenggong Koh x Menti = Sagura(f), Kenneth Kanyan, Iba (f)

Ba’ mai iya pindah baru lalu diau di Batang Kanyau ba endor ka benama Pulau Ensulit. Uchu iya Temenggong Koh ada ditu. Ari nya iya pindah ka Katibas lalu barumah di Pengkalan Ridan begulai enggau anak petunggal iya Balang seduai Unjop. Leboh Unjop ngaga pengachau ngelaban Perintah kategal menyadi iya Balang di ukum bunuh ulih Tuan Resident di Pulau Selalau ari ulu pasar Sibu, Ba seduai Jubang pindah baru pulai ngagai menua lama di Kalimantan Barat. Udah penyarut nya abis, seduai pindah ka Katibas baru lalu diau enda jauh ari Pasar Song ka diatu. Sida ka pindah ka Batang Rajang sekali tu endang dudi ari sida Gerinang “Nitik” seduai Unggat. Enda lama udah nya Jubang parai leboh ka nitih ka kayau Gerinang “Nitik” ngelaban Bansa Lisom enggau Bansa Pieng di Batang Paron.

Udah parai apai iya Jubang, Temenggong Koh lalu pindah baru ari Katibas lalu masuk ngagai Baleh. Di menua baru tu iya di asoh perintah jadi Penghulu nambah ka Penghulu Kanyan, Penghulu Keling enggau Penghulu Matahari di Batang Baleh. Anak iya Kenneth Kanyan lalu nampong pengawa apai iya nyadi ka tuai ngadu ka pemansang anembiak redak rakyat di menua nya.

Leboh Jubang pindah melunggang ari Pulau Ensulit ka Katibas menya, dia iya betemu enggau iban ari Delok siko ka benama Melintang di langgong Bukoh Bukit Mubau. Nyadi Melintang tu anembiak redak rayat Penghulu Alam. Leboh agi di Delok kelia, indai Melintang tu indu iring Penghulu Alam. Leboh sida berumah di ulu Menyang, iya ngandong lalu ngambu Apai Gerinang, tang enda bulih. Nya alai Melintang tu nadai apai. Melintang beserara enggau Alam ba Tembawai Sandong ari ulu Nanga Bengap.

Ari Bukit Mubau nya Melintang seruran nitih ka Jubang ngili Katibas lalu ngulu Batang Rajang enggau Baleh, lalu di atur Temenggong Koh diau dalam Batang Merirai.

Note : Gerinang “Nitik” bisi ngayau lalu ngalah ka Bansa Pieng di Batang Paron. Nyadi Jubang apai Temenggong Koh parai leboh kayau tu.

Nyadi leboh Raja Muda Charles Vyner Brooke nemuai ka Kapit ngadu ka pengawa bebunoh babi antara Kayan-Kenyah enggau Dayak kena 16hb November, 1924 di Kubau Kapit menya, Melintang bisi kasar jako nunjok ka mata Kana tuai Iban ari Batang Ai.

“Enti enda laban de Kana, menoa Batang Julau, Batang Kanowit enda kachau.” Ko Melintang.

Ringat amat Kana dipia ka Melintang, ko iya, “De bengah-bengah bejako Melintang. Enti de agi di Delok kalia de nya nadai rengo, nadai nama, de nya ulun Alam.”

Sampai ka iya jadi Penghulu, Melintang jadi jaga Kubau Kapit. Iya rajin amat. Enti Tuan nengah jalai luchak, nanya iya empu gali ba luchak jadi ka jambatan Tuan. Enti Tuan Raja Kentut, enggai ka Raja malu, dipadah ka Melintang kentut iya empu. Laban pemanah iya, Melintang diasoh Perintah jadi Penghulu megai Batang Merirai, pati Baleh.

Nyadi Kana tu asal iya orang Engkari anak Penghulu Munau. Iya tau serang serta berani lalu nyadi Tuai Kayau udah parai Penghulu Ngumbang “Berauh Langit”, Imba enggau Penghulu Bantin “Ijau Lelayang”. Kana mega udah ngalah ka Rumah Julai di Lemanak, Rumah Agan di Entabai enggau Bukit Balong. Iya enggau belanggar ngelaban bala Raja di Wong Adai, Kanowit ke alai iya putus tunjok.

Kana jadi Penghulu Penulong lalu ari semoa Penghulu di Batang Ai nyengkaum simpang-simpang ai bukai dia, nadai jelai berita ari Kana. Penghulu bukai kena pegai iya magang.

Dalam Taun 1868, leboh Penghulu Gerinang “Nitik” seduai menyadi iya Penghulu Unggat jadi tuai menoa, dia seduai bisi undur ka Nanga Ngemah betemu enggau Tuan Resident J.B. Cruishank ke bisi nemuai kia ka maia nya. Leboh Tuan Resident nanya ka berita, Penghulu Unggat lalu nyaut madah semua menoa likun magang semina iya irau ati ka siko tuai Iban ka benama Balang ke baru pulai ngayau ngalah ka Bansa Lusum. Penghulu Unggat madah ka Tuan Resident, Balang enggau Ringgau bisi dua kali mai seduai menyadi iya munuh Tuan Resident. Iya mega madah ka Balang leboh ka begawai besai tu ila deka munoh babi belang siko. Gawai tu dikena iya nanda ka diri mujur ngayau ngalah ka Bansa Lusum.

Ninga rita Penghulu Unggat munyi nya, Tuan Resident J.B. Cruishank enda lantang ati. Iya lalu madah ka ngagai Penghulu Gerinang seduai Penghulu Unggat iya empu deka ngabang ngagai gawai besai Balang.

Ari siti Tuan Resident J.B. Cruishank lalu mudik ngagai rumah Balang. Datai di pendai, iya lalu ngangau ka Balang ngasoh iya nurun ke pendai ngambi iya niki ka rumah. Balang tekenyit bendar laban iya nadai ngambi Tuan Resident ngabang. Leboh Balang nurun ngambi Tuan Resident ka dalam perau, dia Tuan Resident lalu ngasoh bala iya nangkap Balang. Sida lalu nyau naban ka Balang ka Sibu. Enda lama udah bekau nya, Balang pan diukum bunoh di Pulau Selalau olih Tuan Resident kategal petenah Penghulu Unggat ka madah ka Balang bisi mekat mai munoh Tuan Resident.

Tusut Balang:
Temenggong Medana “Simpi Pala” x Jeburie = Temenggong Demang “Buah Raya” = Temenggong Runggah x Empana = Ba’, Temenggong Jemat x Cherengga (f) = Pateh Mandoh x Meliah = Pok (f) x Bujang Kemping Padi (Menyadi Keling Panggau Libau ke mati lulus) = Unjop, Balang x Rinda (f) = Penghulu Ngelambong x Laing = Charrang (f) x Sumping = Belayong, Joss (di Engkabang, Lepong Kain, Katibas, Song)

Jerita lama pasal penyarut di Batang Ai dilengka ka aku ditu dulu. Arap ka bala anembiak rebak baru bulih pelajar ari jerita lama tu lalu nemu berunding lebih dalam agi serta panjai agi awak ka penyarut baka tu enda agi nyadi ba bansa kitai jemah ila.

Aku mega arap ka jerita tu tau ngasoh kitai Iban beserakup ati enggau pangan diri kena kitai ngemansang ka bansa diri dalam pulau Borneo tu. Kitai sama nemu, Pulau Borneo tu meh satu-satu iya menoa diberi Petara ngagai kitai. Arap ka kitai nemu berserakup dalam semua pengawa ngemansang ka pendiau bansa kitai.

Kitai Iban amat berani serta kering ati. Tang pemerani enggau pengering kitai patut ditumpu ka ba pemansang bansa kitai empu. Ukai kena kitai munas ka bansa diri. Arap ka sapa kitai Iban ke nemu jerita lama tu enggau silik agi, tau nampong serta nambah ka isi jerita tu. Jerita tu ukai kena besalah ka sapa-sapa aki ini kitai.

Ka pengujong kenang tu, aku arap ka bansa kitai Dayak anang kelalu bepangai ba bansa bukai nyadi ka tuai megai menoa. Kebuah pia laban kitai udah kelalu balat dikena bansa orang ngulih ka kuasa megai menoa kitai. Kitai mega udah kelalu balat bendar disabong orang belaya. Lalu pendiau kitai Dayak mega udah kelalu udu rusak laban pengawa bansa orang ka ngerembai ka bansa enggau ugama sida iya empu. Kitai Dayak kelalu arap ka asut bansa bukai lalu nyadi ka alat bansa bukai. Arap ka semua utai tu tau berubah dalam rebak anak uchu kitai jemah ila.

Minta ampun enti jerita tu bisi ngasoh ati sakeda pembacha enda nyamai. Semua utai ti nyadi baka tu patut dijadi ka buah pelajar semua anak kitai Iban.