Jerita Dayang Laing – Indai Bunsu Bintang Banyak

Jerita Dayang Laing – Indai Bunsu Bintang Banyak

Dulu kalia leboh dunya tu baru udah nyadi, Petara ti pemadu bekuasa ngaga batu mas sigi ti besai ke lalu dikumbai “Tengkulas Batu Mas“. Batu mas tu diengkah iya ba tisau dunya di menoa puang kelinggi padang pasir muak ka matahari tumboh. Nyau kelama udah nya, Petara ti pemadu bekuasa lalu ngaga batu mas nya tadi bebali nyadi indu dara siko ti bajik bendar gamal. Mata enggau kulit iya nyau berperenching baka tekang mas. Indu dara tu lalu digaga ka iya nama Dayang Laing.

Nyadi pendiau Dayang Laing tu sunyi bendar laban ti diengkah ka Petara di tisau dunya puang kelinggi padang pasir ka bedau diwan mensia siko. Pengidup Dayang Laing tu tadi nyamai bendar laban semua pemakai enggau perengka ti dikena iya ngidup ka diri ba ujong tunjok iya magang di beri Petara ti ngaga iya. Nyau kelama iya udah idup kediri bakanya, iya pan nyau dara bendar lalu manggai ba umor ti udah tau ngadu ka ruang bilik diri empu. Dayang Laing tu pan nyau tusah bendar ati amat ga semua utai ti dikadeka ka iya kena ngidup ka diri lantang bendar iya bulih. Kebuah iya tusah bendar ati laban iya nadai nemu siko mensia semak menoa nya ti tau enggau iya begulai sajalai.

Nyau kepuas iya berunding nat ka penusah ati ti sunyi nadai orang enggau besulu, dia iya lalu berengkah bertundi bermain enggau Bunsu Ribut ti bepuput mansa menoa nya dia. Nyau kelama udah nya, tundi serta main Dayang Laing enggau Bunsu Ribut tu nyau nyadi leman ti ngasoh Dayang Laing nyau berasai betuboh bisi. Nyepi diri ka betuboh bisi bakanya, Dayang Laing pan berasai lantang ati laban ngenang diri ka deka bisi orang enggau begulai di menoa puang nya. Leboh nyau datai maia iya ti beranak, iya pan lalu ngada ka anak indu tujoh iko diri menyadi ti bajik bendar gamal.

Anak Dayang Laing enggau Bunsu Ribut tu tadi deras bendar mansang. Indai sida rindu bendar ka semua sida menyadi lalu pendiau iya pan enda mega sunyi baka ka ti udah. Tang pengalantang Dayang Laing tu enda lama laban apai iya Petara ti pemadu bekuasa ringat bendar ati meda ulah serta leman Dayang Laing seduai Bunsu Ribut tu tadi. Petara lalu ngukum Dayang Laing seduai Bunsu Ribut lalu ngasoh Bunsu Ribut muput ka anak seduai ka kebong langit. Sabedau Bunsu Ribut ngangkat ka diri bepuput, Petara lalu nangkal iya enggau jako ngasoh Bunsu Ribut ngudi mali menoa orang ti bisi ditemu iya jadi salah. Nya kebuah kitai iban enggai jadi salah, enggai ka ngudi ai ngudi menoa enti enda diadu enggau tusun adat jadi salah. Dayang Laing lalu digaga ka Petara sigi tajau ka dikumbai Sakuntum Indu Benda, Kelawah Besai Moa. Nyadi tajau tu, taja iya mit tang di dalam iya tau endor diau baka ka diau dalam istana raja. Tajau tu diengkah ka Petara di sabuah langkau ba tisi padang pasir ti besai. Enggai ka Dayang Laing selalu pansut ari langkau dia Apai iya Petara lalu ngaga sapasang Burung Geruna nginau menoa nya. Burong Geruna tu beridup ari dagin jelu tauka mensia ti bisi semak menoa nya dia.“Nyadi sapa pungka anak lelaki ka berani, sikar serta pintar tebunuh ka Burung Geruna nya ila, nya baru tau jadi enggau nuan,” ko Apai iya Petara madah ngagai Dayang Laing.

Abis jako tangkal Petara, Bunsu Ribut pan lalu berengkah bepuput nyerara ka Dayang Laing ari anak iya tujoh iko diri menyadi lalu mai sida tujoh iko nya ka kebong langit nitih ka ukum Petara. Sida menyadi enggau indai sida lalu sama nyabak leboh ti deka berserara. Bunsu Ribut pan begadai-gadai ngangkat sida menyadi tujoh iko nya tadi lalu dikemata ka indai sida ari dunya baroh tu sampai sida menyadi nyau nyadi Bintang Banyak tauka Bintang Tujoh (Pleiades). Gamal sida berparenching serta berkijap-kijap, tinggi serta tampak bendar. Sida menyadi duduk berimbai enggau diri sama diri indah enda baka ripih sida ka betunga makai enggau indai sida leboh ka agi di dunya tu.

Barengkah ari nya, pendiau Dayang Laing lalu bebali berasai sunyi baru laban ti ditinggal ka bala anak iya. Iya seruran bersampi ngagai apai iya minta diri ulih nemuai kalangit batemu enggau bala anak iya. Laban ukum Petara tu endang bisa, nya ti ngujong ka iya enda ulih batemu enggau bala anak iya di langit din. Tiap tiap malam iya nengkadah meda ka penunga pejalai bala anak iya dilangit enggau ati ti rindu serta sinu lalengau sampai ka iya nyau leju lalu ngantok tindok.

Abu Tinggang

Rambau maia nya kelia di dunya tu, bisi lelaki siko ti tampak nama serta jelai bendar berita benama Abu Tinggang. Iya tu anak Petara Semarugah (Petara ti nguasa Tanah). Nyadi pengawa iya tu nagang menoa kudi menoa bebali ti selalu bendar nyadi. Iya terit bendar bejalai ka adat ti baka tu serta ngajar mensia nitih ka pantang ti betul, lebih agi enda ngasoh orang ngelanggar adat jadi salah.

Nyadi sekali Abu Tinggang enggau bala anembiak iya berunding deka nubai sungai siti ti maioh bendar ikan ba menoa sida dia. Ninga berita sida Abu Tinggang enggau bala iya deka nubai, dia Bunsu Raong lalu tusah bendar ati laban iya endang enda setuju ka ikan dibunoh ngena jalai kasar baka nya. Iya lalu nesau semua bala raong di menoa nya ngenggok enggau naka pengingar siang malam, awak ka semua menoa sida dia inggar richah nadai didinga utai.

Nyau puas ninga bunyi nyawa raong ngenggok ngingar nya, Abu Tinggang lalu bejalai ngiga siko ari sida raong ka bebunyi nya tadi lalu nanya ka nama kebuah sida iya richah serta inggar ngenyadi nya. Raong nya tadi lalu ngasoh Abu Tinggang betemu enggau tuai sida Bunsu Raong enti iya deka nemu kebuah sida ngenggok ngemendar nya sampai nadai didinga utai.

Abu Tinggang lalu bejalai ngagai rumah Bunsu Raong nanya ka kebuah sida bebunyi ngingar nya enda badu-badu.

“Nyadi pengawa kami ka ngingarnya enda badu-badu dikena kami mandang ka diri ngengai serta enda setuju ka nuan ti deka mai bala anembiak nuan nubai ikan di menoa kitai ditu. Enti nuan ngerja pengawa tu, nuan ukai semina munoh ikan ti besai tang mega masau sida ka agi mit serta ngerusak pendiau enggau pengidup orang bukai ti bepangai ba sungai kitai di menoa tu. Nya alai enti nuan deka nangkap ikan ka dempa kita, manah agi enti nuan nambit pintu langit awak ka ujan enda labuh ka dunya tu lalu sungai tau nyadi langkang. Ari nya kita tau milih ikan ti besai di tangkap lalu neju ka sida ti agi mit mansang besai awak ka bisi ditapat ka anak uchu kita jemah ila,” ko Bunsu Raong bejako enggau Abu Tinggang.

“Amat bendar utai ti ko nuan nya tadi, aya,” ko Abu Tinggang nyaut Bunsu Raong. “Tang kati ko runding nuan jalai aku tau nutup pintu langit nya deh aya,” ko Abu Tinggang nanya Bunsu Raong.

“Samina Sera Gindit tau ngerja pengawa nya, laban iya siko aja diasoh Petara megai kunchi pintu langit,” ko Bunsu Raong madah ngagai Abu Tinggang.

“Tang enti nuan deka ngagai iya, nuan enda tau enda mai daun nyiur dikena nuan nanggam pintu nya rapit enti iya udah di tutup ila,” ko Bunsu Raong ngajar Abu Tinggang.

“Enti bakanya, enda nyadi kami nubai di menoa kitai ditu, aya” ko Abu Tinggang nganu Bunsu Raong ke lalu nesau bala iya ngasoh sida iya ngetu ingar ngenggok.

Udah Abu Tinggang nusoi randau seduai Bunsu Raong ngagai bala anembiak iya, dia Abu Tinggang lalu beradu deka bejalai ngagai rumah Sera Gindit di langit din. Agi tumu bendar pagi siti, Abu Tinggang lalu bejalai ngejang ka menoa sida nuju menoa Sera Gindit. Sekumbang iya ka bejalai tu, iya endang nadai mansa utai bukai, semina tak nengah menoa padang pasir ti besai serta puang nadai utai tumboh. Enti leboh malam hari iya ngiga tanah ti lengkap alai iya gali nindok ka diri. Laban menoa tu ti udu angat, iya tindok enda bepua. Semina leboh maia dini hari dalam baru bisi berasai chelap sepi iya.

Nyau kelama iya ti udah bejalai, iya pan datai ba menoa ka bisi tumboh rumput enggau nyior mimit. Peda iya buah nyior lebat bendar. Laban ti udah aus bendar leboh ka nengah padang pasir dia iya lalu niki nyior sakayu ngambi buah puda ka diirup. Udah chukup tandan nyior diketas iya, dia iya lalu berengkah berati ka rampa menoa ari puchok nyior nya tadi. Nyau kepuas iya merening menoa nya dia, iya pan lalu tepeda ka sabuah langkau ti mit enda jauh ari nya. Udah iya berati ka penunga langkau nya tadi, iya pan lalu nurun ari puchok nyior serta datai iya di baroh dia iya lalu berengkah ngupas buah nyior ka diirup serta ka diempa.

Udah ka ngetu enda lama ba pun nyior nya tadi, Abu Tinggang pan lalu berengkah bejalai begadai-gadai nuju langkau ti di peda iya tadi. Datai iya ba tengah laman langkau nya, iya tak nadai meda tauka ninga mensia siko bebunyi semak tauka ari dalam langkau nya tadi. Leboh ka bediri di tengah laman nya tadi dia iya pan bisi tepeda ka batu perunsut siti ti udah bekau dikena orang mandi. Meda nya, iya pan lalu ngangau, “Hoi, jadi rumah kita tu?” ari luar. Bisi tiga kali iya ngangau, tang nadai disaut orang sekali.

Meda orang nadai nyaut, Abu Tinggang lalu niki masok begadai-gadai. Di dalam langkau nya peda iya tak puang nadai utai semina tajau sigi ti dipeda iya duduk dugau-dugau ba telok dinding. Kepuas iya ka segau-segau dalam langkau, meda orang tak nadai siko, dia iya lalu betati deka ngebak ka tudong tajau ka duggau-dugau tisi dinding. Leboh iya ngebak ka tudong tajau nya, dia iya lalu tekenyit lalu linsau meda perenching panchar utai nyau liau-liau pansut ari dalam tajau nya. Enda berasai kaki iya nyurut ka diri ari kena panchar utai dalam tajau nya tadi, laban iya sigi endang orang ti sikar. Nyau udah enda berasai kesal agi, nya baru iya mansang baru ngagai moa tajau nya tadi lalu nilik ka dalam. Dia iya lalu tapeda ka indu siko belalai dalam nyin. Kulit indu nya nyau berperenching baka panchar bintang di langit din.

Lama Abu Tinggang tagenong bayam pemajik gamal indu nya tadi baru iya berengkah ngangkat ka iya pansut ari moa tajau nya tadi. Udah indu nya pansut ari tajau, Abu Tinggang lalu nanya ka sapa nama indu nya. Indu nya lalu nyaut, ko iya, “aku tu Dayang Laing, lalu aku diau kediri di menoa tu.”

Abu Tinggang lalu madah ka iya, “nuan enda patut diau kadiri di menoa puang baka tu, nuan patut mindah ngagai menoa bukai ngiga orang enggau begulai.”

Dayang Laing lalu nusoi jerita iya empu berengkah ari iya ka digaga Petara Apai iya, Allah Taala, ari tengkulas batu mas datai ka iya ka ngada ka Bintang Banyak begulai enggau Bunsu Ribut. Leboh Abu Tinggang ninga tu, iya lalu nanya ka penyadi enggau penunga bala anak iya diatu.

“Diatu semua sida udah dikebu ka apai sida pulai ka langit lalu nyadi Bintang Banyak. Semua sida tujuh iko diri menyadi tu diasoh Petara Apai iya nyadi ka tanda di langit din. Nya alai enti pejalai sida dipeda ba senentang kebong langit din leboh maia dini hari dalam, nya meh maia anak mensia di dunya tu patut ngelabuh ka benih sida. Enti anak mensia ngelabuh ka benih laun ari maia tu, padi sida deka rusak tauka enda nyadi,” pia ko Dayang Laing nusoi jerita diri ngagai Abu Tinggang.

Nyau kepuas seduai ka berandau enggau pangan diri, Abu Tinggang lalu nanya Dayang Laing enti iya deka jadi enggau Abu Tinggang.

“Aku endang deka jadi enggau sapa orang ka bisi datai ngagai menoa aku tu ditu lalu ulih mai aku pansut ari menoa tu,” ko Dayang Laing. Ninga saut Dayang Laing munyi nya, Abu Tinggang lalu gaga bendar ati laban ti udah tetemu ka indu ti bajik gamal serta ka peransang ati anak lelaki baka nya. Iya lalu bersemaia ngiga jalai mai Dayang Laing ninggal ka menoa nya.

Abu Tinggang lalu berengkah berunding ka cara ngelaban serta munoh Burung Geruna ti ka di padah ka Dayang Laing ngagai iya. Langkau seduai iya lalu di kuta Abu Tinggang ngena batang kayu ti tegap serta lalu dilamun enggau batang pisang ti maioh. Kuta seduai chukup penebal serta chukup penegap lalu enda ulih di kusai ka ngapa.

Baru udah tembu kuta seduai iya pagi nya, agi jauh dinga udah bergeneram munyi guntur Burung Geruna mansang datai. Abu Tinggang lalu ngansah nyabur iya serta ngasoh Dayang Laing belalai dalam tajau Sekuntum Indu Benda, Kelawah Besai Moa. Nyabur pan udah tembu diansah, Burung Geruna nya pan datai lalu nginau kuta seduai nya tadi. Dinga nyawa iya nyau ngikik munyi ngitar, kebab sayap nyau makin inggar. Maia nya Abu Tinggang lalu engkechit ngagai puchuk kuta lalu manjong awak ka Burung Geruna tapeda ka iya.

Sareta tapeda ka Abu Tinggang di puchuk kuta, Burung Geruna lalu enggau nyawa serta kebab sayap ti inggar bendar lalu beputar ari iya ka ngindang ngadap ngagai alai Abu Tinggang ka bediri. Endang enda kakang agi, Burung Geruna nya tadi lalu muai diri ari langit lalu ngelayang deka nyambar Abu Tinggang ka bediri atas kuta. Abu Tinggang endang enda nginsit nganti Burung Geruna nya nyau udah chukup semak ba ati iya. Menoa nyau ayong leboh Burung Geruna nya nyau makin semak. Bubun pala Abu Tinggang pan nyau berasai chelap kena tiup sayap Burung Geruna nya. Nyau udah deka tarengkah ba iya kenu ko gamal Burung Geruna nya tadi, nya baru iya engkechit muai diri ngagai tisau kuta. Kaki Burung Geruna nya tadi lalu mintih puchuk kuta nya. Nyau ka abis batang kayu tepelanting dikesai ka iya empa pemalat sambar Burung Geruna nya tadi. Udah abis lapis lumpung kayu besai kena sambar ka Burung Geruna nya tadi, dia patok, kukut kaki enggau tada iya ti tajam bendar lalu terunjam bebalut ba batang pisang. Ketik ka iya enda ga ulih. Ensepi diri lekat baka nya, iya pan ruik-ruik munyi ka ngebus ka langit, engkasak nguji deka ngelepas ka diri. Balat agi iya mengkasak balat agi ga iya lekat sampai sayap iya nyau enda tentu ulih engkebab agi.

Nyau lelak serta enda bedaya agi Burung Geruna nya tadi deka ngelepas ka diri dikemata ka Abu Tinggang, iya pan lalu mansut ka diri ari endor iya ka belalai. Burung Geruna nya tadi lalu dipantap iya enggau nyabur ba pun pegu. Nyau bakasebun batang kayu enggau batang pisang ka endor burung nya lekat tepalanting lebuh iya ngesai ka diri bedanjar deka mati.

Sekumbang Abu Tinggang tu ka belaban enggau Burung Geruna nya tadi, Dayang Laing endang selalu nilik ari moa tajau ka endor iya belalai tu tadi. Dia iya endang enda engkesap mata meda pemintar, penyikar, pemerani serta pengering Abu Tinggang tu tadi. Ari chara pengawa Abu Tinggang tu ka belaban enggau Burung Geruna, Dayang Laing endang nemu dalam ati iya din, “Abu Tinggang tu tentu ukai orang sengapa pia tang turun orang ti dipebasa ka serta orang ti bepangkat berani.” Pengrindu iya ka Abu Tinggang pan nyau makin betambah.

Udah tembu munoh Burung Geruna nya tadi Abu Tinggang lalu beguai mai Dayang Laing nitih ka iya pulai ngagai menoa sida Abu Tinggang takut ka pangan Burung Geruna nya datai lalu pia mega bangkai Burung Geruna ti udah mati nya nyau berengkah buot. Serta Dayang Laing setuju nitih ka Abu Tinggang pulai seduai pan lalu enda betanggoh agi, lalu barengkah nyendia ka diri mupok pagi siti.

Apin tentu lama seduai udah ngejang ka langkau, dia seduai lalu ninga sayap Burung Geruna, pasang iya ke udah mati dibunuh Abu Tinggang, kebab-kebab datai terbai ari jauh. Tanah nyau berenyang kena tiup sayap burung nya ti deras bendar nachar terbai nuju langkau ti udah ditinggal ka seduai. Abu Tinggang lalu mai bini iya belalai ba lubang batu ti enda jauh ari nya, laban kulit iya ti beperenching lalu tampak dipeda. Baru udah ngelalai ka diri seduai tu tadi, Burung Geruna nya pan mansa ari atas seduai. Nyau ayung langit empa pamesai sayap iya ka terbai. Burung nya tadi lalu ngindang enda lama lalu ingap atas langkau ka ditinggal ka seduai.

Ari moa lubang batu nya, seduai ngemata ka ulah pasang Burung Geruna nya tadi. Burung nya dipeda seduai tak ngenong meda bangkai pangan iya serta meda pemalat kuta ti udah tebarunsai bekau kesai ka pasang iya bedanjar mati. Lama iya duduk dia enda bemunyi. Mata iya gining-gining merening utai kiba-kanan ngiga orang ka munoh pasang iya nya tadi. Nyau kelama udah nya, iya pan lalu ngesai ka diri angkat terbai kabukai.

Serta burung nya nadai agi dipeda, Abu Tinggang seduai Dayang Laing pan angkat ari nya. Seduai iya bejalai siang malam. Nyau kelama seduai udah bejalai, seduai pan lalu datai di menoa sida iya empu.

Lemai nya udah kemas tembu makai Abu Tinggang pan lalu barengkah nusoi rita pejalai iya di menoa orang ngagai apai seduai indai iya. Tambah mega seduai pan bela bisi meda iya mai indu bajik siko pulai nadai temu penatai. Abu Tinggang lalu nusoi rita pejalai iya ka rembus di menoa Dayang Laing serta enggau jerita seduai ka betemu enggau pangan diri datai ka belaban enggau Burung Geruda nya ditusoi iya magang. Penatai Dayang Laing pan lalu ditusoi iya magang ngagai sida sabilik.

Nyau ka pengabis randau sida, Abu Tinggang lalu nanya ka runding apai seduai indai iya, sakali ka seduai setuju nerima Dayang Laing jadi ka menantu sida. Nyadi apai seduai indai iya, laban ka nadai kala ninga rita ka nyelai bendar munyi nya, lalu nyaut. “Nyadi kami duai indai nuan, laban tu tak baru ninga berita ditusoi nuan ngagai kami, apin tulih ka runding kena nyaut nuan pasal pengawa seduai tu. Pagi ila baru kami duai ulih madah ka nuan pemutus runding kami duai,” ko saut Petara Semarugah.

Ari siti, Petara Semarugah, lalu ngangau ka semua kaban belayan ka bekalingi pendiau enggau iya dia, ngasoh sida datai bagempuru ba ruai iya. Leboh ka bagempuru nya, udah semoa orang ka dikangau datai duduk jenuh magang, Petara Semarugah lalu bejako nusoi kebuah iya ka ngangau ka bala ngagai ruai iya kia. Iya lalu nusoi pengawa Abu Tinggang seduai Dayang Laing serta enggau jerita seduai ka batemu enggau pangan diri ngagai bala maioh. Nya alai Semarugah lalu nanya Dayang Laing paneka iya jadi enggau anak iya Abu Tinggang lalu nguai ka iya belama-lama.

Dayang Laing lalu nyaut, ko iya,”Abu Tinggang endang sigi laki aku, lalu aku mega udah nitih ka iya kitu. Nya alai aku nadai jalai enda satuju enggau jako nuan, aya. Aku endang sigi deka nguai ka iya selama umur aku idup, amat ga kita deka narima aku ka menantu kita.”

Ninga jako Dayang Laing munyi nya tadi, Semarugah lalu madah ka diri besatuju narima Dayang Laing ka menantu iya, laban ko iya,”Kitai enda nemu tuah limpah, niat jekat ka dibai iya ari menoa jauh ngagai kitai, tauka anak-uchu turun-menurun kitai jemah ila.”

Petara Semarugah lalu ngadu ka pengawa melah pinang Abu Tinggang seduai Dayang Laing. Leboh pengawa melah pinang nya, Semarugah lalu nerang ka mensia maioh pasal adat begulai sejalai melaki bini. “Udah kitai begulai sejalai jadi diri melaki bini, kitai enda tau enda bebasa ka pangan diri sakumbang ka begulai diri sabilik. Laki tauka bini enda tau enda bebasa ka diri sama diri, samua kaban belayan baik ka ari spiak lelaki tauka spiak indu. Kitai mesti deka nelap enggau sida, lebih agi baka apai indai enggau bala mentua kitai, laban kitai jadi melaki bini tu ukai deka ka anak orang aja tang kitai mesti sedia deka betampil enggau kaban belayan orang ti enggau kitai jadi, nadai milih sapa-sapa orangnya,” ko Semarugah. “Lalu pia mega, enti orangnya deka nampil kitai, orangnya enda tau keji ka kaban belayan ka ditampil iya. Iya enda tau bebagi ati begulai enggau kaban belayan orang ti ditampil iya. Nya alai enti kita deka ngadu ka diri begulai sajalai melaki bini, kita enda tau enda belalau ka ajar aku tu laban enti kita nitih ka ajar tu, kita tau bulih idup ka lantang, menyana serta mujur dalam semua pengawa,” ko iya ngujung ka jaku iya.

Abu Tinggang seduai Dayang Laing pan lalu begulai sajalai lantang senang nitih ka niat ati apai iya Semarugah. Kelama seduai udah begulai, seduai iya lalu beranak ka anak lelaki siko ti digaga ka aki iya Semarugah nama Saliman. Lalu turun Abu Tinggang seduai Dayang Laing tu pan lalu nyadi bakatu:

1. Saliman nurun ka Semarugan
2. Semarugan nurun ka Sera Gindi
3. Sera Gindi nurun ka Sema Ugang
4. Sema Ugang nurun ka Sera Gindam
5. Sera Gindam nurun ka Sera Gindit
6. Sera Gindit nurun ka Sera Gindah
7. Sera gindah nurun ka Pateh Rasiek
8. Pateh Rasiek nurun ka Pateh Ayu
9. Pateh Ayu nurun ka Pateh Gurang & Dayang Patri

Pateh Gurang & Dayang Patri

Nyadi Pateh Gurang seduai Dayang Patri tu anak Pateh Ayu. Nyau datai ba umor ti ngangkat ka diri dara, sekali Dayang Patri enggau bala pangan iya ka sarambau umur mansang bermain dalam kampong ke enda bangat jauh ari rumah sida. Leboh iya bejalai dalam kampong nya, dia iya tapeda ka tinchin sabentuk garing-garing kena singkang iya ka bejalai. Enggau ati ti andal bendar, tinchin nya tadi lalu dijeput iya serta di bai iya pulai ambi ka ditaroh iya empu. Nyadi rita iya ka nemu tinchin nya tadi ditemu menyadi iya Pateh Gurang ari sebut raban anembiak ka enggau menyadi iya bermain. Tang laban ka endang siru enggau diri menyadi, Pateh Gurang enda iboh ka utai ti ditemu menyadi iya empu laban endang nyangka tinchin nya tinchin orang lenyau leboh ka bejalai di menoa nya dia. Iya nadai sangka ka utai nya tau pulai ka penusah.Nyadi malam nya, dia sida sabilik serta enggau orang ka diau berkelingi enggau sida di menoa nya takenyit bendar ninga munyi siko remaung ti ingar serta suah bendar negong ari tisau kampong endor Dayang Patri enggau bala iya bermain tadi. Munyi remaung nya tadi nyau makin ganas saganas. Nyadi Pateh Gurang, ninga munyi remaung ngemalat nya, bisi sangka dalam ati iya din, tentu bisi kebuah remaung nya negong ngemalat nya. Nya baru iya ingat ka tinchin ti ditemu manyadi iya dalam kampong nya siang tadi. Iya lalu irau ati ka adi indu iya laban iya nemu tinchin nya tentu Taju Remaung ti naka pemadu iya mali di tegu. Samalam-malam nya iya enda tindok ngiga runding ngadu ka menyadi iya ti udah puni taju remaung. Enti nitih ka pamedis ati iya dalam din tak adi iya nya meh dianjong ka dalam kampong kin. Tang laban Pateh Gurang tu endang tuai raban bansa menoa nya, iya enda sakali kala mantai ka jako jai serta pengaringat ati diri ngagai rakyat iya lebih agi ngagai sida sabilik. Ka Dayang Patri enggau sida sabilik nemu Pateh Gurang pedis ati ari rejat kaki iya ka bejalai kiba kanan dalam rumah. Nyau kelama iya udah berunding, dia iya tingat ka jerita aki iya Abu Tinggang ti belaban enggau burung geruda kalia. Ari nya iya lalu tulih ka runding jalai belaban enggau Remaung nya.Laban ti nemu tanggung-jawap diri ka enda tau enda ngelindung rakyat, baik ka diri sabilik tauka orang bukai, dalam semua penusah, Pateh Gurang pan lalu nesau semoa anembiak iya ti batulang ngambi batang kayu, randau enggau batang pisang digaga ka kota kena ngelalai ka Dayang Patri. Ninga tesau Pateh Gurang, dia bala anembiak serta manok sabong iya ka dapat nurun endang enda ngenong tang lalu engkechit deka enggau iya ngaga kota nya.

Udah tembu pengawa ka ngaga kota nya tadi, Pateh Gurang pan lalu ngasoh bala manok sabong iya beratur ngeram ka ipa, di lengkap enggau senjata ti tajam, dalam kota nya tadi. Dayang Patri pan lalu di anjong sida ngagai endor siti di tengah kota nya ti udah di gaga sida enggau manah serta teguh bendar.

Lemai nya serta udah Pateh Gurang enggau bala iya siap belatur ngeram ka ipa ari dalam kota, remaung pan lalu barengkah negong ari tisau kampong. Nyau jauh lemai remaung pan lalu ngetu bemunyi. Udah malam nyau jauh serta sunyi bendar lalu semua utai nadai engkeretik agi, dia remaung nya tadi nyau mansang berani. Iya lalu barengkah ngerayap begadai gadai nuju kota Pateh Gurang. Leboh iya pansut ari kampong lalu nengah babas repa, dia kerus kaki iya bisi didinga sida Pateh Gurang ari dalam kota leboh iya ka ngindik daun kayu kering tauka rau rangkai.Datai iya ba tengah laman kota nya, iya pan lalu merening panegap kota nya. Datai iya ba kaki kota nya, iya lalu enda chechamang agi lalu merejok meraka atas pagar kota lalu barengkah bersatup enggau bala manok sabong Pateh Gurang ka bejaga ba atas pagar lumpong kayu dalam kota nya. Pagar lumpong kayu serta enggau enggau bala manok sabong Pateh Gurang nya nyau abis tepalanting kena kesai ka remaung nya tadi, empa pangering-ngering bunsu remaung nya tadi. Udah abis pagar lumpong kayu nya dikesai ka iya, dia iya lalu bersatup enggau Pateh Gurang empu ti nan ba moa kota pagar pisang. Lama seduai besabong mata ngenong ngagai pangan diri. Bala manok sabong Pateh Gurang ke terpelanting tadi lalu angkat baru lalu ngelingi remaung nya ari belakang tang Pateh Gurang enda ngasoh sida ngachau remaung nya ari belakang. Bala manok sabong iya nya tadi lalu nyurut ka diri kira ngelima depa ka belakang.

Nyau kepuas seduai ka ngenong merening pangan diri, remaung nya pan nyau makin ganas saganas meda Pateh Gurang enda nginsit ari moa kota pagar pisang di tengah kota ka endor Dayang Patri belalai. Nyau nitik ai liur iya ngembau Dayang Patri di dalam tengah kota. Remaung nya pan lalu berengkah deka narekam Pateh Gurang. Tanah enggau pagar kota nyau berenyang sepi sida leboh iya ka negong serta mengkechit nerkam Pateh Gurang. Pateh Gurang endang enda engkebut nganti remaung nya laboh semak iya. Nyau angat asai kesoh seput ramaung nya sepi Pateh Gurang, nya baru iya maring ka diri ka kiba nyilat terkam remaung nya tadi. Tak betul-betul, endang utai ti dikadeka ka Pateh Gurang, indah baka Burung Geruna ka belaban enggau aki iya Abu Tinggang Kelia, remaung nya lalu tabintih ka kota pagar batang pisang lalu ngujong ka semua kukut iya lekat bebalut enggau batang pisang. Makin balat agi iya deka ngusai ka diri ari ka lekat ba batang pisang nya tadi, makin balat agi ga batang pisang nya malut iya. Iya pan lalu nguji ngigit batang pisang nya tang ngeli iya pan lalu lekat mega ba batang pisang. Remaung pan nyau lemi-salemi laban ti nyau lelak. Leboh iya nyau enda tau engkebut agi, Pateh Gurang pan enggau lantang mansang ngagai iya. Udah iya bayam gamal remaung ti lekat ba batang pisang serta ngingat ka aki iya Abu Tinggang ka belaban enggau burong Geruna iya pan lalu mumpong pala remaung nya ngena nyabur iya ti ngujong ka remaung nya parai.Nyadi semua pengawa remaung ti nyerang kota serta belaban enggau Pateh Gurang tu tadi mega dikemata ka pasang indu remaung tu ari tisau kampong. Leboh iya meda pangan iya udah mati dibunoh Pateh Gurang, iya pan lalu masok mulai ka diri lari ka dalam kampong puang kin. Iya lalu nadai anak, ti ngujong ka nadai agi remaung nguan pulau Borneo datai ka sahari tu. Remaung indu tu lalu bebali nyadi bunsu antu ti dikumbai kitai Bunsu Remaung serta lalu bekuasa bendar. Iya bisi kuasa nulong orang ngasoh orang nya berani. Orang nya dikumbai kitai ditulong Bunsu Remaung. Enti orang bisi berani ari tulong Bunsu Remaung nya parai, iya enda tau enda di lumbong ka orang di tanah ka tinggi tauka di tuchong bukit.

Nyadi empa pangering remaung leboh ka bedanjar deka ngelepas ka diri ari balut batang pisang udah ka narekam Pateh Gurang nya tadi, dia siti ari kukut kaki iya ulih ngebus ka pagar batang pisang lalu takena kaki Dayang Patri ti ngasuh kaki iya telih serta balat bendar bedarah.Nyau tawas ari, semua orang di menua nya pan lalu begau deka meda ka gamal bangkai remaung nya serta meda ka gamal pemalat kota digaga sida tekusai kena terkam remaung. Sida pan gaga bendar laban bala sida nadai bebadi balat leboh ka nan ka kota nya semina siko dua ka penat isi laban ka tepalanting kena kesai ka remaung tauka kena tinggang lumpong kayu kota.Nyadi kaki Dayang Patri ti telih nya tadi nyau kembai serta lalu barengkah burok. Nadai siko sida di menua nya ulih ngubat serta ngerai ka kaki iya. Pateh Gurang pan nyau irau bendar ati meda adi iya bakanya.Meda Dayang Patri lalu enda gerai, dia Pateh Gurang pan bisi buya jako bersemaia enggau barang sapa orang ulih ngerai ka kaki adi iya, enti orang nya deka, lalu diasoh iya jadi enggau Dayang Patri. Kira berapa hari udah nya, bisi siko dukun bansa Melayu datai ngagai menoa sida Pateh Gurang. Iya lalu minta tulong dukun nya meda ka abi kaki Dayang Patri ti udah balat bendar burok.

“Enti abi kaki iya tu enda di ubat enggau lengkas tau ngujong ka iya mati enda lama agi,” ko dukun nya bejako enggau Pateh Gurang.“Nya meh udong, enti nuan ulih ngubat serta tagerai ka iya, awak ka nuan jadi enggau iya,” ko Pateh Gurang madah ngagai iya.

“Enti orang bukai nadai tubat ka iya, deka ga aku nguji ngubat iya, nyangka ulih gerai,” ko dukun nya madah ngagai Pateh Gurang.Nyadi jako ti ngasoh dukun Melayu ngubat adi iya nya tadi balat bendar ngirau ka ati Pateh Gurang, laban dalam runding iya, enti Dayang Patri tu gerai tentu iya enda tau enda ngenatai ka janji iya lalu ngasoh Dayang Patri nya jadi enggau dukun nya serta masok ugama Islam. Tang iya nadai cara bukai ngerai ka telih adi iya nya. Pia mega nyau ngenang pengawa ka ngamendar nya ngidup ka seput menyadi diri empu leboh ka puni taju remaung laban empa penyiru ka diri sabilik, dia iya nadai runding panjai, semina deka ka adi iya nya agi idup serta gerai.Udah semua parengka dikena berubat sedia, dukun pan lalu barengkah ngubat kaki serta nuchi abi enggau ai panas nyilu kuku serta enggau penemu berubat sida Islam. Udah nya kaki Dayang Patri pan nyau belinsur gerai. Leboh iya nyau gerai bendar, Dayang Patri, nitih ka semia Pateh Gurang enggau dukun nya, dipejadi melaki bini serta lalu masok Ugama Islam. Enggau dukun tu, iya beranak ka Datu Patinggi Ayu ke lalu pindah ka Brunei lalu nurun ka Sultan Menoa Brunei serta pemesai bukai. Datu Patinggi Ayu mega beranak ka Merom Panggai ka nurun ka sakeda bansa Iban Sarawak.

10. Pateh Gurang (menyadi Dayang Patri) beranak ka Pateh Sayat,
11. Pateh Sayat beranak ka Pateh Ismail,
12. Pateh Ismail beranak ka Pateh Sulaiman,
13. Pateh Sulaiman beranak ka Pateh Menaul,
14. Pateh Menaul beranak ka Pateh Menegir,
15. Pateh Menegir beranak ka Pateh Teliang,
16. Pateh Teliang beranak ka Radin Tanjong

Radin Tanjong Enggau Anak Ada ari Ruas Buloh

Nyadi sekali Radin Tanjong nebas nebing sungai ti endor iya deka bumai. Ba menoa ka endor iya nebas nya maioh bendar madang buloh. Batang buloh di menoa nya nyau babesai. Sakeda bisi mesai batang kayu, tauka mesai rumbang puputan ti di kena orang ngamboh.Leboh iya gerup-gerup ngelaban madang buloh, dia iya bisi tadinga ka munyi nyawa anak mit kela-kela nyabak. Nyau kepuas iya mending ka tunga munyi nyawa anak mit nya, dia iya berati ka munyi sabak nya tadi tak ari dalam ruas semak iya dia. Iya alit bendar ati laban nadai kala meda utai nyelai bakanya. Iya pan lalu nyengkau buloh ti alai anak mit nya bisi bemunyi serta ngeluntang ruas nya begadai-gadai. Sekumbang iya ka mantap ruas buloh nya, nyawa anak mit ti nyabak nya seruran didinga iya berari ari. Udah tembu ngeluntang ruas nya, iya pan lalu mai ruas nya pulai ngagai bini iya ti benama Dayang Lungah di rumah.

Datai di rumah, Dayang Lungah takenyit meda ruas buloh dibai Radin Tanjong nya besai bendar lalu nanya nama guna iya enggau ruas nya. Radin Tanjong enda nyaut, tang lalu ngengkah ka ruas nya ba tisau penindok seduai dalam bilik.Malam nya leboh seduai benong jenak tindok, Dayang Lungah bisi dani kenyap laban tadinga ka munyi nyawa anak mit nya kela-kela nyabak tang apas-apas pansut ari dalam ruas nya tadi. Nyau babendar iya berati ka penatai munyi nyawa ti didinga iya nya. Iya lalu nudok ka diri serta alit bendar ati meda utai ti bemunyi nya datai ari dalam ruas ti dibai laki iya tadi. Irau deh ati iya deka nemu utai ka bebunyi didalam ruas nya, iya pan lalu nebok ruas nya begadai-gadai.

Udah kebus ruas nya, iya pan lalu nilik ka dalam lalu tapeda ka utai sigi baka telu tang besai bendar. Meda utai bakanya, iya pan melah ruas nya begadai-gadai. Telu nya tadi lalu di angkat ka iya ari dalam ruas. Kerubong telu nya tadi bisi lubang ti mit indah enda baka telu manok ti baru deka mechah. Iya lalu ngengkah ka telu nya semak endor iya ka tindok enggai ka kena indik tauka laboh.Malam ti kedua, munyi nyawa anak mit tu pan bisi ga didinga seduai baru pansut ari telu nya. Sakali tu ingar serta bejarit agi ga munyi iya ari lemai ka dulu agi. Seduai sama enda nemu chara enggau iya semina tak teju ka seduai iya baka nya laban deka meda nama penyadi enggau pengujong telu nya..

Nyau ketiga malam udah telu nya udah enggau seduai iya dia, munyi nyawa anak mit nya nyau makin ingar agi ari ka ngelamatu. Sabak anak mit tu nyau kela-kela mansang udu. Meda baka nya Dayang Lungah pan lalu ngupak telu nya begadai-gadai. Dia iya lalu gaga bendar tapeda ka anak lelaki siko mit bendar. Anak nya lalu nyabak inggar bendar baka anak mit bukai ka baru ada. Sabak anak mit nya lalu didinga orang bukai ka lalu nguang ka bilik sida Radin Tanjong laban deka nemu sapa empu anak ka nyabak nya lalu pia mega sida sarumah endang nadai nemu Dayang Lungah betuboh bisi. Dayang Lungah pan lalu nusoi ngagai sida sarumah ari ni penatai anak mit nya tadi. Anak mit nya pan lalu dijaga sida baka anak mit bukai di rumah nya..Radin Tanjong lalu ngaga ka nama anak iya nya Pateh Ambau. Turun Pateh Ambau tu baka tu:.

Pateh Ambau x Remias = Pateh Iri x Nain = Nunong x Lampai = Chaong x Lantong = Tindin “Pimpin Bragah Ngindang” x Tida = Rinda x Demong* = Kelimbang, Bundak, Klanang x Laus = Tuah x Sarong = Sieng x Laai = Busu x Jering = (Bremas, Menging, Rinda,) Uyut “Bedilang Besi” x Nangku = (Entemang, Linggir, Empari,Sendai, Nisi, Cheremi,) Pala x Renggie = Saang, Janta, Jantin, Radin,) Kelanang x Empayung = (Lanchang, Empiang, Leminang,)Uyut II x Sawat = Linggir “Mali Lebu” x Anong = (Penghulu Kinyeh,) Dayun x Penghulu Garan “Lembang Batu” = (Uyut III, Kerbau, Tupang, Cherembang,) Attat x Indoo = (Benedict Sandin, Lentie, Gerinching,) L.F.Mawar x Roslyn Pitri = Gregory Nyanggau (The Author)* .Demong tu anak tuai bansa Bukitan Paku, Saribas ti benama Entinggi ka bejulok Keti Aur Tulang X Dayun. Lima peturun ari Demong, peturun iya ka benama Uyut (Bedilang Besi) jadi enggau Nangku, peturun orang ka benama Jelenggai (ke jadi enggau Bunsu Bintang Banyak anak Dayang Laing seduai Bunsu Ribut) ti diau kira 15 peturun udah Abu Tinggang.Jelenggai enggau Bunsu Bintang Banyak

Jelenggai tu siko peturun tuai kitai Iban ka sigi berani serta rindu bendar pegi belayar ngiga nasit. Asal iya ari Pulau Sumatra lalu pengujong pendiau iya di Kalimantan Barat. Rambau nya kelia, kitai mensia agi arap bendar begiga ka nasit besai enti kitai deka kaya, raja, lantang serta senang dalam pengidup kitai. Pia mega rambau nya kelia kitai mensia ngelingi pulau Borneo tu agi arap ka mensia tau bulih nasit besai enti sida tetemu tauka ngembuan “Buah Paoh Laba” ti selalu di kenang bisi tumbuh di tengah pulau di tasik luar din. Taja pia, nadai siko orang udah di kenang tatemu ka pun Paoh Laba nya.. Nyadi Jelenggai tu, taja iya orang pemindah serta selalu belayar nitih ka kapal orang, nadai kala tetemu ka nasit ti menyana serta pendiau ti ngemantup ka ati iya. Ati iya mega keras bendar deka nguji ngiga pun Paoh Laba ti ka selalu nyadi buah kenang anak mensia..

Ari siti iya lalu berengkah nebang kayu ka ramu dikena iya ngaga perau layar ti besai bendar udah digaga sida di menoa nya. Udah tembu perau nya tadi, iya pan nyendia ka bekal serta ngiga kelasi ka berani enggau iya belayar ngelangkah tasik besai ngiga pulau ka alai Paoh Laba nya tumbuh..Tumu pagi siti, sida lalu bakejang angkat nuju menoa matahari tumboh. Kira tiga bulan sida udah belayar lantang, ninjau pulau siti ngagai pulau siti, ngetu ari menoa siti ngagai menoa siti sambil bedaja serta bejalai ngemata ka rampa pemansang enggau dagang menoa orang..

Nyadi dinihari siti leboh sida benong meraka tasik besai siti, dia sida bersatup enggau ribut pulas uchong ti besai bendar. Ai tasik ba endor pulas uchong tu mangka nyau bebuli nyadi pulas ai ti besai serta dalam bendar. Perau layar Jelenggai pan nyau bepusin baka gasing kena taban ka pulas ai bebuli nyadi nya tadi. Meda perau layar diri enda ulih di tan ka ari di telan pulas ai bakanya, Jelenggai lalu ngasoh bala kelasi iya terjun ngidup ka diri. Iya endang enda ngadang diri idup kena pangka ka pulas ai di tengah tasik besai bakanya. Leboh iya ka bepagut ba tisau perau nganti ka karam, dia iya sempat merening kiba-kanan ari atas sebun ai ka bebuli ngasing nya tadi lalu tapeda ka sabatang kayu tumbuh ti tinggi serta besai bendar enda jauh ari nya..Udah nemu tunga batang kayu nya, Jelenggai pan lalu enda chechamang agi lalu terjun ninggal ka perau layar iya ka deka di telan pulas ai nya tadi lalu nyemerai enggau naka ulih nanjak pusin ai deras nuju pun kayu ti di peda iya tadi. Datai iya di tebing pulau ka alai kayu nya tumbuh iya pan lalu bejalai napat ka kayu ti besai serta tinggi nya. Datai iya ba pun kayu nya iya pan lalu niki ngagai pun dan kayu nya ka endor iya dudok belelak serta mega ngemata ka sanentang perau iya ka ditelan pulas ai nyangka bisi bala kelasi iya ti agi idup. Kapal enggau kelasi iya pan nadai dipeda agi. Angin pulas uchong pan nadai ga agi bepuput. Ai tasik pan semina linggang gumbang dipeda begadai-gadai mangka ka tebing. Iya pan alit bendar ati..

“Ngenyampat nya ga hari beribut pulas uchong datai, ngenyampat nya ga iya badu,” ko runding Jelenggai dalam ati iya din.“Nama penyadi aku tu diau saiko-iko, saorang-orang di pulau tu,” ko ati iya bejako kadiri. “Enggai enda pan ngiga cara ngangkat ka diri ari pulau tu meh aku,” ko iya bejako kadiri..Apin bangat lama iya udah nat ka diri balelak ba dan kayu nya tadi dia iya ensepi langit tak lindong baka ka kena matahari gelana. “Enda patut tu deka kabut baru,” ko ati iya bejako kadiri. Malik iya ka atas dia iya tapeda ka siko burung ti besai bendar ngindang di langit deka ngiga dan endor ingap ba kayu ka endor Jalenggai nya tadi..

Burung nya nyau makin semak. Leboh iya deka ngadu ka diri ingap ba puchok kayu nya, dia ubon pala Jelenggai nyau berasai chelap kena tiup sayap burung nya. Udah burung nya inggap, dia Jalenggai lalu berati ka burung nya. Tada burung nya nyau mesai pah kitai mensia. Kaki iya bisi mesai batang engkabang..“Kada enda tu burung ka dikumbai orang Burung Geruna,” ko ati Jalenggai.Nyadi burung geruna tu pasang burung geruna ti udah di bunuh Abu Tinggang leboh iya ka batemu enggau Dayang Laing, indai sida Bintang Banyak dalam dua tauka tiga serak dulu ari tu..

Jalenggai pan lalu berunding deka nepan tada burung geruna nya awak ka ulih mai iya terbai ngagai tanah besai. Iya pan lalu niki begadai-gadai ngagai puchok kayu nya. Datai iya diatas din iya pan lalu bepagut ba tada burung geruna nya. Kain labong iya pan lalu dibuka iya kena iya nanchang diri ba kaki burung nya awak ka enda labuh enti burung nya udah tarebai..Laban burung geruna nya besai bendar, Jelenggai ka bepagut ba tada iya endang nadai berasai ba burong nya. Baru udah tengan niki matahari pagi nya, burung geruna nya pan angkat ngebu ka diri terbai ngagai langit tinggi atas remang. Rampa menoa nyau sedandang dipeda Jelenggai ari atas din. Burung nya pan lalu terbai ngebus ka remang. Jari Jalenggai pan nyau bisi berasai penat serta enda tentu ulih bepagut lama. Ati iya pan nyau makin rawan laban iya makin lama agi makin tinggi agi ga iya dibai burung geruna nya terbai.Nyau kelama udah nya, sepi iya tak ngelayang burung geruna nya tadi terbai ngindang. Malik iya ka baruh dia iya tapeda ka padang chapi enggau kerbau orang besai bendar.“Tentu burung geruna tu ngindang deka nyambar chapi orang ka dibaruh din,” ko ati Jelenggai. “Enti bakanya, nya meh maia aku nerjun ka diri. Tentu menua tu menua tanah besai lalu tau ka jalai aku pulai ila,” ko iya ga berunding kadiri.Enda lama seduai udah ngindang, sepi iya burung geruna nya tak lalu nerjun kadiri ari langit lalu nyambar siko chapi ti besai bendar. Ati Jelenggai naka iya ka rawan dibai burung nya terjun ari langit nyin. Serta tarengkah kaki burung geruna ba belakang chapi nya, Jelenggai pan lalu muka tanchang kain labong iya lalu maring ka diri ka tanah.

“Akai rai…..,” ko Jalenggai, leboh iya ngangkat ka diri sambil ngesai ka debu tanah padang chapi ari tubuh iya. “Nyangka apin maia aku tu mati enti baka tu!” ko dalam ati iya din sambil ngenang pemerinsa ti udah di tempoh iya dalam pejalai iya sekali tu.

Angkat iya ari nya sambil melit ka kain labong iya ba pala, iya lalu bejalai nuju rumah orang sabuah ti mit enda jauh ari tisi padang chapi nya tadi. Datai iya ba kaki tangga, iya pan lalu nanya ka penyadi rumah orang nya. Dinga iya munyi indu siko nyaut serta ngasoh iya lalu. Iya pan nuduk ka diri di ruai, laban indu nya benong berapi. Serta udah mansau asi, indu nya lalu mela iya makai.

Leboh iya udah tembu makai, seduai pan lalu barengkah berandau enggau pangan diri. Jelenggai lalu madah ka nama diri lalu nusoi penatai iya serta enggau semua penusah ti di temu iya di rantu jalai sampai ka iya rembus ba rumah indu nya. Indu nya pan lalu madah ka diri bisi enam iko diri menyadi ka benong nugal di umai.

Leboh hari nyau lemai, bala sida menyadi enam iko nya pan lalu mulai ka diri ari umai. Udah tembu babela makai lemai nya, semua sida lalu berandau enggau pangan diri. Sida menyadi lalu madah ngagai Jalenggai, “kami enam ti tuai agi ari iya tu turun tiap-tiap hari ka umai, lalu iya ka biak ka kami tu diasoh kami nyaga rumah.”

Tumu pagi tiap tiap hari, sida enam iko diri menyadi turun baka ka ngelamatu, lalu ngasoh Jalenggai enggau menyadi bunsu sida tinggal di rumah. Nyau kelama seduai udah tinggal kadiri ngerja pengawa rumah dia deh indu nya nyau bisi ngembuan pengarindu ati deka jadi enggau Jalenggai. Nyadi Jalenggai lalu bedau meri saut ngagai indu nya laban ka agi berunding nampong pejalai iya ti ngiga buah Pauh Laba, lalu enti iya jadi enggau indu tu tentu iya enda ulih mindah jauh agi. Nyau kelama udah nya baru Jalenggai madah ka ngagai indu nya iya setuju deka jadi enggau indu nya.

Lemai nya, leboh sida nyau lama udah berandau enggau pangan diri, dia adi bunsu sida lalu bejako madah ngagai aka tuai iya pasal runding seduai ti deka jadi melaki bini. Ninga jako seduai munyi nya, sida menyadi bukai iya pan lantang bendar ati. Sida menyadi lalu barengkah ngadu ka seduai jadi melaki bini. Udah tembu pengawa lemai nya, nya baru menyadi sida ka tuai madah ngagai Jalenggai nama bini iya dikumbai Bunsu Bintang Banyak.

Nyau tiga taun bumai lepas nya, seduai pan lalu beranak ka anak lelaki siko ti diberi seduai ia nama Selamuda. Iya tu anak tunggal seduai serta dikarindu ka semua sida sabilik dia. Enti leboh siang hari, seduai menyanak endang enda kala dibai orang nurun gawa di tanah tauka ngerja pengawa bukai. Lalu tiap-tiap kali sabedau bini iya turun, bini iya selalu ngelalau iya enda ngasoh iya muka tajau siti ti dikumbai tajau pengajih.

Ketarubah iya, Jalenggai endang nadai ati berunding deka muka serta nilik utai dalam tajau nya. Tang laban nyau kapuas beribun kadiri, serta mega Jalenggai tu endang orang pamindah lalu enda tentu berapa tan lama netap ka diri ba endor siti, dia ati iya lalu berasai enda nyamai nadai pengawa serta nadai orang enggau bejako tauka dipeda. Tambah mega ati iya endang seruran agi ingat ka tuju diri ka nurun pegi kelia, iya nya ngiga Buah Pauh Laba, bedau ngemuas ka ati iya. Tambah mega kenyau ari iya datai menya, iya endang bedau nemu dini menua ka endor iya sangkai leboh iya terjun ari kaki burung geruda suba. Kebuah pia laban iya nadai nemu orang bukai diau ba menua nya kalimpah ari sida bini iya menyadi. Amat mega semua utai ti dikadeka ka seduai menyanak bisi disedia ka bini iya magang, tang tuju ati Jalenggai ka pegi nya endang bedau tepantup. Iya bedau nemu pemisi utai ti di kumbai Buah Pauh Laba ti ka kenang buah mulut anak mensia enti deka idup kaya, raja, lantang enggau senang. Pengidup iya begulai enggau sida Bunsu Bintang Banyak endang bisi jalai pengaya, pengaraja, pengalantang serta panyenang ti selalu di sebut dalam leka sampi kitai mensia. Tang semua utai nya tadi di sepi iya naka seduai menyanak kadiri aja, enda dikunsi ka enggau diri sabilik, kaban belayan serta pangan bukai di menoa diri. Nya alai semua pengaya enggau pengaraja dalam dunya tu tau ngasoh kitai enda lantang enda senang enti iya semina ka empa kitai empu aja.

Ari pendiau ka madai enda nyamai asai bakanya, tambah mega ari jako lalau bini iya tiap-tiap hari, dia iya lalu barengkah sangka ka tentu bisi utai ka nyelai bendar dalam tajau nya alai tudong tajau nya enda tau di buka. Nyau kelama Jalenggai bemain enggau runding ti deka nilik utai dalam tajau nya, hari siti udah bala sida bini iya menyadi turun magang, dia iya lalu ngebak ka tudong tajau pengajih nya lalu nilik ka dalam kin.

Leboh iya nilik ka dalam mua tajau nya, dia iya takenyit bendar tak bisi meda rampa menoa di baruh din. Iya pan lalu alit bendar ati. Nya baru iya nemu kebuah nadai mensia bukai diau semak nya dia laban menua ka endor iya nya tadi di kebong langit din. Iya pan lalu terus nilik ka baruh kin ngemata ka bala anak mensia ti benong bumai, serta benong ngelabuh ka benih.

Udah bekau nya, Jalenggai pan lalu belaboh tusah ati berunding ka utai ti di peda iya tadi serta enggau pendiau sida menyanak. Ari nya tadi, moa iya barengkah bebali puchat, serta tubuh iya pan mansang lembut. Leboh maia makai lemai, dia Jalenggai seduai anak iya dipeda sama enda tentu kenyang lalu gamal seduai iya pan berupai tusah serta irau.

Meda seduai iya baka nya, Bunsu Bintang Banyak pan lalu nanya Jalenggai kebuah iya lembau makai serta berupai tusah ati. Jalenggai endang enda belalai lalu madah ka diri bisi muka serta nilik utai dalam tajau nya ngagai bini iya. Ari nya tadi iya bisi berasai lalengau ka sida di menua lalu mai bini iya Bunsu Bintang Banyak nemuai ngagai menua sida iya empu.

Ninga munyi nya, bini iya pan lalu nyabak nyedan. “Nyadi aku enggau kami menyadi tu enda tau nurun ka dunya di baruh din laban nya endang udah nyadi ukum Raja Petara leboh iya ngasoh apai kami Bunsu Ribut nyerara ka kami ari indai kami Dayang Laing menya. Aku nemu nuan, lama laun, tentu enda betah diau di langit tu agi. Nya kabuah aku selalu ngelalau nuan enda ngasoh nuan muka moa tajau nya lalu aku mega endang tentu selalu agi belala begulai enggau seduai ti endang dikarindu ka aku,” ko Bunsu Bintang Banyak madah ngagai Jalenggai.

Salemai nya leboh ka berandau, Bunsu Bintang Banyak endang seruran laboh ai mata mangku anak iya. Iya pan lalu meri ajar ngagai Jalenggai baka tu, “Nyadi pengawa kami Bintang Banyak tu ngemata ka orang bumai dalam dunya di baroh din. Leboh maia dini hari mabu lalu kami bisi di peda kita di kebong langit ari dunya din, nya tanda kita enda tau enda lalu belaboh nugal. Enti kita nugal laun ari nya tauka udah kami di peda kita lepas ari kebong langit maia dini hari dalam, umai kita deka enda nyadi lalu ngujong ka kita enda bulih padi.”

“Leboh nuan ka begulai enggau kami nuan udah meda bala menyadi aku nadai kala diau di rumah. Sida enda tau enda turun baik ka bisi tauka nadai pengawa di kerja di umai. Semina aku aja ti bisi diau, tang aku apas-apas di peda ari dunya kita laban aku ti pemadu mit ka kami diri menyadi,” ko Bunsu Bintang Banyak ngajar Jalenggai.

“Pia mega kami menyadi selalu mindah nitih ka maia enggau musim, lalu pemindah kami tau nyadi ka chuan teladan anak mensia enti deka belaboh ngerja pengawa baka pengawa umai tauka pengawa bukai,”ko Bunsu Bintang Banyak ngajar Jalenggai.

Samalam-malam nya Bunsu Bintang Banyak ngajar Jalenggai seduai anak iya chara beguna ka pejalai Bintang Banyak di langit enti deka ngerja pengawa di dunya sambil nyendia ka barang enggau bekal ka dibai seduai menyanak pulai.

Kira dinihari pagi nya, Jalenggai seduai anak iya pan beradu deka nurun. Bedau nurun, Bunsu Bintang Banyak lalu merap seduai menyanak lalu ngasoh Jalenggai seduai anak iya ngingat ka jako ajar iya. Semua sida menyadi bukai iya pan sama nitik ai mata laban ka agi belala begulai enggau seduai. Udah nya sida menyadi lalu muka mua tajau pengajih nya lalu ngulur ka seduai menyanak ari langit ngagai dunya di baruh ditu. Sekumbang ka nurun tu Jalenggai seduai anak iya seruran malik ka atas ngagai endor bala sida Bini iya nilik. Makin lama agi, jauh agi ga gamal sida tujoh iko nya sampai enda dikelala moa, semina bintang aja ka dipeda kelip-kelip manchar di kebong langit.

Datai di dunya tu, Jalenggai pan lalu nusoi pejalai diri kenyau iya ka belayar ngiga Buah Paoh Laba datai ka iya rembus di langit lalu jadi enggau Bunsu Bintang Banyak. Iya mega lalu ngajar orang bechuan ka Bintang Banyak enti deka ngerja pengawa awak ka pengawa sida nyadi. Ajar tu mengkang dititih ka bansa kitai Iban datai ka saharitu.

Selamuda (Samaluda or Meluda) & Dayang Manis Muka (Bunsu Babi)

Selamuda tu anak Jalenggai seduai Bunsu Bintang Banyak. Nyadi pendiau Selamuda enda tentu jauh bida ari pendiau apai iya menya. Iya endang seruran mindah. Semina tunga iya mindah nya lain agi ari apai iya. Apai iya deka bendar mindah belayar ngagai menoa tasik luar tang Selamuda deka bendar mindah tunga ngagai menoa kampong puang. Tambah pia, iya nadai kala ensepi pendiau baka anak orang bukai ke meruan bisi apai indai ngelapong sida. Semina leboh agi mit datai ka iya udah nemu ngati ka diri, iya endang seruran nitih ka pemindah apai iya berari-ari. Iya mega nadai penangul bemain tauka mindah begulai enggau anembiak ka sarebak enggau iya.

Datai ba umor iya ka udah tau niri ka ruang bilik diri empu, Selamuda lalu jadi enggau Bunsu Landak orang ka diau di tisau kampong puang di tengah Batang Ai Kepuas. Udah ka bebini tu, nya baru Selamuda ninggal ka apai iya nguai ngagai menoa bini iya Bunsu Landak lalu diau begulai enggau mentua iya sabilik.

Nyadi sekali, umai mentua Selamuda balat bendar rusak kena kachau babi. Meda umai diri ngemalat nya kachau babi, mentua iya pan ngasoh seduai melaki bini diau di langkau umai awak ka nyaga umai nya siang malam. Tang taja pia, kaban babi nya endang enda ngasi ka nama macham emba dikena Selamuda. Nama lemai hari, barengkah meh bala babi nya baka gerup ngelaban umai sida.Meda bakanya, Selamuda lalu nadai bekira agi. Nama malam hari lalu barengkah ngipa babi nya lalu numbuk babi nya ngena sangkoh beruak sida. Iya semina tebunoh ka dua tiga iko babi aja lalu nya apin ngasoh bala babi chengang. Meda babi nya lalu enda jera nyau makin balat, hari siti iya lalu bejalai ngelingi umai mentua iya lalu meresa penatai bala babi nya lalu ngemata ka ari ni pemansut kepala babi ka ngulu ka sida babi bukai nya kia. Udah iya nemu pemansut kepala babi nya ari bekau abi kaki iya ti besai bendar dia iya berunding deka ngena sangkoh besi mentua iya ti endang ka sabatang aja kena iya ngipa kepala babi nya. Leboh iya ngambi sangkoh nya ka rumah iya endang enda madah ka diri ngena sangkoh nya ngagai mentua iya laban iya endang nemu mentua iya tentu enda ngasoh.

Lemai siti, seduai melaki bini mela diri tumu ari lemai ka bukai, laban Selamuda deka barengkah tumu agi ngipa kepala babi lemai nya. Udah tembu makai, iya pan lalu nurun mai sangkoh besi mentua iya napat ka endor iya ngeram ka ipa semak enggau bekau pemansut Kepala babi nya tadi.Bedau tentu lama iya udah ngadu ka diri ngeram ka ipa, dinga iya nyau baka kerus bala babi datai mansang napat ka umai sida. Nyau udah abis bala anembiak iya tama ngagai umai sida mentua Selamuda, nya baru tuai sida begadai-gadai ninjau umai ari pemansut iya. Lama iya mending serta ngembau nyangka bisi anak mensia semak nya dia, tang penatai angin ba endor Selamuda nya ngipa endang udah di perati ka iya. Nya alai kepala babi nya enda tesium ka bau iya. Enda lama udah nya tadi kepala babi nya lalu deka ngemansut ka diri. Serta baru nyingkang kepala babi nya ngayan ka rusok, Selamuda lalu nikau ka sangkoh besi mentua iya nya tadi.

Sangkoh nya tadi lalu chuit-chuit kena rusok kanan babi nya. Ensepi diri udah kena tumbok sangkoh, kepala babi nya lalu nekus serta lalu manjong ngangau ka raban iya ngasoh sida nitih ka iya lari. Iya pan lalu lari naban ka sangkoh besi mentua Selamuda ti mengkang chuit-chuit ba rusok kanan iya. Meda sangkoh nya di taban ka kepala babi nya tadi, Selamuda pan lalu beguai nyidi bekau babi nya lari. Bekau darah babi nya meruan di peda iya berari-ari. Nyau kelama udah nya, iya pan lalu ngetu nyidi babi nya laban hari nyau udah petang bendar. Iya lalu tindok dalam kampong semalam malam nya. Tumu pagi siti, iya berengkah nyidi bekau babi nya tadi laban agi irau ati enggai ka dianu mentua iya enti sangkoh nya nadai temu.Nyau kelama iya udah bejalai nitih ka bekau darah babi nya tadi, iya pan rembus ba siti nanga jali besimpang tujoh. Dia iya alit bendar ati laban enda nemu ni bagi jalai ti patut di tengah. Lebuh iya agi berunding ngiga bagi jalai ti patut di titih ka, dia iya ninga munyi raban orang bejako datai ari belakang. Dia iya lalu betemu enggau orang tujoh iko ka bempu nyawa nya tadi. Selamuda lalu nanya ka pejalai sida tujoh iko nya.

“Eh….. kami tujoh iko tu manang, di pesan ka Bunsu Babi ngubat apai iya ti raya bendar sakit,” ko saut tuai sida.Ninga munyi nya, Selamuda lalu madah ka diri deka enggau sida ngabas orang ti sakit nya. Iya pan lalu nitih ka sida masok simpang jalai ka di tengah manang tujoh iko nya. Sepamanjai jalai nya Selamuda berati ka bekau teritik darah sampai ka rumah. Datai sida di tengah laman rumah, manang tujoh iko nya enda ngasoh iya niki bareta enggau sida. Ninga munyi nya, iya lalu nudok ka diri ba tisau laman rumah nya. Manang tujoh iko nya pan lalu niki ka rumah.Apin tentu lama udah nya bisi siko orang datai nurun ari rumah bejalai nuju Selamuda ka nganti di tanah.

Orang nya lalu nanya Selamuda, “Kati nuan bisi kala ngubat orang ti sakit unggal,” ko orang nya nanya iya.

“Kala ga aku dua tiga kali nguji ngubat orang sakit,” ko Selamuda nyaut.

“Enti kita ngasoh, deka ga aku nguji ngubat aya kita ka sakit din,” ko tampong jako iya.

Ninga munyi nya, orang nya tadi lalu mai Selamuda niki ka rumah, laban orang ti sakit nya beguna ka tulong ari sapa orang ka tau berubat. Leboh iya bejalai niti rumah, orang ka mai iya niki nya tadi lalu madah ngagai Selamuda,”Barang sapa orang tulih ngubat lalu ngerai ka tuai sida ti sakit, deka diasoh tuai sida jadi enggau sebarang siko ari anak indu iya tujoh iko nya,” ko orang nya bejako. Selamuda enda nyaut, laban iya ngasai ka diri udah bisi bini.

Datai Selamuda di bilik, iya pan lalu merening orang ka sakit nya. Peda iya tak enteran sangkoh chuit-chuit lekat ba dada orang nya. Nyadi semua orang bukai ka begau ngabas iya ka sakit dia tak babi magang peda iya. Nyadi bala sida manang tujoh iko nya lalu diasoh orang dulu belian ka tuai ti sakit nya tadi. Semua puchau abis sembur ka sida, leka sampi abis disebut magang lalu kaengka panemu baru ti baru udah di pelajar ka sida abis di uji ka sida magang tang lalu enda samitan enggau tuai ka sakit nya tadi. Anang ka ngasoh belinsur manah, iya ka sakit nya nyau makin inggar agi ga didinga sida nat ka pemedis diri. Kaki bala manang ka belian ngelingi iya ka sakit nya tadi selalu bendar tesangkut ba enteran sangkoh ti chuit-chuit nya, lalu nya ti ngasoh orang ka sakit nya selalu nyerauh nat ka pemedis diri.Nyadi sangkoh ka lekat ba rusok babi ka sakit nya endang kelala bendar sangkoh besi mentua iya dipeda Selamuda. “Tentu tu tuai babi ka ditumbok aku lemai kemari leboh iya ngulu ka kaban babi bukai mansang ngerusak umai mentua aku,” ko ati Selamuda dalam din. Nyau kelama udah nya Selamuda pan lalu ngasoh manang tujoh iko nya ngetu belian laban iya ka sakit nya nyau makin pedis peda iya. Meda bakanya sida manang nya lalu enda lantang ati serta mutap nyurut ka diri pulai ka ruai.Udah sida pansut ka ruai, Selamuda lalu ngasoh sida nutok entemut. Tembu entemut nya ditutok lalu disua ka sida ngagai Selamuda. Udah nya iya lalu begadai-gadai nyabut sangkuh nya ari rusok tuai babi nya tadi. Nyau jarang gamal seput babi nya leboh Selamuda nyabut sangkoh besi nya tadi. Udah sangkoh nya techabut nya baru seput tuai babi nya tadi bisi lantang agi peda iya. Lama iya enda tentu bemunyi agi nat ka pamedis udah nya. Selamuda pan lalu ngunsut abi tuai babi nya enggau entemut serta lalu ngasoh babi nya nat ka diri.

Udah tembu pengawa nya, sida babi nya sabilik pan nyau lantang bendar ati meda tuai sida nyau udah jenuh nat ka bekau ubat Selamuda nya tadi. Selamuda pan lalu mansut ka diri ari bilik lalu duduk di ruai lalu iya nemu penyakit babi nya tentu gerai.

Nyadi Selamuda, laban iya endang anak mensia, lalu maioh mega menua udah dipeda, endang selalu berati ka pengawa serta pendiau bala sida babi ka dia. Suah ulah sida dia ngalit ka ati iya, tang iya enda bemunyi semina iya berunding dalam ati diri. Iya enda geli bebuti begulai enggau sida dia. Jalai pendiau enggau pengawa sida endang sigi nyelai tauka enda sama enggau kitai mensia. Taja sida ukai mensia, tang dalam dunya jelu, sida semampai bisi jalai tauka atur pengidup ka diri empu. Nya alai semua ulah sida jelu ngelingi nya di perati ka Selamuda magang lalu tambah mega gamal sida endang suman baka mensia, taja sida ka dia jelu magang. Semina munyi sida bejako serta ketawa bisi nyelai agi ari kitai mensia laban nya endang nitih ka munyi siko-siko bansa jelu.

Tumu pagi siti dia iya lalu tama ka bilik baru nyengok tuai babi ka sakit nya tadi. Tuai babi nya pan lalu malik ngagai iya lalu tuchum lalu ketawa mimit. Iya lalu nyapa, “enti asai tu idup aku,” ko iya madah ka ngagai Selamuda. “Asai sepi aku bisi bendar udah belinsur nyamai ari ka kemari,” ko iya. “Manah meh nya aya, laban kitai endang minta diri gerai,” ko Selamuda nyaut iya. Tuai babi nya pan lalu nan ka Selamuda enda ngasoh beguai mulai ka diri.

Nyau berapa hari udah nya, tuai babi nya pan udah gerai bendar. Dia iya lalu ngasoh Selamuda milih siko anak dara iya jadi ka bini nitih ka semaia iya leboh ka balat sakit suba. Selamuda lalu milih iya ka bunsu ka sida menyadi, ti benama Dayang Manis Muka ka bini iya.

Ari Selamuda ka jadi enggau Dayang Manis Muka tu, seduai iya beranak ka anak lelaki siko ti diberi seduai nama Begeri.

Nyadi sekali leboh Begeri nya agi mit, dia aki iya bisi niri ka gawai ti besai bendar dalam menoa sida. Iya lalu ngambi semua bansa jelu, burong enggau utai ti ngerayap dalam menoa nya datai ngabang ngagai iya. Udah bala pengabang datai, sida pan lalu barengkah bebuti, betundi serta bungah enggau pangan diri. Semua sida babendar magang ngirup nyemekih serta numi pangan diri. Sida ka dia pan mabok magang, lebih agi ular sawa ka kuat agi ngirup ari sida bukai, nyau ngelingkang mabok serta balat bendar mutah. Sida ular bukai, laban ka udah sama mabuk, mai beuji-uji sapa berani nilat mutah sawa nya tadi. Sida kendawang, tedong, engkerudu, serau, untup, kengkang mau, kengkang tebu semua berani dulu nilat mutah sawa nya tadi. Nya mun ka semua sida tu nyadi ular bisa datai ka diatu. Ular bungai seduai ular merasian, laban ka dudi datai, enda ampit mutah sawa nya tadi lalu ngujong ka seduai enda bisa datai ka diatu. Ular sawa, laban mutah iya abis dempa ular bukai, nyau nyadi enda bisa agi datai ka kemaia hari tu.

Leboh udah lempus gawai, semawa lalu mutah. Ba mutah semawa, peda sida tak leka buah magang. Ari nya tadi semua jelu enggau burong ka bisi dia nemu maia musim buah udah datai laban endang baka jelu enggau burong, kia ka buah bisi, kia ka sida mindah. Maia nya mega sida iya jauh kurang ngachau umai anak mensia.

Udah abis bekau gawai, bala sida babi sarumah pan lalu ngangau ka ini manang ngasoh iya nyadi ka tuai sida begiga ka buah di sabelah kampong puang. Sida iya lalu nurun bejalai siang malam ngiga buah ka dipakai. Selamuda enggau anak iya Begeri pan sama enggau nitih ka sida.

Leboh ka baru nurun ari menoa sida, gamal bala babi nya tadi endang agi suman baka gamal kitai mensia. Leboh sida datai ba endor ka dikumbai sida Tanjong Munong, sida lalu ngalekat ka munong ba junggor sida. Lepas nya sida lalu bejalai baru nuju menoa ka dikumbai sida Sungai Tunjing. Dia sida lalu masok ka tunjing ba kaki enggau jari sida iya lalu bejalai ngena tunjing nya tadi. Pia mega dalam pejalai sida nya, sida endang napat ka menoa ka endor sida tau nukar gamal sida dulu datai ka gamal sida iya suman baka gamal babi, sabedau barengkah begiga ka buah.

Enti malam hari sida bejalai ngena mata malam, lalu enti siang hari, sida bejalai ngena mata siang. Nyadi mata malam sida tau manchar lalu dikena sida nenggau jalai ka di tengah sida naresa babas enggau kampung puang. Nya kebuah jelu tau meda leboh malam hari.

Ari siti sida datai ba tisau menoa anak mensia ka endor anak mensia nanam madang buah sida. Semua buah ka tumbuh ba endor tu lebat magang. Sida lalu barengkah naresa menoa nya makai buah ka maioh udah labuh. Sida andal bendar ati bebuti begagai enggau pangan diri sambil ngumpul tauka makai buah dia. Leboh sida benong makai buah dia, enda mukai-mukai, ini manang ka nyadi tuai sida tak kena pangka peti buloh menangkin ka ditan ka anak mensia dikena sida nyaga madang buah sida ari empa jelu. Nama deh, tudah ini manang, endang enda menyawa, lalu parai dia. Meda tuai sida udah mati, bala babi bukai pan lalu lari, tinggal ka semina sida tiga Dayang Manis Muka, Selamuda enggau Begeri agi dia.

Ba sanentang tu, Selamuda enggau Begeri, udah masok ngagai dunya kitai mensia. Dayang Manis Muka pan lalu bejako enggau Selamuda. “Semua orang ka dipeda nuan begulai enggau kitai di rumah panjai apai aku nya semua Antu Babi magang,” ko iya madah ngagai Selamuda. “Nya alai aku enda tau begulai enggau seduai lama ari tu. Aku enda tau enda pulai ngagai bansa sida apai aku baru. Pia mega seduai enda tau enda pulai ngagai bansa diri empu laban seduai tentu enda tau idup menyana dalam babas baka kami ka endang bansa babi. Tang sabedau kitai sabilik berserara, ambi ka tanda tua udah begulai lalu ka kenang mensia dudi hari ila, aku deka ngajar nuan chara ngena serta beguna ka atau babi kena nenong penyakit, nasit, tuah limpah, pengerai, penyamai, pengeraja, pengaya tauka utai bukai ti deka di tenong sida anak mensia. Semua utai ti deka di padah ka Petara ngagai nuan ulih di bacha ari gamal atau babi nya.” ko iya ngajar Selamuda.

Udah nya Dayang Manis Muka lalu merap Selamuda enggau anak seduai sabedau iya mutar ka diri nitih ka bala iya ka udah lari dulu tadi. Seduai menyanak ngemata ka iya mupok kadiri sampai ka iya nadai dipeda agi masok ka dalam kampong puang.

Ari nya tadi Selamuda lalu berunding dalam ati iya din. Dalam runding iya, udah ngasai ka utai ti nyadi ba tubuh iya, dia iya nemu semua utai ti idup bisi Petara kadiri empu magang. Lalu kitai mensia enda ulih diau baka sida jelu di dalam kampong laban tiap-tiap iko kitai mensia endang bisi tuju ati ka diri empu. Tang tiap-tiap pengidup bisi sama chura iya antara jelu enggau mensia. Iya nya, jelu enggau mensia sama bisi ngembuan atur pendiau ka diri empu masing-masing.

Kitai mensia, enti kitai deka, ulih diau begulai bekunsi ka menoa enggau bala jelu laban atur pendiau kitai enggau atur pendiau jelu ulih di adu ka kitai mensia manah ka agi awak ka kitai sama-sama mereti serta enda siga ka pangan diri. Kuasa ti tau ngadu ka kitai begulai pendiau engggau pangan diri nya endang bepanggai ba kitai mensia laban kitai mensia endang digaga Petara lebih pintar ari semua sida jelu dalam dunya tu. Tang endang udah adat digaga mensia dalam dunya tu, iya nya mensia sama mensia deh enda ulih begulai enggau pangan diri, anang agi enggau bansa jelu ka di babas. Pia mega, bansa jelu pan enda ga tau dikumbai kitai tau begulai enggau diri sama diri anang ka deka diau begulai enggau kitai mensia.

Semua utai tu tadi endang diperati ka Selamuda sekumbang iya ka diau begulai enggau antu babi di dalam kampong lalu bisi meri reti dalam pengawa ngidup ka diri di dunya tu. Iya tau nyadi ka teladan kitai mensia dalam semua pengawa kitai awak ka kitai selalu berunding ka semua utai ti ngelinggi kitai, baik ka jelu tau ka mensia, enti kitai deka ngerja pengawa kitai. Laban kitai sama begantung ba diri sama diri dalam semua utai lalu semua utai ti idup nya sama bisi Petara ka diri empu ti tau ngemedis ka kitai enti kitai enda bejimat.

Nyadi leboh Begeri udah besai, iya lalu ngajar anembiak iya atur chara bakena ka atau babi nilik nasit orng ke sakit serta pemujur pengidup siko-siko kitai mensia tauka pemujur pengawa ti dikerja anak mensia, baka bumai enggau ngayau mulau. Pengawa tu seruran agi di kena serta dititih bansa kitai Iban datai ka diatu.

Peturun Bunsu Bintang Banyak enggau Jelenggai:
Jelenggai x Bunsu Bintang Banyak = Selamuda (M) x Dayang Manis Muka (Bunsu Babi) = Begeri (M) x Senia = Busok “Tandok Raja” x Singgau = Mai (Apai Rekaya) x Jelawai = Patinggi Gurang x Pudai (f) = Patinggi Ngadan x Lamentan = Bata (F) x Sambang = Pala (F) x Entinggang = Nasa(F), Inchoh (F) *Saang(M) x Selaka = Changgai(M) Lanchang(M) Tida (F), Umoi(F) Injar, Laus, Lika, Nangku (F) x Uyut “Bedilang Besi” = Sendai(F), Pala (F) x Renggie = Kelanang (M) x Empayung = Uyut II (M) x Sawat = Linggir “Mali Lebu” x Anong = Penghulu Kinyeh, Dayun (F) x Garan “Lembang Batu” = Uyut III (M), Tupang (F), Cherembang (F), Kerbau (M), Attat (M) x Indoo = Benedict Sandin, Lentie (F), Gerinching (F), L. F. Mawar (M) x Roslyn Pitri Enau = Gregory Nyanggau (The Author)