Jerita Geruka Anak Banda Renggat 2

Jerita Geruka Anak Banda Renggat 2.

Bup kala ditulis Mary Tinggom maia taun 1920.Nyadi aku datai baru nampung jerita Geruka tu ke panjai agi.Alu nama agi deh alu berintu utai patut meh sida sabuat tadi kena bambu diri menyadi.Manok disayat,asi pulut dipansuh alu sida ia alu bersampi madah diri bambu madi,pengudahnya sida lima alu makai alu ngirup mimit ai tuak nya tadi alu udahnya sida alu berandau nguji pengering diri ko Igoh ngepun randau beruji pangan diri.Diak Mering ngasuh Igoh dulu nguji penemu diri.Diak Igoh madah au alu ia nguji penemu diri ngena nunu diri ba api.Pengudah diak Igoh ngasuh sida Mering nugung ke kayu rangkai alu ngasuh sida ia nunu tudah Igoh.Nama agi deh alu ditugong kayu rangkai ba tubuh Igoh enyau nadai dipeda tubuh Igoh laban peninggi kayu pemaioh dunjung kayu rangkai nya.Udahnya alu ditunu sida ia Igoh,enti mensia baka kitai diato meda kumbai sida ia parai angus meh tudah Igoh nya tadi.Dinga Geruka nadai ga Igoh nyeraoh minta sah,api majak mau semau,daun kayu ke idup ba tisi nya enyau layus laban daing api ngemalat nya.Diak sida sama ngenung magang laban enda kala sida meda Igoh mantai penemu diri baka nya.Enyau nyauh kediri sida sabuat tadi laban daing api kayu ke nunu tubuh Igoh enya enyau angat amai dasai sida ia.Alu nanya tudah Geruka ari jauh.
"Agi idup unggal Igoh?"diak sida ninga Igoh nyaut."Agi unggal Geruka".

Meda kenya senang meh ati sabuat tadi.Enyau ambis kayu nunu tubuh Igoh diak sida meda Igoh ngangkat kediri ari tugung kayu berapi nya.Diak sida rerangap meda tudah Igoh,tak baka selama tak rusik nadai apa nadai nadai nama tang sida terkenyit meda tubuh Igoh enyau biru cecinang baka api gas kitai enya.Diak sida meda lebuh Igoh megai kayu mesai pah tak angus kulit kayu nya.Enti Igoh megai kayu mesai lengan tak rumpung kayu nya.Diak sida terangap meda penemu Igoh.Udahnya Igoh alu duduk ba nisi karangan diak enyau majak berinsur tubuh ia bado demaram gadong,diak meda Igoh alu nyepuh kediri ba sungai diak sida meda ai senentang tubuh ia ke nyepuh nya amai baka ai engkurak ba sampau.Udah bado engkurak diak Igoh bejalai nuju sida sabuat ke nganti tadi alu madah nya aja penemu ia ko ia.Diak Igoh ngasuh Sumping ga mantai penemu ia.Enda chechamang diak Sumping alu nyangkam pun kayu ensurai ba tebing sungai Besalin ba Ulu Skrang,pun kayu ensurai endang besai,bisi lapan pemerap sereta dibelit akar kara ti besai mega,alu dijangkam ia pun kayu ensurai tadi alu dikatung ia sapiak jari kelangit diak sida nyeraoh meda pengering Sumping tadi meda akar kara enggau akar kayu ensurai kebesai nya tecabut ambis ari tanah.Nadai kekakang agi ati diak Sumping nempalong pun ensurai nya ari nya kelangit alu kekebu meruntu ngilah tuchung tapang,agi menya suah agai Skrang suah meda kara tu ba tengah kampung puang ba Batang Ulu Skrang.Keno ko niang Aya Nirau tu meh pun ensurai ditikau ke Sumping ko ia tang bebali nyadi pun kara pengudah lama kara nya beridup numpang ba batang pun kayu ensurai.Pulai agai jerita tadi diak sida ngenung magang meda pengering Sumping mega.Diak sida ngasuh Mangah ga mantai penemu.Tak ngumba penama ia Mangah meh penemu ia,dambi ia ilang tak disirap ia manah batu besai bisi ngenam pemerap tak digaga baka mensia lelaki ke megai terabai batu nya.Pengelancat ia ngukir batu nya bisi ka nglima derokok gento ambis diak batu nya tembu amai.Naka pemanah utai digaga ia.Diak bala amai gegilik pala meda pemanah ukir Mangah mega.Batu Mangah tu udah dambi bala tuai suba pengudah pemindah Mangah kelia ari menua Ulu Skrang.Batu Mangah tu agi meruan dibun bala kami nyentuk kediato.Agi ba Ulu Skrang mega Batu Mangah tu tang enda tau ditemu entabanyak ba dini endur Batu Mangah tu.Pengudahnya diak sabuat alu ngasuh Geruka mega nguji penemu ia sebedau Mering dasuh sida ia.Geruka ngemai sida ia agai Batang Skrang diak sida meda Geruka tu belanda alu niti lepong ai Batang Skrang.Tubuh ia nadai basah sereta sida terkenyit meda Geruka muka kuntau tengah lubuk mina berindik ba kayu mit mesai lengan aja ba tengah lubuk.Diak sida tak ngapo magang meda kah anak Iban bangat bepenemu baka ia nya.Meda bakanya diak Mering alu engkecit ke tengah lubuk alu ia nyelam lubuk,laban ai chiru diak sida meda Mering tu bejalai dalam ai alu Mering ngangkat ke batu bisi ngelapan pemerap alu ba sapiak sapiak jari diak Mering alu nanam kuda kuda alu sida meda Mering baka ke tindok ba dalam ai.Enyau meniga ari sida nganti Mering pansut ari ai.Udah Mering pansut ari lubuk diak sida kabukai ngenung laban pemanjai seput Mering ba dalam ai mega.Bepun ari sida sabuat nyadi tubuh belima suah mega ngayau mulau bala Sultan Brunei belah Kuching belah Nanga Saribas mega.Kayau sida sigi kayau chelap endang kayau anak agi kelia.Auk pagila aku nampung baru.